Dayawa hi Jehova Tungod han Iya Dagku nga mga Buhat!
“Ginpakadaku han akon kalag an Ginoo, . . . Tungod kay naghimo ha akon hin dagku nga mga bagay an Makagarahum.”—LUKAS 1:46-49.
1. Tungod han ano dagku nga mga buhat nga angay naton pagdayawon hi Jehova?
HI Jehova takos dayawon tungod han iya dagku nga mga buhat. Han iginsaysay ni propeta Moises an katalwasan han Israel tikang ha Ehipto, hiya nagsiring: “An iyo mga mata nagpakakita han ngatanan nga dagku nga buhat nga ginbuhat ni Jehova.” (Deuteronomio 11:1-7) Sugad man, han iginpahibaro ni anghel Gabriel an tiarabot nga katawo ni Jesus ha birhen nga daraga nga hi Maria, hiya nagsiring: “Ginpakadaku han akon kalag an Ginoo, . . . Tungod kay naghimo ha akon hin dagku nga mga bagay an Makagarahum.” (Lukas 1:46-49) Sugad nga mga Saksi ni Jehova, aton gindadayaw hiya tungod han dagku nga mga buhat sugad han pagtalwas ha Israel tikang ha pagkauripon ha Ehipto ngan milagroso nga pagpanamkon ha iya hinigugma nga Anak.
2. (a) Ano an kahulogan han ‘waray kataposan nga katuyoan’ han Dios para ha masinugtanon nga katawohan? (b) Ano an naeksperyensyahan ni Juan ha isla han Patmos?
2 Damu han dagku nga mga buhat ni Jehova an may kalabotan han iya ‘waray kataposan nga katuyoan’ ha pagbendisyon ha masinugtanon nga katawohan pinaagi han Mesias ngan han iya pagmando han Ginhadian. (Efeso 3:8-13) Ito nga katuyoan mainuswagon nga nahitatabo han an lagas nga hi apostol Juan gintugotan nga magkita ha abrido nga purtahan ha langit ha usa nga bisyon. Iya hinbatian an sugad-trumpeta nga tingog nga nasiring: “Saka ngadi, ngan igpapakita ko ha imo an mga bagay nga mahinanabo ha urhi nga mga panahon.” (Pahayag 4:1) Samtang igindistyero han Romano nga gobyerno ngadto ha isla han Patmos ‘tungod ha pagyakan mahitungod han Dios ngan pagpamatuod kan Jesus,’ nakarawat ni Juan an “pahayag ni Jesu-Kristo.” An hinkit-an ngan hinbatian han apostol nagpahayag hin damu mahitungod han waray kataposan nga katuyoan han Dios, nga nagtatagana hin espirituwal nga kahayag ngan napapanahon nga pagdasig para ha ngatanan totoo nga mga Kristiano.—Pahayag 1:1, 9, 10.
3. Hin-o an ginrirepresentaran han 24 nga tigurang nga hinkit-an ni Juan ha bisyon?
3 Ha pagkita hiton abrido nga purtahan ha langit, hinkit-an ni Juan an 24 nga tigurang, nga nalingkod ha trono ngan ginkoronahan pariho han mga hadi. Hira nanhapa ha atubangan han Dios ngan nagsiring: “Aton Ginoo, ngan aton Dios, takos ikaw ha pagkarawat han himaya, ngan han dungog ngan han gahum: kay ikaw an nagbuhat han ngatanan nga mga bagay, ngan tungod ha imo kaburut-on nagkahihimo, ngan pinanmuhat hira.” (Pahayag 4:11) Ito nga mga tigurang nagrirepresentar han ngatanan nga binanhaw dinihogan nga mga Kristiano ha hitaas nga katungdanan nga iginsaad han Dios ha ira. Napapagios hira ha pagdayaw kan Jehova tungod han iya dagku nga mga buhat may kalabotan han mga linarang. Kita liwat napapausa ha ebidensya han kan Jehova ‘waray kataposan nga gahum ngan pagka-Dios.’ (Roma 1:20) Ngan kon labaw nga nahibabaro kita mahitungod kan Jehova, nagkakaada kita labaw nga hinungdan ha pagdayaw ha iya tungod han iya dagku nga mga buhat.
Igpahayag an Darayawon nga mga Buhat ni Jehova!
4, 5. Paghatag hin mga ehemplo kon paonan-o gindayaw ni David hi Jehova.
4 Gindayaw ni salmista David an Dios tungod han Iya dagku nga mga buhat. Pananglitan, hi David nagkanta: “[Magkanta] kamo hin mga pagdayaw kan Jehova, nga nagpupuyo ha Sion: Igpahibaro niyo ha mga tawo an iya mga buhat. Kalooyan mo ako, O Jehova; Tan-awa an akon kasakitan nga akon gin-aantos tumikang ha mga nagdudumot ha akon, ikaw nga nagbangon ha akon tikang ha mga ganghaan han kamatayon; Basi nga igpahayag ko an ngatanan nga imo pagdayaw. Ha mga ganghaan han anak nga babaye ni Sion.” (Salmo 9:11, 13, 14) Katapos ihatag ha iya anak nga hi Salomon an arkitektural nga plano para ha templo, ginbulahan ngan gindayaw ni David an Dios, nasiring: “Imo, O Jehova, an pagkadungganan, ngan an gahum, ngan an himaya, ngan an pagdaog, ngan an pagkaharangdon: . . . imo an ginhadian, O Jehova, ngan ikaw ginpahitaas sugad nga pangulo labaw han ngatanan. . . . Busa yana, Dios namon, nagpapasalamat kami ha imo, ngan nagdadayaw han imo mahimayaon nga ngaran.”—1 Kronikas 29:10-13.
5 An Kasuratan pauroutro nga nagdadapit—oo, nagsasagda—ha aton nga dayawon an Dios, sugad han ginbuhat ni David. An libro han Salmos nagsusulod hin damu nga mga kapahayagan han pagdayaw ha Dios, ngan mga katunga hini nga mga kanta an ginhimo ni David. Pirme nga gindayaw ngan ginpasalamatan niya hi Jehova. (Salmo 69:30) Dugang pa, tikang ha siyahan nga mga panahon, an inspirado han Dios nga mga sinurat ni David ngan iba pa ginagamit ha pagdayaw kan Jehova.
6. Paonan-o nga mapulsanon ha aton an inspirado nga Salmos?
6 Mapulsanon gud an Salmos ha mga magsiringba ni Jehova! Kon karuyag naton magpasalamat ha Dios tungod han ngatanan nga iya bantogan nga mga buhat para ha aton, an aton mga hunahuna mahimo gumamit han magtahom nga mga pulong ha Salmos. Ha pagmata ha usa ka bag-o nga adlaw, pananglitan, mahimo kita mapagios ha pagpahayag pariho hini: “Maopay nga butang an pagpasalamat ngadto kan Jehova, ngan pagkanta hin mga pagdayaw ha imo ngaran, O Gihitaasi; Pagpahayag han imo mahigugmoan nga kalooy ha aga, ngan an imo kamasinugtanon kada gab-i, . . . Kay ikaw, Jehova, pinapagmalipay mo ako pinaagi han imo buhat: Magdadaog ako dida hiton mga binuhat han imo mga kamot.” (Salmo 92:1-4) Kon nalalamposan naton an ulang ha aton espirituwal nga pag-uswag, mahimo kita magpahayag hin kalipay ngan pagpasalamat ha pag-ampo, sugad la han ginbuhat han salmista han hiya nagkanta: “O kadi, pagkanta kita ngadto kan Jehova; Pagkanta kita hin malipayon nga tingog ngadto ha bato nga bantilis han aton kaluwasan. Kada kita ha iya atubangan upod in pagpasalamat; Pagkanta kita hin malipayon nga tingog ngadto ha iya upod an mga salmos.”—Salmos 95:1, 2.
7. (a) Ano an makatirigamnan mahitungod han damu nga mga karantahon nga ginkakanta han mga Kristiano? (b) Ano an usa nga hinungdan han temprano nga pag-abot ha mga katirok ngan magpabilin tubtob matapos?
7 Agsob nga nagkakanta kita ha daku nga tingog han mga karantahon han pagdayaw kan Jehova ha mga katirok ha kongregasyon, mga asembleya, ngan mga kombensyon. Makatirigamnan nga damu hinin mga karantahon an iginbasar ha inspirado nga mga panhunahuna tikang ha libro han Salmos. Malipayon gud kita ha pagkaada han napapanahon nga koleksyon han makalilipay nga mga karantahon han pagdayaw kan Jehova! An pagkanta hin mga pagdayaw ha Dios usa nga maopay gud nga hinungdan ha pag-abot hin temprano ha aton mga katirok ngan presente tubtob matapos, basi makaangbit upod han mga igkasi-magsiringba ha pagdayaw kan Jehova pinaagi han pagkanta ngan pag-ampo.
“Pagdayawa Niyo hi Jehova!”
8. Ano an kahulogan han pulong nga “Hallelujah,” ngan paonan-o ito agsob nga iginhuhubad?
8 An pagdayaw kan Jehova matin-aw ha pulong nga “Hallelujah,” an pinahalipot tikang ha Hebreo nga ekspresyon nga pirme iginhuhubad nga “Pagdayawa niyo hi Jehova.” Pananglitan, ha Salmo 135:1-3, makikita naton inin mapaso, marig-on nga pagdapit: “Pagdayawa niyo hi Jehova! Pagbulahana niyo an ngaran ni Jehova; Pagbulahana hiya, O kamo nga mga surugoon ni Jehova, kamo nga natindog dida ha balay ni Jehova, dida ha mga bungsaran han balay han aton Dios. Pagdayawa niyo hi Jehova; kay hi Jehova maopay: Pagkanta hin mga pagdayeg ngadto ha iya ngaran; kay malipayon ito.”
9. Ano an nagpapagios ha aton nga dayawon hi Jehova?
9 Samtang aton pinamamalandong an urusahon nga mga buhat han paglarang han Dios ngan an ngatanan nga iya mga buhat para ha aton, an kinasingkasing nga apresasyon nagpapagios ha aton nga dayawon hiya. Kon aton pinamamalandong an milagroso nga mga butang nga ginbuhat ni Jehova para ha iya katawohan ha naglabay nga mga panahon, an aton mga kasingkasing nagpapagios ha aton nga dayawon hiya. Ngan samtang pinamamalandong naton an mga saad han dagku nga mga butang nga pagbubuhaton pa ni Jehova, namimiling kita hin mga paagi ha pagpahayag hin pagdayaw ngan pagpasalamat.
10, 11. Paonan-o an aton kinabuhi mismo naghahatag ha aton hin hinungdan nga dayawon an Dios?
10 An aton kinabuhi mismo naghahatag ha aton hin husto nga hinungdan ha pagdayaw kan Jehova. Hi David nagkanta: “Ako magpapasalamat ha imo [Jehova]; kay an paghimo ha akon makatarag-ob ngan urusahon: Urusahon an imo mga buhat; Ngan an akon kalag maaram hito hin maopay.” (Salmo 139:14) Oo, ‘urusahon an pagkahimo’ ha aton ngan mayada kita han presyoso nga mga regalo sugad han pagkita, pakabati, ngan abilidad ha paghunahuna. Salit, diri ba kita sadang magkinabuhi ha paagi nga nagdadayaw ha aton Magburuhat? Hi Pablo nagpahayag hin pariho han hiya nagsurat: “Kon mangaon kamo, o manginom, o bisan ano an iyo pagbuhaton, pagbuhaton niyo an ngatanan ha himaya han Dios.”—1 Korinto 10:31.
11 Bubuhaton naton an ngatanan ha himaya ni Jehova kon totoo nga nahigugma kita ha iya. Hi Jesus nagsiring nga an siyahan nga sugo amo ini: “Higugmaon mo an imo Ginoo nga Dios ha bug-os mo nga kasingkasing, ngan ha bug-os mo nga kalag, ngan ha bug-os mo nga hunahuna, ngan ha bug-os mo nga kusog.” (Markos 12:30; Deuteronomio 6:5) Sadang higugmaon gud naton hi Jehova ngan dayawon hiya sugad nga aton Magburuhat ngan Humaratag han “ngatanan nga maopay nga hatag ngan han ngatanan nga hingpit nga hatag.” (Jakobo 1:17; Isaias 51:13; Buhat 17:28) Aw, an aton mga abilidad ha pangatadongan, an aton kapasidad ha espirituwal, ngan an aton pisikal nga kusog—an ngatanan nga aton mga kalidad ngan mga abilidad—tikang kan Jehova. Sugad nga aton Maglalarang, takos hiya han aton gugma ngan pagdayaw.
12. Mationan-o an inaabat mo mahitungod han dagku nga mga buhat ni Jehova ngan ha mga pulong han Salmo 40:5?
12 An dagku nga mga buhat ni Jehova naghahatag ha aton hin damu gud nga hinungdan nga higugmaon ngan dayawon hiya! “O Jehova, nga akon Dios, damu an mga urusahon nga buhat nga imo ginhimo, ngan an imo mga hunahuna ngadi ha amon,” nagkanta hi David. “Diri ito mahuhusay ha atubangan mo; Kon ako magpahayag ngan magyakan tungod hito. Mamadamu pa hito han maiisip.” (Salmo 40:5) Diri mahuhunahuna ni David an ngatanan han urusahon nga mga buhat ni Jehova, ngan diri gud naton mahihimo. Kondi dayawon naton pirme an Dios kon an bisan ano han iya dagku nga mga buhat iginpapatin-aw ha aton.
Mga Buhat nga May Kalabotan ha Waray Kataposan nga Katuyoan han Dios
13. Paonan-o an aton paglaom nadepende ha dagku nga mga buhat han Dios?
13 An aton paglaom para ha tidaraon nadepende ha dagku ngan darayawon nga mga buhat may kalabotan han waray kataposan nga katuyoan han Dios. Katapos han pagrebelde ha Eden, iginhatag ni Jehova an puno-hin-paglaom siyahan nga tagna. Ha pagpahayag han sirot ha halas, an Dios nagsiring: ‘Ako magbubutang hin away ha butnga nimo ngan han babaye ngan ha butnga han imo binhi ngan han iya binhi. Hiya magsasamad han imo ulo ngan ikaw magsasamad han iya tikod.’ (Genesis 3:15) An paglaom ha iginsaad nga Binhi han babaye nagpabilin ha mga kasingkasing han matinumanon nga mga tawo katapos buhaton ni Jehova an daku nga buhat pinaagi han pagtalwas kan Noe ngan ha iya pamilya ha bug-os globo nga Delubyo nga nagpara han maraot nga kalibotan. (2 Pedro 2:5) An matagnaon nga mga saad ha mga tawo han pagtoo sugad kan Abraham ngan David naghatag hin dugang nga pagsabot ha pagbubuhaton ni Jehova pinaagi hiton nga Binhi.—Genesis 22:15-18; 2 Samuel 7:12.
14. Ano an gihitaasi nga ehemplo han dagku nga mga buhat ni Jehova para ha katawohan?
14 An gihitaasi nga pagpahayag ni Jehova sugad nga usa nga nagbubuhat hin dagku nga mga buhat para ha katawohan nahitabo han iginhatag niya an iya bugtong nga Anak—an iginsaad nga Binhi, hi Jesu-Kristo—sugad nga halad lukat. (Juan 3:16; Buhat 2:29-36) An lukat nagtagana han basihanan han pagpahiuli ha Dios. (Mateo 20:28; Roma 5:11) Gindara ni Jehova an siyahan nga mga ginpahiuli ngada ha Kristiano nga kongregasyon, nga natukod han Pentekostes 33 K.P. Pinaagi han bulig han baraan nga espiritu, ira iginwali an maopay nga sumat ha kahigrayoan, ipinapakita kon paonan-o an kamatayon ngan pagkabanhaw ni Jesus nag-aabre han dalan para ha masinugtanon nga katawohan basi magpahimulos han waray kataposan nga mga bendisyon ilarom han pagmando han langitnon nga Ginhadian han Dios.
15. Paonan-o nagbubuhat hi Jehova ha urusahon nga paagi ha aton panahon?
15 Ha aton panahon, nagbubuhat hi Jehova ha urusahon nga paagi ha pagtirok han ultimo dinihogan nga mga Kristiano. An mga hangin han kabungkagan ginpupugngan basi maselyohan an mga nahibibilin pa han 144,000, nga magmamando upod ni Kristo ha langit. (Pahayag 7:1-4; 20:6) Ginsiguro han Dios nga matalwas an dinihogan nga mga Kristiano tikang ha espirituwal nga pagkabihag ha “Babilonya nga Daku,” an imperyo han palso nga relihiyon ha kalibotan. (Pahayag 17:1-5) Ito nga katalwasan han 1919 ngan an panalipod han Dios nga ira naeksperyensyahan tikang hadto nagtutugot ha dinihogan nga nanhibilin nga buhaton an ano? Nga maglamrag ha paghatag han ultimo nga pagtestigo antes tapuson ni Jehova an maraot nga sistema han mga butang ni Satanas ha madagmit nga nagtitiarabot nga “daku nga kagol-anan.”—Mateo 24:21; Daniel 12:3; Pahayag 7:14.
16. Ano an nahitatabo yana sugad nga resulta han buruhaton nga pagwali-han-Ginhadian ha bug-os nga kalibotan?
16 An dinihogan nga mga Saksi ni Jehova madasigon nga nangunguna ha buruhaton nga pagwali-han-Ginhadian ha bug-os nga kalibotan. Sugad nga resulta, damu han “iba nga mga karnero” an nagigin mga magsiringba ni Jehova yana. (Juan 10:16) Nalilipay kita nga abrido pa gihapon an higayon para ha mga maaghop han tuna nga umupod ha aton ha pagdayaw kan Jehova. Adton nakarawat han pagdapit nga “kadi” nakalinya para ha mga matatalwas ha daku nga kagol-anan, nga may paglaom ha pagdayaw kan Jehova ha waray kataposan.—Pahayag 22:17.
Yinukot an Naupod haTotoo nga Pagsingba
17. (a) Paonan-o ginbubuhat ni Jehova an dagku nga mga buhat may kalabotan han aton pagwali nga buruhaton? (b) Paonan-o natutuman an Sakarias 8:23?
17 Hi Jehova nagbubuhat na yana han dagku ngan darayawon nga mga buhat may kalabotan han aton pagwali nga buruhaton. (Markos 13:10) Ha bag-o la nga mga tuig, iya ‘inabrihan an daku nga mga purtahan nga nagtutugway ngadto ha buruhaton.’ (1 Korinto 16:9) Tungod hini iginwawali an maopay nga sumat ha bug-os haluag nga mga teritoryo diin nag-ulang hadto an mga kaaway han kamatuoran. Damu han nagkikinabuhi hadto ha espirituwal nga kasisidman an nakarawat na yana ha pagdapit nga magsingba kan Jehova. Ira gintutuman inin matagnaon nga mga pulong: “Ha sugad hini nasiring hi Jehova han mga kasundalohan: Hadto nga mga adlaw mahinanabo, nga an napulo ka tawo tikang ha ngatanan nga yinaknan han mga nasud magunit, hira magunit han saya niya nga usa nga Judio, ha pagsiring: Kami maupod ha iyo, kay kami nakabati nga an Dios aada kaupod niyo.” (Sakarias 8:23) Adton ginsidngan han “napulo ka tawo” amo an espirituwal nga mga Judio, an nanhibilin han dinihogan nga mga Kristiano yana. Tungod kay an napulo nagsisimbolo han kabug-osan han tunan-on nga klase, an “napulo ka tawo” nagsisimbolo han ‘daku nga panon,’ nga gindadara basi makig-upod ha “Israel han Dios,” basi hira nagigin “usa nga panon.” (Pahayag 7:9, 10; Galasia 6:16) Makalilipay gud makita an damu yana nga nag-aalagad nga tarampo sugad nga mga magsiringba ni Jehova nga Dios!
18, 19. Ano an ebidensya nga ginbibendisyonan ni Jehova an pagwali nga buruhaton?
18 Nalilipay kita nga napuplo ka yukot—oo, ginatos ka yukot—an nakarawat han totoo nga pagsingba ha mga nasud nga kontrolado gud hadto han palso nga relihiyon nga an mga tawo baga in diri gud makarawat han maopay nga sumat. Kitaa an pinakabag-o nga Yearbook of Jehovah’s Witnesses, ngan tigamni an mga nasud nga nagrireport na yana tikang ha 100,000 ngadto ha hirani 1,000,000 nga magwarali han Ginhadian. Ini an marig-on nga pamatuod nga an buruhaton nga pagwali-han-Ginhadian ginbibendisyonan ni Jehova.—Proberbios 10:22.
19 Sugad nga katawohan ni Jehova, gindadayaw ngan pinasasalamatan naton an aton langitnon nga Amay ha paghatag ha aton han totoo nga katuyoan ha kinabuhi, makapatagbaw nga buruhaton ha pag-alagad ha iya, ngan malamrag nga panlantaw para han tidaraon. Nagkikinabuhi kita nga naghuhulat hin madasigon ha katumanan han ngatanan nga mga saad han Dios ngan determinado nga ‘magpadayon kita ha gugma han Dios, nga ginlalantaw an kinabuhi nga waray kataposan.’ (Judas 20, 21) Malipayon gud kita nga makita nga an daku nga panon nga nagdadayaw ha Dios mga 6,000,000 na yana an kadamu! Pinaagi han matin-aw nga bendisyon ni Jehova, an dinihogan nga nanhibilin upod an ira iba nga mga karnero nga mga kaupod organisado ha mga 91,000 nga kongregasyon ha 235 nga nasud. Kita ngatanan ginpapakaon hin maopay ha espirituwal pinaagi han waray pagkakapoy nga mga pangalimbasog han ‘matinumanon ngan maaramon nga uripon.’ (Mateo 24:45) An mainuswagon teokratiko nga organisasyon nga mayada mahigugmaon nga pagmangno nagdudumara han buruhaton han Ginhadian pinaagi han 110 nga sanga nga opisina han mga Saksi ni Jehova. Mapasalamaton kita nga ginpapagios ni Jehova an mga kasingkasing han iya katawohan ha ‘pagpasidungog ha iya pinaagi han ira birilhon nga mga butang.’ (Proberbios 3:9, 10) Sugad nga resulta, nagpapadayon an aton pagwali nga buruhaton ha bug-os nga kalibotan, upod an pagtukod han ginkikinahanglan nga mga pasilidad ha pag-imprinta, mga balay han Bethel ngan han mga misyonero, mga Kingdom Hall, ngan mga Assembly Hall.
20. Mationan-o sadang makaapekto ha aton an pamalandong ha dagku ngan darayawon nga mga buhat ni Jehova?
20 Diri gud naton mauunabi an ngatanan dagku ngan darayawon nga mga buhat han aton langitnon nga Amay. Kondi an usa nga matadong an kasingkasing makakalikay ba ha pag-upod ha panon han mga magdarayaw ni Jehova? Siyempre diri! Salit, an ngatanan nga mga nahigugma ha Dios malipayon nga magsinggit: “Pagdayawa niyo hi Jehova. Pagdayawa niyo hi Jehova tikang ha mga langit: Pagdayawa hiya dida ha kahitas-an. Pagdayawa hiya niyo, an ngatanan nga iya mga manurunda: . . . An mga olitawo ngan mga daraga; Mga lagas nga kalalakin-an ngan kabataan: Pagdayawon nira an ngaran ni Jehova; Kay an iya ngaran amo la an maigbawan; An iya himaya igbaw ha tuna ngan ha mga langit.” (Salmo 148:1, 2, 12, 13) Oo, yana ngan ha kadayonan, pagdayawon naton hi Jehova tungod han iya dagku nga mga buhat!
Paonan-o Mo Babatunon?
• Ano an pipira han darayawon nga mga buhat ni Jehova?
• Kay ano nga napapagios ka ha pagdayaw kan Jehova?
• Paonan-o nadepende ha dagku nga mga buhat han Dios an aton paglaom?
• Paonan-o ginbubuhat ni Jehova an darayawon nga mga buhat may kalabotan han buruhaton nga pagwali-han-Ginhadian?
[Retrato ha pahina 10]
Bug-os-kasingkasing ba nga naduyog ka ha pagkanta hin mga pagdayaw kan Jehova?
[Mga Retrato ha pahina 13]
Nalilipay kita nga abrido pa gihapon an higayon para ha mga maaghop nga umupod ha aton ha pagdayaw kan Jehova