Ginbuhat Nira an Kaburut-on ni Jehova

Pinili ni Maria ‘an Maopay nga Bahin’

HAN adlaw ni Jesus, an Judio nga kababayin-an ginpugngan han rabiniko nga mga tradisyon. Salit, gindid-an hira ha pag-aram han Balaud. Ha pagkamatuod, usa nga opinyon nga ginkotar tikang ha Mishnah nagsiring: “Kon an hin-o man nga lalaki maghatag ha iya anak nga babaye hin kahibaro ha Balaud sugad ito hin iya gintutdoan hiya hin kalaw-ayan.”—Sotah 3:4.

Sugad nga resulta, damu an diri gud edukado nga kababayin-an ha Judea han siyahan-siglo. “Waray ebidensya nga antes han ministeryo ni Jesus an Judio nga kababayin-an gintugotan nga magin disipulo han daku nga magturutdo, ngan sigurado nga waray tuguti nga magbiyahe upod han magturutdo, o magtutdo ha bisan hin-o gawas han mga anak,” siring han The Anchor Bible Dictionary. Ha dugang nga pagtamay ha kababayin-an, an iba relihiyoso nga mga lider naghimo hin balaud nga nag-uunabi nga an usa nga lalaki diri sadang makiistorya ha usa ka babaye ha publiko!

Ginbalewaray ni Jesus an sugad diri-diosnon nga mga paggios. Nagtutdo hiya ha kababayin-an sugad man ha kalalakin-an, ngan an kalalakin-an ngan kababayin-an nagkukompuwesto han iya mga sumurunod. (Lukas 8:1-3) Ha usa nga okasyon, gindapit ni Marta ngan Maria hi Jesus nga magin bisita. (Lukas 10:38) Inin duha nga babaye amo an kabugtoan ni Lasaro, ngan an tulo, mga disipulo ngan maopay nga kasangkayan ni Jesus. (Juan 11:5) Bangin prominente ini nga pamilya, tungod kay damu an inabot ha pagliaw kan Marta ngan Maria han namatay hi Lasaro. Ha anoman nga kahimtang, an nahitabo ha ira balay han bumisita hi Jesus didto nagtagana hin birilhon nga leksyon diri la para ha ira kondi para ha aton liwat.

Nahibaro ha Tiilan ni Jesus

Waray ruhaduha, hi Marta ngan Maria disidido pagtagana kan Jesus hin engrande nga panagtawo, ngan posible nga maaakos nira ini ha pinansyal. (Itanding an Juan 12:1-3.) Kondi, han inabot an ira bisita, hi Maria ‘liningkod ha tiilan han Ginoo ngan padayon nga namati ha iya pulong.’ (Lukas 10:39) Waray tradisyon han mga tawo an makakagpugong kan Jesus ha pagtutdo ha usa ka sinsero nga babaye nga disidido gud mahibaro! Mahahanduraw naton hi Maria nga nalingkod ha atubangan ni Jesus, sugad hin usa nga estudyante nga atentibo gud ha pamati ha katutdoan han iya Magturutdo.—Itanding an Deuteronomio 33:3; Buhat 22:3.

Diri pariho kan Maria, hi Marta “nalilingaw tungod han kadamu nga marangnoan.” Sibot hiya ha iya makuri nga mga buruhaton, ha pag-andam hin engrande nga pangaon. Waray pag-iha, nasina hi Marta nga ginpabay-an hiya ha pagbuhat han ngatanan nga buruhaton samtang an iya bugto nga babaye nagliliningkod ha tiilan ni Jesus! Salit sinagbang hi Marta han nag-iistorya hi Jesus kan Maria, bangin tigda, nasiring: “Ginoo, waray ka ba kabaraka nga an akon bugto ginpabay-an ako nga usa la, nga nagmamangno? Busa, pagyakni hiya nga buligan ako niya.”—Lukas 10:40.

Diri sayop an hangyo ni Marta. Aw, makuri nga trabaho an pag-andam hin pagkaon, ngan an trabaho diri sadang pas-anon hin usa nga tawo. Kondi, nakita ni Jesus ha iya mga pulong an higayon ha pagtutdo hin birilhon nga leksyon. “Marta, Marta,” nagsiring hiya, “nasasakit ka, ngan nalilisang tungod han kadam-an nga mga bagay. Kondi usa nga bagay nga kinahanglan; kay hi Maria nakagpili hin maopay nga bahin, nga diri makukuha tikang ha iya.”—Lukas 10:41,42.

Diri hi Jesus nasiring nga waray interes hi Marta ha espirituwal nga mga butang. Ha kabaliktaran, kilala hiya ni Jesus nga usa ka babaye nga mayada hilarom diosnon nga debosyon.a Sigurado nga ito an nagpagios ha iya nga dapiton hi Jesus ha iya balay. Kondi, ha iya mahinay nga pagsaway, iginpatin-aw ni Jesus nga hi Marta, tungod han iya kabaraka ha pagkaon, nawarayan han talagsaon nga higayon ha pagkarawat hin personal nga instruksyon tikang ha Anak han Dios.

Oo, an kultura hito nga panahon bangin nasuporta han ideya nga an bili han babaye matin-aw nga napapamatud-an pinaagi han iya kahibaro ha mga buruhaton ha balay. Kondi ipinakita han mga pulong ni Jesus nga an kababayin-an, pariho han kalalakin-an, mahimo lumingkod ha tiilan han Anak han Dios ngan kumarawat han mga pulong han kinabuhi! (Juan 4:7-15; Buhat 5:14) May kalabotan hini, maoroopay unta para kan Marta nga magtagana hin pipira la nga mga putahi—o bisan usa la—kon maghahatag ito ha iya hin higayon nga lumingkod ha tiilan han Magturutdo ngan mahibaro tikang ha iya.—Itanding an Mateo 6:25.

Leksyon Para ha Aton

Yana nga adlaw, an kalalakin-an ngan kababayin-an kaupod hadton binaton ha pagdapit ni Jesus nga ‘uminom han tubig han kinabuhi nga waray bayad.’ (Pahayag 22:17.) Napagios han gugma, an iba—sugad gud kan Marta—nagbubuhat hin labaw han ira mahihimo ha pagbulig han mga panginahanglan han mga igkasi-tumuroo. Responsable hira ngan madagmit gumios, ngan nagsasaad hi Jehova ha pagbalos han ira mga kabudlay tungod han gugma. (Hebreo 6:10; 13:16) An iba bangin pariho gud kan Maria. Malumo hira ngan mahunahunaon ha espirituwal. An ira kaikag ha pamalandong ha Pulong han Dios nakakabulig ha ira nga magpabilin nga marig-on nga nakagamot ha pagtoo.—Efeso 3:17-19.

An duha nga klase hin mga indibiduwal nagbubuhat hin importante nga panginahanglan ha Kristiano nga kongregasyon. Kondi, ha kataposan, an ngatanan sadang ‘pumili han maopay nga bahin’ pinaagi han pag-una han espirituwal nga mga butang. Pinaagi han pagsiguro han mas importante nga mga butang, makakarawat naton an pag-uyon ngan bendisyon ni Jehova.—Filipos 1:9-11.

[Footnote]