Magpabilin Kamo ha “Siyudad nga Arayupan” Ngan Mabuhi!

“Hiya kinahanglan magpabilin ha iya siyudad nga arayupan tubtob ha kamatay han hitaas nga saserdote.”—NUMEROS 35:28, NW.

1. Hin-o an Naninimalos han dugo, ngan ano nga buhat an iya pagbubuhaton ha diri na maiha?

AN KAN Jehova Naninimalos han dugo, hi Jesu-Kristo, hirani na gumios. Upod an iya mga anghel, ini nga Naninimalos ha diri mag-iiha magios kontra han ngatanan nga diri-mabinasulon nga salaan-ha-dugo. Oo, hi Jesus mag-aalagad sugad nga Parapamatay han Dios durante han madagmit nga nagtitiarabot “daku nga kagol-anan.” (Mateo 24:21, 22; Isaias 26:21) An katawohan hiton nga panahon diri makakapalagiw ha mga resulta han ira sala-ha-dugo.

2. Ano an amola totoo nga lugar nga arayupan, ngan ano nga mga pakiana an nagkikinahanglan hin mga baton?

² An dalan ngadto ha katalwasan amo an hingada ha dalan ngadto ha antitipiko nga siyudad nga arayupan ngan matalwas an kinabuhi han usa! Kon karawaton ha siyudad, an usa nga naayop mahimo magpabilin didto, kay amola ito an totoo nga lugar nga arayupan. Kondi bangin maghunahuna ka, ‘Tungod kay an kadam-an ha aton waray pa gud makamatay hin bisan hin-o, tinuod ba nga salaan-ha-dugo kita? Kay ano nga hi Jesus an Naninimalos han dugo? Ano an moderno nga siyudad nga arayupan? Makakabaya ba an bisan hin-o didto nga talwas?’

Kita ba Tinuod nga Salaan-ha-Dugo?

3. Ano nga bahin han Mosaiko nga Balaud an mabulig ha aton nga makita nga binilyon nga mga tawo ha tuna an kaangbit ha sala-ha-dugo?

³ An usa nga bahin han Mosaiko nga Balaud mabulig ha aton nga makita nga an binilyon nga mga tawo ha tuna may bahin ha sala-ha-dugo. An Dios naghatag ha mga Israelita hin duha nga responsabilidad ha pagpaagay hin dugo. Kon hin-agian an usa nga ginpatay ngan an nakamatay ha iya waray-hikilal-i, kinahanglan suklon han mga hukom an kahirayo ha nakapalibot nga mga siyudad ha pagsiguro han gihiranii nga siyudad. Basi mawara an sala, an mga tigurang hito nga siyudad nga salaan-ha-dugo kinahanglan lunggoon an liog han usa ka nati, waray pa magamit nga baka nga babaye ha walog han nag-aawas nga tubig nga waray pa maarado o matamni. Ginbubuhat ini ha atubangan han Lebihanon nga mga saserdote ‘tungod kay ginpili hira ni Jehova ha paghatag hin kahusayan ha mga pagkasumpaki ha madarahog nga mga buhat.’ Ginhuhugasan han mga tigurang han siyudad an ira mga kamot ha igbaw han baka nga babaye ngan nagsiring: “An amon mga kamot waray magpaagas hini nga dugo, ngan waray an amon mga mata makakita hito. Pasayloa, O Jehova, an imo katawohan nga Israel nga imo gintubos ngan ayaw itugot nga an sala ha inosente nga dugo magpabilin ha butnga han imo katawohan nga Israel.” (Deuteronomio 21:1-9, NW) Diri karuyag ni Jehova nga an tuna han Israel mahugawan han dugo o an katawohan hito magdara han duha nga sala-ha-dugo.

4. An Babilonya nga Daku mayada ano nga rekord han pagkasalaan-ha-dugo?

⁴ Oo, mayada han usa nga butang sugad han kaangbit, o komunidad, nga sala-ha-dugo. Tagda an daku nga sala-ha-dugo han Babilonya nga Daku, an imperyo han buwa nga relihiyon ha kalibotan. Aw, hiya nahubog ha dugo han mga surogoon ni Jehova! (Pahayag 17:5, 6; 18:24) An mga relihiyon han Kakristianohan nag-aangkon nga nasunod ha Prinsipe han Kamurayawan, kondi an mga girra, relihiyoso nga mga inkisisyon, ngan makamaratay nga mga krusada naghihimo ha iya nga salaan-ha-dugo ha atubangan han Dios. (Isaias 9:6; Jeremias 2:34) Ha pagkamatuod, hiya an mayada daku nga sala para ha minilyon nga mga nagkamatay ha duha nga girra ha kalibotan hini nga siglo. Salit, an mga sumurunod han buwa nga relihiyon sugad man an mga nasuporta ngan nakikigbahin ha tawhanon nga pakig-away mga salaan-ha-dugo ha atubangan han Dios.

5. Paonan-o an iba nga mga tawo pariho han diri-tinuyo nga nakamatay ha Israel?

⁵ An iba nga mga tawo nakahimo han tinuyo nga kamatayon han mga tawo o pinaagi han kawaray-paghirot. An iba nakigbahin ha pamatay han kadam-an, bangin ginsagda han relihiyoso nga mga lider nga ini an kaburut-on han Dios. An iba nagtitimaraot pa gihapon ngan ginpapatay an mga surogoon han Dios. Kondi, bisan kon waray kita magbuhat han sugad nga mga butang, kaangbit kita ha baratunon han komunidad para ha kawara han tawhanon nga kinabuhi tungod kay diri kita maaram han balaud ngan kaburut-on han Dios. Pariho kita han diri-tinuyo nga nakamatay ‘nga nakamatay han iya igkasitawo nga diri maaram hito ngan diri napupungot ha iya hadto.’ (Deuteronomio 19:4) An sugad nga mga indibiduwal sadang mangamuyo ha Dios para han kalooy ngan sadang pumalagiw ngadto ha antitipiko nga siyudad nga arayupan. Kon diri, makamaratay nga igkikita nira an Naninimalos han dugo.

Importante nga mga Buruhaton ni Jesus

6. Kay ano nga masisiring nga hi Jesus an gihiranii nga paryente han katawohan?

⁶ Ha Israel an naninimalos han dugo amo an gihiranii nga paryente han biktima. Basi makapanimalos ha ngatanan nga pinanmatay ha tuna ngan labi na an pinanmatay nga mga surogoon ni Jehova, an Naninimalos han dugo yana nga adlaw magkakaada mga paryente nga amo an ngatanan nga katawohan. Iton nga buruhaton pagbubuhaton ni Jesu-Kristo. Natawo hiya nga usa ka hingpit nga tawo. Iginhatag ni Jesus an iya waray-sala nga kinabuhi ha kamatayon sugad nga halad lukat, ngan katapos han iya pagkabanhaw ngadto ha langit, iya iginpresenta an bili hito ha Dios para ha makasasala tikamatay nga mga tulin ni Adan. Salit hi Kristo nagin an Manlulukat han katawohan, an aton gihiranii nga paryente—an may katungod nga Naninimalos han dugo. (Roma 5:12; 6:23; Hebreo 10:12) Nakikilala hi Jesus sugad nga usa ka bugto ha iya dinihogan nga mga sumurunod han iya mga pitad. (Mateo 25:40, 45; Hebreo 2:11-17) Sugad nga langitnon nga Hadi hiya nagin an “Amay ha Kadayonan” hadton magpapahimulos tikang ha iya halad sugad nga iya tunan-on nga mga sakop. Hira mabubuhi ha waray kataposan. (Isaias 9:6, 7) Salit angayan nga ginpili ni Jehova ini nga Paryente han katawohan sugad nga an Naninimalos han dugo.

7. Sugad nga daku Hitaas nga Saserdote, ano an ginbubuhat ni Jesus para ha mga tawo?

⁷ Hi Jesus usa liwat nga waray-sala, nasarihan, maloloy-on nga Hitaas nga Saserdote. (Hebreo 4:15) Hiton nga kapasidad inaaplikar niya an bili han iya nagtutubos-ha-sala nga halad ha katawohan. An mga siyudad nga arayupan gintukod “para ha mga anak ni Israel ngan para ha dumuruong ngan para ha umurokoy ha butnga nira.” (Numeros 35:15, NW) Salit siyahan nga inaaplikar han daku Hitaas nga Saserdote an bili han iya halad ha iya dinihogan nga mga sumurunod, “an mga anak ni Israel.” Yana inaaplikar ito ha ‘mga dumuruong’ ngan ‘mga umurokoy’ ha antitipiko nga siyudad nga arayupan. Inin “iba nga mga karnero” han Ginoo Jesu-Kristo naglalaom nga mabuhi ha waray kataposan ha tuna.—Juan 10:16; Salmo 37:29, 34.

Siyudad nga Arayupan Yana nga Adlaw

8. Ano an antitipiko nga siyudad nga arayupan?

⁸ Ano an antitipiko nga siyudad nga arayupan? Diri ito usa nga lugar sugad han Hebron, nga usa han unom nga mga siyudad nga arayupan han mga Lebihanon ngan panimalay han hitaas nga saserdote han Israel. An siyudad nga arayupan yana nga adlaw amo an tagana han Dios ha pagpanalipod ha aton tikang ha kamatayon tungod ha pagtalapas ha iya sugo mahitungod han pagkabaraan han dugo. (Genesis 9:6) Tinuyo man o diri-tinuyo, an tagsa nga magtalapas hiton nga sugo kinahanglan mamiling han pagpasaylo han Dios ngan han pagwara han iya sala pinaagi ha pagtoo ha dugo han Hitaas nga Saserdote, hi Jesu-Kristo. An dinihogan nga mga Kristiano nga may langitnon nga paglaom ngan an “daku nga kadam-an” nga may tunan-on nga mga paglaom nagpapahimulos han nagtutubos-ha-sala nga halad ni Jesus ngan aada ha antitipiko nga siyudad nga arayupan.—Pahayag 7:9, 14; 1 Juan 1:7; 2:1, 2.

9. Paonan-o gintalapas ni Saulo han Tarsos an sugo han Dios mahitungod han dugo, kondi paonan-o niya ipinakita an pagbag-o han paggios?

⁹ Antes hiya nagin usa nga Kristiano, gintalapas ni apostol Pablo an sugo mahitungod han dugo. Sugad nga Saulo han Tarsos, iya gintimaraot an mga sumurunod ni Jesus ngan inuyonan pa ngani an pagpatay ha ira. “Kondi,” siring ni Pablo, “kinarawat ako hin kalooy, tungod kay ako diri maaram ngan nagbuhat ha kawaray pagtoo.” (1 Timoteo 1:13, NW; Buhat 9:1-19) Hi Saulo mayada mabinasulon nga paggios, ha urhi pinamatud-an han damu nga mga buhat han pagtoo. Kondi labaw pa han pagtoo ha lukat an ginkikinahanglan basi makasulod ha antitipiko nga siyudad nga arayupan.

10. Paonan-o nga posible an pagkaada maopay nga konsensia, ngan ano an kinahanglan buhaton ha pagpabilin hito?

¹⁰ An diri-tinuyo nga nakamatay mahimo magpabilin ha usa han mga siyudad nga arayupan han Israel kon mapapamatud-an la niya nga mayada hiya maopay nga konsensia ha Dios may kalabutan ha pagpaagay hin dugo. Basi magkaada maopay nga konsensia, kinahanglan magbuhat kita hin pagtoo ha halad ni Jesus, magbasol ha aton mga sala, ngan magbag-o ha aton mga buhat. Kinahanglan maghangyo kita hin maopay nga konsensia ha mainampoon nga dedikasyon ha Dios pinaagi kan Kristo, simbolohan ini pinaagi han bawtismo ha tubig. (1 Pedro 3:20, 21) Inin maopay nga konsensia nagtutugot ha aton nga magkaada hin maopay nga relasyon kan Jehova. An amola nga paagi ha pagpabilin han maopay nga konsensia amo an pagsunod ha mga kinahanglanon han Dios ngan magbuhat han buruhaton nga igintoka ha aton ha antitipiko nga siyudad nga arayupan, sugad la han mga naayop ha kadaan nga mga siyudad nga arayupan nga kinahanglan sumunod ha Balaud ngan tumanon an ira mga toka nga buruhaton. An importante nga buruhaton para ha katawohan ni Jehova yana nga adlaw amo an pagpahayag han mensahe han Ginhadian. (Mateo 24:14; 28:19, 20) An pagbuhat hiton nga buruhaton mabulig ha aton nga magin mapulsanon nga mga umurokoy ha siyudad nga arayupan yana.

11. Ano an kinahanglan likyan kon karuyag naton magpabilin nga talwas ha sulod han siyudad nga arayupan yana nga adlaw?

¹¹ An pagbaya ha siyudad nga arayupan yana nga adlaw amo an pagbuhayhag han aton kalugaringon ha kabungkagan, kay an Naninimalos han dugo ha diri na mag-iiha magios kontra ha ngatanan nga salaan-ha-dugo. Diri panahon ini nga hidakpan ha gawas hinin nagpapanalipod nga siyudad o ha peligroso nga lugar hirani ha tubtuban han panabsaban nga mga tuna hito. Hingangada kita ha gawas han antitipiko nga siyudad nga arayupan kon mawad-an kita hin pagtoo ha nagtutubos-ha-sala nga dugo han Hitaas nga Saserdote. (Hebreo 2:1; 6:4-6) Diri liwat kita matatalwas kon susubaron naton an kalibotanon nga mga paagi, nga natindog ha mga sidsid han organisasyon ni Jehova, o nagpapahirayo tikang ha matadong nga mga suruklan han aton langitnon nga Amay.—1 Korinto 4:4.

Nakagawas Tikang ha Siyudad nga Arayupan

12. Tubtob san-o magpapabilin ha siyudad nga arayupan an mga salaan-ha-dugo hadto?

¹² An diri-tinuyo nga nakamatay ha Israel kinahanglan magpabilin ha siyudad nga arayupan “tubtob ha kamatay han hitaas nga saserdote.” (Numeros 35:28, NW) Salit tubtob san-o kinahanglan magpabilin an mga salaan-ha-dugo ha antitipiko nga siyudad nga arayupan? Tubtob nga diri na nira kinahanglanon an mga serbisyo han Hitaas nga Saserdote, hi Jesu-Kristo. “Mahihimo liwat niya maluwas hin bug-os adton nahirani ha Dios pinaagi ha iya,” siring ni Pablo. (Hebreo 7:25, NW) Tubtob nga nagpapadayon an anoman nga mga hugaw han sala ngan daan nga sala-ha-dugo, ginkikinahanglan an mga serbisyo han Hitaas nga Saserdote basi an diri-hingpit nga mga tawo magkaada husto nga pagtindog ha Dios.

13. Hin-o an “mga anak ni Israel” yana nga adlaw, ngan tubtob san-o hira magpapabilin ha “siyudad nga arayupan”?

¹³ Hinumdumi nga an kadaan nga mga siyudad nga arayupan gintukod para ha “mga anak ni Israel,” mga dumuruong, ngan mga umurokoy tikang ha iba nga lugar. “An mga anak ni Israel” amo an espirituwal nga mga Israelita. (Galasia 6:16) Kinahanglan magpabilin hira ha antitipiko nga siyudad nga arayupan tubtob nga hira buhi ha tuna. Kay ano? Tungod kay hira aada pa ha diri-hingpit nga unod ngan salit nagkikinahanglan han nagtutubos nga bili han ira langitnon Hitaas nga Saserdote. Kondi kon inin dinihogan nga mga Kristiano mamatay ngan mabanhaw ha espiritu ha langit, diri na hira magkikinahanglan han nagtutubos nga mga serbisyo han Hitaas nga Saserdote; babayaan nira ha kadayonan an unod ngan diri na magigin salaan-ha-dugo nga mga tawo. Ha sugad binanhaw nga mga dinihogan, an Hitaas nga Saserdote mamamatay ha nagtutubos, nagpapanalipod nga kapasidad.

14. Ano pa an ginkikinahanglan nga adton mayada langitnon nga mga paglaom nagpapabilin yana ha siyudad nga arayupan yana nga adlaw?

¹⁴ An pagkaada tawhanon nga kinaiya nagkikinahanglan nga adton magigin langitnon nga “kaupod nga mga manurunod ni Kristo” magpabilin ha antitipiko nga siyudad nga arayupan, tubtob nga matinumanon nga matapos nira an ira tunan-on nga kurso ha kamatayon. Kon hira mamatay, ira ighahalad an tawhanon nga kinaiya ha kadayonan. (Roma 8:17; Pahayag 2:10) An halad ni Jesus naaplikar la ngada hadton mayada tawhanon nga kinaiya. Salit, an Hitaas nga Saserdote namamatay ngada hadton han espirituwal nga Israel kon hira banhawon na sugad nga espiritu nga mga linarang nga mag-uukoy ha kadayonan ha langit sugad nga “mga umarangbit ha baraan nga kinaiya.”—2 Pedro 1:4.

15. Hin-o an moderno nga ‘mga dumuruong’ ngan ‘mga umurukoy tikang ha iba nga lugar,’ ngan ano an pagbubuhaton ha ira han daku Hitaas nga Saserdote?

¹⁵ San-o “mamamatay” an Hitaas nga Saserdote may kalabutan han moderno nga ‘mga dumuruong’ ngan ‘mga umurokoy tikang ha iba nga lugar,” nga magtutugot ha ira nga bumaya ha antitipiko nga siyudad nga arayupan? Ini nga mga membro han daku nga kadam-an diri makakagawas hini nga siyudad nga arayupan katapos gud han daku nga kagol-anan. Kay ano nga diri? Tungod kay aada pa hira ha ira diri-hingpit, makasasala nga unod ngan kinahanglan magpabilin ilarom han panalipod han Hitaas nga Saserdote. Pinaagi ha pagpahimulos han nagtutubos nga mga serbisyo durante han iya usa ka yukot ka tuig nga pagkahadi ngan pagkasaserdote, makakadangat hira ngadto ha tawhanon nga kahingpitan. Ipipresenta ni Jesus hira ha Dios para ha ultimo, pangataposan nga pagsari han ira integridad pinaagi ha pagbuhii kan Satanas ngan han iya mga demonyo hin usa ka dali. Tungod kay nalamposan nira ini nga pagsari nga may baraan nga pag-uyon, hi Jehova magpapahayag ha ira nga magtadong. Salit madadangat nira an pagkabug-os han tawhanon nga kahingpitan.—1 Korinto 15:28; Pahayag 20:7-10.a

16. San-o diri na magkikinahanglan han nagtutubos nga mga serbisyo an mga maluluwas ha daku nga kagol-anan?

¹⁶ Salit, an mga maluluwas ha daku nga kagol-anan kinahanglan igpadayon nira an maopay nga konsensia pinaagi ha pagpabilin ha antitipiko nga siyudad nga arayupan tubtob ha kataposan han Usa ka Yukot ka Tuig nga Pagmando ni Kristo. Sugad nga hingpit na nga mga tawo, diri na hira magkikinahanglan pa han nagtutubos nga mga serbisyo han Hitaas nga Saserdote ngan magawas tikang ha iya panalipod. Hi Jesus hiton nga panahon mamamatay para ha ira sugad nga Hitaas nga Saserdote, kay diri na kinahanglan magbuhat hiya para ha ira ha paglimpyo han dugo han iya halad. Hiton nga panahon mabaya hira ha antitipiko nga siyudad nga arayupan.

17. Kay ano nga diri na kinahanglanon para hadton mga binanhaw durante han Usa ka Yukot ka Tuig nga Pagmando ni Kristo nga sumulod ha antitipiko nga siyudad nga arayupan ngan magpabilin didto?

¹⁷ Kinahanglan ba nga adton mga binanhaw durante han Usa ka Yukot ka Tuig nga Pagmando ni Jesus sumulod ha antitipiko nga siyudad nga arayupan ngan magpabilin didto tubtob ha kamatay han hitaas nga saserdote? Diri, tungod kay ha kamatayon ira ginbayaran an sirot han ira pagkamakasasala. (Roma 6:7; Hebreo 9:27) Kondi, an Hitaas nga Saserdote mabulig ha ira nga makadangat ha kahingpitan. Kon malamposan nira an ultimo nga pagsari katapos han Milenyo, igpapahayag liwat hira han Dios nga magtadong upod an garantiya han kinabuhi nga dayon ha tuna. Siyempre, an kapakyas ha pagsunod ha mga kinahanglanon han Dios magdadara hin paghukom nga sirot ngan kabungkagan ha bisan hin-o nga mga tawo nga diri makakalampos han ultimo nga pagsari sugad nga mga magtiripig han integridad.

18. Mahitungod han pagkahadi ngan pagkasaserdote ni Jesus, ano an magpapabilin ha katawohan ha kadayonan?

¹⁸ Ha kataposan an Israelita hitaas nga mga saserdote namatay. Kondi hi Jesus “nagin hitaas nga saserdote sumala han katungdanan ni Melkisedek ha kadayonan.” (Hebreo 6:19, 20; 7:3) Salit an kataposan han katungdanan ni Jesus sugad nga manlalaban Hitaas nga Saserdote ha katawohan diri nagtatapos han iya kinabuhi. An maopay nga mga epekto han iya pag-alagad sugad nga Hadi ngan Hitaas nga Saserdote magpapabilin ha katawohan ha kadayonan, ngan an mga tawo may utang ha iya ha kadayonan tungod han iya pag-alagad hini nga mga kapasidad. Dugang pa, mangunguna hi Jesus ha kadayonan ha putli nga pagsingba kan Jehova.—Filipos 2:5-11.

Birilhon nga mga Leksion Para ha Aton

19. Ano nga leksion mahitungod han kapungot ngan gugma an hibabaroan tikang ha tagana han mga siyudad nga arayupan?

¹⁹ Magkalainlain nga mga leksion an hibabaroan naton tikang ha tagana han mga siyudad nga arayupan. Pananglitan, waray nakamatay nga may kapungot ha iya biktima an gintugotan nga mag-ukoy ha siyudad nga arayupan. (Numeros 35:20, 21) Salit paonan-o tutugotan an bisan hin-o dida ha antitipiko nga siyudad nga arayupan nga magpatubo han kapungot ha usa nga bugto ha iya kasingkasing? “Bisan hin-o nga napupungot ha iya bugto usa nga parapamatay,” an iginsurat ni apostol Juan, “ngan maaram kamo nga waray parapamatay nga may nahibilin ha iya nga kinabuhi nga waray kataposan.” Busa “padayon nga maghigugmaay kita ha usa kag usa, kay an gugma tikang ha Dios.”—1 Juan 3:15, NW; 4:7, NW.

20. Basi mapanalipdan tikang ha Naninimalos han dugo, ano an kinahanglan buhaton hadton aada ha antitipiko nga siyudad nga arayupan?

²⁰ Basi mapanalipdan tikang ha naninimalos han dugo, an diri-tinuyo nga nakamatay kinahanglan magpabilin ha siyudad nga arayupan ngan diri magpatlaag lahos han mga tuna nga panabsaban. Kumusta man adton aada ha antitipiko nga siyudad nga arayupan? Basi matalwas tikang ha daku nga Naninimalos han dugo, kinahanglan diri hira bumaya ha siyudad. Tinuod, kinahanglan magbantay hira kontra han mga pagdani nga kumadto ha tubtuban han mga tuna nga panabsaban, siring pa. Kinahanglan mag-ikmat hira nga diri tugotan nga magtubo ha ira mga kasingkasing an gugma ha kalibotan ni Satanas. Bangin nagkikinahanglan ini hin pag-ampo ngan pangalimbasog, kondi an ira kinabuhi nadepende hito.—1 Juan 2:15-17; 5:19.

21. Ano iton may balos nga buruhaton an ginbubuhat hadton aada ha siyudad nga arayupan yana nga adlaw?

²¹ An diri-tinuyo nga mga nakamatay ha kadaan nga mga siyudad nga arayupan kinahanglan magin mabungahon nga mga magburuhat. Sugad man, an dinihogan nga “mga anak ni Israel” nagpapakita hin maopay nga susbaranan sugad nga mga magburuhat ha pag-ani ngan mga parasamwak han Ginhadian. (Mateo 9:37, 38; Markos 13:10) Sugad nga ‘mga dumuruong’ ngan ‘mga umurokoy’ ha siyudad nga arayupan yana nga adlaw, an mga Kristiano nga mayada tunan-on nga mga paglaom may pribilehiyo ha pagbuhat hinin nagluluwas-han-kinabuhi nga buruhaton upod han mga dinihogan nga hahani pa ha tuna. Ngan may balos gud ini nga buruhaton! Adton matinumanon nga nagbubuhat ha antitipiko nga siyudad nga arayupan makakapalagiw ha dayon nga kamatayon ha mga kamot han Naninimalos han dugo. Lugod, makakarawat nira an waray kataposan nga mga kapulsanan tikang ha iya pag-alagad sugad nga daku Hitaas nga Saserdote han Dios. Magpapabilin ba kamo ha siyudad nga arayupan ngan mabuhi ha waray kataposan?

[Footnote],[Mga footnote]

Paonan-o Mo Babatunon?

◻ Kay ano nga masisiring nga an binilyon nga mga tawo ha tuna mga salaan-ha-dugo?

◻ Ano nga mga buruhaton an ginbubuhat ni Jesu-Kristo may kalabutan han katawohan?

◻ Ano an antitipiko nga siyudad nga arayupan, ngan paonan-o nasulod an usa didto?

◻ San-o makakagawas an mga tawo tikang ha antitipiko nga siyudad nga arayupan?

◻ Ano iton birilhon nga mga leksion an hibabaroan naton tikang ha tagana han mga siyudad nga arayupan?

[Retrato ha pahina 16]

Maaram ka ba kon ano iton importante nga mga buruhaton an ginbubuhat ni Jesu-Kristo?