Mga Milagro—Totoo o Surumatanon?

NAOBSERBAHAN dayon han lalaki an istiker ha bamper han usa nga nalabay nga awto, “Nahitatabo an mga Milagro—Pakianhi Pa an mga Anghel.” Bisan kon relihiyoso hiya, diri hiya sigurado kon ano an iginpapasabot hito. Nangangahulogan ba ito nga an drayber natoo ha mga milagro? O usa ba ito nga inintremes nga paagi han pagpakita hin kawaray pagtoo ha mga milagro ngan mga anghel?

Bangin magin interesado ka ha komento han Aleman nga awtor nga hi Manfred Barthel: “An milagro usa nga pulong nga nakakagbahin dayon han mga magbarasa ngadto ha duha nga grupo nga magkaiba an opinyon.” Adton natoo ha mga milagro kombinsido nga nahitatabo ito ngan bangin agsob mahitabo.a Pananglitan, iginreport nga ha Gresya durante hinin naglabay pa la nga pipira ka tuig, an mga tumuroo nagsiring nga an mga milagro nahitatabo mga usa ka beses ha usa ka bulan. Tungod hini an usa nga obispo ha Griego Ortodokso nga Iglesia nagpahamangno: “An tumuroo nahihilig ha paghunahuna nga an Dios, hi Maria, ngan an mga santo may-ada tawhanon nga personalidad. Diri sadang pasobrahan han mga tumuroo an mga butang may kalabotan hini.”

An pagtoo ha mga milagro diri gud sugad kakalyap ha iba nga mga nasud. Sumala ha usa nga surbey ha Allensbach nga iginpublikar ha Alemanya han 2002, 71 porsyento han mga tuminungnong hito an naghuhunahuna nga an mga milagro surumatanon la, diri totoo. Kondi, kaupod han diri maabot hin ikatulo ka bahin nga natoo ha mga milagro an tulo nga kababayin-an nga nasiring nga kinarawat hira hin mensahe tikang kan Birhen Maria. Mga pipira la ka bulan katapos han pagpakita kuno ni Maria ha ira—nga inupdan hin mga anghel ngan usa nga sarapati—an pahayagan ha Alemanya nga Westfalenpost nagreport: “Tubtob yana, mga 50,000 nga pilgrimo, mga tawo nga namimiling hin pagtambal, sugad man han mga usyusiro an nagpapakita hin duro nga interes ha mga bisyon nga nakit-an han kababayin-an.” An dugang nga 10,000 nga mga tawo ginlaoman nga kumadto ha barangay basi kumita kan Maria kon magpakita utro hiya. An pariho nga mga pagpakita ni Birhen Maria ginsisiring nga nahitabo kuno ha Lourdes, Fransia, han 1858, ngan ha Fátima, Portugal, han 1917.

Kumusta Man an Diri-Kristiano nga mga Relihiyon?

Haros ngatanan nga mga relihiyon natoo ha mga milagro. An The Encyclopedia of Religion nagsasaysay nga an mga nagpatikang han Budhismo, Kristianidad, ngan Islam may-ada magkalainlain nga mga ideya mahitungod ha mga milagro, kondi nasiring ito: “An sumunod nga kasaysayan hini nga mga relihiyon matin-aw nga nagpapakita nga an mga milagro ngan mga istorya mahitungod han mga milagro nagin importante na nga bahin han relihiyoso nga mga gintotoohan han tawo.” Ini nga reperensya nasiring nga “hadto an Budha mismo usahay naghihimo hin mga milagro.” Ha urhi, han an “Budhismo iginbalhin ha Tsina, an mga misyonero hito agsob magpakita han ira mga gahum ha pagmilagro.”

Katapos unabihon an pipira han sugad nga mga milagro kuno, nagtapos ito nga ensayklopidya: “An usa bangin diri andam ha pagtoo hini ngatanan nga mga istorya mahitungod han mga milagro nga iginsumat han relihiyoso nga mga biograpo, kondi waray ruhaduha nga ginhimo ito nga may maopay nga intensyon ha paghimaya ha Budha, nga nakahatag ha iya madasigon nga mga sumurunod han sugad nga mga gahum ha pagmilagro.” Ito nga ensayklopidya nasiring liwat mahitungod han Islam: “An kadam-an han mga komunidad nga Islam padayon nga naglalaom hin mga milagro. Iginhuhulagway ha mga tradisyon (hadīths) nga hi Muhammad naghimo hin mga milagro ha publiko ha damu nga mga okasyon. . . . Bisan katapos mamatay an mga santo, gintotoohan nga ha ira mismo mga lubnganan naghihimo hira hin mga milagro para ha kaopayan han mga matinumanon, ngan sinsero nga ginhahangyo han mga tawo nga buligan hira han mga santo.”

Kumusta Man an mga Milagro ha Kristianidad?

Damu hadton nagkarawat na han Kristianidad an nababahin ha ira mga opinyon. Kinakarawat han iba nga totoo an mga sumat han Biblia mahitungod han mga milagro nga ginhimo ni Jesu-Kristo o han mga surugoon han Dios durante han antes-Kristiano nga mga panahon. Kondi, damu an nauyon ha Protestante nga Repormador nga hi Martin Luther. An The Encyclopedia of Religion nasiring mahitungod ha iya: “Hira Luther ngan Calvin nagsurat nga tapos na an panahon han mga milagro ngan diri na sadang laoman nga mahitatabo pa ito.” An Iglesia Katolika nagpadayon ha pagtoo ha mga milagro nga “diri nagsasari ha pagsaysay kon paonan-o ito nahitabo,” siring hini nga reperensya. Kondi, “an intelektuwal nga komunidad han mga Protestante hinay-hinay nga tinoo nga an Kristianidad ha kadak-an may kalabotan la ha moralidad, ngan an Dios o an kalibotan han mga espiritu diri gud nakikigkomunikar o nakakaimpluwensya ha totoo nga kinabuhi han tawo.”

An iba nga nag-aangkon nga mga Kristiano, upod na an pipira nga mga klerigo, nagruruhaduha kon totoo an mga milagro nga gin-unabi ha Biblia. Pananglitan, paghisgotan naton an asoy mahitungod han naglalaga nga kahoy-kahoy nga mababasa ha Biblia, ha Eksodo 3:1-5. An libro nga What the Bible Really Says nagsasaysay nga damu han mga teologo nga Aleman an diri naghuhunahuna nga literal ini nga asoy mahitungod han usa nga milagro. Lugod, gin-iinterpretar nira ito sugad nga “usa nga simbolo han duro nga kasakitan ni Moises tungod han iya padayon nga pag-abat hin pagbasol ngan duro nga kakonsensya.” An libro nagdudugang: “An mga laga mahimo liwat sabton sugad nga mga bukad nga tigda nga nabuklad ha sirak han presensya han Dios.”

Bangin diri ka matagbaw ha sugad nga pagsaysay. Salit, ano an sadang mo toohan? Reyalistiko ba nga tumoo nga may-ada gud nahitabo nga mga milagro? Ngan kumusta man an mahitungod han mga milagro yana nga panahon? Tungod kay diri naton mapapakianhan an mga anghel, hin-o an aton mapapakianhan?

An Punto-de-Bista han Biblia

Waray makakagnigar nga an Biblia nagsusumat nga ha naglabay nga mga panahon, an Dios usahay nanhihilabot basi himoon an mga buhat nga imposible para ha tawo. Mahitungod ha iya, aton mababasa: “[Ikaw] nagdara han imo katawohan an Israel tikang ha tuna ha Ehipto pinaagi han mga pangirilal-an, ngan han mga katingalahan, ngan han makusog nga kamot, ngan han inunat nga butkon, ngan han daku nga makaharadlok.” (Jeremias 32:21) Hunahunaa la, an gamhanan hinduro nga nasud hito nga panahon nagin taramayon tungod han napulo nga peste nga iginpadara han Dios, upod na an kamatay han mga suhag nga anak hito. Milagro gud ito!—Eksodo, kapitulo 7 tubtob 14.

Paglabay hin mga siglo, an upat nga parasurat han Mga Ebanghelyo naghulagway hin mga 35 nga milagro nga ginbuhat ni Jesus. Ha pagkamatuod, ipinapakita han ira mga asoy nga nagbuhat hiya hin mas damu nga mga milagro kay han ira iginsumat. Totoo ba ini nga mga asoy, o surumatanon la?b—Mateo 9:35; Lukas 9:11.

Kon an Biblia amo gud an sugad han gin-aangkon hito—nga Pulong ito han Dios mahitungod han kamatuoran—niyan may-ada ka marig-on nga hinungdan nga tumoo ha mga milagro nga ginhihisgotan hito. Matin-aw an Biblia ha pagsiring nga an mga milagro nahitabo ha naglabay nga mga panahon—milagroso nga mga panambal, mga pagbanhaw, ngan iba pa nga pariho hito—kondi sugad liwat kamatin-aw an pagsaysay hito nga diri na nahitatabo an sugad nga mga milagro. (Kitaa an kahon nga “Kon Kay Ano nga an mga Milagro Diri na Nahitatabo ha Paagi nga Pariho Hadto,” ha pahina 4.) Niyan, nagpapasabot ba ini nga bisan adton natoo ha Biblia diri natoo ha mga milagro yana nga panahon? Alayon basaha an baton ha sunod nga artikulo.

[Mga footnote]

[Kahon ha pahina 4]

KON KAY ANO NGA AN MGA MILAGRO DIRI NA NAHITATABO HA PAAGI NGA PARIHO HADTO

Magkalainlain nga mga milagro an gin-uunabi ha Biblia. (Eksodo 7:19-21; 1 Hadi 17:1-7; 18:22-38; 2 Hadi 5:1-14; Mateo 8:24-27; Lukas 17:11-19; Juan 2:1-11; 9:1-7) Damu hini nga mga milagro an nakabulig ha pagkilala kan Jesus sugad nga an Mesias, ngan nagpamatuod ito nga may-ada hiya han suporta han Dios. An siyahan nga mga sumurunod ni Jesus nagpakita hin milagroso nga mga abilidad, sugad han pagyakan hin magkalain-lain nga mga pinulongan ngan hilarom nga pagsabot mahitungod han giniyahan-han-Dios nga mga pulong. (Buhat 2:5-12; 1 Korinto 12:28-31) An sugad nga milagroso nga mga abilidad mapulsanon ha Kristiano nga kongregasyon durante han pagtikang hito. Paonan-o?

An usa nga hinungdan amo nga hadto nga panahon diri pa damu an mga kopya han Kasuratan. Kasagaran nga mga bahandianon la an may-ada han bisan ano nga klase hin linukot nga mga basahon o mga libro. Ha pagano nga mga nasud hadto, an mga tawo waray kahibaro mahitungod ha Biblia o ha Awtor hito, hi Jehova. An Kristiano nga katutdoan kinahanglan isumat ha berbal nga paagi. An milagroso nga mga abilidad mapulsanon ha pagpakita nga ginagamit han Dios an Kristiano nga kongregasyon.

Kondi hi Pablo nagsaysay nga mawawara ini nga mga regalo kon diri na ito kinahanglan. “An mga tagna may kataposan; an mga yinaknan matatapos; an kinaadman tatagan hin kataposan. Kay ha bahin nakilala kita, ngan ha bahin nananagna kita; kondi kon umabot na adton hingpit, an aada ha bahin bubutangan hin kataposan.”—1 Korinto 13:8-10.

Yana, an mga tawo masayon makagamit hin Biblia, sugad man hin mga konkordansya ngan mga ensayklopidya. Sobra unom ka milyon nga binansay nga mga Kristiano an nabulig ha iba nga mahibaro mahitungod ha Dios basado ha Biblia. Tungod hito, diri na ginkikinahanglan an mga milagro basi pamatud-an nga hi Jesu-Kristo an pinili han Dios nga Manluluwas o basi magtagana hin ebidensya nga binubuligan ni Jehova an iya mga surugoon.