‘Dangop ha Ngaran ni Jehova’
“Ako mabilin dida ha butnga mo hin mabidoon ngan kablas nga katawohan, ngan hira madangop ha ngaran ni Jehova.”—SEP. 3:12.
1, 2. Ano an sugad-bagyo nga hitabo nga hirani na maeksperyensyahan han katawohan?
NASARIHAN mo na ba nga sumirong ha usa nga payag han naabtan ka hin bunok? An payag maopay sirongan kon nabunok, pero diri ito makakapanalipod ha imo kon may makusog nga bagyo o buhawi.
2 May iba nga klase hin bagyo nga tiarabot, ngan tungod hito namimeligro an ngatanan nga katawohan. Ito an sugad-bagyo nga “adlaw han kabungkagan.” Iton “daku nga adlaw ni Jehova” makakaapekto ha ngatanan nga katawohan. Kondi, makakaagi kita han aton ginkikinahanglan nga arayopan. (Basaha an Sepania 1:14-18.) Paonan-o naton ito mahihimo ha ‘adlaw han kan Jehova kapungot’ nga hirani na umabot?
Sugad-Bagyo nga mga Hitabo ha Kadaan nga Panahon
3. Ano nga “bagyo” an inabot ha napulo ka tribo nga ginhadian han Israel?
3 An adlaw ni Jehova titikangan pinaagi han pagbungkag ha ngatanan nga buwa nga relihiyon. An pag-usisa ha kasaysayan han katawohan han Dios ha kadaan nga panahon mabulig ha aton nga hibaroan kon diin kita maayop. Hi Isaias, nga nabuhi ha ikawalo ka siglo A.K.P., nagtagna nga an paghukom ni Jehova ha apostata nga napulo ka tribo nga ginhadian han Israel maabot sugad hin “bagyo” nga diri mapupugngan han mga tawo. (Basaha an Isaias 28:1, 2.) Natuman ito han 740 A.K.P. han ginsulong han mga Asiryahanon ito nga mga tribo, nga an Epraim an pinakaprominente.
4. Paonan-o an Jerusalem ginbungkag ha “daku nga adlaw ni Jehova” han 607 A.K.P.?
4 An paghukom ha diri matinumanon nga Israel nasundan han 607 A.K.P. ha “daku nga adlaw ni Jehova” kontra ha Jerusalem ngan ha ginhadian han Juda. Nahitabo ito tungod kay nagin apostata liwat an mga taga-Juda. Gintarhog han mga Babilonyahanon ha panguna ni Nabukodonosor an Juda ngan an kapital hito, an Jerusalem. An mga taga-Juda dinangop ha ‘buwa nga arayopan,’ an ira pakig-alyansa ha Ehipto. Kondi an mga Babilonyahanon sugad hin makusog nga bagyo nga nagbungkag hito nga “arayopan.”—Isa. 28:14, 17.
5. Ano an mahitatabo ha katawohan han Dios sugad nga grupo kon bungkagon na an ngatanan nga buwa nga relihiyon?
5 An daku nga adlaw ni Jehova nga nagbungkag han Jerusalem nagpapakita han paghukom nga ipapadapat ha apostata nga Kakristianohan ha aton panahon. Bubungkagon liwat an ngatanan nga iba pa nga bahin han “daku nga Babilonya,” an imperyo han buwa nga relihiyon ha kalibotan. Katapos, pupoohon an nahibibilin pa nga bahin han maraot nga sistema ni Satanas. Kondi sugad nga grupo, an katawohan han Dios maluluwas tungod kay naayop hira kan Jehova.—Pah. 7:14; 18:2, 8; 19:19-21.
Espirituwal ngan Pisikal nga Arayopan
6. Paonan-o an katawohan han Dios makakaagi hin arayopan?
6 Paonan-o an katawohan han Dios makakaagi hin arayopan yana pa la hinin panahon han kataposan? Makakaagi kita hin espirituwal nga arayopan pinaagi ha matinalahuron nga ‘paghunahuna ha ngaran han Dios’ ngan madasigon nga pag-alagad ha iya. (Basaha an Malakias 3:16-18.) Pero diri igo an paghunahuna la han iya ngaran. Ini an aton mababasa: “Bisan hin-o nga magtawag ha ngaran han Ginoo maluluwas.” (Roma 10:13) An pagtawag ha ngaran ni Jehova magriresulta hin kaluwasan. Ngan damu nga tangkod an kasingkasing an nakakakita nga an tinuod nga mga Kristiano nga matinalahuron nga ‘naghuhunahuna ha iya ngaran’ ngan nag-aalagad sugad nga iya mga Saksi naiiba gud ha mga diri nag-aalagad ha iya.
7, 8. Ha ano nga paagi literal nga naluwas an mga Kristiano ha siyahan nga siglo, ngan ano an kaparihoan hito yana?
7 Bisan pa hito, diri la espirituwal nga arayopan an igintatagana ha mga nag-aalagad ha Dios. Nagsaad liwat hiya hin pisikal nga arayopan. Iginpakita ini han nahitabo han 66 K.P. katapos sulungon an Jerusalem han Romano nga kasundalohan ha panguna ni Cestius Gallus. Igintagna ni Jesus nga an mga adlaw hito nga kagol-anan “pahahaliputon.” (Mat. 24:15, 16, 21, 22) Natuman ito han diri linalaoman nga inatras an Romano nga kasundalohan salit an iba nga “unod”—an tinuod nga mga Kristiano—nakahigayon nga ‘maluwas.’ Nakapalagiw hira ha Jerusalem ngan ha kahigrani nga lugar. An iba tinabok ha Salog Jordan ngan kinadto ha kabukiran ha este hito.
8 May kaparihoan adto nga mga Kristiano ha katawohan han Dios yana. An mga Kristiano ha siyahan nga siglo namiling hin arayopan, ngan ito liwat an bubuhaton han mga alagad han Dios yana. Kondi an tinuod nga mga Kristiano diri na makadto ha espisipiko nga lugar tungod kay naukoy hira ha iba-iba nga lugar ha bug-os nga kalibotan. Bisan pa hito, sugad nga grupo, an “mga pinili” ngan an ira maunungon nga mga kaupod literal nga maluluwas ha kabungkagan han apostata nga Kakristianohan pinaagi ha pag-ayop kan Jehova ngan ha iya sugad-bukid nga organisasyon.
9. Hin-o an naghihimo hin paagi nga hingalimtan han mga tawo an ngaran han Dios? Paghatag hin ehemplo.
9 Ha luyo nga bahin, an Kakristianohan angay gud bungkagon tungod kay diri nira igintututdo ha ira mga membro an kamatuoran mahitungod ha Dios ngan ha iya mga prinsipyo ngan iginpapakita nira an kangalas ha iya ngaran. Han mga 500-1500 K.P., kilala gud ha Europa an ngaran han Dios. Ito nga ngaran nga ginrirepresentaran han upat nga Hebreo nga letra nga tinatawag nga Tetragrammaton ngan kasagaran nga iginhuhubad nga YHWH (o JHVH), makikita ha mga sinselyo, prente han mga balay, damu nga libro ngan Biblia, ngan bisan ha pipira nga singbahan han mga Katoliko ngan Protestante. Kondi yana, kasagaran na nga ginkukuha an ngaran han Dios ha mga hubad han Biblia ngan igindidiri an paggamit hito ha iba pa nga paagi. Usa nga ehemplo amo an Surat ha mga Komperensya han mga Obispo mahitungod ha ‘Ngaran han Dios’ han Hunyo 29, 2008, nga iginpagowa han Kongregasyon Para ha Sagrado nga Pagsingba ngan ha Surundon han mga Sakramento. Hito nga surat, an Katoliko nga Singbahan nagsugo nga an iba-iba nga hubad han Tetragrammaton sadang liwanan hin “Ginoo.” An Vatican nagsugo nga an ngaran han Dios diri sadang gamiton o luwason ha mga kanta ngan pangadi ha misa han mga Katoliko. Ngan an mga lider han iba nga relihiyon, kaapi man han Kakristianohan o diri, waray liwat magsumat ha ira minilyon nga membro mahitungod ha pangirilal-an han tinuod nga Dios.
Panalipod ha mga Nagbabaraan han Ngaran han Dios
10. Ha ano nga paagi gindadayaw an ngaran han Dios yana?
10 Kabaliktaran gud ha ginhihimo han iba nga relihiyon, an mga Saksi ni Jehova nagdadayaw ngan naghihimaya ha ngaran han Dios. Ginbabaraan nira ito pinaagi ha paggamit hito ha dungganon nga paagi. Nalilipay hi Jehova ha mga nasarig ha iya, ngan hiya nagigin bisan ano nga ginkikinahanglan basi bendisyonan ngan panalipdan an iya katawohan. “Hiya nakilala ha ira nga nadangop ha iya.”—Nah. 1:7; Buh. 15:14.
11, 12. Hin-o an nagpabilin nga matinumanon kan Jehova ha kadaan nga Juda, ngan hin-o an nagbubuhat hito yana?
11 Bisan kon an kadam-an han mga taga-Juda nagin apostata, may pipira nga ‘dinangop ha ngaran ni Jehova.’ (Basaha an Sepania 3:12, 13.) Oo, han ginsirotan han Dios an waray pagtoo nga Juda pinaagi ha pagtugot ha mga Babilonyahanon nga sakupon ngan bihagon an mga umurukoy hito, naluwas an iba sugad kanda Jeremias, Baruk, ngan Ebed-melek. Nagpabilin hira nga matinumanon bisan kon nagkinabuhi “ha butnga” han apostata nga nasud. An iba nagpabilin nga matinumanon samtang bihag. Han 539 A.K.P., an Babilonya ginsakop han mga Mediahanon ngan Persiahanon ha panguna ni Ciro. Waray pag-iha, nagpagawas hiya hin balaud nga nagtutugot ha nanhibilin nga mga Judio nga bumalik ha ira nasud.
12 Mahitungod ha mga magpapahiuli han tinuod nga pagsingba, igintagna ni Sepania nga luluwason hira ni Jehova ngan hiya malilipay ha ira. (Basaha an Sepania 3:14-17.) Nahitatabo liwat ito yana. Katapos maestablisar an Ginhadian han Dios ha langit, gintalwas ni Jehova ha espirituwal nga pagkauripon ha Babilonya nga Daku an magtinumanon nga nanhibilin nga dinihogan. Ngan tubtob yana nalilipay hiya ha ira.
13. Ano nga kagawasan an naieksperyensyahan han mga tawo ha ngatanan nga nasud?
13 An may paglaom nga mabuhi ha waray kataposan dinhi ha tuna nakagawas liwat ha Babilonya nga Daku ngan nakatalwas ha buwa nga mga katutdoan. (Pah. 18:4) Salit an Sepania 2:3 may daku nga katumanan ha aton panahon: “Pangitaa niyo hi Jehova, ngatanan kamo nga mga maaghop ha tuna.” An mga maaghop ha ngatanan nga nasud naayop na ha ngaran ni Jehova, ha langit man o ha tuna an ira paglaom.
An Ngaran han Dios Diri Anting-anting
14, 15. (a) Ano an ginagamit han iba sugad nga anting-anting? (b) Ano an diri sadang gamiton sugad nga anting-anting?
14 Ginhunahuna han pipira nga Israelita an templo sugad nga anting-anting nga magpapanalipod ha ira tikang ha mga kaaway. (Jer. 7:1-4) Antes pa hito, gintagad liwat han mga Israelita an arka han kauyonan sugad hin pangontra nga magpapanalipod ha ira ha girra. (1 Sam. 4:3, 10, 11) Hi Constantino nga Bantogan nagbutang ha mga taming han iya mga sundalo hin khi ngan rho, an siyahan nga duha nga letra han titulo nga “Kristo” ha Griego nga yinaknan, tungod kay naglalaom hiya nga makakapanalipod ito ha ira ha girra. Ngan hi Hadi Gustav Adolph II han Sweden, nga inapi ha Trenta ka Tuig nga Girra ha Europa, gintotoohan nga nagsul-ot han hinganiban nga makikita ha pahina 7. Klaro nga makikita dida hito an ngaran nga “Iehova.”
15 An pipira nga alagad han Dios nga gin-atake han mga demonyo inayop kan Jehova pinaagi ha pagtawag ha iya ngaran ha daku nga tingog. Bisan pa hito, an usa nga butang nga may ngaran han Dios diri sadang gamiton nga anting-anting o pangontra nga baga hin may gahum ito ha pagpanalipod. Diri ito an karuyag sidngon han pag-ayop ha ngaran ni Jehova.
Kon Paonan-o Kita Naayop Yana
16. Paonan-o kita mapapanalipdan ha espirituwal yana?
16 Usa nga paagi nga ginpapanalipdan ni Jehova an iya katawohan yana amo an espirituwal nga kasigurohan nga ira napapahimulosan sugad nga grupo. (Sal. 91:1) Pinaagi han “matinumanon ngan maaramon nga uripon” ngan han mga tigurang ha kongregasyon, ginpapahamangnoan kita mahitungod han kalibotanon nga mga buhat nga mahimo makawara hito nga kasigurohan. (Mat. 24:45-47, NW; Isa. 32:1, 2) Hunahunaa kon ano kaagsob kita pahamangnoan mahitungod han materyalismo, ngan tagda kon paonan-o kita ginpapanalipdan hito ha kadaot ha espirituwal. Kumusta man an peligro nga magin kampante o mapasibay-on, nga tungod hito mahimo kita magin diri aktibo ha pag-alagad kan Jehova? An Pulong han Dios nasiring: “An mapinasibayaon nga kasayon han mga lurong maggugunaw ha ira. Kondi bisan hin-o nga mamati ha akon magpupuyo ha marig-on, ngan magmamamingaw ha waray kahadlok han karaotan.” (Prob. 1:32, 33) An pangalimbasog nga magpabilin nga limpyo ha moral nabulig liwat ha aton nga matipigan an aton espirituwal nga kasigurohan.
17, 18. Ano an nabulig ha minilyon nga umayop ha ngaran ni Jehova yana?
17 Hunahunaa liwat an pag-aghat han matinumanon nga uripon nga sundon an sugo ni Jesus nga isangyaw an maopay nga sumat han Ginhadian ha bug-os nga kalibotan. (Mat. 24:14; 28:19, 20) Gin-unabi ni Sepania an usa nga pagbag-o nga mabulig ha mga tawo nga umayop ha ngaran han Dios. Ini an aton mababasa: “Hadto akon pakakadaon ha mga katawohan an uray nga yinaknan, nga hira ngatanan makatawag han ngaran ni Jehova, ha pag-alagad ha iya ha usa nga pagkahiringyon.”—Sep. 3:9.
18 Ano inin “uray” o putli nga yinaknan? Ito an kamatuoran mahitungod kan Jehova nga Dios ngan han iya mga katuyoan nga mababasa ha iya Pulong. Nagyayakan ka hito nga yinaknan kon ginbubuligan mo an iba nga magkaada husto nga pagsabot ha Ginhadian han Dios ngan kon paonan-o hito babaraanon an iya ngaran. Nagyayakan ka liwat hito kon imo ginpapabug-atan an pagbindikar han pagkasoberano han Dios ngan kon malipayon nga iginsusumat mo ha iba an waray kataposan nga mga bendisyon nga mapapahimulosan han matinumanon nga katawohan. Tungod kay damu hinduro an nagyayakan hinin simboliko nga yinaknan, nagtitikadamu an ‘natawag ha ngaran ni Jehova’ ngan urosa nga nag-aalagad ha iya. Oo, minilyon ha bug-os nga kalibotan an naayop yana kan Jehova.—Sal. 1:1, 3.
19, 20. Ha kadaan nga panahon, paonan-o napakyas an pagsarig ha ‘buwa nga arayopan’?
19 An mga tawo ha kalibotan may mga problema nga baga hin waray solusyon. Tungod kay karuyag gud nira nga masulbad ito, damu an napabulig ha diri hingpit nga mga tawo. O naglalaom hira nga masusolusyonan ito han politikal nga mga institusyon, sugad la nga may mga panahon nga an kadaan nga Israel nagpabulig ha kahigrani nga nasud ngan nakig-alyansa ha ira. Kondi maaram kita nga waray ito makabulig ha Israel. Ngan waray nasud yana, bisan pa an United Nations, an makakasulbad han ngatanan nga problema han katawohan. Salit husto ba nga umayop ha politikal nga mga institusyon ngan kaalyansa? Gintawag ito han Biblia nga ‘buwa nga arayopan.’ Husto la nga ito an magin pagtagad ha ira tungod kay an ngatanan nga naglalaom ha ira mapapakyas gud.—Basaha an Isaias 28:15, 17.
20 Hirani na umabot ha tuna an sugad-bagyo nga adlaw ni Jehova. An mga estratihiya han tawo diri gud makakapanalipod, bisan an karikohan o an mga lugar nga gindisenyo nga arayopan kon may bumuto nga bomba nuklear. An Isaias 28:17 nasiring: “An uran nga yelo magsisiphid han arayopan nga mga buwa, ngan an mga tubig manlalayap han lugar nga luluk-an.”
21. Ano an kapulsanan han pagsunod ha tinuig nga teksto ha 2011?
21 Yana ngan ha tidaraon, an magigin tinuod nga arayopan han katawohan han Dios amo an ira Dios nga hi Jehova. An ngaran ni Sepania nga nangangahulogan nga “Igintago ni Jehova” nagtutudlok hinin tinuod nga ruluk-an. Angayan gud nga an aton tinuig nga teksto yana nga 2011 amo inin maaramon nga sagdon: ‘Dangop ha ngaran ni Jehova.’ (Sep. 3:12) Bisan yana mahimo kita umayop ha ngaran ni Jehova ngan bug-os nga sumarig ha iya, ngan sadang naton buhaton ito. (Sal. 9:10) Kada adlaw hinumdoman naton ini nga pasarig han Dios: “An ngaran ni Jehova amo an marig-on nga balwarte; an matadong nadalagan ngadto ngan naluluwas.”—Prob. 18:10.
Nahinunumdoman Mo Ba?
• Paonan-o kita maayop ha ngaran ni Jehova yana?
• Kay ano nga diri kita sadang sumarig ha ‘buwa nga arayopan’?
• Ano nga arayopan an iginpapasarig ha aton ha tidaraon?
[Blurb ha pahina 6]
Ini an tinuig nga teksto yana nga 2011: ‘Dangop ha ngaran ni Jehova.’—Sepania 3:12.
[Ginkuhaan han mga Retrato ha pahina 7]
Thüringer Landesmuseum Heidecksburg Rudolstadt, Waffensammlung “Schwarzburger Zeughaus”