Tindog hin Marig-on Ngan Kitaa an Pagluwas ni Jehova!
“Magpahamutang kamo, tindog hin marig-on ngan kitaa an pagluwas ni Jehova ha iyo.”—2 KRONIKAS 20:17, NW.
1, 2. Kay ano nga an tiarabot nga pag-atake ni “Gog han tuna han Magog” may-ada mas daku nga epekto kay ha peligro han internasyonal nga terorismo?
AN TERORISMO iginhuhulagway han iba sugad nga pag-atake ha komunidad han kalibotan, ha sibilisasyon pa ngani mismo. Oo, kinahanglan tagdon hin seryoso an sugad nga peligro. Ha luyo nga bahin, may-ada usa pa nga pag-atake nga magkakaada mas daku nga epekto, nga ginbabalewaray o diri gintatagad han komunidad han kalibotan. Ano ito?
2 Amo ito an pag-atake ni “Gog han tuna han Magog,” nga gin-uunabi ha Biblia ha Esekiel kapitulo 38. Sobra ba an pagsiring nga ini nga pag-atake may-ada mas daku nga epekto kay ha peligro han internasyonal nga terorismo? Diri gud, tungod kay an pag-atake ni Gog nalahos pa ha pag-atake ha mga gobyerno han tawo. Naatake ito ha langitnon nga gobyerno han Dios! Kondi, diri pariho ha mga tawo, nga bangin limitado la an paglampos ha pagsagang han mga pag-atake ha ira sistema, an Maglalarang bug-os nga may kapas ha pagsagang ha mas mabangis nga pag-atake ni Gog.
Pag-atake ha Gobyerno han Dios
3. Tikang han 1914, gin-aaghat an mga magmarando han kalibotan nga buhaton an ano, ngan ano an ira baton?
3 Nagpapadayon an away butnga han nagmamando na yana nga Hadi han Dios ngan han maraot nga sistema ni Satanas tikang nga natukod an Ginhadian han Dios ha mga langit han 1914. Hiton nga panahon, an tawhanon nga mga magmarando ginsumatan nga magpasakop ha Magmarando nga pinili han Dios. Kondi nagdumiri hira ha pagpasakop, sugad han igintagna: “An mga hadi ha tuna magkakatukdaw, ngan an mga punoan naggigisarusagdon, pagtigi kan Jehova, ngan patok han iya Hinirogan, nga nasiring: Pagraptusa ta an ira mga higot, ngan ilabog ta an ira mga pisi tikang ha aton.” (Salmo 2:1-3) An pagdumiri ha pagmando han Ginhadian matin-aw nga maabot ha pungkay hito durante han pag-atake ni Gog han Magog.
4, 5. Paonan-o makikig-away an mga tawo ha diri-nakikita, langitnon nga gobyerno han Dios?
4 Bangin maghunahuna kita kon paonan-o makikig-away an mga tawo kontra ha diri-nakikita, langitnon nga gobyerno. Ini nga gobyerno, sugad han iginpapahayag ha Biblia, ginkukompuwesto han “usa ka gatos ngan kap-atan kag upat ka yukot, nga adton mga gintubos tikang ha tuna,” upod han “Kordero,” hi Kristo Jesus. (Pahayag 14:1, 3; Juan 1:29) Tungod kay an bag-o nga gobyerno aadto ha langit, tinatawag ito nga “bag-o nga mga langit,” samtang an tunan-on nga mga sakop hito husto la nga tawagon nga “bag-o nga tuna.” (Isaias 65:17; 2 Pedro 3:13) An kadam-an han 144,000 nga mga igkasi-magmarando ni Kristo matinumanon nga nakatapos na han ira pagkinabuhi ha tuna. Hito nga paagi napamatud-an nira an ira pagin takos ha pagkarawat han ira bag-o nga mga toka han pag-alagad ha langit.
5 Kondi, usa ka gutiay nga nanhibilin han 144,000 an aanhi pa ha tuna. Ha sobra 15,000,000 nga tinambong ha selebrasyon han Panihapon han Ginoo han 2002, may-ada la 8,760 nga nagpahayag han ira paglaom sugad nga pinili para hinin langitnon nga toka. Bisan hin-o nga magsari ha pag-atake ha nahibibilin pa nga magigin mga membro han Ginhadian, ha pagkamatuod naatake ha Ginhadian han Dios.—Pahayag 12:17.
Gintatapos han Hadi an Iya Pagdaog
6. Paonan-o gintatagad ni Jehova ngan ni Kristo an pagkontra ngada ha katawohan han Dios?
6 Igintagna an reaksyon ni Jehova ha pagkontra ha iya natukod na nga Ginhadian: “Hiya nga nalingkod ha kalangitan magtatawa: an Ginoo magyuyubit ha ira. Niyan magyayakan hiya ha ira ha iya kasina, ngan paglilisangon hira niya ha iya gidadakui nga kasina: kondi ibinutang ko an akon hadi ha bawbaw han akon baraan nga bukid nga Sion.” (Salmo 2:4-6) Inabot na an panahon yana para kan Kristo, ilarom han giya ni Jehova, “ha pagtapos han iya pagdaog.” (Pahayag 6:2, NW) Paonan-o gintatagad ni Jehova an pagkontra ngada ha iya katawohan durante han panahon han ultimo nga away? Gintatagad ito ni Jehova sugad nga pagkontra ha iya mismo ngan ha iya nagmamando nga Hadi. “Hiya nga nakamkam ha iyo nakamkam ha tawotawo han akon mata,” siring ni Jehova. (Sakarias 2:8, NW) Ngan mapuwersa nga nagsiring hi Jesus nga gintatagad niya an ginbubuhat o diri ginbubuhat han mga tawo ngada ha iya dinihogan nga kabugtoan sugad nga ginbubuhat o diri ginbubuhat ngada ha iya.—Mateo 25:40, 45.
7. Tungod ha ano nga mga hinungdan nga adton ha “daku nga panon,” nga iginhulagway ha Pahayag 7:9, nakakaeksperyensya han kasina ni Gog?
7 Syempre, adton aktibo nga nasuporta ha dinihogan nga nanhibilin makakaeksperyensya liwat han kasina ni Gog. Inin magigin mga membro han “bag-o nga tuna” han Dios amo an “kadam-an nga mga tawo [“daku nga panon,” NW]” nga gintawag “tikang ha tagsatagsa nga nasud ngan ha ngatanan nga mga panon, ngan mga katawohan ngan mga yinaknan.” (Pahayag 7:9) Gin-uunabi hira sugad nga “nagkakatukdaw ha atubangan han hadianon nga lingkuranan, ngan han Kordero, ngan nanmamanapton hin mga magbusag nga panapton nga higlawig.” Hito nga paagi may-ada hira inuyonan nga kahimtang ha atubangan han Dios ngan ni Kristo Jesus. Samtang nagdadara hira hin “mga palwa dida ha ira mga kamot,” gindadayaw nira hi Jehova sugad nga an may-katungod nga Soberano han uniberso, nga an iya pagmando ginbubuhat pinaagi han iya nahitrono nga Hadi, hi Jesu-Kristo, “an Kordero han Dios.”—Juan 1:29, 36.
8. An pag-atake ni Gog magigin hinungdan nga bubuhaton ni Kristo an ano, ngan ano an resulta?
8 An pag-atake ni Gog magpapahinabo han nahitrono nga Hadi han Dios nga gumios ngan makig-away ha girra han Armagedon. (Pahayag 16:14, 16) Adton nagdudumiri ha pagkilala ha pagkasoberano ni Jehova mag-aantos hin kabungkagan. Adton nagpapailob ha kagol-anan tungod han ira pagkamaunungon ha Ginhadian han Dios, ha luyo nga bahin, makakaeksperyensya hin permanente nga katalwasan. Mahitungod hini, hi apostol Pablo nagsurat: “Amo ini an matuod nga tigaman han matadong nga paghukom han Dios; basi nga maihap kamo nga mga takos ha ginhadian han Dios, nga tungod hini nag-aantos kamo man: kon angay ba nga an Dios magbayad hin kasakitan ha mga nagsasakit ha iyo, ngan kamo nga mga ginsasakit mapahuway kamo upod ha amon, ha pagpahayag han Ginoo nga hi Jesus tikang ha langit upod an mga anghel han iya gahum ha malaga nga kalayo, ha paghatag hin bulos ha mga waray kumilala ha Dios, ngan ha waray pagtuman han maopay nga sumat han aton Ginoo Jesus.”—2 Tesalonika 1:5-8.
9, 10. (a) Paonan-o iginhatag ni Jehova ha Juda an kadaogan kontra han makusog nga kaaway? (b) Ano an kinahanglan padayon nga buhaton yana han mga Kristiano?
9 Durante han tiarabot nga daku nga kagol-anan, nga maabot ha pungkay ha Armagedon, hi Kristo makikig-away ha ngatanan nga maraot. Kondi diri kinahanglan makig-away an iya mga sumurunod, sugad la nga diri na ito kinahanglan buhaton han mga umurukoy ha duha-nga-tribo nga ginhadian han Juda yinukot ka tuig na an naglabay. Kan Jehova an pakig-away, ngan iginhatag niya an kadaogan. An rekord mababasa: “Hi Jehova nagbutang hin mga maghurupol patok ha mga anak ni Amon, ni Moab ngan han bukid ha Seir, nga nakada patok ha Juda: ngan hira hinampak. Kay an mga anak ni Amon ngan ni Moab tinmindog patok han mga umurukoy ha bukid ha Seir, ha pagpatay ngan paggunaw ha ira ha tinuod: ngan han ira pakatapos han mga umurukoy ha Seir, an usa binulig paggunaw han usa. Ngan han pag-abot han Juda ngadto ha balwarte han kamingawan, hira nagtan-aw ngada ha kadam-an; ngan, kitaa, hira mga patay nga mga lawas nga nagkakapupukan ha tuna, ngan waray nakapalagiw.”—2 Kronikas 20:22-24.
10 Sugad gud ito han igintagna ni Jehova: “Diri kamo kinahanglan makiaway.” (2 Kronikas 20:17) Naghahatag ini hin susbaranan nga angay sundon han mga Kristiano kon gumios na hi Jesu-Kristo ha “pagtapos han iya pagdaog.” Samtang yana, nagpapadayon hira ha pakig-away ha maraot, diri pinaagi han literal nga mga armas, kondi han espirituwal. Hito nga paagi hira ‘padayon nga nagdadaog ha maraot pinaagi han maopay.’—Roma 6:13; 12:17-21; 13:12; 2 Korinto 10:3-5.
Hin-o an Mangunguna ha Pag-atake ni Gog?
11. (a) Ano nga mga ahensya an gagamiton ni Gog ha pagbuhat han iya pag-atake? (b) Ano an nahiuupod ha pagin alerto ha espirituwal?
11 Ipinapakilala hi Gog han Magog sugad nga hi Satanas nga Yawa ha iya ginpaubos nga kahimtang tikang han 1914. Sugad nga espiritu nga linarang, diri niya mahihimo an iya direkta nga pag-atake, kondi gagamiton niya an tawhanon nga mga ahensya ha pagbuhat han iya mga katuyoan. Hin-o ini nga tawhanon nga mga ahensya? An Biblia diri naghahatag ha aton hin mga detalye, kondi naghahatag ito ha aton hin masasarigan nga mga pangirilal-an nga makakabulig ha aton basi makilala kon hin-o hira. Samtang nahitatabo an mga panhitabo ha kalibotan sugad nga katumanan han mga tagna ha Biblia, hinay-hinay nga magkakaada kita mas matin-aw nga pagsabot. Ginlilikyan han katawohan ni Jehova an pagbanabana kondi nagpapabilin hira nga alerto ha espirituwal, bug-os nga maaram han mga nahitatabo ha politika ngan ha relihiyon nga nahitutukma ha katumanan han tagna ha Biblia.
12, 13. Paonan-o igintagna ni propeta Daniel an ultimo nga pag-atake ha katawohan han Dios?
12 Hi propeta Daniel nagpahayag hin dugang nga impormasyon mahitungod han ultimo nga pag-atake kontra han katawohan han Dios, nga nagsurat: “Hiya [an hadi han amihanan] magawas ha daku nga kapintas ha paggunaw ngan ha pagsilhig ha tinotoo hin damu. Ngan hiya mag-uusok han mga salapdag han iya palasyo ha katutung-an han dagat ngan han mahimayaon ngan baraan nga bukid.”—Daniel 11:44, 45.
13 Ha konteksto ha Biblia, ‘an dagat’ amo an Daku nga Dagat, o an Mediteranyo, ngan an “baraan nga bukid” amo an Sion, nga mahitungod hito hi Jehova nagsiring: “Ibinutang ko an akon hadi ha bawbaw han akon baraan nga bukid nga Sion.” (Salmo 2:6; Josue 1:4) Salit, ha espirituwal nga kahulogan, an tuna ‘ha katung-anan han dagat ngan han baraan nga bukid’ nagrirepresentar ha mainuswagon nga espirituwal nga kahimtang han dinihogan nga mga Kristiano. Diri na hira kaupod han dagat han katawohan nga nagpahirayo ha Dios, ngan nagpapamulat hira ha pagmando upod ni Kristo Jesus ha langitnon nga Ginhadian. Matin-aw, an dinihogan nga mga surugoon han Dios, upod an ira maunungon nga mga kaupod nga amo an daku nga panon, magigin puntirya han hadi han amihanan kon tikangan na niya an iya mabangis nga pag-atake sugad nga katumanan han tagna ni Daniel.—Isaias 57:20; Hebreo 12:22; Pahayag 14:1.
Paonan-o Magios an mga Surugoon han Dios?
14. Ano an tulo nga butang nga bubuhaton han katawohan han Dios kon atakehon na hira?
14 Ano an malalaoman nga bubuhaton han mga surugoon han Dios kon atakehon na hira? An paggios han simboliko nga nasud han Dios ha panahon ni Jehosapat amo na liwat an susbaranan. Tigamni nga an mga tuminungnong hito ginsugo nga buhaton an tulo nga butang: (1) magpahamutang hira, (2) tumindog hin marig-on, ngan (3) kitaon an pagluwas ni Jehova. Paonan-o magios an katawohan han Dios yana uyon hini nga mga pulong?—2 Kronikas 20:17.
15. Ano an kahulogan han pagpahamutang han katawohan ni Jehova?
15 Magpahamutang hira: An katawohan han Dios magpapadayon ha pagtipig han ira aktibo nga suporta ha Ginhadian han Dios nga waray pag-alang-alang. Padayon nga titipigan nira an ira Kristiano nga neutralidad. Hira magigin “marig-on nga diri sadang mabantad” ha ira maunungon nga pag-alagad kan Jehova ngan magpapadayon ha pagdayaw kan Jehova ha kadaygan tungod han iya mahigugmaon-nga-pagkabuotan. (1 Korinto 15:58; Salmo 118:28, 29) Waray presente o tidaraon nga pag-ipit nga makakabantad ha ira tikang hinin inuyonan han Dios nga kahimtang.
16. Ha ano nga paagi matindog hin marig-on an mga surugoon ni Jehova?
16 Tumindog hin marig-on: An mga surugoon ni Jehova diri magsasari ha pagluwas ha ira kalugaringon kondi bug-os nga masarig hira kan Jehova. Hiya la an may-ada kapas ha pagtalwas ha iya mga surugoon tikang ha kasamok hini nga kalibotan, ngan nagsasaad hiya nga buhaton ito. (Isaias 43:10, 11; 54:15; Pagtangis 3:26) An pagsarig kan Jehova mag-uupod han pagsarig ha moderno nga nakikita nga agianan nga matin-aw nga ginagamit niya hin mga katuigan na ha pagtuman han iya mga katuyoan. Ha sukol nga waray pa gud kinahanglana ha naglabay, an totoo nga mga Kristiano kinahanglan sumarig ha mga igkasi-magsiringba nga gintaporan ni Jehova ngan han iya nagmamando nga Hadi nga manguna. Inin matinumanon nga kalalakin-an maggigiya ha katawohan han Dios. An pagbalewaray han ira giya mahimo magresulta hin kalamidad.—Mateo 24:45-47; Hebreo 13:7, 17.
17. Kay ano nga makikita han matinumanon nga mga surugoon han Dios an pagluwas ni Jehova?
17 Kitaon an pagluwas ni Jehova: Kaluwasan an magigin balos para han ngatanan nga nagtitipig han ira Kristiano nga integridad ngan hadton nasarig kan Jehova para han kaluwasan. Tubtob ha ultimo nga oras—ngan ha paagi nga mahihimo nira—ipapahibaro nira an pag-abot han adlaw han paghukom ni Jehova. An ngatanan nga mga linarang kinahanglan mahibaro nga hi Jehova an matuod nga Dios ngan may-ada hiya matinumanon nga mga surugoon ha tuna. Diri na gud mauutro an hilawig nga paglantugi mahitungod ha pagkahusto han pagkasoberano ni Jehova.—Esekiel 33:33; 36:23.
18, 19. (a) Paonan-o ipinapakita han karantahon han pagdaog ha Eksodo kapitulo 15 an mga pagbati hadton maluluwas ha pag-atake ni Gog? (b) Ano an angay pagbuhaton han katawohan han Dios yana?
18 An katawohan han Dios masulod ha bag-o nga kalibotan nga may-ada nabag-o nga kusog, andam ha pagkanta han karantahon han pagdaog, sugad la han ginbuhat han kadaan nga mga Israelita katapos han ira kaluwasan ha Dagat nga Pula. Tungod kay mapasalamaton ha kadayonan kan Jehova tungod han iya panalipod, sugad nga indibiduwal ngan sugad nga grupo, yayaknon nira an mga pulong han maiha na nga naglabay: “Magkakanta ako kan Jehova, kay nagdaog hiya nga mahimayaon: . . . hi Jehova amo an tawo ha pakig-away; hi Jehova amo an iya ngaran. . . . An imo too nga kamot, O Jehova, nagruruba han kaaway. Ngan ha kadaku han imo pagkaharangdon dinaog mo hira nga natindog patok ha imo. Imo ipinadadara an imo kapungot, ginlamoy hira hini sugad hin dagami. . . . Ha imo kalooy ikaw nagtugway han katawohan nga imo gintubos: imo hira ginmandoan ha imo kusog ngadto ha imo baraan nga puroy-anan. . . . Pagdadad-on mo hira nganhi, ngan pagtatanmon hira ha bukid nga imo panurundon, an lugar, O Jehova, nga imo ginhimo nga urukyan mo, an santuaryo, O Ginoo, nga gintindog han imo mga kamot. Hi Jehova maghahadi ha waray kataposan.”—Eksodo 15:1-19.
19 Yana nga mas malamrag an paglaom ha kinabuhi nga waray kataposan kay ha naglabay, ini an angayan nga panahon para ha mga surugoon han Dios nga ipakita an ira debosyon kan Jehova ngan parig-unon an ira determinasyon nga mag-alagad ha iya sugad nga ira waray kataposan nga Hadi!—1 Kronikas 29:11-13.
Maisasaysay Mo Ba?
• Kay ano nga an pag-atake ni Gog ipapadapat kontra ha mga dinihogan ngan ha iba nga mga karnero?
• Paonan-o magpapahamutang an katawohan han Dios?
• Ano an kahulogan han pagtindog hin marig-on?
• Paonan-o makikita han katawohan han Dios an pagluwas ni Jehova?
[Retrato ha pahina 18]
Iginhatag ni Jehova kan Jehosapat ngan ha iya katawohan an kadaogan, salit diri na hira kinahanglan makig-away
[Retrato ha pahina 20]
An mga dinihogan ngan an iba nga mga karnero nagkakaurosa ha pagparig-on han pagkasoberano ni Jehova
[Retrato ha pahina 22]
Pariho han kadaan nga mga Israelita, an katawohan han Dios ha diri na mag-iiha magkakanta han karantahon han pagdaog