Magin Marig-on Pinaagi han Gugma
“Higugmaon mo [hi Jehova] nga imo Dios ha bug-os mo nga kasingkasing ngan ha bug-os mo nga kalag, ngan ha bug-os mo nga hunahuna.”—MATEO 22:37.
1. (a) Ano an pipira nga mga butang nga ginpapatubo han usa nga Kristiano? (b) Ano an pinakaimportante nga kalidad han usa nga Kristiano, ngan kay ano?
DAMU an ginpapatubo han usa nga Kristiano basi magin epektibo nga ministro. An libro han Proberbios nagpapatin-aw han bili han kahibaro, pagsabot, ngan kinaadman. (Proberbios 2:1-10) Ginhisgotan ni apostol Pablo an panginahanglan hin bug-os nga pagtoo ngan marig-on nga paglaom. (Roma 1:16, 17; Kolosas 1:5; Hebreo 10:39) Importante liwat an pagpailob ngan pagpugong-ha-kalugaringon. (Buhat 24:25; Hebreo 10:36) Kondi, mayada usa nga sangkap nga kon waray hito mawawara an ngatanan iba nga mga kalidad ngan mawawaray kapulsanan. Ito nga sangkap amo an gugma.—1 Korinto 13:1-3, 13.
2. Paonan-o ipinakita ni Jesus an pagkaimportante han gugma, ngan ano nga mga pakiana an iginbabangon hini?
2 Ipinakita ni Jesus an pagkaimportante han gugma han hiya nagsiring: ‘Tungod hini an ngatanan makilala nga kamo an akon mga disipulo, kon kamo maghigugmaay an usa kag usa.’ (Juan 13:35) Tungod kay an gugma amo an nagpapakilala nga tigaman han totoo nga Kristiano, kinahanglan magpakiana kita sugad han, Ano an gugma? Kay ano nga importante gud nga hi Jesus nagsiring nga ito, labaw ha ngatanan, nagpapakilala han iya mga disipulo? Paonan-o naton mapapatubo an gugma? Hin-o an sadang kumarawat han aton gugma? Aton paghisgotan ini nga mga pakiana.
Ano an Gugma?
3. Paonan-o maisasaysay an gugma, ngan kay ano nga nag-uupod ito han hunahuna ngan han kasingkasing?
3 An usa nga pagsaysay han gugma amo an ‘pagbati hin kinasingkasing personal nga relasyon o hilarom nga pagtagad, kinasingkasing nga pagkaduok o pagkaruyag ha usa.’ Usa ito nga kalidad nga nagpapagios ha mga tawo nga magbuhat para ha kaopayan han iba, usahay ha daku personal nga sakripisyo. An gugma, sugad han pagkasaysay ha Biblia, nag-uupod han hunahuna ngan han kasingkasing. Mayada bahin an hunahuna, o pagsabot, tungod kay an usa ka tawo nga nahigugma nagbubuhat hini tungod ha kahibaro, kinikilala nga hiya ngan an iba nga mga tawo nga iya hinigugma ngatanan mayada mga kaluyahan ngan nakakadani nga mga kalidad. Nahiuupod an pagsabot tungod kay mayada mga tawo nga hinigugma han usa nga Kristiano nga—usahay, bangin, nakontra han iya natural nga mga hilig—tungod kay maaram hiya tikang ha iya nabasa ha Biblia nga karuyag han Dios nga buhaton niya ito. (Mateo 5:44; 1 Korinto 16:14) Ha gihapon, an gugma nagtitikang ha kasingkasing. An totoo nga gugma sugad han iginpahayag ha Biblia diri la kay ha hunahuna. Nagkikinahanglan ito hin hilarom nga pagkasinsero ngan bug-os nga pagsarig ha emosyon.—1 Pedro 1:22.
4. Ha ano nga paagi nga usa ka gamhanan nga bugkos an gugma?
4 An mga tawo nga hakog ha kasingkasing diri makakahimo hin totoo mahigugmaon nga relasyon tungod kay an tawo nga nahigugma andam nga unahon an mga kaopayan han iba kay han iya kalugaringon. (Filipos 2:2-4) Totoo an mga pulong ni Jesus nga ‘mayada labaw nga kalipay ha paghatag kay ha pagkarawat’ labi na kon an paghatag usa ka buhat han gugma. (Buhat 20:35) An gugma usa ka gamhanan nga bugkos. (Kolosas 3:14) Agsob nga nag-uupod ito han pakigsangkay, kondi an mga bugkos han gugma mas marig-on kay han pakigsangkay. An romantiko nga relasyon han bana ngan han iya asawa usahay iginsasaysay sugad nga gugma; kondi, an gugma nga gindadasig han Biblia nga sadang patuboon naton mas nagpapabilin kay han pisikal nga kadani. Kon an mag-asawa totoo nga nahigugma ha usa kag usa, nagpapabilin hira nga magkaupod bisan kon waray na pisikal nga relasyon tungod han mga balatian han kalagas o tungod kay diri na makakahimo an usa ha ira.
Gugma—An Importante nga Kalidad
5. Kay ano nga importante nga kalidad an gugma para ha usa nga Kristiano?
5 Kay ano nga importante nga kalidad an gugma para ha usa nga Kristiano? Siyahan, tungod kay ginsugo ni Jesus an iya mga sumurunod nga higugmaon an usa kag usa. Hiya nagsiring: “Kamo amo an akon mga kasangkayan kon iyo buhaton an akon iginsusugo ha iyo. Ini nga mga bagay iginsusugo ko ha iyo, basi kamo maghigugmaay an usa kag usa.” (Juan 15:14, 17) Ikaduha, tungod kay hi Jehova amo an dagway han gugma, ngan sugad nga iya mga magsiringba, sadang subaron naton hiya. (Efeso 5:1; 1 Juan 4:16) An Biblia nasiring nga an pagkuha hin husto nga kahibaro kan Jehova ngan kan Jesus nangangahulogan hin kinabuhi nga waray kataposan. Paonan-o naton masisiring nga kilala naton an Dios kon diri kita nangangalimbasog ha pagsubad ha iya? Hi apostol Juan nangatadongan: “An waray paghigugma waray makakilala ha Dios; kay an Dios amo an gugma.”—1 Juan 4:8.
6. Paonan-o natitimbang han gugma an magkalainlain nga mga bahin han aton mga kinabuhi?
6 Importante an gugma tungod han ikatulo nga hinungdan: Nabulig ito ha aton nga magin timbang ha magkalainlain nga mga bahin han aton kinabuhi ngan nagdudugang hin maopay nga motibo ha aton ginbubuhat. Pananglitan, importante nga magpadayon ha pagkuha hin kahibaro ha Pulong han Dios. Para ha Kristiano, an sugad nga kahibaro pariho han pagkaon. Nabulig ito ha iya nga magtubo ha pagkahamtong ngan magbuhat uyon han kaburut-on han Dios. (Salmo 119:105; Mateo 4:4; 2 Timoteo 3:15, 16) Kondi, hi Pablo nagpahamangno: “An kinaadman nagpapadayaw, kondi an gugma nagpaparig-on.” (1 Korinto 8:1) Waray, waray sayop ha husto nga kahibaro. An problema aada ha aton—mayada kita makasasala nga mga hilig. (Genesis 8:21) Kon diri titimbangan han gugma, an kahibaro makakahimo ha usa ka tawo nga magpahitaas, naghuhunahuna nga maoroopay hiya kay ha iba. Diri ito mahitatabo kon ginpapagios hiya han gugma. “An gugma . . . waray pagpadaku ha iya ngahaw, waray pagpadayaw.” (1 Korinto 13:4) An Kristiano nga ginpapagios han gugma diri nagigin mapahitas-on, bisan kon nagkaada hiya hilarom nga kahibaro. An gugma nagtitipig ha iya nga mapainubsanon ngan nagpupugong ha iya ha paghimo hin ngaran para ha iya kalugaringon.—Salmo 138:6; Jakobo 4:6.
7, 8. Paonan-o an gugma nabulig ha aton nga nakasentro ha mas importante nga mga butang?
7 Hi Pablo nagsurat ha mga taga-Filipos: “Ini an akon igin-aampo, nga an iyo gugma magtubo gud kaopay ha kaaram ngan ha ngatanan nga sarabotan; Basi [masiguro] niyo an mga bagay nga magopay gud.” (Filipos 1:9, 10) An Kristiano nga gugma mabulig ha aton nga sundon ini nga pagdasig basi masiguro an mas importante nga mga butang. Sugad nga ehemplo, tagda an mga pulong ni Pablo kan Timoteo: “Kon an tawo magbiling ha katungdanan han obispo maopay nga buhat an iya ginbibiling.” (1 Timoteo 3:1) Durante han 2000 nga tuig han pag-alagad, an kadamu han mga kongregasyon ha bug-os nga kalibotan nag-uswag hin 1,502, nga nakahimo hin bag-o nga total nga 91,487. Salit, daku an panginahanglan hin dugang nga mga tigurang, ngan adton nangangalimbasog para hini nga pribilehiyo angay kumendasyonan.
8 Kondi, adton nangangalimbasog para han mga pribilehiyo han pagmangno makakagtipig hin maopay nga pagkatimbang kon huhunahunaon nira pirme an katuyoan han sugad nga pribilehiyo. An pagkaada la hin awtoridad o pagkaprominente diri amo an importante nga butang. An mga tigurang nga nagpapalipay kan Jehova ginpapagios han gugma ha iya ngan ha ira kabugtoan. Diri hira naghihingyap han pagkaprominente o awtoridad. Katapos sagdonan an mga tigurang ha kongregasyon nga magpabilin ha maopay nga panhunahuna, pinabug-atan ni apostol Pedro an panginahanglan han ‘pagpaubos ha hunahuna.’ Iya ginsagdonan an ngatanan ha kongregasyon: “Magmapainubsanon kamo ha ilarom han makagarahum nga kamot han Dios.” (1 Pedro 5:1-6) Bisan hin-o nga nangangalimbasog para han sugad nga pribilehiyo maopay nga tagdon an susbaranan han damu nga mga tigurang ha bug-os nga kalibotan nga mauyatom, mapainubsanon, ngan salit usa nga bendisyon ha ira mga kongregasyon.—Hebreo 13:7.
An Maopay nga Motibo Nabulig ha Aton nga Magpailob
9. Kay ano nga gintitipigan ha hunahuna han mga Kristiano an iginsaad nga mga bendisyon ni Jehova?
9 An bili han pagin napagios han gugma makikita ha lain nga paagi. Ngada hadton namimiling han diosnon nga debosyon tungod han gugma, an Biblia nagsasaad hin hura nga mga bendisyon yana ngan ha diri-mahuhunahuna urusahon nga mga bendisyon ha tidaraon. (1 Timoteo 4:8) An Kristiano nga marig-on nga natoo hini nga mga saad ngan kombinsido nga hi Jehova ‘an parahatag hadton sinsero nga namimiling ha iya’ nabubuligan nga magin marig-on ha pagtoo. (Hebreo 11:6) Kadam-an ha aton an maiha na nga naghahandom han katumanan han mga saad han Dios ngan gin-uutro an ginsiring ni apostol Juan: “Amen! Kadi, Ginoo Jesus.” (Pahayag 22:20) Oo, an pamalandong hini nga mga bendisyon nga igin-aandam, kon matinumanon kita nagpaparig-on ha aton nga magpailob, sugad la han pagtipig ha hunahuna han “kalipay nga iginbutang ha iya atubangan” nga nakabulig kan Jesus ha pag-ilob.—Hebreo 12:1, 2.
10, 11. Paonan-o an pagin napagios han gugma nabulig ha aton nga magpailob?
10 Kondi, ano man kon an aton hingyap nga mabuhi ha bag-o nga kalibotan amo la an aton motibo ha pag-alagad kan Jehova? Niyan masayon kita magin diri-mapailubon o diri-tagbaw kon umabot an mga kakurian o diri mahitabo an mga butang sugad han aton ginlalaoman. Mamimeligro gud kita ha pagpahirayo. (Hebreo 2:1; 3:12) Gin-unabi ni Pablo an mahitungod han usa nga kaupod hadto nga hi Demas, nga binaya ha iya. Kay ano? Tungod kay ‘hiya naghigugma hini nga kalibotan.’ (2 Timoteo 4:10) Bisan hin-o nga nag-aalagad tungod la ha hakugnon nga mga hinungdan namimeligro ha pagbuhat hin pariho. Bangin madani hira ha tigda nga mga higayon nga igintatanyag ha kalibotan ngan diri na disidido ha pagsakripisyo yana tungod kay ginlalaoman an mga bendisyon nga maabot.
11 Bisan kon husto ngan natural an paghingyap ha pagkarawat han tidaraon nga mga bendisyon ngan maglaom han katalwasan tikang ha mga kakurian, an gugma nagpaparig-on han aton apresasyon ha kon ano an sadang magin importante ha aton kinabuhi. An kaburut-on ni Jehova, amo an importante nga butang, diri an aton. (Lukas 22:41, 42) Oo, an gugma nagpaparig-on ha aton. Nakakahimo ito ha aton nga makontento ha paghulat hin mapailubon ha aton Dios, tagbaw ha anoman nga mga bendisyon nga iya iginhahatag ngan nasarig nga ha iya igo nga panahon makakarawat naton an ngatanan nga iya iginsaad—ngan damu pa. (Salmo 145:16; 2 Korinto 12:8, 9) Samtang yana, an gugma nabulig ha aton nga magpadayon ha diri-hakugnon nga pag-alagad tungod kay ‘an gugma . . . diri nagbibiling han iya kalugaringon nga kaopayan.’—1 Korinto 13:4, 5.
Hin-o an Sadang Higugmaon han mga Kristiano?
12. Sumala kan Jesus, hin-o an sadang higugmaon naton?
12 Hi Jesus naghatag hin importante nga sugo kon hin-o an sadang higugmaon naton han ginkotar niya an duha nga sugo tikang ha Mosaiko nga Balaud. Hiya nagsiring: “Higugmaon mo [hi Jehova] nga imo Dios ha bug-os mo nga kasingkasing ngan ha bug-os mo nga kalag, ngan ha bug-os mo nga hunahuna” ngan, “Higugmaon mo an imo igkasi-tawo sugad ha imo ngahaw.”—Mateo 22:37-39.
13. Paonan-o kita mahibabaro ha paghigugma kan Jehova, bisan kon diri naton nakikita hiya?
13 Tikang ha mga pulong ni Jesus, matin-aw nga siyahan ngan importante ha ngatanan sadang higugmaon naton hi Jehova. Kondi, waray kita matawo nga mayada bug-os na nga gugma kan Jehova. Kinahanglan patuboon naton ito. Han siyahan nga hinbatian naton an mahitungod ha iya, nadani kita ha iya tungod han aton hinbatian. Hinay-hinay, hinbaroan naton kon paonan-o niya igin-andam an tuna para ha katawohan. (Genesis 2:5-23) Aton hinbaroan kon paonan-o hiya nakig-upod ha katawohan, waray niya kita pabay-i han siyahan nga sinulod an sala ha tawhanon nga pamilya, kondi nagbuhat hin mga paagi basi malukat kita. (Genesis 3:1-5, 15) Maloloy-on nga nakig-upod hiya hadton matinumanon, ngan ha kataposan iginhatag niya an iya bugtong nga Anak para ha kapasayloan han aton mga sala. (Juan 3:16, 36) Tungod hinin nag-uuswag nga kahibaro nagtutubo an aton apresasyon kan Jehova. (Isaias 25:1) Hi Hadi David nagsiring nga hiya nahigugma kan Jehova tungod han Iya mahigugmaon nga pagtagad. (Salmo 116:1-9) Yana nga panahon, hi Jehova nagtatagad ha aton, naggigiya ha aton, nagpaparig-on ha aton, ngan nagdadasig ha aton. Kon labaw nga hinbabaroan naton an mahitungod ha iya, nagigin mas hilarom an aton gugma.—Salmo 31:23; Sepania 3:17; Roma 8:28.
Paonan-o Naton Maipapakita an Aton Gugma?
14. Ha ano nga paagi maipapakita naton nga putli an aton gugma ha Dios?
14 Siyempre, damu ha bug-os nga kalibotan an nasiring nga hira nahigugma ha Dios, kondi an ira mga buhat diri nauyon ha ira mga pulong. Paonan-o kita mahibabaro nga tinuod nga hinigugma naton hi Jehova? Mahimo kita makiistorya ha iya ha pag-ampo ngan sumatan hiya kon mationan-o an aton inaabat. Ngan makakagios kita ha paagi nga nagpapakita han aton gugma. Hi apostol Juan nagsiring: “An nagbabantay ha [pulong han Dios], ha pagkamatuod an gugma han Dios ginhingpit ha iya. Tungod hini hibabaroan ta nga aada kita ha iya.” (1 Juan 2:5; 5:3) Kaupod han iba nga mga butang, an Pulong han Dios nagsusumat ha aton nga makig-upod ngan magkinabuhi nga limpyo ha moral. Ginlilikyan naton an pagkasalingkapaw, nagyayakan han kamatuoran, ngan gintitipigan an aton panhunahuna nga limpyo. (2 Korinto 7:1; Efeso 4:15; 1 Timoteo 1:5; Hebreo 10:23-25) Ipinapakita naton an gugma pinaagi han paghatag hin materyal nga bulig ngada hadton nagkikinahanglan. (1 Juan 3:17, 18) Ngan diri kita nahunong ha pagsumat ha iba mahitungod kan Jehova. Nag-uupod ito han pakigbahin ha pagwali han maopay nga sumat han Ginhadian ha bug-os nga kalibotan. (Mateo 24:14; Roma 10:10) An pagsugot ha Pulong han Dios ha sugad nga mga butang amo an ebidensya nga putli an aton gugma kan Jehova.
15, 16. Paonan-o an gugma kan Jehova nakaapekto ha damu nga mga kinabuhi ha naglabay nga tuig?
15 An gugma kan Jehova nabulig ha mga tawo ha paghimo hin maopay nga mga desisyon. Ha naglabay nga tuig, an sugad nga gugma nagpagios ha 288,907 nga indibiduwal nga igdedikar an ira mga kinabuhi ha iya ngan ginsimbolohan ito nga desisyon pinaagi han bawtismo ha tubig. (Mateo 28:19, 20) May kahulogan an ira dedikasyon. Nagtigaman ito han pagbag-o ha ira mga kinabuhi. Pananglitan, hi Gazmend usa han sikat nga mga basketbolista ha Albania. Ha pipira ka tuig, hiya ngan an iya asawa nag-aram ha Biblia ngan bisan pa han mga ulang ha kataposan nagin kuwalipikado sugad nga mga magwarali han Ginhadian. Ha naglabay nga tuig, nabawtismohan hi Gazmend, usa han 366 nga nabawtismohan ha Albania han 2000 nga tuig han pag-alagad. Usa nga pahayagan an nagpublikar hin artikulo mahitungod ha iya ngan nagsiring: “An iya kinabuhi mayada katuyoan, ngan tungod hini, hiya ngan an iya pamilya nagpapahimulos han pinakamalipayon nga mga adlaw han ira kinabuhi. Para ha iya, diri na importante nga makita kon mationan-o hiya nagpapahimulos para han iya kalugaringon kondi, lugod, kon mationan-o ka daku an maibubulig niya ha iba nga mga tawo.”
16 Sugad man, an bag-o la nga bawtismado nga bugto nga babaye nga nagtatrabaho ha kompanya han gasolina ha Guam kinarawat hin nakakadani nga tanyag. Katapos mag-uswag an katungdanan ha korporasyon ha sulod hin mga tuig, ha kataposan gintanyagan hiya han higayon nga magin siyahan nga babaye nga bise presidente ha kasaysayan han kompanya. Kondi, igindedikar na niya yana an iya kinabuhi ngadto kan Jehova. Salit katapos paghisgotan an mga butang ha iya bana, waray karawata han bag-o nga bugto an tanyag ngan naghikay lugod para han part-time nga trabaho basi mag-uswag hiya ha pagin bug-os-panahon nga ministro, usa nga payunir. An gugma kan Jehova nagpagios ha iya nga mag-alagad ha iya sugad nga payunir imbes nga igpadayon an mga interes ha pinansyal hini nga kalibotan. Ha pagkamatuod, ha bug-os nga kalibotan an sugad nga gugma nagpagios ha 805,205 nga makigbahin ha magkalainlain nga mga bahin han payunir nga ministeryo durante han 2000 nga tuig han pag-alagad. Daku gud ito nga kapahayagan han gugma ngan pagtoo hiton nga mga payunir!
Napagios ha Paghigugma kan Jesus
17. Ano nga maopay nga susbaranan han gugma an nakikita naton kan Jesus?
17 Hi Jesus usa ka maopay nga susbaranan han usa nga napagios han gugma. Antes hiya magin tawo, ginhigugma niya an iya Amay ngan ginhigugma niya an katawohan. Sugad nga simbolo han kinaadman, hiya nagsiring: “Hadto dida ako ha hirani [ni Jehova], sugad hin labaw nga magburuhat; Ngan ako an iya kalipay ha adlaw-adlaw, nga kanunay malipayon ha iya atubangan, malipayon dida ha iya tuna nga kapupoy-an; Ngan an akon kalipay aada ha mga anak han mga tawo.” (Proberbios 8:30, 31) An gugma ni Jesus nagpagios ha iya nga bayaan an iya langitnon nga urukyan ngan matawo sugad nga waray-mahihimo nga minasus-an. Mapailubon ngan maloloy-on nga nakig-upod hiya ha maaghop ngan mapainubsanon ngan nag-antos ha mga kamot han mga kaaway ni Jehova. Ha kataposan, namatay hiya para han ngatanan nga katawohan ha pasakitan nga kahoy. (Juan 3:35; 14:30, 31; 15:12, 13; Filipos 2:5-11) Pagkamaopay nga susbaranan han husto nga motibo!
18. (a) Paonan-o naton ginpapatubo an gugma kan Jesus? (b) Ha ano nga paagi ipinapakita naton nga nahigugma kita kan Jesus?
18 Kon ginbabasa hadton husto an kahimtang han kasingkasing an mga asoy han kinabuhi ni Jesus ha mga Ebanghelyo ngan namamalandong ha damu nga mga bendisyon nga nakarawat nira tungod han iya matinumanon nga pagkinabuhi, nakakahimo ini nga magtubo an ira hilarom nga gugma ha iya. Kita yana pariho hadton ginsumatan ni Pedro han hiya nagsiring: “Bisan waray niyo kitaa [hi Jesus] ginhihigugma niyo hiya.” (1 Pedro 1:8) Ipinapakita an aton gugma kon kita nagbubuhat hin pagtoo ha iya ngan ginsusubad an iya pagkinabuhi nga nagsasakripisyo-ha-kalugaringon. ((1 Korinto 11:1; 1 Tesalonika 1:6; 1 Pedro 2:21-25) Han Abril 19, 2000, an total nga 14,872,086 napahinumdom han aton mga hinungdan ha paghigugma kan Jesus han tinambong hira ha tinuig nga Memoryal han iya kamatayon. Damu gud ito! Ngan makaparig-on gud an paghibaro nga damu hinduro an interesado ha katalwasan pinaagi han halad ni Jesus! Tinuod, napaparig-on kita han gugma ha aton ni Jehova ngan ni Jesus ngan han aton gugma ha ira.
19. Ano nga mga pakiana mahitungod han gugma an paghihisgotan ha masunod nga artikulo?
19 Siring ni Jesus nga sadang higugmaon naton hi Jehova ha aton bug-os nga kasingkasing, kalag, hunahuna, ngan kusog. Kondi nagsiring liwat hiya nga sadang higugmaon naton an aton igkasi-tawo sugad ha aton kalugaringon. (Markos 12:29-31) Nag-uupod ito kan kanay? Ngan paonan-o an gugma ha igkasi-tawo nabulig ha aton nga magpabilin ha maopay nga pagkatimbang ngan husto nga motibo? Ini nga mga pakiana paghihisgotan ha masunod nga artikulo.
Nahinunumduman Mo Ba?
• Kay ano nga importante nga kalidad an gugma?
• Paonan-o kita mahibabaro ha paghigugma kan Jehova?
• Paonan-o pinamamatud-an han aton paggawi nga nahigugma kita kan Jehova?
• Paonan-o naton ipinapakita nga nahigugma kita kan Jesus?
[Mga Retrato ha pahina 10, 11]
An gugma nabulig ha aton nga mapailubon nga maghulat han katalwasan
[Retrato ha pahina 12]
An daku nga halad ni Jesus nagpapagios ha aton nga higugmaon hiya