Dadayawon Mo Daw hi Jehova?
SUGAD han imo ngaran, O Dios, amo man an pagdayaw ha imo ngadto ha mga tubtuban han tuna.” Ini an mga pulong tikang ha matagnaon nga kanta han mga anak nga kalalakin-an ni Kore. (Salmo 48:10, NW) Yana nga adlaw, an gamhanan nga koro han minilyon han mga Saksi ni Jehova nagdadayaw ha Dios ngan iginpapakilala an iya ngaran pinaagi ha pagwali han maopay nga sumat han iya Ginhadian. Pinaagi ha pagbuhat hini ha 232 nga katunaan ngan mga isla han dagat ngan ha sobra 300 nga yinaknan, literal nga nakakaabut hira ha “mga tubtuban han tuna.”
Ano ito nga nagpipirit ha mga tawo han iba nga mga eksperiensia ha kultura, sosyal, ngan yinaknan ha pagdayaw kan Jehova? An ira pagpasalamat para ha husto nga kahibaro ha Pulong han Dios, an Biblia, usa ka daku nga hinungdan. An espirituwal nga kamatuoran nagtalwas ha ira tikang ha mga irihiya ngan tikang ha sugad nag-uuripon relihiyoso nga mga toloohan sugad han waray kataposan nga pagsakit. (Juan 8:32) An kamatuoran nabulig liwat ha ira ha pag-apresyar han urosahon nga mga kalidad han Dios, sugad han iya gugma, gahum, kinaadman, ngan hustisya nga tinimbangan hin kalooy. An pagsabut ha paghalad han Dios han iya bugtong nga Anak, hi Jesu-Kristo, sugad nga halad lukat para han katawohan nagpapagios ha matadong nga mga tawo nga magdayaw ngan mag-alagad kan Jehova.
Sumala han Pahayag nga libro han Biblia, an langitnon nga koro nagsisinggit: “Takus ikaw, Jehova, nga amon Dios, ha pagkarawat han himaya ngan han dungog ngan han gahum, kay imo ginbuhat an ngatanan nga mga butang, ngan tungod han imo kaburut-on nagkahihimo ngan pinanmuhat hira.” (Pahayag 4:11) An sugad nga pagdayaw diri nagreresulta tikang ha usa ka pagbati la han obligasyon. Lugod, nagtitikang ito ha pagtahod kan Jehova.
Dayawa an Dios Pinaagi ha Pagpahayag han Maopay nga Sumat
Ha pagdayaw kan Jehova, ginsusubad han usa ka tawo an gimaopayi nga susbaranan ni Jesu-Kristo, an siyahan nga magdarayaw ha Dios. An pagsunod ha mga pitad ni Jesus nag-uupod han pakiangbit ha buruhaton nga pagwali han maopay nga sumat han Ginhadian han Dios. (Mateo 4:17, 23; 24:14) Ini nga pagwali nga buruhaton amo an gidadakui bug-os kalibotan nga pangalimbasug ha pagdayaw kan Jehova.
Ini nga pagwali nga buruhaton importante gud nga matin-aw nga iginkakaw-ing ito han Biblia ha kaluwasan. An Roma 10:13-15 (NW) mababasa: “‘An ngatanan nga natawag han ngaran ni Jehova maluluwas.’ Kondi paonan-o hira matawag ha iya nga waray nira pagtoohi? Paonan-o hira matoo ha iya nga waray nira hibatii? Paonan-o hira makakabati kon waray magwawali? Paonan-o hira magwawali kon waray hira sugoa? Sugad han nahisurat: ‘Kamatahum han mga tiil hadton nagpapahayag han maopay nga sumat han magopay nga mga butang!’”
Han naglabay la nga tuig, ginamit han mga Saksi ni Jehova an sobra usa ka bilyon ka oras ha pagwali nga buruhaton. Ngan pagkamaopay nga mga resulta an inabut tikang hini nga pagdayaw ha Dios! Mga 314,000 an inupod ha koro han mga magdarayaw pinaagi ha pagpabawtismo ha tubig sugad nga simbolo han ira dedikasyon kan Jehova.
Kondi, ano an masisiring mahitungod han 12,288,917 nga tinambong ha 1994 nga Memoryal han kamatayon ni Kristo? Kaupod nira an sobra 7,000,000 nga diri pa nagdadayaw kan Jehova sugad nga mga parawali han maopay nga sumat. Kondi an ira presensia hinin importante nga okasyon mahimo nga ha kataposan magresulta ha dugang nga minilyon pa ngada ha koro han mga magdarayaw. Ano an mahihimo ha pagbulig hini nga mga interesado nga magin mga magdarayaw ni Jehova?
Andam nga Bulig
Damu nga interesado nga mga tawo an bangin naghihingyap ha pagdayaw kan Jehova kondi naabat nga diri nira mahihimo an mga kinahanglanon. Maopay nga hinumduman nira an mga pulong han salmista: “Ihahangad ko an akon mga mata ngadto ha kabukiran. Tikang diin maabut an bulig ha akon? An bulig ha akon tikang kan Jehova, an Magburuhat han langit ngan tuna.” (Salmo 121:1, 2, NW) Matin-aw, iginhangad han salmista an iya mga mata ngadto ha kabukiran han Jerusalem nga didto nahimumutang an templo ni Jehova ngan an tunan-on nga sentro han teokratiko nga gobyerno. Tikang hini husto nga makakasiring kita nga an bulig nga ginkikinahanglan ha pagdayaw ha Dios ngan ha pagpahayag han mensahe han Ginhadian naabut tikang la kan Jehova ngan ha iya organisasyon.—Salmo 3:4; Daniel 6:10.
Yana nga adlaw, adton naghihingyap ha pagdayaw kan Jehova makakalaom han mahigugmaon nga bulig tikang ha iya tunan-on nga organisasyon. Pananglitan, an mga Saksi ni Jehova nagtatanyag hin bulig pinaagi ha pagdumara hin libre nga mga pag-aram ha Biblia ha interesado nga mga tawo. Inin edukasyonal nga programa nag-uupod han labaw pa kay han paghibaro la han mga doktrina han Biblia. Nabulig ito ha estudyante nga mapatubo an apresasyon para ha iya hinbabaroan ngan para ha organisasyon nga ginagamit ni Jehova.
Uyon hini, an Saksi nga nagdudumara han pag-aram ha Biblia nangangalimbasug ha pagsiguro nga an bag-o nga hin-agian nga mga kamatuoran maisilsil diri la ha hunahuna kondi liwat ha kasingkasing. Ngan an magturutdo diri sadang maglikay ha pagpakita ha estudyante kon paonan-o ginagamit ni Jehova an Iya organisasyon ha pagtuman han Iya katuyoan dinhi ha tuna. An Bokleta nga Mga Saksi ni Jehova—Nagkakaurosa ha Pagbuhat han Kaburut-on han Dios ha Bug-os nga Kalibotan ngan an videotape nga Jehovah’s Witnesses—The Organization Behind the Name agsub nga nakakabulig ha pagtuman hini.
An Kristiano nga mga katirok mayada liwat importante nga bahin ha pagbulig ha magigin mga magdarayaw kan Jehova. Ha tinikangan gud han pag-aram ha Biblia, mahimo dapiton an estudyante nga tumambong ha Kristiano nga mga katirok. Maabut an panahon, hibabaroan niya an bili han regular nga pagtambong ngan pakigbahin ha ngatanan nga mga katirok ha kongregasyon. (Hebreo 10:24, 25) An mga paramangno makakaghatag han birilhon nga bulig ha igkasi magtinoohon ngan ha magigin mga magdarayaw kan Jehova pinaagi ha pag-andam han mga katirok nga makaparig-on ha espirituwal ngan praktikal.
Buligi an Kabataan ha Pagdayaw kan Jehova
An kabataan amo an kaupod ha damu nga mahimo magin mga magwarali han maopay nga sumat ha hirani nga tidaraon. Labi na nga an mga amay mayada Biblikal nga responsabilidad ha pagpatubo ha ira kabataan “ha disiplina ngan paglaygay ni Jehova.” (Efeso 6:4, NW) Kon husto nga ginbabansay han diosnon nga mga ginikanan, bisan gudtiay nga kabataan mahimo magpatubo han hingyap ha pagdayaw kan Jehova.
Usa ka gutiay nga bata nga babaye ha Argentina an paulit-ulit nga dinaraon ha mga tigurang ha kongregasyon ha pipira ka bulan, naghahangyo han ira bulig basi magin kalipikado hiya nga magwarali han Ginhadian. Inabut an panahon, an iya mga ginikanan ngan mga tigurang inuyon ha pagtugot ha iya nga magin diri-bawtisado nga magwarali. Epektibo nga nagpipresenta na hiya han mensahe han Ginhadian ha mga purtahan. Bisan kon inin gutiay nga bata nga babaye lima ka tuig pa la an edad ngan diri maaram ha pagbasa, iya ginmemorya an mga lugar han pipira nga mga teksto han Biblia. Katapos nga hin-aagian an usa nga kasuratan, iya ginhahangyo an tagbalay nga basahon ito, ngan iya iginsasaysay ito.
Matin-aw nga an mga tigurang ngan an mga ginikanan makakahimo hin maopay ha pagdasig ngan pagbulig hadton nag-uuswag ngada ha pagin mga magdarayaw kan Jehova.—Proberbios 3:27.
Waray Kataposan nga Relasyon kan Jehova
Kondi, anoman kon ikaw mismo nakikig-upod na ha mga Saksi ni Jehova hin pipira ka panahon kondi diri pa naupod ha ira ha pagwali nga buruhaton? Bangin mapulsanon an pagpakiana ha imo kalugaringon han masunod nga mga pakiana, ‘Natoo ba ako nga hin-agian ko na an kamatuoran ngan nga hi Jehova an amola matuod nga Dios? Kombinsido ba ako nga an Ginhadian han Dios amola an kasulbaran han mga problema han katawohan? Ginbayaan ko na ba an ngatanan buwa nga relihiyon ngan kalibotanon nga mga kustomre ngan mga buhat nga nakakapasina kan Jehova? Mayada ba ako hilarum nga gugma ha Dios ngan ha iya matadong nga mga kinahanglanon?’ (Salmo 97:10) Kon tangkod nga mababaton mo hin oo ini nga mga pakiana, ano an nakakapugong ha imo ha pagdayaw kan Jehova?—Itanding an Buhat 8:36.
An pagdayaw kan Jehova nag-uupod labaw pa han pagwali han maopay nga sumat. Kon nagkaada ka na husto nga kahibaro, nagkaada totoo nga pagtoo, ngan iginpapahiuyon na an imo kinabuhi ha baraan nga mga kinahanglanon, kinahanglan parig-onon mo an imo personal nga relasyon ha Dios. Paonan-o? Pinaagi ha paghimo hin dedikasyon ha iya ha pag-ampo ngan simbolohan ini pinaagi han bawtismo ha tubig. Nahidadabi an kinabuhi nga waray kataposan. Salit, pagbuhat na yana ha sagdon ni Jesus: “Sulud ha haligut nga ganghaan; kay halapad ngan haluag an dalan nga nagtutugway ngadto ha kabungkagan; ngan damu an nakakaagi hito; kondi haligut an ganghaan ngan masigpit an dalan nga nagtutugway ngadto ha kinabuhi, ngan gutiay la an nakakaagi hito.”—Mateo 7:13, 14, NW.
Tungod kay nagtitikahirani na an kabungkagan han presente nga sistema han mga butang, diri panahon ini ha pag-alang-alang. Pagbuhat dayon han mga pitad ngada ha waray kataposan nga relasyon kan Jehova. Tinuod, yana an panahon ha pagbaton hin positibo ha pakiana, Dadayawon mo daw hi Jehova?