An mga Ministeryal nga Surugoon Nagbubuhat hin Birilhon nga Serbisyo

HA KONGREGASYON ha Filipos, hi apostol Pablo nagsurat: “Tikang kan Pablo ngan kan Timoteo, nga mga uripon ni Kristo Jesus, para ha ngatanan nga baraan ha Filipos nga kahiusa ni Kristo Jesus, kaupod an mga paramangno ngan mga ministeryal nga surugoon.” (Fil. 1:1) Tigamni nga gin-unabi niya an mga ministeryal nga surugoon. Matin-aw nga ini nga kalalakin-an nagbuhat hin importante nga papel ha pagbulig ha mga tigurang ha kongregasyon hito nga panahon. Ito liwat an kahimtang ha aton panahon. An mga ministeryal nga surugoon nagbubuhat hin mga serbisyo nga nabulig ha mga paramangno ngan ha maopay nga pagkaorganisar han kongregasyon.

² Kilala mo ba an mga ministeryal nga surugoon ha iyo kongregasyon? Maaram ka ba han ira ginbubuhat para ha imo kapulsanan ngan ha bug-os nga kongregasyon? An ira pangalimbasog sigurado nga ginpapabilhan ni Jehova. Hi Pablo nagsurat: “An kalalakin-an nga nag-aalagad ha maopay nga paagi nagkakaada maopay nga reputasyon ngan daku nga kagawasan ha pagyakan mahitungod han pagtoo kan Kristo Jesus.”​—1 Tim. 3:13.

KASURATANHON NGA MGA KWALIPIKASYON PARA HA MGA MINISTERYAL NGA SURUGOON

³ Ginlalaoman an mga ministeryal nga surugoon nga magin susbaranan ha Kristiano nga pagkinabuhi, magin responsable nga kalalakin-an, ngan magtuman han ira mga toka ha husto nga paagi. Klaro ini ha ginsiring ni Pablo mahitungod han ira mga kwalipikasyon ha iya surat kan Timoteo: “Sugad man, an mga ministeryal nga surugoon kinahanglan seryoso, diri malimbong an panyakan, diri nagpapatakas hin damu nga bino, diri hakog nga namimiling hin mga paagi basi makabentaha, gintitipigan an sagrado nga tinago han pagtoo nga may limpyo nga konsensya. Sugad man, sadang hira sarihan anay kon angayan hira; katapos puydi na hira magin mga ministro, kay waray naiaakusar ha ira. An mga ministeryal nga surugoon kinahanglan bana hin usa nga babaye, nangunguna hin maopay ha ira mga anak ngan ha ira kalugaringon nga panimalay.” (1 Tim. 3:8-10, 12) An pagsunod hinin hitaas nga suruklan para ha mga ministeryal nga surugoon nagpapanalipod ha kongregasyon kontra ha mga akusasyon may kalabotan ha kon ano nga klase hin kalalakin-an an gintataporan hin espesyal nga mga responsabilidad.

⁴ Batan-on man o edaran, an mga ministeryal nga surugoon aktibo ha ministeryo kada bulan. Sugad nga pagsubad kan Jesus, madasigon hira ha ministeryo. Pinaagi hito, naipapakita nira an hingyap ni Jehova nga talwason an katawohan.​—Isa. 9:7.

⁵ An mga ministeryal nga surugoon susbaranan liwat ha pamado, pag-ayos, pagyakan, disposisyon, ngan panggawi. Maopay an ira panhunahuna salit gintatahod hira han iba. Dugang pa, ginsiseryoso nira an ira relasyon kan Jehova ngan an ira mga toka ha kongregasyon.​—Tito 2:2, 6-8.

⁶ Ini nga kalalakin-an ‘nasarihan na kon angayan hira.’ Bisan antes pa hira magin mga ministeryal nga surugoon, ginpamatud-an na nira nga dedikado gud hira nga kalalakin-an. Iginpapakita nira nga prayoridad nira an mga buruhaton han Ginhadian ngan nananalinguha pagkab-ot hin bisan ano nga pribilehiyo han pag-alagad nga abrido para ha ira. Susbaranan gud hira ha kongregasyon.​—1 Tim. 3:10.

KON PAONAN-O HIRA NAGSISERBI

⁷ An mga ministeryal nga surugoon nagbubuhat hin magkalain-lain nga praktikal nga serbisyo para ha ira kabugtoan, salit an mga paramangno nagkakaada mas daku nga panahon ha ira responsabilidad nga pagtutdo ngan pag-ataman ha kongregasyon. Kon an mga ministeryal nga surugoon gintatagan hin toka, ginkukonsiderar han lawas han mga tigurang an ira tagsa-tagsa nga abilidad ngan an mga panginahanglan han kongregasyon.

⁸ Ini an pipira han ira buruhaton: An usa nga ministeryal nga surugoon mahimo itoka ha pag-asikaso ha literatura basi makakuha kita hito para ha aton personal nga paggamit ngan ha pagministeryo. An iba liwat igintutoka ha pag-asikaso han accounts han kongregasyon o mga rekord han teritoryo. An pipira igintutoka ha pagpasa han mga mikropono, pag-asikaso han sound system, pagin attendant, ngan pagbulig ha mga tigurang ha iba pa nga paagi. Daku an buruhaton ha pagmintinar han Kingdom Hall ngan pagtipig hito nga limpyo, salit agsob hangyoon an bulig han mga ministeryal nga surugoon ha pagbuhat hini.

⁹ Ha pipira nga kongregasyon, bangin posible nga magtoka hin usa nga ministeryal nga surugoon ha tagsa hini nga mga buruhaton. Ha iba nga kongregasyon, bangin damu nga buruhaton an igintutoka ha usa nga ministeryal nga surugoon. Ha pipira nga kahimtang, diri la usa nga ministeryal nga surugoon an bangin manginano ha usa nga buruhaton. Kon waray igo nga mga ministeryal nga surugoon, an lawas han mga tigurang mahimo magtoka hin susbaranan ngan bawtismado nga kalalakin-an basi manginano hinin importante nga buruhaton. Hini nga paagi, magkakaada hira eksperyensya nga magagamit kon magin kwalipikado na hira ha pagin mga ministeryal nga surugoon. Kon waray magagamit nga kabugtoan nga kalalakin-an, mahimo hangyoon an bulig han usa nga susbaranan nga bugto nga babaye para ha pipira nga buruhaton bisan kon syempre, diri hiya pipilion sugad nga ministeryal nga surugoon. An susbaranan nga bugto nga lalaki o babaye usa nga indibiduwal nga an panggawi ngan pagsingba takos subaron. Maopay hiya nga susbaranan ha regular nga pagtambong ha katirok, ha pakigbahin ha ministeryo, ha pamilya, ha pagpili hin kaliawan, ha pamado ngan pag-ayos, ngan ha iba pa.

¹⁰ Ha mga kongregasyon nga gutiay la hinduro an tigurang, mahimo hangyoon an may kapas nga mga ministeryal nga surugoon ha pagrepaso ha mga indibiduwal ha mga pakiana para ha bawtismo nga may kalabotan ha doktrina. Makikita ini ha Apendise “Bahin 1: Gintotoohan han mga Kristiano.” Tungod kay an “Bahin 2: Kristiano nga Pagkinabuhi” naghihisgot hin sensitibo nga personal nga mga butang, sadang ini dumarahon hin tigurang.

¹¹ Kon may maopay nga hinungdan, bangin mapulsanon nga burobalyoon ha panapanahon han lawas han mga tigurang an toka han mga ministeryal nga surugoon. Kondi daku an kapulsanan kon an usa nga bugto magpapabilin anay ha iya toka ha sulod hin pipira ka panahon basi magkaada hiya eksperyensya ngan magin maabtik.

¹² Depende ha kahimtang, bangin may iba pa nga responsabilidad nga mahimo itoka ha mga ministeryal nga surugoon nga an pag-uswag ‘klaro nga nakikita han ngatanan nga tawo.’ (1 Tim. 4:15) Kon waray igo nga mga tigurang, puydi tokahan an usa nga ministeryal nga surugoon nga magin asistant han paramangno han grupo o, ha pipira nga kahimtang, sugad nga surugoon han grupo, nga nagbubuhat ilarom han giya han mga tigurang. An mga ministeryal nga surugoon mahimo itoka ha pagdumara hin pipira nga bahin ha Katirok ha Pagkinabuhi Ngan Ministeryo, pati ha Pag-aram ha Biblia han Kongregasyon kon kinahanglan, ngan ha paghatag hin pahayag publiko. Mahimo ihatag an iba pa nga toka ha mga ministeryal nga surugoon kon may partikular nga panginahanglan ngan kon kwalipikado hira hito. (1 Ped. 4:10) Ha pagbulig ha mga tigurang, sadang buhaton ito hin kinaburut-on han mga ministeryal nga surugoon.

¹³ Bisan kon iba an ira buruhaton ha buruhaton han mga tigurang, bahin liwat ito han sagrado nga pag-alagad ha Dios ngan importante basi magin organisado an mga buruhaton han kongregasyon. Paglabay han panahon, kon gintutuman hin maopay han mga ministeryal nga surugoon an ira mga obligasyon ngan kwalipikado na nga magin paraataman ngan magturutdo, mahimo na hira irekomendar nga magin tigurang.

¹⁴ Kon usa ka nga bugto nga lalaki nga tin-edyer o bag-o la nga bawtismado, nagtatalinguha ka ba pagkab-ot nga magin kwalipikado nga ministeryal nga surugoon? (1 Tim. 3:1) Tungod kay damu hinduro an nakarawat han kamatuoran kada tuig, ginkikinahanglan an kwalipikado nga kalalakin-an ha pag-ataman han mga responsabilidad ha kongregasyon. Mahimo ka manalinguha pagkab-ot hito nga pribilehiyo pinaagi ha pagkultibar han hingyap ha pagbulig ha iba. Usa nga paagi ha pagbuhat hini amo an pagpamalandong han maopay nga susbaranan ni Jesus. (Mat. 20:28; Juan 4:6, 7; 13:4, 5) Mas maghihilarom an imo hingyap samtang naieksperyensyahan mo an kalipay ha paghatag. (Buh. 20:35) Salit pagboluntaryo ha paghatag hin praktikal nga bulig ha iba, pagbulig ha pagmintinar han Kingdom Hall, o pagdumara hin toka para ha estudyante ha Katirok ha Pagkinabuhi Ngan Ministeryo kon waray an gintokahan. An panalinguha ha pagkab-ot hin pribilehiyo nag-uupod liwat han pagkultibar han diosnon nga mga kalidad pinaagi ha pagkaada maopay nga rutina han personal nga pag-aram. (Sal. 1:1, 2; Gal. 5:22, 23) Dugang pa, an usa nga bugto nga lalaki nga nananalinguha pagkab-ot hin pribilehiyo nagpapakita hin pagin masasarigan ngan matataporan ha iya mga toka ha kongregasyon.​—1 Cor. 4:2.

¹⁵ An mga ministeryal nga surugoon ginpipili pinaagi han baraan nga espiritu para ha kaopayan han kongregasyon. Maipapakita han ngatanan ha kongregasyon an apresasyon ha pagkamaduruto han mga ministeryal nga surugoon pinaagi ha pagkooperar ha ira samtang nagbubuhat hira han ira mga toka. Hini nga paagi, maipapakita han kongregasyon an apresasyon ha kahikayan ni Jehova ha pagtipig hin organisado nga panimalay.​—Gal. 6:10.