Diin Mo Hiaagian an Masasarigan nga Giya?
“MAARAM ako, O Jehova, nga an paagi han tawo diri aada ha iya kalugaringon. Diri aada ha tawo nga naglalakat an pagmando han iya pitad. Tadonga ako, O Jehova.”—Jeremias 10:23, 24, NW.
Iginsurat ni Jeremias nga parasurat han Biblia iton nga mga pulong mga 25 ka siglo na an naglabay. An maraut hinduro nga kahimtang han katawohan katapos han yinukot ka mga tuig nga pagsunod ha tawhanon nga mga giya nagpapamatuod han pagkatotoo hini nga pahayag. Kondi, bangin magpakiana ka, ‘Diin hiaagian an masasarigan nga giya?’
An kasuratan nga ginkotar ha igbaw nagtutudluk ha usa ka surok han masasarigan nga giya ngan pagtugway nga labaw gud han tawo—an Maglalarang han tawo, hi Jehova nga Dios. Sigurado waray usa nga labaw nga maaram han pagkahimo han tawo ngan han iya mga panginahanglan kay ha aton Maglalarang. Kondi, interesado ba an Dios ha pagtagana ha aton han sugad nga giya ngan pagtugway? Paonan-o niya ginbubuhat ito? Praktikal ba ito para ha aton mga panahon?
Gindisenyo Basi Karawaton an Baraan nga Giya
Bantugan gud nga an siyahan nga kaibahan nga nagbubulag han tawo tikang ha mga hayop amo an hitsura, kapasidad, ngan mga buhat han utok han tawo. Ha mga hayop haros ngatanan nga buhat han utok igindisenyo ha tinatawag nga kinaiya nga kinaadman. Diri ini an kahimtang ha mga tawo.—Proberbios 30:24-28.
Diri pariho han mga utok han mga hayop, daku nga bahin han utok han tawo an waray igdisenyo hin permanente ha mga paagi nga magios an tawo ha partikular nga kahimtang. Tinagan han Dios an tawo hin abilidad han luwas nga pagbuot, nga nakakahimo ha ira ha paghimo hin intelihente nga mga desisyon ngan ipakita an hitaas nga mga kalidad, sugad han gugma, kamahinatagon, pagkadiri-hakognon, hustisya, ngan kinaadman.
Makatadonganon ba an paghunahuna nga hihimoon han Dios an tawo nga mayada han sugad nga mga kapasidad han hunahuna nga diri magtatagana hin klase han giya kon paonan-o gagamiton ito ha gimaopayi nga paagi? Tinagan han Dios hin direkta nga giya an siyahan nga mga tawo. (Genesis 2:15-17, 19; 3:8, 9) Bisan katapos nga nakasala an tawo, nagpadayon hi Jehova ha paggiya ha matinumanon nga kalalakin-an ngan kababayin-an, labi na gud pinaagi han iya kalugaringon inspirado nga Pulong, an Biblia. (Salmo 119:105) Tinutugotan hini an mga tawo nga atubangon hin malampuson an adlaw-adlaw nga mga problema ha kinabuhi samtang ginagamit nira hin maaramon an ira luwas nga pagbuot.
An Dios an Awtor han Biblia
Ano an nakakahimo han Biblia nga masasarigan nga surok han giya? Ha usa ka butang, naghahatag ito hin impormasyon nga an Maglalarang amola an makakagtagana. Iginsasaysay hito an kasaysayan han mga hitabu nga nahitabu maiha na antes pa magtikang an kinabuhi han tawo. Pananglitan, nagtatagana ito han kasaysayan kon paonan-o igin-andam an tuna ha sunod-sunod nga mga paagi tubtub nga nagin angayan ito ha pagsustini ha tawhanon nga kinabuhi. (Genesis, kapitulo 1, 2) Bisan kon iginsurat ito ha Biblia sobra 3,000 ka tuig na an naglabay, nauyon ito ha moderno sientipiko nga mga ideya.
Maiha na nga panahon antes karawaton han katawohan ha kabug-osan nga an tuna lipuyok, an Biblia nagpahayag: “Inuunat [han Dios] an amihanan dida ha hawan nga waray sulud, binibitay an tuna ha waray binibitayan.” (Job 26:7, NW) Dugang pa, iginpapahayag han Biblia nga “mayada Usa nga nag-uukoy ha kalinginan han tuna, an mga umurukoy dida sugad hin mga apan.” (Isaias 40:22, NW) An Dios la, an Maglalarang, an makakahatag hini nga mga detalye.
An abilidad han paghibaro patiuna kon ano an mahitatabu ha tidaraon diri usa ka regalo nga iginhatag ha tawo. Lugod, igintatagna han Maglalarang an tidaraon pinaagi ha mga pahina han Biblia. Gin-aghat han Dios hi propeta Isaias nga magsurat mahitungod ha Iya: “Ako an Baraan nga Usa ngan waray lain nga Dios, waray man pariho ha akon; an Usa nga nagsusumat han kataposan tikang ha tinikangan, ngan tikang ha kadaan nga mga panahon han mga butang nga diri pa nabubuhat.”—Isaias 46:9, 10, NW.
Ipinapakita han Biblia nga makakagtagna ito han kataposan tikang ha tinikangan nga may urosahon nga pagkaeksakto. Pananglitan, igintagna hito an pagbangon, kapukan, ngan an mga kinaiya han siyahan nga mga gahum ha kalibotan durante han yinukot ka mga tuig han kasaysayan han tawo. Inin makatirigamnan nga mga tagna iginsurat mga siglo antes han mga katumanan hito, ha pipira nga mga kahimtang yinukot ka mga tuig patiuna. Salit an Biblia husto nga nagtatagna han moderno nga mga hitabu, sugad man han kataposan nga resulta hito. Talagsaon liwat an Biblia tungod kay nagsusumat ito han paagi han kaluwasan durante han kabungkagan han diri-hingpit hinimo han tawo nga mga gobyerno ha Armagedon, “an girra han daku nga adlaw han Makagagahum nga Dios.” An Ginhadian han Dios ha mga kamut han iya Anak, hi Jesu-Kristo, an magtutuman hiton daku nga buhat.—Pahayag 16:14, 16; 17:9-18; Daniel, kapitulo 2, 8.
Pirme nga Mapulsanon—Diri Gud Nakakadaut
Diri-hingpit an kinaadman han tawo; salit, an tawhanon nga sagdon diri pirme mapulsanon, bisan kon bangin iginhahatag ito nga mayada magopay nga mga tuyo. Diri sugad hini an sagdon han Biblia. An Dios mismo nagsiring: “Ako, hi Jehova, . . . an Usa nga nagtututdo ha imo ha pagpahimulos ha imo kalugaringon, an Usa nga nagtututdo ha imo ha dalan nga imo paglalaktan. O kon ikaw mamamati la unta han akon mga sugo! Dida hito an imo kamurayaw masusugad han usa nga salog, ngan an imo pagkamatadong masusugad han mga balud han dagat.”—Isaias 48:17, 18, NW.
An baraan nga giya nabulig ha aton nga unahon an mga butang nga sadang unahon ngan magpabilin ha labaw nga mga birilhon ha kinabuhi. Samtang pinabubug-atan han moderno nga sosiedad an materyal nga mga nahimo ngan mga tumong, pinabubug-atan han Biblia kon mationan-o kabirilhon para ha aton nga “itutok an aton mga mata, diri ha mga butang nga nakikita, kondi ha mga butang nga diri-nakikita. Kay an mga butang nga nakikita may kataposan, kondi an mga butang nga diri-nakikita waray kataposan.” (2 Korinto 4:18, NW) Hini nga paagi naaaghat kita ha pagkaada hin gimaopayi nga mga tumong ha kinabuhi, nga amo an, espirituwal nga mga tumong may kalabutan ha pagbuhat han kaburut-on han Dios, an kataposan nga tumong amo an kinabuhi nga waray kataposan ha matadong bag-o nga sistema.
Samtang nangangalimbasug an Kristiano ha pagpadayon hinin hitaas nga mga tumong, an sagdon ha Biblia nabulig ha iya ha pagkinabuhi ha gimaopayi nga klase hin kinabuhi nga posible hinin maraut nga sistema han mga butang. An moderno nga kinaadman han tawo baga in nag-aaghat han pilosopiya han pagtrabaho hin pinakaguti ngan kumita hin pinakadaku nga suweldo. Ha luyo nga bahin, iginsusumat ha aton han Biblia nga “an usa nga nagbubuhat pinaagi han mapinasibayaon nga kamut makakablas, kondi an kamut han maduroto makakahimo ha usa nga bahandianon.” Hi apostol Pablo nagsurat ngadto ha Hebreohanon nga mga Kristiano: “Nasarig kami nga mayada namon maopay nga konsensia, nga nagtitinguha kami ha paggawi hin tangkod ha ngatanan nga mga butang.”—Proberbios 10:4, NW; Hebreo 13:18, NW.
Iginhahatag liwat han Biblia an praktikal nga sagdon ha kahikayan han pamilya. Nagtutukod ito hin espisipiko nga mga bahin han bana ngan han asawa ha kahikayan han pag-asawa, sugad man han husto nga paagi ha pagpatubo ngan pagtutdo ha mga anak. Nasiring ito: “Kinahanglan higugmaon han mga bana an ira mga asawa sugad ha ira kalugaringon nga mga lawas. . . . Ha luyo nga bahin, an asawa sadang magkaada hilarum nga pagtahud ha iya bana. Mga anak, magmasinugtanon kamo ha iyo mga ginikanan . . . Kamo, mga amay, diri niyo pag-aghaton ha kasina an iyo mga anak, kondi aghata hira ha disiplina ngan paglaygay ni Jehova.” An pagsunod ha hitaas nga sagdon han Maglalarang naamut hin daku ha karig-on ngan kalipayan han mga pamilya.—Efeso 5:21:–6:4, NW.
Usa ka Sigurado nga Tidaraon Para Hadton Nasunod ha Giya han Dios
Iginsusumat han sinurat nga Pulong han Dios an kasulbaran han Dios ha ngatanan nga mga problema han katawohan. Diri na mag-iiha kukuhaon ni Jehova nga Dios an presente nga sistema han mga butang, upod na an ngatanan nga kasakit hito, pagtalumpigos ngan mga pag-antus, ngan sasaliwnan ito han iya matadong bag-o nga sistema. Iginsasaysay ini han Biblia ha 2 Pedro 3:7-10, nagdudugang ha bersikulo 13 (NW): “Naghuhulat kita hin bag-o nga mga langit ngan hin bag-o nga tuna sumala han iya saad, ngan dida hini mag-uukoy an katadongan.” Amo ini an gimaopayi maopay nga sumat nga maihahatag ha katawohan. Amo gud ito an mensahe nga iginhahatag han Biblia ngan iginsasangyaw han mga Saksi ni Jehova ha sobra 200 nga katunaan ngan mga isla han dagat.
Kon binubuhat na an kaburut-on han Dios ha bug-os nga tuna, an bug-os nga tawhanon nga pamilya magpapahimulos pinaagi ha pagsunod ha gimaopayi nga giya han Maglalarang hito, hi Jehova. Mawawaray na an mga problema ha kakablas, krimen, ngan mga droga. An katawohan diri na sasakitan, malalagas, ngan mamamatay. An tawhanon nga pamilya babayawon ha kahingpitan nga amo an kahimtang hadto han aton siyahan nga mga ginikanan antes hira magrebelde ha giya han Dios.
Ginsusuma hin maopay han ultimo nga libro han Biblia an malipayon nga kahimtang hadton iginbutang an ira pagsarig ha baraan nga giya! An Pahayag 21:4, 5 (NW) nasiring: “Papahiron [han Dios] an ngatanan nga luha tikang ha ira mga mata, ngan mawawaray na an kamatayon, bisan kabidoan bisan pagtangis bisan kasakit pa gud. An siyahan nga mga butang nag-agi na.” Ginarantiyahan ito han aton Maglalarang, nasiring: “Kitaa! Akon ginhihimo an ngatanan nga mga butang nga bag-o.” Hiya nagdudugang: “Ini nga mga pulong matinumanon ngan totoo.”
Kon karuyag naton karawaton ini nga mga bendisyon, ano an ginlalaoman ha aton han Dios? Iginsasaysay ni apostol Pablo nga an kaburut-on han Dios amo nga “an ngatanan nga klase han mga tawo sadang maluwas ngan makadangat ha husto nga kahibaro han kamatuoran.” (1 Timoteo 2:4, NW) Kinasingkasing nga gindadapit kamo han mga Saksi ni Jehova ha pagkaada hiton husto nga kahibaro han kamatuoran pinaagi ha maopay nga pag-aram ha Biblia. Pinaagi ha mauyatom nga pag-aram ha baraan nga kaburut-on, ikaw liwat mahibabaro pinaagi ha eksperiensia nga an baraan nga kinaadman amola an masasarigan nga giya hinin peligroso nga mga panahon. An kaapurado han mga panahon naghihimo hito nga labaw nga kinahanglanon kay ha kan-o pa man nga sundon ito!