Hi Jehova Mahigugmaon nga Nagmamangno ha Iya Lagas nga mga Surugoon
“An Dios diri nga diri matadong, nga hikalimtan niya an iyo buhat ngan an iyo gugma nga iyo iginpakita tungod ha iya ngaran.”—HEB. 6:10.
1, 2. (a) Ano an bangin mahinumdoman mo kon nakakakita ka hin mabusag na an buhok nga tawo? (b) Paonan-o gintatagad ni Jehova an lagas nga mga Kristiano?
KON imo nakikita an mabusag na nga buhok han kalagasan ha kongregasyon, may-ada ka ba nahinunumdoman nga asoy ha libro han Daniel ha Biblia? Ha usa nga bisyon nga iginhatag ni Jehova nga Dios kan Daniel, Iya iginpakita an Iya dagway nga busag na an buhok. Hi Daniel nagsurat: “Ako nagkinita ngada nga an mga trono iginbutang, ngan an usa nga Tigurang na ha mga Adlaw liningkod: an iya panapton mabusag sugad hin niebe, ngan an buhok han iya ulo pariho hin las-ay nga barahibo hin karnero.”—Dan. 7:9.
2 An natural nga barahibo han karnero kasagaran nga busag. Salit, an busag nga buhok ngan an titulo nga ‘Tigurang ha mga Adlaw’ nagpapasabot han diri-matupngan nga kinaadman ngan diri-maihap nga panuigon han Dios, ngan sadang naton ito pasidunggan. Kon sugad, paonan-o gintatagad han Tigurang ha mga Adlaw, hi Jehova, an magtinumanon nga kalagasan? An Pulong han Dios nasiring nga “an ubanon nga ulo amo an pudong-pudong han himaya; [kon] ini hiaagian dida ha dalan han pagkamatadong.” (Prob. 16:31) Oo, kon an matinumanon nga Kristiano ubanon na o busag na an buhok, an ira hamtong nga hitsura makaruruyag ha paniplatan han Dios. An imo ba pagtagad ha lagas nga kabugtoan pariho han pagtagad ni Jehova ha ira?
Kay Ano nga Hinigugma Gud Hira?
3. Kay ano nga hinigugma gud naton an edaran na nga mga igkasi-tumuroo?
3 Kaupod han mga hinigugma gud nga edaran na nga mga surugoon han Dios an mga membro han Nagmamando nga Lawas han mga Saksi ni Jehova, nagbibiyahe nga paramangno yana ngan hadto, madasigon nga payunir, ngan hamtong nga magwarali han Ginhadian—kabugtoan nga matinumanon nga nagsiserbi ha mga kongregasyon. Bangin may kilala ka nga madasigon nga nagsasangyaw han maopay nga sumat ha sulod hin damu ka tuig na ngan an iya maopay nga susbaranan nakakabulig ha pagdasig ngan pagmolde ha mga batan-on. An iba han aton edaran na nga mga igkasi-tumuroo nagpapas-an hin magbug-at nga responsabilidad ngan nag-aantos hin pagtimaraot tungod han maopay nga sumat. Inaapresyar gud ni Jehova ngan han “matinumanon ngan maaramon nga uripon” an ngatanan nga ira naibulig ha buruhaton han Ginhadian hadto ngan yana.—Mat. 24:45, NW.
4. Kay ano nga sadang naton tahuron an edaran na nga mga Kristiano ngan mag-ampo para ha ira?
4 Inin magtinumanon nga edaran na takos han pagpasalamat ngan pagtahod han iba pa nga surugoon ni Jehova nga Dios. Ha pagkamatuod, ha Balaud han Dios nga iginhatag pinaagi kan Moises, an pagtagad ngan pagtahod ha kalagasan iginkakaw-ing ha kahadlok kan Jehova. (Leb. 19:32) Sadang kita mag-ampo pirme para ha magtinumanon ngan magpasalamat ha Dios tungod han ira mahigugmaon nga mga buhat. Igin-ampo liwat ni apostol Pablo an iya hinigugma nga mga igkasi-magburuhat—batan-on ngan lagas.—Basaha an 1 Tesalonika 1:2, 3.
5. Paonan-o kita magpapahimulos ha pakig-upod ha edaran na nga mga magsiringba ni Jehova?
5 Dugang pa, an ngatanan ha kongregasyon makakapahimulos ha pakig-upod ha edaran na nga mga Kristiano. Pinaagi han pag-aram, pag-obserba, ngan eksperyensya, nakatirok na hin birilhon gud nga kahibaro an magtinumanon nga edaran na nga magsiringba ni Jehova. Nahibaro hira ha pagpailob ngan pagpakita hin pagpaid, ngan daku gud an ira kalipay ngan katagbaw kon igintututdo nira ha sunod nga henerasyon an ira hinbabaroan. (Sal. 71:18) Mga batan-on, magin maaramon ngan pahimulusi inin makukuhaan han kahibaro, sugad han imo pagkuha hin tubig ha hilarom nga atabay.—Prob. 20:5.
6. Paonan-o mo maipapakita ha mga edaran na nga hinigugma mo gud hira?
6 Iginpapahibaro mo ba ha mga edaran na nga hinigugma mo hira sugad han paghigugma ni Jehova ha ira? An usa nga paagi amo an pagsumat ha ira nga hinigugma mo gud hira tungod han ira pagkamatinumanon ngan ginpapabilhan mo gud an ira mga opinyon. Dugang pa, kon imo ginsusunod an ira mga sagdon, ipinapakita mo nga sinsero an imo pagtahod ha ira. Damu nga lagas na nga Kristiano an nakakahinumdom han maaramon nga sagdon ha ira han magtinumanon nga edaran na ngan kon paonan-o hira nagpahimulos ha bug-os nira nga kinabuhi pinaagi ha pagsunod hito.a
Ipakita an Mahigugmaon nga Pagtagad ha Praktikal nga mga Paagi
7. Hin-o an ginhatagan ni Jehova han siyahan nga responsabilidad ha pagmangno ha kalagasan?
7 An ginhatagan han Dios han siyahan nga responsabilidad ha pagmangno ha kalagasan amo an ira pamilya. (Basaha an 1 Timoteo 5:4, 8.) Nalilipay hi Jehova kon gintutuman han mga pamilya an ira obligasyon ha lagas nga mga kapamilya ngan hito nga paagi ira ipinapakita nga ginmamangnoan nira an kalagasan sugad han Iya pagmangno ha ira. Binubuligan han Dios ini nga mga pamilya ngan binibendisyonan hira tungod han ira pangalimbasog ngan han ngatanan nga ira sakripisyo.b
8. Kay ano nga an mga kongregasyon nagpapakita hin pagtagad ha lagas nga mga Kristiano?
8 Nalilipay liwat hi Jehova kon nabulig an mga kongregasyon ha magtinumanon nga kalagasan nga kinahanglan buligan kondi waray hira kapamilya nga Saksi o waray paryente nga naruruyag magmangno ha ira. (1 Tim. 5:3, 5, 9, 10) Hito nga paagi ipinapakita han mga kongregasyon nga hira ‘malolooyon, mahigugmaon sugad ha magburugto, ngan mapuanguron’ o mapinairon ha kalagasan. (1 Ped. 3:8) An ira pagtagad ha mga edaran na nga membro han kongregasyon igin-ilustrar hin maopay ni Pablo han hiya nagsiring nga kon an usa nga bahin han lawas nag-aantos, ‘an ngatanan nga bahin mag-aantos’ liwat. (1 Kor. 12:26) Ipinapakita han praktikal ngan mapinairon nga bulig ha kalagasan an prinsipyo ha sagdon ni Pablo: “Magdinaraay kamo han darad-on han usa kag usa, ngan tungod hini nagtutuman kamo ha balaud ni Kristo.”—Gal. 6:2.
9. Ano an mga kakurian han kalagasan?
9 Ano an mga kakurian han kalagasan? Damu ha ira an madagmit kapuyon. Bangin diri na nira naaakos bisan an magaan la nga buruhaton sugad han pagkadto ha doktor, paghulog hin surat, paglimpyo han balay, o pag-andam hin pagkaon. Tungod kay kon tikalagas na, nagtitikawara liwat an gana ha pagkaon ngan pag-inom, bangin mahunahuna nira nga diri na hira kinahanglan kumaon o uminom hin damu sugad han kinahanglanon gud nira. Sugad man hito an espirituwal nga pagkaon. Tungod han pagtikaharap ngan pagtikabungol nakukurian na hira ha pagbasa ngan pagpamati ha mga katirok, ngan bisan ha pagpangandam pa la basi makatambong bangin makapoy na hira. Kon sugad, ano an mahihimo han iba para ha ira?
Kon Ano an Imo Maibubulig
10. Ano an mahihimo han mga tigurang basi masiguro nga nakakarawat han kalagasan an ginkikinahanglan nga bulig?
10 Ha damu nga kongregasyon, ginmamangnoan gud hin maopay an kalagasan. Binubuligan hira han mahigugmaon nga kabugtoan ha pamalit, pagluto, ngan paglimpyo; sugad man ha pag-aram, pag-andam para ha mga katirok, ngan pagin regular ha ministeryo. Inuupdan hira han burobata nga mga Saksi ngan ginpapanginano an ira transportasyon. Kon diri na hira nakakabaya ha balay, nakakapamati hira han mga katirok pinaagi han telepono o iginrekord nga programa. Kon posible, ginsisiguro han mga tigurang nga nasusunod an praktikal nga mga kahikayan basi maihatag gud an ginkikinahanglan nga bulig han kalagasan ha ira kongregasyon.c
11. Isaysay kon paonan-o ginbuligan han usa nga pamilya an lagas nga bugto.
11 An tagsa nga Kristiano mahimo liwat magmaabiabihon ngan magmahinatagon. Han mamatay an pensyonada nga asawa han edaran na nga bugto, waray na hiya makabayad ha plete han balay kay inundang na an pensyon. Hira nga mag-asawa nagdumara hadto hin pag-aram ha Biblia ha usa nga pamilya, nga duha an tinedyer nga anak nga babaye—nga may-ada daku nga balay. An duha nga kwarto hito ira ginpaukyan ha iya. Nagin sugad hiya hin kapamilya na nira ngan ha sulod hin 15 ka tuig, malipayon nga nag-urupod hira. Daku gud an ira nahibaroan tikang ha iya pagtoo ngan damu nga eksperyensya, ngan hiya liwat nagpahimulos han makalilipay nga pagkaurupod. Inin lagas nga bugto linungon ha ira tubtob han mamatay hiya ha edad nga 89. Nagpapasalamat pa gihapon ha Dios ini nga pamilya tungod han damu nga bendisyon nga ira nakarawat pinaagi han pakig-upod ha iya. Waray ‘mawara an balos ha ira’ tungod ha pagbulig ha usa nga disipulo ni Jesu-Kristo.—Mat. 10:42.d
12. Ano an imo mahihimo basi ipakita an mahigugmaon nga pagtagad ha lagas nga kabugtoan?
12 Bangin diri mo maaakos nga bumulig ha lagas nga bugto sugad han ginbuhat hini nga pamilya, kondi posible nga mabubuligan mo hira nga makatambong ha mga katirok ngan makasangyaw. Mahimo mo liwat hira imbitaron ha iyo balay ngan iupod ha iyo pamasyada. Puydi mo hira bisitahon, labi na kon may sakit o ada na la hira ha balay. Dugang pa, mahimo ngan sadang mo tagdon pirme hira sugad nga hamtong nga adulto. Tubtob nga maopay pa an ira panhunahuna, sadang mo hira iupod ha ngatanan nga desisyon diin nahidadabi hira. Bisan adton haros nawara na an abilidad ha paghunahuna naabat pa gihapon kon ginpapasidunggan ngan gintatahod hira.
Diri Hingangalimtan ni Jehova an Imo Buhat
13. Kay ano nga importante an pagpakita hin pagtagad ha inaabat han lagas nga mga Kristiano?
13 Importante an pagpakita hin pagtagad ha inaabat han kalagasan. Normal la nga nasusubo hinduro hira tungod kay diri na nira nahihimo an ngatanan nga ira nahihimo hadto han burobata ngan makurokusog pa hira. Pananglitan, usa nga bugto nga babaye nga aktibo ha pag-alagad kan Jehova hin mga 50 ka tuig ngan nagregular payunir, an nagkaada sakit nga hinay-hinay nga nagpaluya ha iya salit nakurian na hiya pagtambong ha mga katirok. Han igintanding niya an iya ministeryo hadto ha limitado nga nahihimo niya yana, nahingatangis hiya. Dinuko hiya nga nagtatangis ngan nagsiring, “Waray na ako nahihimo yana.”
14. Ano nga pagdasig tikang ha mga salmo an makakarawat han lagas nga mga surugoon ni Jehova?
14 Kon edaran ka na, inabat mo na ba an sugad nga kasakit? O inaabat mo ba usahay nga bangin ginbayaan ka na ni Jehova? Bangin sugad liwat hito an inabat han salmista han lurolagas na hiya tungod kay nanginyupo hiya kan Jehova: “Ayaw ako isalikway kon ako matigurang na; ayaw ako pagpasibay-i kon an akon kusog lumuya. . . . Bisan kon ako matigurang ngan ubanon na an akon ulo, O Dios, ayaw ako bayai.” (Sal. 71:9, 18) Syempre, waray gud bayai ni Jehova an nagkomposo hito nga salmo, ngan diri ka liwat Niya babayaan. Ha usa pa nga salmo, iginpahayag ni David an iya pagsarig ha suporta han Dios. (Basaha an Salmo 68:19.) Kon matinumanon ka, makakasarig ka nga hi Jehova kaupod mo ngan magpapadayon ha pagbulig ha imo ha adlaw-adlaw.
15. Ano an makakabulig ha kalagasan nga matipigan an positibo nga panhunahuna?
15 Mga lagas nga Saksi ni Jehova, an ngatanan nga iyo ginbuhat ngan ginbubuhat yana para ha himaya han Dios, diri gud niya hingangalimtan. “An Dios diri nga diri matadong, nga hikalimtan niya an iyo buhat ngan an iyo gugma nga iyo iginpakita tungod ha iya ngaran,” siring han Biblia. (Heb. 6:10) Salit, ayaw paghinunahuna hin negatibo—sayop nga naghuhunahuna nga tungod han pagtikalagas, waray ka na pulos kan Jehova. Pangalimbasog nga masaliwnan hin positibo an nakakaguol ngan nakakasubo nga panhunahuna. Malipay gud ha imo mga bendisyon ngan paglaom ha tidaraon! May-ada kita gimaopayi nga kabubuwason ngan “paglaom,” ngan ginagarantiyahan ini han aton Maglalarang. (Jer. 29:11, 12; Buh. 17:31; 1 Tim. 6:19) Pamalandonga an imo paglaom, pangalimbasog nga magpabilin nga positibo ha hunahuna ngan kasingkasing, ngan ayaw gud pagminosa an bili han imo presensya ha kongregasyon!e
16. Kay ano nga nahunahuna han lagas nga bugto nga angay na hiya umundang ha pag-alagad sugad nga tigurang, kondi paonan-o hiya ginparig-on han mga tigurang?
16 Tagda hi Johan, nga ha edad nga 80 anyos bug-os-panahon nga nagmamangno ha iya maunungon nga asawa, hi Sannie, nga baldado na yana.f An kabugtoan nga kababayin-an nagsusurosaliwan ha pagmangno kan Sannie basi makatambong hi Johan ha mga katirok ngan makasangyaw. Kondi, diri pa la maiha, inabat hi Johan hin duro nga kakapoy ngan kasakit ha emosyon, ngan nahunahuna niya nga diri na hiya angay mag-alagad sugad nga tigurang ha kongregasyon. “Ano an pulos han akon pagin tigurang?” nagpakiana hiya samtang nanunuro an luha. “Waray na ako nahihimo nga mapulsanon ha kongregasyon.” Ginpasarig hiya han iya mga igkasi-tigurang nga birilhon gud an iya eksperyensya ngan mga opinyon. Ira gin-aghat hiya nga magpadayon ha pag-alagad sugad nga tigurang, bisan kon limitado na an iya nahihimo. Tungod kay naparig-on gud, padayon nga nag-alagad hiya sugad nga tigurang, ngan nagpahimulos an kongregasyon.
Hi Jehova Nagmamangno Gud
17. Ano an iginpapasarig han Biblia ha lagas nga mga Kristiano?
17 Iginpapatin-aw han Kasuratan nga an kalagasan makakapadayon nga mabungahon ha espirituwal bisan pa han mga problema tungod han kalagas. An salmista nagsiring: “Gintanom hira dida ha balay ni Jehova; . . . mamumunga la gihapon hira bisan ha ira pagkatigurang; ngan hira magigin tagukon ngan hilaw.” (Sal. 92:13, 14) Hi apostol Pablo, nga bangin nag-antos hin kasakit ha pisikal, ‘waray manluya bisan kon an iya pagkatawo nga ha gowa nadudunot.’—Basaha an 2 Korinto 4:16-18.
18. Kay ano nga an igkasi-tumuroo nga kalagasan ngan an nagmamangno ha ira nanginginahanglan han bulig han iba?
18 Damu nga ehemplo yana an nagpapamatuod nga an kalagasan ‘nakakapamunga la gihapon.’ Kondi an mga kakurian tungod han pagkasakit ngan kalagas makahuhulop bisan hadton may-ada mga kapamilya nga mahigugmaon ngan kinaburut-on nga nabulig ha ira. Bangin liwat makapoy hinduro adton nagmamangno. An kongregasyon may-ada pribilehiyo ngan responsabilidad nga ipakita an ira gugma ha kalagasan ngan ha nagmamangno ha ira. (Gal. 6:10) Kon buhaton ito, diri la naton ginsisidngan hira nga “magmapaso ngan mabusog kamo,” siring pa, nga diri aktuwal nga binubuligan hira.—Jak. 2:15-17.
19. Kay ano nga an magtinumanon nga lagas nga Kristiano makakasarig han ira tidaraon?
19 Tungod han pagtikalagas bangin magkaada gutiay nga pagbag-o ha mga buruhaton han usa nga Kristiano, kondi an panahon diri nakakaiban han gugma ni Jehova ha iya mag-unungon nga lagas nga surugoon. Ha kabaliktaran, ini ngatanan nga matinumanon nga Kristiano hinigugma gud niya, ngan diri gud niya pasisibay-an. (Sal. 37:28; Isa. 46:4) Bubuligan ngan gigiyahan hira ni Jehova ha ira kalagas.—Sal. 48:14.
[Mga footnote]
a Kitaa an artikulo nga “Mga Edaran Na—Bendisyon ha mga Batan-on,” ha Hunyo 1, 2007 nga An Barantayan.
b Kitaa an kapitulo 15, “Pagpasidungog ha Aton Lagas Na nga mga Ginikanan” ha libro nga An Sekreto han Kalipayan ha Pamilya.
c Ha pipira nga nasud, mahimo nga upod na hini an pagbulig ha kalagasan nga makapahimulos han ayuda nga igintatagana han gobyerno. Kitaa an artikulo nga “An Dios Nagtatagad ha mga Lagas,” ha Hunyo 1, 2006 nga An Barantayan.
d Kitaa an artikulo nga “Jehovah Always Cares for Us,” ha Septyembre 1, 2003 nga The Watchtower.
e Kitaa an artikulo nga “An Kaanyag han Pagkaubanon,” ha An Barantayan han Marso 15, 1993.
f Ginbag-o an mga ngaran.
Ano an Imo Baton?
• Kay ano nga hinigugma mo gud an magtinumanon nga lagas nga Kristiano?
• Paonan-o naton maipapakita an mahigugmaon nga pagtagad ha mga lagas nga igkasi-magsiringba?
• Ano an makakabulig ha lagas nga mga surugoon ni Jehova nga magkaada positibo nga panhunahuna?
[Mga Retrato ha pahina 18]
Hinigugma gud han mga membro han kongregasyon an kalagasan