Pagin Kwalipikado Para ha Kristiano nga Bawtismo
“Ano pa an nakakaulang pagbaptis ha akon?”—BUHAT 8:36.
1, 2. Paonan-o natikangan ni Felipe an pakiistorya ha Etiopiahanon nga opisyal, ngan ano an nagpapamatuod nga interesado ini nga tawo ha totoo nga pagsingba?
PAGLABAY hin usa o duha ka tuig tikang han kamatay ni Jesus, usa nga opisyal han gobyerno an nagbiyahe tipakadto ha sur dida ha dalan tikang ha Jerusalem ngadto ha Gasa. Makapoy ito nga biyahe ha karomata nga bangin 1,500 kilometro an kahirayo. Ini nga debotado nga lalaki nagbiyahe tikang ha Etiopia ngadto ha Jerusalem basi magsingba kan Jehova. Ha hirayo nga biyahe tipauli, ginamit niya hin maaramon an iya panahon pinaagi han pagbasa han Pulong han Dios—ebidensya ini han iya pagtoo. Nakita ni Jehova inin sinsero nga lalaki, ngan pinaagi han usa nga anghel, Iya ginsugo an disipulo nga hi Felipe nga sangyawan hiya.—Buhat 8:26-28.
2 Masayon nga natikangan ni Felipe an pakiistorya, tungod kay an Etiopiahanon nga opisyal nagbabasa ha daku nga tingog, nga batasan na hadto nga panahon. Salit, hinbatian ni Felipe nga binabasa niya an linukot nga basahon han Isaias. An usa nga simple nga pakiana ni Felipe nakaaghat han interes han opisyal: “Nasabot ka ba hiton imo ginbabasa?” Nagresulta ini ha paghisgot han Isaias 53:7, 8. Katapos, hi Felipe ‘nagsumat ha iya han maopay nga sumat mahitungod kan Jesus.’—Buhat 8:29-35.
3, 4. (a) Kay ano nga ginbawtismohan dayon ni Felipe an Etiopiahanon? (b) Ano nga mga pakiana an aton paghihisgotan yana?
3 Ha sulod hin halipot nga panahon, nasabtan han Etiopiahanon an buruhaton ni Jesus ha katuyoan han Dios, sugad man an panginahanglan nga magin bawtismado nga disipulo ni Kristo. “Ano pa an nakakaulang pagbaptis ha akon?” nagpakiana hiya kan Felipe han hinkit-an niya an hirani nga lugar nga may tubig. Syempre, talagsahon ini nga mga kahimtang. An Etiopiahanon nga opisyal usa nga matinoohon nga tawo nga nagsisingba na ha Dios sugad nga Judio nga nakumberte. Bangin maghulat pa hiya hin maiha nga panahon antes hiya magkaada higayon ha pagpabawtismo. An mas importante, nasabtan hini nga tawo kon ano an iginpapatuman ha iya han Dios, ngan karuyag niya nga kinasingkasing hiya nga sumunod. Malipayon nga inuyon hi Felipe ha iya hangyo, ngan an Etiopiahanon, katapos mabawtismohan, “nagpadayon nga malipayon.” Sigurado nga nagin madasigon hiya nga parasangyaw han maopay nga sumat ha iya natawohan nga nasud.—Buhat 8:36-39.
4 Bisan kon an mga pangandam ha dedikasyon ngan bawtismo sadang tagdon hin seryoso o diri sadang apurahon, an susbaranan han Etiopiahanon nga opisyal nagpapakita nga may-ada mga higayon hadto nga an mga indibiduwal ginbawtismohan dayon katapos makabati han kamatuoran han Pulong han Dios.a Salit, angay gud hunahunaon an masunod nga mga pakiana: Ano nga klase hin pangandam an sadang himoon antes han bawtismo? San-o sadang tagdon an edad? Ano nga espirituwal nga pag-uswag an sadang makita antes bawtismohan an usa ka tawo? Labaw ha ngatanan, kay ano nga ginkikinahanglan ni Jehova an iya mga surugoon nga magpabawtismo?
Usa ka Seryoso nga Pakigsabot
5, 6. (a) Paonan-o ginios an katawohan han Dios ha naglabay uyon ha gugma ni Jehova? (b) Ano nga duok nga relasyon ha Dios an mapapahimulosan naton kon magpabawtismo na kita?
5 Katapos talwason an mga Israelita tikang ha Ehipto, disidido hi Jehova ha pagkarawat ha ira sugad nga iya “kalugaringon” nga panag-iya, ha paghigugma ngan pagpanalipod ha ira ngan paghatag ha ira hin kadungganan sugad nga “baraan nga nasud.” Kondi, basi makarawat an sugad nga mga bendisyon, an katawohan kinahanglan gumios uyon ha gugma han Dios ha espisipiko nga paagi. Ira ginbuhat ini pinaagi han pag-uyon nga ira bubuhaton “an ngatanan nga ginyakan ni Jehova” ngan naghimo hin kauyonan ha iya. (Eksodo 19:4-9) Han siyahan nga siglo, ginsugo ni Jesus an iya mga sumurunod nga manhimo hin mga disipulo ha mga tawo han ngatanan nga mga nasud, ngan ginbawtismohan adton nagkarawat han iya katutdoan. An maopay nga relasyon ha Dios nagdepende ha pagtoo kan Jesu-Kristo ngan sinundan han bawtismo.—Mateo 28:19, 20; Buhat 2:38, 41.
6 Ini nga mga asoy ha Kasuratan nagpapakita nga ginbibendisyonan ni Jehova adton sinsero nga nagsasaad nga mag-aalagad ha iya. Para ha mga Kristiano, an dedikasyon ngan bawtismo kinahanglanon nga mga pitad nga nagriresulta hin bendisyon ni Jehova. Determinado kita nga sundon an iya mga suruklan ngan pamilngon an iya giya. (Salmo 48:14) Sugad nga resulta, simboliko nga kinakaptan ni Jehova an aton kamot ngan tinutugwayan kita dida ha dalan nga sadang naton paglaktan.—Salmo 73:23; Isaias 30:21; 41:10, 13.
7. Kay ano nga kita an kinahanglan magdesisyon para ha dedikasyon ngan bawtismo?
7 An motibo han aton pagbuhat hini nga mga pitad amo an gugma kan Jehova ngan hingyap nga mag-alagad ha iya. Diri sadang magpabawtismo an usa tungod la kay may-ada usa nga nasiring ha iya nga maiha na hiya nga nag-iinaram o tungod kay nagpapabawtismo an iya kasangkayan. Syempre, an mga kag-anak ngan an iba nga hamtong nga mga Kristiano mahimo magdasig ha usa ka tawo nga hunahunaon an mahitungod han dedikasyon ngan bawtismo. Gin-aghat ni apostol Pedro nga ‘magpabawtismo’ adton namati ha iya ha Pentekostes. (Buhat 2:38) Kondi, an aton dedikasyon usa ka personal nga desisyon, ngan waray iba nga makakahimo hito para ha aton. Kinahanglan kita an magdesisyon ha pagbuhat han kaburut-on han Dios.—Salmo 40:8.
Igo nga Pangandam Para ha Bawtismo
8, 9. (a) Kay ano nga an bawtismo ha minasus-an diri nauyon ha Kasuratan? (b) Ano nga pag-uswag ha espirituwal an sadang himoon han mga batan-on antes han bawtismo?
8 An kabataan ba makakahimo na ha pagdedikar nga iginbasar ha kahibaro? Waray ginsisiring an Kasuratan nga ginkikinahanglan nga edad para ha bawtismo. Kondi, an mga minasus-an sigurado nga diri pa mahimo magin mga tumuroo, makagdesisyon nga iginbasar ha pagtoo, o magdedikar ngadto ha Dios. (Buhat 8:12) Mahitungod han siyahan-siglo nga mga Kristiano, an historyador nga hi Augustus Neander nagsiring ha iya libro nga General History of the Christian Religion and Church: “Ginkinahanglan an bawtismo siyahan ha mga adulto la, tungod kay nasasabtan han mga tawo nga duok nga may kalabotan an bawtismo ngan an pagtoo.”
9 Ha kahimtang han mga batan-on, napapauswag han pipira an ira espirituwalidad samtang bata pa, pero nag-iiha pa antes ito mahimo han iba. Kondi, antes magpabawtismo, an usa nga batan-on sadang magkaada personal nga relasyon kan Jehova, husto nga pagsabot ha mga prinsipyo han Kasuratan, ngan matin-aw nga pagsabot kon ano an nahiuupod ha dedikasyon, sugad la han ginkikinahanglan ha mga adulto.
10. Ano an ginkikinahanglan antes magpadayon an usa ha dedikasyon ngan bawtismo?
10 Ginsugo ni Jesus an iya mga disipulo nga tutdoan an mga bag-ohan han ngatanan nga butang nga iya iginsugo. (Mateo 28:20) Salit, siyahan ha ngatanan, an mga bag-ohan kinahanglan magkaada husto nga kahibaro han kamatuoran, nga mabulig ha ira ha pagpatubo hin pagtoo kan Jehova ngan ha iya Pulong. (Roma 10:17; 1 Timoteo 2:4; Hebreo 11:6) Katapos, kon an kamatuoran han Kasuratan nakakabantad na han kasingkasing han usa ka tawo, nagpapagios ito ha iya nga magbasol ngan diri na magbuhat han iya ginbubuhat hadto antes mahibaro han kamatuoran. (Buhat 3:19) Ha kataposan, an tawo naabot ha punto nga karuyag na niya igdedikar an iya kalugaringon ngadto kan Jehova ngan magpabawtismo, sugad han iginsugo ni Jesus.
11. Kay ano nga importante nga regular nga nakikigbahin kita ha pagsangyaw nga buruhaton antes han bawtismo?
11 Usa pa nga importante nga pitad ha pag-uswag ngadto ha pagpabawtismo amo an pakigbahin ha pagsangyaw han maopay nga sumat han Ginhadian. Ini an pinakaimportante nga buruhaton nga iginpapabuhat ni Jehova ha iya katawohan durante hinin kataposan nga mga adlaw. (Mateo 24:14) Salit an diri-bawtismado nga mga magwarali mahimo magkaada kalipay ha pagsumat ha iba mahitungod han ira pagtoo. An pakigbahin hini nga buruhaton nag-aandam liwat ha ira para ha regular ngan madasigon nga pakigbahin ha ministeryo ha kanataran katapos han bawtismo.—Roma 10:9, 10, 14, 15.
May-ada ba Nakakaulang ha Imo ha Pagpabawtismo?
12. Ano an bangin nakakapugong ha iba ha pagpabawtismo?
12 An iba bangin nadiri pagpabawtismo tungod kay nag-aalang hira pagkarawat han responsabilidad nga kaupod hito. Nasasantop nira nga basi makasunod ha mga suruklan ni Jehova, kinahanglan maghimo hira hin daku nga mga pagbag-o ha ira kinabuhi. O bangin nahahadlok hira nga makuri an pagsunod ha mga iginpapatuman han Dios katapos han bawtismo. An iba bangin mangatadongan pa ngani, “Bangin usa ka adlaw ha tidaraon makabuhat ako hin maraot ngan paiwason ako ha kongregasyon.”
13. Han hi Jesus nakanhi ha tuna, ano an nakaulang ha iba nga magin mga sumurunod ni Jesus?
13 Han hi Jesus nakanhi pa ha tuna, gintugotan han iba an personal nga mga interes ngan relasyon ha pamilya nga makaulang ha ira nga magin iya mga disipulo. Usa nga eskriba an nagsiring nga masunod hiya kan Jesus bisan ngain Hiya magpakadto. Kondi iginsaysay ni Jesus nga ha kasagaran, waray ngani hiya lugar nga makakaturogan ha gab-i. Han gin-imbitar ni Jesus an usa pa nga mamarati nga magin iya sumurunod, ini nga lalaki binaton nga iya anay ‘iglulubong’ an iya amay. Bangin karuyag niya magpabilin ha balay ngan maghulat tubtob nga mamatay an iya amay imbes nga sumunod kan Jesus ngan atubangon ito nga responsabilidad ha pamilya kon kinahanglanon na. Ha kataposan, an ikatulo nga tawo nagsiring nga antes hiya sumunod kan Jesus, ‘masarit’ anay hiya ha iya pamilya. Iginhulagway ni Jesus an sugad nga paglangan sugad nga ‘paglingi’ ha mga butang nga aada ha luyo. Tungod hito, baga hin adton naglalangan pirme magbibiling hin mga pasangilan basi makalikay ha ira Kristiano nga responsabilidad.—Lukas 9:57-62.
14. (a) Paonan-o binaton hira Pedro, Andres, Jakobo, ngan Juan han gin-imbitar hira ni Jesus nga magin mga parapangisda hin mga tawo? (b) Kay ano nga diri kita sadang mag-alang ha pagkarawat han yugo ni Jesus?
14 Kabaliktaran gud hini an ginbuhat nira Pedro, Andres, Jakobo, ngan Juan. Han gin-imbitar hira ni Jesus nga sumunod ha iya ngan magin mga parapangisda hin mga tawo, an Biblia nasiring: “Ira dayon binayaan an ira mga pukot ngan nanunod kan Jesus.” (Mateo 4:19-22) Pinaagi han pagsunod dayon kan Jesus, personal nga naeksperyensyahan nira an ginsiring ni Jesus ha ira ha urhi: “Pas-ana niyo an akon yugo, ngan magtoon kamo ha akon, kay ako maaghop ngan mapainubsanon ha kasingkasing, ngan kamo makakaagi hin pagpahuway ha iyo mga kalag. Kay an akon yugo masayon, ngan an akon pinas-an magaan.” (Mateo 11:29, 30) Bisan kon an bawtismo may-ada paras-anon nga responsabilidad, ginsisiguro ha aton ni Jesus nga ito masayon ngan magaan nga makakarepresko dayon ha aton.
15. Paonan-o ipinapakita han mga susbaranan ni Moises ngan ni Jeremias nga makakasarig kita nga makakarawat naton an bulig han Dios?
15 Normal la nga umabat hin diri pakatuman han responsabilidad katapos han bawtismo. Ha siyahan, inabat ni Moises ngan ni Jeremias nga diri nira mahihimo an mga toka nga iginhatag ha ira ni Jehova. (Eksodo 3:11; Jeremias 1:6) Paonan-o ginpasarig hira han Dios? “Ako maupod ha imo,” siring niya kan Moises. “Ako upod ha imo ha pagluwas ha imo,” nagsaad hiya kan Jeremias. (Eksodo 3:12; Jeremias 1:8) Kita liwat makakasarig ha bulig han Dios. An gugma ha Dios ngan pagsarig ha iya makakabulig ha aton nga malamposan an nagpapadayon nga mga pagruhaduha kon makakagbuhat ba kita uyon ha aton dedikasyon. “Ha gugma waray kahadlok,” nagsurat hi apostol Juan, “kondi an hingpit nga gugma naglalabay han kahadlok.” (1 Juan 4:18) An gutiay nga bata bangin nahahadlok kon naglalakat hiya nga nag-uusahan, kondi nasarig hiya kon naglalakat hiya nga nakapot ha kamot han iya amay. Ha sugad man nga paagi, kon bug-os-kasingkasing nga nasarig kita kan Jehova, hiya nagsasaad nga iya tatadungon ‘an imo mga agianan’ samtang naglalakat kita kaupod niya.—Proberbios 3:5, 6.
Dungganon nga Okasyon
16. Kay ano nga an bawtismo nagkikinahanglan han bug-os nga pagpailarom ha tubig?
16 Antes han bawtismo kasagaran nga may-ada Kasuratanhon nga pahayag nga nagsasaysay han pagkaimportante han Kristiano nga bawtismo. Ha ikatarapos hini nga pahayag, an mga kandidato ginhahangyo nga ipahayag ha publiko an ira pagtoo pinaagi han pagbaton ha duha nga pakiana ha bawtismo. (Roma 10:10; kitaa an kahon ha pahina 22.) Katapos hito, an mga kandidato iginpapailarom ha tubig, uyon ha susbaranan nga ipinakita ni Jesus mismo. Iginsasaysay han Biblia nga katapos bawtismohan, hi Jesus ‘hinaw-as ha tubig’ o binangon “tikang ha tubig.” (Mateo 3:16; Markos 1:10) Matin-aw, hi Jesus bug-os nga iginpailarom ha tubig ni Juan nga Parabaptis.b An bug-os nga pagpailarom ha tubig angayan nga nagsisimbolo han aton daku nga pagbag-o ha aton kinabuhi—simboliko nga namamatay kita ha aton daan nga paagi han pagkinabuhi ngan gintitikangan an bag-o nga pagkinabuhi ha pag-alagad ha Dios.
17. Paonan-o an mga kandidato ha bawtismo ngan an mga nagkikita makakaamot ha dignidad han okasyon?
17 An bawtismo usa ka seryoso ngan makalilipay nga okasyon. Nasiring an Biblia nga hi Jesus nag-inampo han ginbawtismohan hiya ni Juan ha Salog Jordan. (Lukas 3:21, 22) Uyon hini nga susbaranan, an mga kandidato ha bawtismo yana sadang gumios nga may dignidad. Ngan tungod kay ginsasagda kita han Biblia nga magbado hin desente kada adlaw, labi na gud nga sadang kita magsul-ot hin desente nga pankarigo durante han aton bawtismo! (1 Timoteo 2:9) Maipapakita liwat han mga nagkikita an husto nga pagtahod pinaagi han pagpamati hin maopay ha pahayag ha bawtismo ngan pinaagi han pagkita ha pagbawtismo ha tubig ha organisado nga paagi.—1 Korinto 14:40.
Mga Bendisyon nga Napapahimulosan han Bawtismado nga mga Disipulo
18, 19. Ano nga mga pribilehiyo ngan mga bendisyon an nakakarawat tungod han bawtismo?
18 Kon igindedikar na naton an aton kalugaringon ngadto ha Dios ngan bawtismado na, nagigin bahin na kita han espesyal nga pamilya. Siyahan ha ngatanan, hi Jehova nagigin Amay ngan Sangkay naton. Bulag kita ha Dios han waray pa kita mabawtismohi; yana naipahiuli na kita. (2 Korinto 5:19; Kolosas 1:20) Pinaagi han halad ni Kristo, nagin duok kita ha Dios ngan hiya nagigin duok ha aton. (Jakobo 4:8) Iginsasaysay ni propeta Malakias kon paonan-o nagtatagad ngan namamati hi Jehova hadton nagamit ngan nagdadara han iya ngaran, ngan iginbubutang niya an ira mga ngaran ha iya libro han handumanan. “Hira maaakon,” nasiring an Dios, “ngan akon hira huhungayon [“malolooy ako ha ira,” NW], sugad han paghungay han usa ka tawo ha iya kalugaringon nga anak nga lalaki nga nag-aalagad ha iya.”—Malakias 3:16-18.
19 An bawtismo nabulig liwat ha aton nga magin bahin han bug-os-kalibotan nga pagminagburugto. Han hi apostol Pedro nagpakiana kon ano nga mga bendisyon an makakarawat han mga disipulo ni Kristo tungod han ira mga sakripisyo, hi Jesus nagsaad: “Bisan hin-o nga mabaya ha mga balay o mga kabugtoan nga lalaki, o mga kabugtoan nga babaye, o amay, o iroy, o mga anak, o mga tuna tungod ha akon ngaran makakakarawat hin usa ka gatos ka pilo, ngan manununod han kinabuhi nga waray kataposan.” (Mateo 19:29) Paglabay hin damu ka tuig, hi Pedro nagsurat mahitungod han bug-os nga asosasyon han “mga kabugtoan” nga nagtikadamu “ha kalibotan.” Hi Pedro nakaeksperyensya mismo han bulig ngan mga bendisyon han mahigugmaon nga kabugtoan, ngan makakaeksperyensya liwat kita hito.—1 Pedro 2:17; 5:9.
20. Ano nga makalilipay nga paglaom an makakarawat pinaagi han bawtismo?
20 Dugang pa, ipinakita ni Jesus nga adton nasunod ha iya “manununod han kinabuhi nga waray kataposan.” Oo, an dedikasyon ngan bawtismo naghahatag ha aton hin paglaom nga makaptan hin marig-on “an kinabuhi nga amo an kinabuhi nga totoo”—kinabuhi nga waray kataposan ha bag-o nga kalibotan han Dios. (1 Timoteo 6:19) Waray na mas maopay pa nga pundasyon para ha tidaraon nga matutukod naton para ha aton kalugaringon ngan para ha aton mga pamilya! Inin makalilipay nga paglaom mabulig ha aton nga ‘maglakat ha ngaran ni Jehova nga aton Dios ha kagihaponan.’—Mika 4:5.
[Mga footnote]
a An tulo ka yukot nga mga Judio ngan mga nakumberte nga namati ha pahayag ni Pedro ha Pentekostes nagpabawtismo dayon liwat. Syempre, pariho han Etiopiahanon nga yunuko, pamilyar na hira ha basihan nga mga katutdoan ngan mga prinsipyo han Pulong han Dios.—Buhat 2:37-41.
b An Griego nga pulong nga baʹpti·sma (bawtismo) nangangahulogan hin “mga proseso han pagpailarom ha tubig, pagtunod ngan paghaw-as,” sumala ha Expository Dictionary of New Testament Words ni Vine.
Maisasaysay Mo Ba?
• Paonan-o ngan kay ano nga sadang gumios kita uyon ha gugma ni Jehova?
• Ano nga espirituwal nga pag-uswag an sadang mahiuna ha bawtismo?
• Kay ano nga diri naton sadang tugotan nga makaulang ha aton pagpabawtismo an kahadlok nga mapakyas o an pag-alang ha pagkarawat han responsabilidad?
• Ano nga talagsahon nga mga bendisyon an mahimo mapahimulosan han bawtismado nga mga disipulo ni Jesu-Kristo?
[Retrato ha pahina 26]
“Ano pa an nakakaulang pagbaptis ha akon?”
[Mga Retrato ha pahina 29]
An bawtismo usa ka seryoso ngan makalilipay nga okasyon