Malipayon nga Kinakarawat an Giya ni Jehova
GINSUMAT NI ULYSSES V. GLASS
Usa ito ka espesyal hinduro nga okasyon. Mayada la 127 nga estudyante ha nagradwar nga klase, kondi an tinambong 126,387 maglipayon nga mamarati, tikang ha damu nga mga nasud. Gradwasyon adto han ika-21 nga klase han Watchtower Bible School of Gilead, nga ginhimo ha Yankee Stadium ha New York City han Hulyo 19, 1953. Kay ano nga makatirigamnan gud ito nga hitabo ha akon kinabuhi? Tuguti ako ha pagsumat han pipira nga detalye.
NATAWO ako ha Vincennes, Indiana, E.U.A., han Pebrero 17, 1912, mga duha ka tuig antes umabot an Mesianiko nga Ginhadian, sugad han iginsaysay ha Pahayag 12:1-5. Han sunod nga tuig an akon mga ginikanan nagtikang pag-aram ha Biblia pinaagi han mga tomo han Studies in the Scriptures. Kada Domingo nga aga, ginbabasahan ni Tatay an pamilya tikang ha usa hiton nga mga libro, ngan ginhihisgotan namon an mahitungod hito.
Ginamit ni Nanay an iya nahibaroan basi mamolde an panhunahuna han iya mga anak. Maopay gud hiya nga tawo—maloloy-on hinduro, andam gud ha pagbulig. Upat kami nga nagin mga anak, kondi an gugma ni Nanay nag-uupod liwat ha iba nga kabataan ha amon mga amyaw. Naggasto hiya hin panahon upod ha amon. Nalipay hiya pagbasa han mga istorya ha Biblia ngan pagkanta kaupod namon.
Iya liwat gindapit ha amon balay an damu nga tawo nga bug-os-panahon nga nag-aalagad ha ministeryo. Nag-ukoy hira ha amon balay hin usa o duha la ka adlaw, agsob nga nagdudumara hin mga katirok ngan nagpapahayag. Labi nga naruyagan namon adton nagamit hin mga ilustrasyon ngan nagsusumat ha amon hin mga istorya. Ha usa nga okasyon han 1919, mga usa ka tuig katapos han siyahan nga girra ha kalibotan, iginsentro han nabisita nga bugto nga lalaki an iya mga komento ha amon nga mga kabataan. Ginhisgotan niya an konsagrasyon—an mas husto nga tinatawag naton yana nga dedikasyon—ngan binuligan kami nga makasabot kon paonan-o ito nakakaapekto ha amon mga kinabuhi. Hito nga gab-i han tikaturog na ako, nag-ampo ako ha akon langitnon nga Amay ngan ginsumatan hiya nga karuyag ko mag-alagad pirme ha iya.
Kondi, katapos han 1922 an iba nga mga kabaraka ha kinabuhi nakahimo hito nga desisyon nga mahibutang ha ikaduha nga lugar. Nagbarobalhin kami hin lugar ngan waray makaupod ha kongregasyon han katawohan ni Jehova. Hirayo hi Tatay tungod han iya trabaho ha riles han tren. Diri regular an amon pag-aram ha Biblia. Nag-eskwela ako basi magin usa nga debuhista ha komersyo ngan nagplano nga umiskwela ha nangunguna nga unibersidad.
Pagbag-o han Akon Tumong ha Kinabuhi
Ha kabutngaan han dekada han 1930, an kalibotan nagtikang na liwat han bug-os-kalibotan nga girra. Nag-uukoy kami hadto ha Cleveland, Ohio, han ginbisita kami han usa han mga Saksi ni Jehova. Nagtikang kami maghunahuna hin seryoso han amon nahibaroan sugad nga kabataan. An akon magurang nga bugto, hi Russell, mas seryoso, ngan hiya an siyahan nga nabawtismohan. Ako diri gud sugad kaseryoso, kondi han Pebrero 3, 1936, nagpabawtismo liwat ako. Nagtutubo an akon apresasyon kon ano an nahiuupod han dedikasyon ngadto kan Jehova, ngan nahibaro ako pagkarawat han giya ni Jehova. Hito mismo nga tuig, nabawtismohan liwat an akon duha nga bugto nga babaye, hi Kathryn ngan hi Gertrude. Kami ngatanan sinulod ha bug-os-panahon nga pag-alagad sugad nga mga payunir.
Kondi, diri ito nangangahulogan nga diri na gud namon ginhuhunahuna an iba nga mga butang. Nagkainteres gud ako ha iginsumat han akon hipag mahitungod ha usa ka mahusay nga daraga nga hi Ann nga “madasigon gud” tikang nga nahibatian niya an kamatuoran ngan natambong na ha mga katirok ha amon balay. Hito nga panahon, hi Ann nagtatrabaho sugad nga sekretarya ha usa nga opisina han pamalaud, ngan sulod hin usa ka tuig nagpabawtismo hiya. Waray ako plano ha pag-asawa, kondi matin-aw nga hi Ann 100 porsyento gud ha kamatuoran. Karuyag niya makigbahin hin bug-os ha pag-alagad kan Jehova. Diri gud hiya nasiring nga, “Mahihimo ko ba ito?” Lugod, hiya nagpapakiana, “Ano an gimaopayi nga paagi basi mabuhat ko ito?” Ngan determinado hiya nga tumanon ito. Iton positibo nga panlantaw nakadani ha akon. Gawas pa hito, mahusay hiya hinduro, ngan amo la gihapon yana. Nagin asawa ko hiya, ngan waray pag-iha nagin kaupod ko hiya ha pagpayunir.
Birilhon nga Pagbansay Sugad nga mga Payunir
Sugad nga mga payunir nahibaro kami han sekreto kon paonan-o magigin kontento kon aada kami ha kakablasan ngan ha kahuraan. (Filipos 4:11-13) Usa ka adlaw, tikagab-i na hadto, ngan waray kami makakaon. Mayada la kami singko sentabos. Kinadto kami ha tindahan han karne, ngan nagpakiana ako, “Mahimo ba kami makapalit hin kanan singko sentabos nga longganisa?” Siniplat hiya ha amon ngan nag-utod hin upat ka tiros. Sigurado ako nga sobra singko sentabos an kantidad hito, ngan nakabusog ito ha amon.
Diri ordinaryo an pakaeksperyensya hin duro nga pagkontra samtang nagpapadayon kami ha amon ministeryo. Ha usa nga bungto hirani ha Syracuse, New York, nakada kami ha kalye ha panaltag hin mga handbill ngan nakasul-ot hin mga plakard basi makadani han atensyon ha usa ka espesyal nga katirok ha publiko. Duha magkusog nga kalalakin-an an nagrabnot ha akon ngan ginkaptan ako hin makusog. Opisyal han polisya an usa, kondi diri hiya naka-unipormi, ngan ginbalewaray niya an akon hangyo nga makita an iya tsapa. Dida hito, inabot hi Grant Suiter han Brooklyn Bethel ngan nagsiring nga makadto kami ha istasyon han pulis basi masulbad ito nga problema. Katapos nagtawag hiya ha telepono ngadto ha opisina han Sosiedad ha Brooklyn, ngan duha ka padis ha amon an ginsugo nga gumawas utro hito nga adlaw nga may mga plakard ngan mga handbill basi magkaada basihan an pagkiha. Sugad han ginlalaoman, gindakop kami. Kondi, han ginsumatan namon an pulis nga igkikiha hira tungod han sayop nga pag-aresto, ginpagawas kami.
Kinabuwasan ginsamok han damu, maaringasa nga mga batan-on an amon lugar han asembleya tungod ha pagsulsol han usa nga padi, ngan an pulis waray gud magsaway. Ginlambahan han madarahog nga mga kriminal an kahoy nga salog hin mga baseball bat, iginduso an iba nga mga mamarati nga nangangalingkod, ngan sinaka ha plataporma, diin ira gintindog an bandera han Amerika ngan nagsinggit, “Saluduhi ito! Saluduhi ito!” Katapos nagkanta hira han “Beer Barrel Polka.” Bug-os nga ginbungkag nira an katirok. Direkta nga naeksperyensyahan namon an iginpasabot ni Jesus han hiya nagsiring: “Kay diri kamo kanan kalibotan, kondi ginpili ko kamo tikang ha kalibotan, tungod hini, an kalibotan nagdudumot ha iyo.”—Juan 15:19.
An pahayag publiko ha tinuod usa ka kopya han diskurso ni J. F. Rutherford, nga presidente hadto han Watch Tower Society. Hi Ann ngan ako nagpabilin didto hito nga bungto sulod hin pipira ka adlaw ngan ginbisita an mga tawo ha pagtanyag ha ira nga mamati han pahayag ha ira mga balay. Kinarawat han pipira ito nga tanyag.
Pagboluntaryo ha Langyaw nga Pag-alagad
Inabot an panahon, naabrihan an iba nga bahin han pag-alagad. An akon bugto nga hi Russell, ngan an iya asawa nga hi Dorothy, gindapit nga mag-eskwela ha siyahan nga klase han Eskwelahan ha Gilead, han 1943, ngan katapos iginpadara sugad nga mga misyonero ha Cuba. An akon bugto nga hi Kathryn nag-eskwela ha ikaupat nga klase. Hiya liwat igintoka ha Cuba. Ha urhi igintoka hiya ha Dominican Republic ngan katapos ha Puerto Rico. Ano man an nahitabo ha amon ni Ann?
Han makabati kami mahitungod han Eskwelahan ha Gilead ngan han hingyap han Sosiedad ha pagpadara hin mga misyonero ha iba nga katunaan, inabat namon nga karuyag namon gamiton para ha langyaw nga pag-alagad. Ha siyahan, nagplano kami nga maglugaring pagkadto, posible nga ha Mexico. Kondi nagdesisyon kami nga mas maopay kon maghuhulat ngan tugotan an Sosiedad ha pagtoka ha amon katapos mag-eskwela ha Eskwelahan ha Gilead. Nasabtan namon nga ini an kahikayan nga ginagamit ni Jehova.
Gindapit kami ha ikaupat nga klase han Eskwelahan ha Gilead. Kondi antes gud magtikang an klase, hi N. H. Knorr, nga hito nga panahon amo an presidente han Watch Tower Society, naghunahuna gud han mga limitasyon ni Ann tungod han iya polio nga sakit han bata pa. Nakig-istorya hiya ha akon mahitungod hito ngan nagdesisyon nga diri maaramon nga ipadara kami basi mag-alagad ha iba nga nasud.
Paglabay hin mga duha ka tuig, han nag-aandam ako ha tiarabot nga kombensyon, nakita ako utro ni Bugto Knorr ngan nagpakiana kon interesado pa kami mag-eskwela ha Gilead. Ginsumatan niya ako nga diri kami itotoka ha iba nga nasud; mayada hiya iba nga nahuhunahuna. Salit han magtikang an ikasiyam nga klase han Pebrero 26, 1947, kaupod kami ha grupo han mga estudyante.
Diri gud mahingangalimtan adto nga mga adlaw ha Gilead. An mga kurso makaparig-on gud ha espirituwal. Nahimo an bug-os-kinabuhi nga pagkamagsarangkay. Kondi an akon pag-eskwela nag-upod han sobra pa hito.
Butnga han Washington Ngan Gilead
Bag-o pa hadto an Eskwelahan ha Gilead. An gobyerno han Estados Unidos diri pa maaram hin bug-os han mga tumong han eskwelahan, salit damu nga mga pakiana an iginbangon. Karuyag han Sosiedad nga magkaada representante ha Washington, D.C. Didto kami iginpadara paglabay hin pipira ka bulan katapos makagradwar ha Gilead. Mabulig ako ha pagkuha hin mga visa para hadton gindapit pag-eskwela ha Gilead tikang ha iba nga mga nasud ngan pagkuha hin legal nga mga papeles basi maipadara an mga naggradwar ngadto ha iba nga mga lugar para ha misyonero nga buruhaton. An iba nga mga opisyal makatadunganon gud ngan mabinuligon. An iba marig-on nga nakontra ha mga Saksi. An iba nga mayada marig-on nga mga panlantaw ha politika nagpirit nga mayada kami koneksyon ha mga grupo nga ira gintatagad nga diri-naruruyagan.
Usa ka tawo nga akon nakaistorya ha iya opisina an nakontra gud ha amon tungod kay diri kami nasaludo ha bandera o naapi ha girra. Katapos niya magyinakan mahitungod hito, ha kataposan siniring ako: “Karuyag ko hibaroan mo, ngan maaram ka gud, nga an mga Saksi ni Jehova diri naapi ha girra ha bisan hin-o ha kalibotan. Diri kami nakikigbahin ha mga buruhaton ha kalibotan. Diri kami kaupod han ira mga girra, ha ira mga buruhaton ha politika. Bug-os gud kami nga neutral. Nasulbad na namon an problema nga iyo inaatubang; mayada kami pagkaurosa ha amon organisasyon. . . . Yana, ano an karuyag mo nga buhaton namon? Karuyag mo ba nga bumalik kami pagbuhat sugad han iyo ginbubuhat ngan isalikway an amon?” Waray na hiya magyakan hin bisan ano katapos hito.
Duha ka adlaw han semana an iginlain para ha pagkadto ha mga opisina han gobyerno. Dugang pa hito, nag-aalagad kami sugad nga mga espesyal payunir. Hadto, kinahanglan gumasto hin 175 ka oras ha ministeryo ha kanataran kada bulan (ha urhi ginbag-o ito ha 140 ka oras), salit agsob nga naabot tubtob ha katutnga ha gab-i an amon pagministeryo. Mabungahon gud an amon panahon. Nagdudumara kami hin damu, magopay nga mga pag-aram ha bug-os nga mga pamilya, ngan nag-uswag hira hin maopay. Nagdesisyon kami ni Ann nga diri manganak, kondi ha espirituwal nga pagkayakan, nagkaada kami diri la mga anak kondi mga apo ngan mga apo-ha-tuhod liwat. Nakakalipay gud hira ha amon mga kasingkasing!
Ha ikatarapos han 1948, nakarawat ko an dugang nga toka. Nagsaysay hi Bugto Knorr nga hi Bugto Schroeder, an pararehistro ngan usa han mga instruktor han Eskwelahan ha Gilead, magigin sibot hinduro ha iba importante nga buruhaton, salit ginhangyo ako nga magtutdo ha mga klase han Gilead kon kinahanglanon. Upod an kabaraka, binalik ako ha Gilead, ha South Lansing, New York, upod hi Ann han Disyembre 18. Ha siyahan, naukoy kami ha Gilead sulod la hin pipira ka semana, ngan katapos mabalik kami ha Washington. Kondi, ha kataposan, mas maiha an amon pag-ukoy ha Gilead kay ha Washington.
Sugad han akon gin-unabi kanina, durante hini nga panahon nga an ika-21 nga klase han Gilead naggradwar ha Yankee Stadium ha New York. Salit sugad nga usa han mga instruktor, nakapribilehiyo ako nga magkaada bahin ha programa han gradwasyon.
Pag-alagad ha Headquarters
Han Pebrero 12, 1955, nagtikang an usa pa nga toka ha pag-alagad para ha amon. Nagin membro kami han pamilya han Bethel ha headquarters han nakikita nga organisasyon ni Jehova. Kondi ano an nahiuupod hito? An importante, amo an pagin disidido nga buhaton an anoman nga itoka ha amon, nabulig ha mga proyekto nga nagkikinahanglan han kooperasyon han iba. Siyempre, ginbuhat na namon ito hadto, kondi yana magigin bahin kami han darodaku nga grupo—an pamilya han Bethel ha headquarters. Malipayon nga kinarawat namon inin bag-o nga toka sugad nga ebidensya han giya ni Jehova.
An daku nga bahin han akon trabaho nag-uupod han mga butang may kalabotan ha media. Tungod han hingyap para han makapainteres nga mga istorya ngan tungod han pakakuha hin impormasyon ha may-dinadapigan nga mga surok, an mga peryodista nagsurat hin nakakadaot gud nga mga butang mahitungod ha mga Saksi ni Jehova. Nangalimbasog kami pagsulbad hito nga kahimtang.
Karuyag makasiguro ni Bugto Knorr nga kami ngatanan mayada damu nga ginbubuhat, salit mayada lain pa nga mga toka. An pipira hini nagkinahanglan han akon nabansay nga kaabtik sugad nga debuhista ha komersyo. An iba nag-uupod han istasyon ha radyo han Sosiedad, an WBBR. Mayada buruhaton may kalabotan ha mga pasalida nga ginhimo han Sosiedad. Siyempre, an teokratiko nga kasaysayan, bahin han kurso ha Gilead, kondi yana ginhihimo an magkalainlain nga mga proyekto basi dugang nga mahibaroan han katawohan ni Jehova an detalye han kasaysayan han moderno teokratiko nga organisasyon ngan basi mapahimulsan liwat ini han publiko. Usa pa nga bahin han pagbansay ha Gilead nag-uupod han pagpahayag ha publiko, ngan han kinahanglan buhaton basi maipatin-aw an importante nga mga bahin ha pagpahayag ha publiko nga mapahimulsan han kabugtoan nga kalalakin-an ha mga kongregasyon. Salit damu gud an sadang buhaton.
Nagin Regular ha Gilead
Han 1961, han tikahirani an pagbansay ha nagbibiyahe nga mga paramangno ngan ha mga komite han sanga, ginbalhin an Eskwelahan ha Gilead ngadto ha Brooklyn, diin nahimumutang an sentro nga mga opisina han Watch Tower Society. Nagtutdo na liwat ako—yana diri sugad nga kasaliwan nga instruktor kondi sugad nga regular nga membro han grupo han magturutdo. Daku gud nga pribilehiyo! Marig-on nga kombinsido ako nga regalo ni Jehova an Eskwelahan ha Gilead, usa ka regalo nga pinahihimulsan han iya bug-os, nakikita nga organisasyon.
Ha Brooklyn an mga klase ha Gilead mayada mga higayon nga waray mahibaroi han mga estudyante han naglabay nga mga klase. Nagkaada dugang nga mga mamumulong nga bisita ngan nagkaada duok nga pakig-upod ha Nagmamando nga Lawas ngan ha pamilya han Bethel ha headquarters. Nagin posible liwat para ha mga estudyante nga mabansay ha mga trabaho ha opisina, ha mga buruhaton ha panimalay han Bethel, ngan ha magkalainlain nga mga buruhaton ha pabrika.
Sulod hin mga tuig ibaiba an kadamu han mga estudyante, ngan sugad man an mga instruktor. Damu ka beses liwat nga ginbag-o an lugar han eskwelahan. Yana nahimumutang ito ha makaruruyag nga palibot ha Patterson, New York.
Pagtrabaho Kaupod an mga Estudyante
Makalilipay gud an pagtutdo hini nga mga klase! Iini an batan-on nga mga tawo nga diri interesado pagbuhat han mga butang ha daan nga sistema. Ira binayaan an ira pamilya, an ira kasangkayan, an ira balay, ngan an mga tawo nga nagyayakan han ira yinaknan. An klima, an pagkaon—an ngatanan maiiba gud. Diri ngani hira maaram kon diin nga nasud hira makadto, kondi an ira tumong amo an pagin misyonero. Diri mo kinahanglan pagiuson an sugad nga mga tawo.
Kon nasulod ako ha klase, tumong ko pirme nga magin komportable an mga estudyante. Waray masasabtan an usa kon ginkukulba o nababaraka hiya. Totoo, ako an instruktor, kondi maaram ako kon mationan-o an pagin estudyante. Liningkod ako ha usa hito nga mga lingkoran hadto. Siyempre, nag-aram hira hin maopay ngan nahibaro hin damu ha Gilead, kondi karuyag ko liwat nga magmalipayon hira.
Maaram ako nga kon kumadto na hira ha ira mga toka, mayada pipira nga mga butang nga ginkikinahanglan nira basi maglampos. Kinahanglan nira an marig-on nga pagtoo. Kinahanglan nira an pagpaubos—hura gud hito. Kinahanglan mahibaro hira pakig-upod ha iba nga mga tawo, pagkarawat han mga kahimtang, pagin andam ha pagpasaylo. Kinahanglan magpadayon hira pagpatubo han mga bunga han espiritu. Kinahanglan higugmaon liwat nira an mga tawo ngan higugmaon an trabaho nga igintoka ha ira. Ito an mga butang nga pirme ko ginpapabug-atan ha mga estudyante samtang aada pa hira ha Gilead.
Diri ako maaram kon pira gud nga mga estudyante an akon natutdoan. Kondi maaram ako kon ano an akon inaabat mahitungod ha ira. Katapos han lima ka bulan nga pakig-upod ko ha ira ha klase, diri ko malikyan nga magin duok ha ira. Katapos kon ginkikita ko hira nga naglalakat ha plataporma ngan kinakarawat an ira mga diploma ha adlaw han gradwasyon, maaram ako nga malampuson nga natapos nira an kurso ngan ha diri mag-iiha mabaya na hira. Sugad ito hin nabaya an akon pamilya. Paonan-o mo mapupugngan an imo kalugaringon nga higugmaon an mga tawo nga disidido maghalad han ira kalugaringon ngan magbuhat han pagbubuhaton hinin mga batan-on?
Paglabay han mga tuig, kon nabalik hira pagbisita, hinbabatian ko an ira mga sumat mahitungod han ira mga kalipay ha pag-alagad, ngan maaram ako nga nagpapabilin hira ha ira mga toka, nagbubuhat kon ano an ginbansay ha ira. Mationan-o an akon inaabat hito? Ha totoo la, pagkamaopay gud han akon inaabat.
Nagtatan-aw ha Tidaraon
Masirom na yana an akon mga mata, ngan inaabat ko an mga kapakyasan tungod hini. Diri na ako nakakagtutdo ha klase ha Gilead. Ha siyahan, makuri gud ito karawaton nga pagbag-o, kondi ha bug-os ko nga kinabuhi nahibaro ako pagkarawat han mga kahimtang ngan magpahiuyon hito. Agsob ko hinumduman hi apostol Pablo ngan an iya “tunok ha unod.” Tulo ka beses nga nag-ampo hi Pablo nga kuhaon ito nga kakurian tikang ha iya, kondi an Ginoo nagsiring ha iya: “Iton akon grasya igo ha imo: kay iton akon gahum mahihingpit ha kamaluya.” (2 Korinto 12:7-10) Padayon nga gin-antos ito ni Pablo. Kon nahimo niya ito, kinahanglan sarihan ko. Bisan kon diri na ako nagdudumara hin mga sesyon ha klase, mapasalamaton ako nga nakikita ko pa gihapon an mga estudyante nga nasulod ngan nagowa kada adlaw. Usahay nakakaistorya ko hira, ngan nakakalipay ha akon kasingkasing an paghinumdom han maopay nga espiritu nga ira ipinakikita.
Makalilipay gud pamalandungon kon ano an mahitatabo ha tidaraon. Gintutukod na yana an pundasyon. An Gilead mayada importante nga bahin hito. Katapos han daku nga kagol-anan, kon pangabrihan na an mga basahon nga gin-unabi ha Pahayag 20:12, magkakaada dugang, daku nga edukasyon ha mga paagi ni Jehova ha usa ka yukot ka tuig. (Isaias 11:9) Kondi diri pa ito an kataposan. Ha tinuod tinikangan pa la ito. Ha waray kataposan, damu pa an mahibabaroan mahitungod kan Jehova ngan damu pa an buruhaton samtang nakikita naton an katumanan han iya mga katuyoan. Bug-os nga nasarig gud ako nga tutumanon ni Jehova an ngatanan dagku nga mga saad niya, ngan karuyag ko nga aadto ako basi makiangbit ha pagkarawat han mga giya ni Jehova para ha aton hiton nga panahon.
[Retrato ha pahina 26]
Gradwasyon ha Gilead ha New York Yankee Stadium han 1953
[Retrato ha pahina 26]
Hi Gertrude, ako, Kathryn, ngan hi Russell
[Retrato ha pahina 26]
Nagtatrabaho kaupod hi N.H.Knorr (durho ha wala) ngan hi M. G. Henschel ha pag-organisar han kombensyon
[Retrato ha pahina 26]
Ha WBBR nga istasyon ha radyo
[Retrato ha pahina 29]
Ha klase han Gilead
[Retrato ha pahina 31]
Kaupod hi Ann, diri pa la maiha