Mga Batan-on—Ano an Iyo Bubuhaton ha Iyo Kinabuhi?

“Nakikipag-away ako, diri sugad ha nagdadabal ha hangin.”—1 KOR. 9:26.

1, 2. Ano an ginkikinahanglan basi maglampos ka samtang nagtutubo ngadto ha pagkaadulto?

KON magbabaktas ka ha diri pamilyar nga dalan, bangin magdara ka hin mapa ngan kompas. An mapa mabulig ha imo nga hibaroan kon hain ka na dapit ngan kon diin ka maagi. An kompas mabulig ha imo nga diri mawara. Kondi magigin waray pulos an mapa ngan kompas kon diri ka maaram kon diin ka makadto. Basi diri ka maglinibot-libot la, kinahanglan maaram ka kon tikain ka.

² Sugad liwat hito an imo kahimtang samtang nagtutubo ka ngadto ha pagkaadulto. May-ada ka masasarigan nga mapa ngan kompas. An Biblia pariho hin mapa nga makakabulig ha imo nga hibaroan kon ano an maopay buhaton ha imo kinabuhi. (Prob. 3:5, 6) Kon nabansay hin maopay an imo konsensya, magigin sugad ito hin kompas nga makakabulig gud ha imo nga pirme magkinabuhi ha husto nga paagi. (Roma 2:15) Kondi basi magmalampuson ka, kinahanglan maaram ka liwat kon ano an imo karuyag makab-ot. Kinahanglan may-ada ka espisipiko nga mga tumong.

3. Ano nga mga kapulsanan ha pagkaada mga tumong an ginsiring ni Pablo ha 1 Korinto 9:26?

³ Iginpakita ni apostol Pablo an mga kapulsanan han pagkaada mga tumong ngan pangalimbasog nga makab-ot ito han hiya nagsurat: “Nadalagan ako, diri sugad ha may pagruhaduha, busa nakikipag-away ako, diri sugad ha nagdadabal ha hangin.” (1 Kor. 9:26) Kon may-ada ka mga tumong, maaram ka kon ano an imo bubuhaton. Maabot an panahon nga kinahanglan maghimo ka hin magbug-at nga desisyon, pananglitan may kalabotan ha pagsingba, trabaho, pag-asawa, ngan pamilya. Usahay bangin mawurok ka kon ano an imo hihimoon. Pero kon planuhon mo hin abanse an imo bubuhaton ngan ibasar ha mga kamatuoran ngan prinsipyo ha Pulong han Dios an imo mga desisyon, diri ka masusulay nga sumimang ha husto nga dalan.—2 Tim. 4:4, 5.

4, 5. (a) Ano an puydi mahitabo kon waray ka mga tumong? (b) Kay ano nga an imo mga desisyon sadang giyahan han imo hingyap nga lipayon an Dios?

⁴ Kon waray ka mga tumong, bangin aghaton ka han imo kasangkayan ngan mga magturutdo nga buhaton an ira ginhuhunahuna nga husto para ha imo. Syempre, bisan kon may-ada ka na espisipiko nga mga tumong, ipapahayag la gihapon han iba an ira opinyon. Katapos mabatian an ira mga suhestyon, pakianhi an imo kalugaringon, ‘An mga tumong ba nga ira ginsiring makakabulig ha akon nga hinumdoman an akon Maglalarang samtang batan-on pa ako, o makakaulang ito ha akon?’—Basaha an Eklesiastes 12:1.

⁵ Kay ano nga an imo mga desisyon sadang giyahan han imo hingyap nga lipayon an Dios? Siyahan, tungod kay hi Jehova an naghatag ha aton han ngatanan nga mag-opay nga butang. (Jak. 1:17) Ha pagkamatuod, kita ngatanan sadang magin mapasalamaton ha iya. (Pah. 4:11) May-ada pa ba mas maopay nga paagi ha pagpakita han imo apresasyon kay han paghunahuna pirme kan Jehova kon naghihimo hin mga tumong? Aton hisgotan kon ano nga mga tumong an maopay kab-uton ngan kon ano an imo sadang buhaton basi makab-ot ito.

Ano an Puydi Mo Himoon nga mga Tumong?

6. Ano nga importante nga tumong an puydi mo himoon, ngan kay ano?

⁶ Sugad han gin-unabi ha nahiuna nga artikulo, usa nga importante nga tumong nga puydi mo himoon amo an pagpamatuod ha imo kalugaringon nga tinuod an ginsisiring han Biblia. (Roma 12:2; 2 Kor. 13:5) An imo mga igkasi-batan-on bangin natoo ha ebolusyon o ha sayop nga mga katutdoan han mga relihiyon tungod kay may nagsiring ha ira nga ito an sadang nira toohan. Kondi diri mo kinahanglan toohan an usa nga butang tungod la kay ito an karuyag han iba nga toohan mo. Hinumdumi nga karuyag han aton langitnon nga Amay nga hi Jehova nga mag-alagad ka ha iya ha imo bug-os nga hunahuna. (Basaha an Mateo 22:36, 37.) Karuyag niya nga an imo pagtoo may marig-on nga basihan.—Heb. 11:1.

7, 8. (a) Ano nga madali makab-ot nga mga tumong an mabulig ha imo nga maparig-on an imo pagtoo? (b) Ano an imo aabaton kon makab-ot mo an pipira hito nga mga tumong?

⁷ Basi buligan ka nga maparig-on an imo pagtoo, kay ano nga diri maghimo hin mga tumong nga madali makab-ot? Usa nga tumong amo an pag-ampo kada adlaw. Basi magin espisipiko ngan diri pauroutro an imo pag-ampo, puydi mo tigamnan o isurat an mga nahitabo ha usa ka adlaw. Ayaw kalimti an pag-unabi diri la han mga problema nga imo inatubang kondi pati na han magpakalilipay nga nahitabo ha imo. (Fil. 4:6) An ikaduha nga tumong amo an pagbasa han Biblia kada adlaw. Maaram ka ba nga kon magbasa ka hin mga upat ka pahina kada adlaw, matatapos mo pagbasa an Biblia ha usa la ka tuig?a An Salmo 1:1, 2 nasiring: “Mahimayaon an tawo nga . . . ha balaud ni Jehova aada an iya kalipay; ngan adlaw ug gab-i hiya namamalandong ha iya balaud.”

⁸ An ikatulo nga tumong amo an pag-andam hin baton para ha tagsa nga katirok. Ha siyahan bangin karuyag mo basahon an baton o an usa nga teksto. Ha urhi, puydi mo himoon nga tumong nga bumaton ha imo kalugaringon nga mga pulong. Ha pagkamatuod, ha kada panahon nga nagkukomento ka, naghahalad ka kan Jehova. (Heb. 13:15) Kon makab-ot mo na an iba hini nga mga tumong, madudugangan an imo kompyansa ha kalugaringon ngan apresasyon kan Jehova, ngan magigin andam ka na paghimo hin mga tumong nga maiha makab-ot.

9. Kon diri ka pa magwarali han Ginhadian, ano nga maiha makab-ot nga mga tumong an puydi mo himoon?

⁹ Ano nga maiha makab-ot nga mga tumong an puydi mo himoon? Kon diri ka pa nagsasangyaw, puydi mo himoon nga tumong nga magin magwarali han Ginhadian. Kon makab-ot mo na ini, pangalimbasugi nga magin regular ngan epektibo, diri ginpapalabay an usa ka bulan nga diri ka nakikigbahin ha ministeryo. Talinguhaa liwat nga gamiton an Biblia ha pagsangyaw. Kon bubuhaton mo ito, maoobserbaran mo nga magigin mas malipayon ka ha ministeryo. Mahimo mo liwat dugangan an panahon nga igin-gagahin mo ha pagbalay-balay o mangalimbasog pa ngani nga magdumara hin pag-aram ha Biblia. Sugad nga diri-bawtismado nga magwarali, may mas maopay pa ba nga tumong kay ha pagin kwalipikado ha bawtismo ngan magin dedikado ngan bawtismado nga Saksi ni Jehova nga Dios?

10, 11. Ano nga maiha makab-ot nga mga tumong an sadang himoon han bawtismado nga mga batan-on?

¹⁰ Kon bawtismado ka na nga alagad ni Jehova, may pipira nga maiha makab-ot nga tumong nga puydi mo kab-uton. Pananglitan, ha panapanahon bangin puydi ka bumulig ha mga kongregasyon ha pagsangyaw ha ira mga teritoryo nga talagsa la masangyawan. Puydi mo liwat gamiton an imo kusog ngan maopay nga panlawas ha pag-auxiliary o pagregular payunir. Yinukot nga malipayon nga payunir an magsusumat ha imo nga an bug-os-panahon nga pag-alagad makalilipay nga paagi ha paghinumdom han imo Maglalarang samtang batan-on ka pa. Mga tumong ini nga puydi mo makab-ot samtang aada ka pa ha poder han imo mga kag-anak. Magigin mapulsanon liwat ha iyo kongregasyon an imo pagkab-ot hito.

¹¹ May mga tumong nga maghahatag ha imo hin higayon nga makabulig diri la ha iyo kongregasyon. Pananglitan, puydi ka mag-alagad ha iba nga lugar o nasud nga mas daku an panginahanglan. Puydi ka liwat bumulig pagtukod hin mga Kingdom Hall o mga sanga nga opisina ha iba nga nasud. Bangin puydi ka pa ngani magin Bethelite o misyonero. Syempre, antes mo makab-ot an kadam-an han gin-unabi pa la nga mga tumong, kinahanglan ka anay magpabawtismo. Kon diri ka pa bawtismado, tagda kon kay ano nga sadang mo kab-uton ito nga tumong.

Kab-ota an Tumong nga Magpabawtismo

12. Ano an mga hinungdan nga nagpapabawtismo an iba, ngan kay ano nga diri igo ito nga mga hinungdan?

¹² Para ha imo, ano an katuyoan han bawtismo? An iba bangin maghunahuna nga proteksyon ito basi diri hira makasala. Bangin hunahunaon liwat han iba nga kinahanglan magpabawtismo hira tungod kay bawtismado na an ira kasangkayan. An iba nga batan-on bangin naruruyag nga mapalipay an ira mga kag-anak. Kondi an bawtismo diri usa nga kontrata nga nagpupugong ha imo ha pagbuhat hin mga butang nga karuyag mo buhaton hin sekreto, ngan diri ka liwat sadang magpabawtismo tungod la kay gin-aaghat ka han iba. Sadang ka magpabawtismo kon nasasabtan mo na kon ano an nahiuupod ha pagin Saksi ni Jehova ngan kon andam ka na nga karawaton ito nga responsabilidad.—Ekles. 5:4, 5.

13. Kay ano nga sadang ka magpabawtismo?

¹³ Nagpapabawtismo kita tungod kay ginsugo ni Jesus an iya mga sumurunod nga ‘manhimo hin mga tinon-an ngan pamaptisan hira.’ Nagpakita liwat hiya hin susbaranan pinaagi ha pagpabawtismo. (Basaha an Mateo 28:19, 20; Markos 1:9.) Dugang pa, an bawtismo importante basi maluwas. Katapos unabihon an paghimo ni Noe han arka nga gin-gamit ha pagluwas ha iya ngan ha iya pamilya durante han Baha, hi apostol Pedro nagsiring: “Sugad man hini nga pagkaagi an pagbaptis nagluluwas ha iyo niyan, . . . pinaagi ha pagkabanhaw ni Jesu-Kristo.” (1 Ped. 3:20, 21) Kondi diri ini nangangahulogan nga nagpapabawtismo ka basi la maluwas. Lugod, nagpapabawtismo ka tungod kay hinigugma mo hi Jehova ngan karuyag mo mag-alagad ha iya ha imo bug-os nga kasingkasing, kalag, hunahuna, ngan kusog.—Mar. 12:29, 30.

14. Kay ano nga an iba nag-aalang pagpabawtismo, kondi ano an iginpapasarig ha imo?

¹⁴ An iba bangin mag-alang pagpabawtismo tungod kay nahahadlok nga bangin ha urhi mapaiwas hira ha kongregasyon. Nahahadlok ka ba liwat nga mahitabo ito ha imo? Kon amo, diri ito maraot. Karuyag sidngon hito nga nasasabtan mo an seryoso nga responsabilidad han pagin Saksi ni Jehova. May iba pa ba nga hinungdan? Bangin diri ka pa kombinsido nga an pagsunod ha mga prinsipyo han Dios amo an gimaopayi nga paagi han pagkinabuhi. Kon ito an imo panhunahuna, an pamalandong ha maraot nga resulta nga naieksperyensyahan han mga nagbabalewaray han mga prinsipyo ha Biblia makakabulig ha imo nga magdesisyon. O bangin naruruyagan mo an mga prinsipyo han Dios pero naghuhunahuna ka nga bangin diri mo ito masunod. Ha tinuod la, maopay ito tungod kay iginpapakita hito nga mapainubsanon ka. An Biblia nasiring nga malimbong an kasingkasing han ngatanan nga diri-hingpit nga tawo. (Jer. 17:9) Kondi maglalampos ka kon pirme mo susundon an pulong han Dios. (Basaha an Salmo 119:9.) Anoman an hinungdan nga nag-aalang ka pagpabawtismo, kinahanglan pangalimbasogan mo nga mawara ito.b

15, 16. Paonan-o mo hibabaroan kon andam ka na magpabawtismo?

¹⁵ Kondi paonan-o mo hibabaroan kon andam ka na magpabawtismo? Usa nga paagi amo an pagpakiana ha imo kalugaringon: ‘Maiesplikar ko na ba ha iba an nangunguna nga mga katutdoan ha Biblia? Nagsasangyaw ba ako bisan kon diri ko upod an akon mga kag-anak? Nangangalimbasog ba ako nga tumambong ha ngatanan nga katirok? May espisipiko ba nga mga kahimtang nga nalamposan ko an pagsulay han akon mga igkasi-batan-on? Magpapadayon ba ako pag-alagad kan Jehova bisan kon diri na mag-alagad an akon mga kag-anak ngan kasangkayan? Nag-ampo na ba ako mahitungod han akon relasyon ha Dios? Ngan bug-os ko na ba nga igindedikar an akon kalugaringon kan Jehova pinaagi han pag-ampo?’

¹⁶ An bawtismo nakakapabag-o han aton kinabuhi, ngan seryoso ito nga desisyon. Hamtong ka na ba basi buhaton ito? An pagin hamtong diri la maipapakita pinaagi ha mag-opay nga pahayag ha entablado o mag-opay nga komento ha katirok. Nangangahulogan ito hin pagdesisyon basado ha pagsabot ha mga prinsipyo ha Biblia. (Basaha an Hebreo 5:14.) Kon nahihimo mo na ito, igintatanyag ha imo an gimaopayi nga pribilehiyo—an pag-alagad kan Jehova hin bug-os-kasingkasing ngan pagkinabuhi ha paagi nga nagpapakita nga dedikado ka gud ha iya.

17. Ano an mabulig ha imo nga maatubang an mga pagsari nga bangin maeksperyensyahan mo katapos han imo bawtismo?

¹⁷ Katapos gud han imo bawtismo, bangin madasigon ka hinduro ha pag-alagad ha Dios. Kondi maabot an panahon nga bangin makaeksperyensya ka hin mga pagsari diin mapuproybahan an imo pagtoo ngan karig-on. (2 Tim. 3:12) Ayaw paghunahuna nga mag-uusahan ka la ha pag-atubang hito. Pangaro hin sagdon ha imo mga kag-anak. Pagpabulig ha mga hamtong nga imo kakongregasyon. Pakisangkay ha kabugtoan nga masuporta ha imo. Ayaw gud hingalimti nga diri ka papabay-an ni Jehova, ngan tatagan ka niya han kusog nga ginkikinahanglan ha pag-atubang ha bisan ano nga kahimtang nga bangin mahitabo.—1 Ped. 5:6, 7.

Paonan-o Mo Makakab-ot an Imo mga Tumong?

18, 19. Ano an kapulsanan han pag-usisa han imo mga prayoridad?

¹⁸ Bisan pa han imo maopay hinduro nga motibo, inaabat mo ba nga kulang gud an imo panahon ha pagbuhat han imo karuyag ngan kinahanglan himoon? Kon amo, maopay nga usisahon mo an imo mga prayoridad. Ha pag-ilustrar: Pagkuha hin balde ngan sudli ito hin pipira nga dagku nga bato. Katapos sudli liwat ito hin baras. Yana an imo balde puno na hin bato ngan baras. Sunod, ihuwad an ngatanan nga sulod hito. Katapos, ibalik ito pagsulod pero unaha an baras ngan katapos an mga bato. Diri na ba naigo? Tungod ito kay gin-una mo pagsulod an baras.

¹⁹ Sugad liwat hito an imo kahimtang may kalabotan ha paggamit han panahon. Kon magigin prayoridad mo an mga buruhaton sugad han kaliawan, maghuhunahuna ka nga waray ka na igo nga panahon ha mas importante nga mga butang—an espirituwal nga mga buruhaton. Pero kon sundon mo an sagdon ha Biblia nga siguruhon “an mga bagay nga mag-opay gud” o mas importante, magkakaada ka panahon para ha espirituwal nga mga buruhaton ngan ha gutiay nga kaliawan.—Fil. 1:10.

20. Kon may mga panahon nga nababaraka ngan nagruruhaduha ka samtang nangangalimbasog pagkab-ot han imo mga tumong, ano an sadang mo buhaton?

²⁰ Samtang nangangalimbasog ka nga makab-ot an imo mga tumong, pati na an pagpabawtismo, bangin may mga panahon nga mabaraka ngan magruhaduha ka. Kon mahitabo ito, ‘ibutang an imo dinara kan Jehova, ngan bubuligan ka niya.’ (Sal. 55:22) Yana may-ada ka higayon nga makigbahin ha pinakamakalilipay ngan pinakaimportante nga buruhaton ha kasaysayan, an bug-os-kalibotan nga kampanya han pagsangyaw ngan pagtutdo. (Buh. 1:8) Puydi mo pilion nga diri makigbahin ngan pabay-an na la nga iba an magbuhat hito. Pero puydi ka liwat bumulig hin madasigon. Ayaw pag-alang ha paggamit han imo abilidad ha pag-alagad ha Dios ngan ha pagsuporta han iya Ginhadian. Diri ka gud magbabasol nga nag-alagad ka ha “imo Magburuhat ha mga adlaw han imo pagkabatan-on.”—Ekles. 12:1.

[Mga footnote]

Ano an Imo Baton?

• Kay ano nga sadang ka magkaada mga tumong?

• Ano an pipira nga tumong nga maopay kab-uton?

• Kay ano nga sadang mo kab-uton an tumong nga magpabawtismo?

• Paonan-o an pag-usisa ha imo mga prayoridad makakabulig ha imo nga makab-ot an imo mga tumong?

[Retrato ha pahina 13]

Tumong mo ba nga basahon an Biblia kada adlaw?

[Retrato ha pahina 15]

Ano an mabulig ha imo nga makab-ot an tumong nga magpabawtismo?

[Retrato ha pahina 16]

Ano nga leksyon an imo hibabaroan hini nga ilustrasyon?