An Mahigugmaon nga Regalo han Dios

“An grasya maghahadi tungod ha katadongan nga ha kinabuhi nga waray kataposan.”—ROMA 5:21.

1, 2. Ano nga regalo an gintatagad nga birilhon han damu nga tawo, kondi ano nga regalo an mas birilhon gud?

USA nga propesor ha University of Melbourne, Australia an nagsiring nga an mga balaud han Imperyo han Roma usa nga regalo nga may nagpapadayon nga bili para ha katawohan. Kondi igintututdo han Biblia nga an Dios naghatag ha aton hin mas birilhon ngan mahigugmaon gud nga regalo. Ito nga regalo amo an paagi nga igintagana han Dios basi an tawo magin inuyonan ngan matadong ha iya atubangan ngan magkaada paglaom nga maluwas ngan mabuhi ha waray kataposan.

² An paagi han paghatag han Dios hini nga regalo nag-uupod han iya hustisya. Ha Roma kapitulo 5, waray ini isaysay ni Pablo pinaagi hin detalyado nga paghisgot han balaud. Lugod, nagtikang hiya pinaagi hinin makalilipay nga pasarig: “Ginpakamatadong kita tungod ha pagtoo, [salit] may paghidait kita ha Dios tungod ha aton Ginoo Jesu-Kristo.” An mga nakarawat han regalo han Dios napapagios nga higugmaon liwat hiya. Usa ha ira hi Pablo. Hiya nagsurat: ‘An gugma han Dios iginbisibis ha aton kasingkasing tungod ha espiritu.’—Roma 5:1, 5.

3. Ano nga mga pakiana an makatadunganon nga bumangon?

³ Kondi kay ano nga kinahanglan ini nga regalo? Paonan-o ito naihatag han Dios ha paagi nga uyon ha iya hustisya ngan mapapahimulsan han ngatanan? Ngan ano an sadang naton buhaton basi magin kwalipikado ha pagkarawat hito? Hisgotan naton an makapatagbaw nga mga baton ngan kitaon kon paonan-o hito ginpapabug-atan an gugma han Dios.

Gugma han Dios Kontra ha Sala

4, 5. (a) Ha ano nga makatirigamnan nga paagi iginpakita ni Jehova an iya gugma? (b) Basi masabtan an Roma 5:12, ano an kinahanglan naton hibaroan?

⁴ Tungod han daku nga gugma ni Jehova, iya ginsugo an iya bugtong nga Anak basi buligan an mga tawo. Sugad hini an pagsaysay ni Pablo: “An Dios nagpahayag gud han iya kalugaringon nga gugma tungod ha aton, nga, amo man hi Kristo namatay tungod ha aton, han mga makasasala pa kita.” (Roma 5:8) Tagda an usa nga kamatuoran nga gin-unabi: “Mga makasasala pa kita.” Kinahanglan hibaroan han ngatanan kon paonan-o kita nagin makasasala.

⁵ Gintikangan ni Pablo an pagsaysay hito pinaagi ha pagsiring: “Tungod ha usa ka tawo, sinulod an sala ha kalibotan, ngan tungod ha sala an kamatayon; ngan sugad man an kamatayon inagi ha ngatanan nga katawohan, kay an ngatanan nakasala.” (Roma 5:12) Masasabtan naton ini tungod kay iginpasurat han Dios kon paonan-o nagtikang an kinabuhi han tawo. Hi Jehova naglarang hin duha nga tawo, hira Adan ngan Eva. Hingpit an Maglalarang, ngan hingpit liwat an siyahan nga mga tawo, an aton kaapoy-apoyan. Usa la an igindiri ha ira han Dios, ngan ginpahamangnoan hira nga kon diri nira sundon ito nga balaud, mamamatay hira. (Gen. 2:17) Kondi an ira desisyon nagresulta han ira kamatayon. Gintalapas nira an makatadunganon nga sugo han Dios, hito nga paagi iginsalikway hiya sugad nga Humaratag hin balaud ngan Soberano.—Deut. 32:4, 5.

6. (a) Ano an hinungdan nga namamatay an katulinan ni Adan, ngan nabag-o ba han Mosaiko nga Balaud ini nga kahimtang? (b) Paonan-o mahimo iilustrar an epekto han napanunod nga sala?

⁶ Nakasala na hi Adan han nagkaanak hiya, salit naipasa niya ha ngatanan niya nga anak an sala ngan an mga epekto hito. An mga anak ni Adan waray magtalapas ha balaud han Dios sugad han ginbuhat ni Adan, salit waray hira akusari han sala nga igin-akusar ha iya; waray pa liwat mga balaud nga iginhatag hito nga panahon. (Gen. 2:17) Bisan pa hito, napanunod nira an sala. Salit an sala ngan kamatayon naghadi tubtob ha panahon nga iginhatag han Dios ha mga Israelita an Balaud, nga matin-aw nga nagpakita nga makasasala hira. (Basaha an Roma 5:13, 14.) An epekto han napanunod nga sala mahimo iilustrar pinaagi han mga sakit nga bangin mapanunod naton ha aton mga kag-anak. Bisan kon an iba nga anak ha usa nga pamilya nakakapanunod hin sakit ha ira mga kag-anak, diri ngatanan nga anak nakakapanunod hito. Kondi diri sugad hito an sala. Kita ngatanan nakapanunod hin sala tikang kan Adan, ngan tungod hito kita ngatanan mamamatay. May paglaom pa ba nga makatalwas hiton makasurubo nga kahimtang?

An Igintagana han Dios Pinaagi kan Jesu-Kristo

7, 8. Ano an magkaiba nga resulta han pagkinabuhi han duha nga hingpit nga tawo?

⁷ Tungod han gugma, nagtagana hi Jehova hin paagi basi matalwas an katawohan ha napanunod nga sala. Iginsaysay ni Pablo nga nagin posible ito pinaagi han usa pa nga hingpit nga tawo nga nabuhi ha urhi, nga gintawag nga ikaduha nga Adan. (1 Kor. 15:45) Kondi magkaiba gud an resulta han pagkinabuhi hinin duha nga hingpit nga tawo. Ha ano nga paagi?—Basaha an Roma 5:15, 16.

⁸ “Diri sugad ha pagtalapas, amo man an hatag nga waray bayad,” hi Pablo nagsurat. Nakasala hi Adan, salit makatadunganon la nga sirotan hiya hin kamatayon. Kondi diri la hiya an namatay. Ini an aton mababasa: “Tungod ha pagtalapas [hiton] usa ka tawo nagkamatay an kadam-an.” An makatadunganon nga sirot kan Adan kinahanglan liwat ipadapat ha ngatanan nga iya diri hingpit nga katulinan, pati na ha aton. Kondi nakakaliaw an paghibaro nga kabaliktaran gud an magigin resulta han pagkinabuhi han hingpit nga tawo nga hi Jesus. Ano an resulta? Hibabaroan naton an baton ha gin-unabi ni Pablo nga ‘pagdangat han ngatanan nga [klase hin] mga tawo ngadto ha pagkamatadong ha kinabuhi.’—Roma 5:18.

9. Ano an ginbubuhat han Dios han ginhukman niya hin pagkamatadong an mga tawo sugad han gin-unabi ha Roma 5:16, 18?

⁹ Ano gud ba an karuyag ipasabot han Griego nga mga pulong nga iginhubad nga ‘paghukman hin pagkamatadong’ ngan ‘pagdangat ngadto ha pagkamatadong’? Usa nga parahubad han Biblia an nagsurat mahitungod hito: “Usa ito nga metapora may kalabotan ha balaud nga an kahulogan may punto nga iginbasar ha balaud. Nagtutudlok ito ha pagbag-o han kahimtang han usa ka tawo ha iya relasyon ha Dios, diri ha pagbag-o han iya personalidad . . . Iginhuhulagway hito an Dios sugad nga hukom nga nagdesisyon pabor ha akusado nga sugad hin gindara ha hukmanan han Dios ngan gin-akusaran hin pagkadiri-matadong. Kondi gin-aabswelto han Dios an akusado.”

10. Ano an ginbuhat ni Jesus nga nagin basihan basi maipahayag nga matadong an mga tawo?

¹⁰ Ano an basihan han matadong nga “Maghuhukom han bug-os nga tuna” ha pag-abswelto han diri-matadong nga tawo? (Gen. 18:25) Mahigugmaon nga ginsugo han Dios an iya bugtong nga Anak nganhi ha tuna. Hingpit nga ginbuhat ni Jesus an kaburut-on han iya Amay bisan pa han mga pagsulay, duro nga pagtamay, ngan pagmaltrato. Nagpabilin hiya nga matinumanon tubtob ha kamatayon ha pasakitan nga kahoy. (Heb. 2:10) Pinaagi ha paghalad ni Jesus han iya hingpit nga kinabuhi sugad nga tawo, nagtagana hiya hin lukat nga makakatalwas o makakatubos han katulinan ni Adan tikang ha sala ngan kamatayon.—Mat. 20:28; Roma 5:6-8.

11. Ano an katugbang han lukat ni Jesus?

¹¹ Ha iba nga teksto, gintawag ini ni Pablo nga “katugbang nga lukat.” (1 Tim. 2:6, NW) Ano an magkatugbang? Iginpasa ni Adan an pagkadiri-hingpit ngan kamatayon ha binilyon nga iya katulinan. Oo, hi Jesus puydi unta pagtikangan hin binilyon nga hingpit nga katulinan.a Salit hadto ginhunahuna nga an kinabuhi ni Jesus ngan han ngatanan nga iya unta magigin hingpit nga katulinan amo an halad nga katugbang han kinabuhi ni Adan ngan han iya diri hingpit nga katulinan. Kondi waray magsiring an Biblia nga kon magkaanak hi Jesus, magigin bahin hira han lukat. Ginpapabug-atan han Roma 5:15-19 nga an kamatayon han “usa ka tawo” la an nagtagana han lukat. Oo, an hingpit nga kinabuhi ni Jesus amo an katugbang han hingpit nga kinabuhi ni Adan. Salit hi Jesu-Kristo gud la an ginpapabug-atan hito. Nagin posible nga makarawat han ngatanan nga klase hin tawo an regalo ngan kinabuhi tungod han “usa nga buhat han katadongan” ni Jesus, an iya pagkamasinugtanon ngan pagkamatinumanon tubtob ha kamatayon. (2 Kor. 5:14, 15; 1 Ped. 3:18) Paonan-o nagin sugad hito an resulta?

Kaabswelto Tungod han Lukat

12, 13. Kay ano nga masisiring nga an kalooy ngan gugma han Dios an nagpagios ha iya nga iaplikar an bili han lukat para ha mga iginpapahayag niya nga matadong?

¹² Ginkarawat ni Jehova nga Dios an halad lukat han iya Anak. (Heb. 9:24; 10:10, 12) Bisan pa hito, nagpabilin nga diri hingpit an mga disipulo ni Jesus dinhi ha tuna, pati na an iya magtinumanon nga apostol. Nangalimbasog hira nga diri makabuhat hin sayop, pero usahay napapakyas hira. Kay ano? Tungod kay nakapanunod hira hin sala. (Roma 7:18-20) Kondi may mahihimo an Dios ha pagsulbad hito, ngan ginhimo niya ito. Ginkarawat niya an “katugbang nga lukat” ngan karuyag niya nga iaplikar an bili hito ha mga tawo nga nag-aalagad ha iya.

¹³ Diri karuyag sidngon hini nga obligado an Dios nga iaplikar an bili han lukat ha mga apostol ngan ha iba tungod han ira mag-opay nga buhat. Lugod, ginbuhat niya ito tungod han iya kalooy ngan daku nga gugma. Ginpili niya nga iabswelto an mga apostol ngan an iba ha akusasyon ha ira, ngan para ha iya talwas na hira ha napanunod nga sala. Iginsaysay ito ni Pablo: “Pinaagi han grasya naluwas kamo pinaagi han pagtoo; ngan ini diri tikang ha iyo ngahaw, amo ito an hatag han Dios.”—Efe. 2:8.

14, 15. Ano an balos ha mga iginpahayag han Dios nga matadong, kondi ano pa an kinahanglan nira buhaton?

¹⁴ Hunahunaa kon mationan-o kabirilhon an regalo nga mapasaylo han Makagarahum ha ngatanan an sala nga napanunod han usa pati na an mga sayop nga iya nabuhat! Diri gud maiihap an mga sala nga nabuhat han mga tawo antes hira magin Kristiano, kondi pinaagi han lukat, mapapasaylo han Dios ito nga mga sala. Hi Pablo nagsurat: “An hatag nga waray bayad tikang ha damu nga mga pagtalapas ngadto ha pagkamatadong.” (Roma 5:16) An mga apostol ngan an iba nga nakakarawat hinin mahigugmaon nga hatag o regalo (naipahayag nga matadong) sadang magpadayon ha pagsingba ha tinuod nga Dios nga may pagtoo. Ano an ira balos ha tidaraon? “Hira nga nakakarawat han kahuraan han grasya ngan han hatag han kamatadong maghahadi ha kinabuhi, tungod han usa, nga amo hi Jesu-Kristo.” Oo, kabaliktaran gud an resulta han regalo nga pagkamatadong. Magriresulta ito hin kinabuhi.—Roma 5:17; basaha an Lukas 22:28-30.

¹⁵ An mga nakakakarawat hito nga regalo, an pagin naipahayag nga matadong, nagigin espirituwal nga mga anak han Dios. Sugad nga mga igkasi-manurunod ni Kristo, may paglaom hira nga banhawon ngadto ha langit sugad nga espiritu nga mga anak nga “maghahadi” upod ni Jesu-Kristo.—Basaha an Roma 8:15-17, 23.

An Gugma han Dios Iginpakita ha Iba

16. Ano nga regalo an mahimo makarawat bisan yana han mga may paglaom nga mabuhi ha tuna?

¹⁶ Diri ngatanan nga natoo ngan nag-aalagad ha Dios sugad nga maunungon nga Kristiano naglalaom nga ‘maghadi’ kaupod ni Kristo ha langit. Damu an may paglaom nga basado ha Biblia nga pariho han paglaom han mga magsiringba han Dios antes han panahon han mga Kristiano. Naglalaom hira nga mabuhi ha waray kataposan ha paraiso nga tuna. Puydi na ba nira makarawat yana an mahigugmaon nga regalo han Dios ngan tungod hito tagdon hira nga matadong para ha kinabuhi ha tuna? Basado ha surat ni Pablo ha mga taga-Roma, makakasarig gud kita nga oo an baton!

17, 18. (a) Tungod han pagtoo ni Abraham, paonan-o hiya gintagad han Dios? (b) Kay ano nga puydi magin matadong hi Abraham ha paniplatan han Dios?

¹⁷ Ginhisgotan ni Pablo an usa nga nangunguna nga ehemplo, hi Abraham, nga nagpakita hin pagtoo ngan nabuhi antes pa maghatag hi Jehova hin mga balaud ha Israel ngan maiha pa antes abrihan ni Kristo an higayon nga mabuhi ha langit. (Heb. 10:19, 20) Ini an aton mababasa: “An saad kan Abraham o ha iya katulinan nga hiya an manurunod han kalibotan, diri pinaagi han Kasugoanan, kondi pinaagi ha katadongan ha pagtoo.” (Roma 4:13; Jak. 2:23, 24) Salit gintagad han Dios nga matadong an matinumanon nga hi Abraham.—Basaha an Roma 4:20-22.

¹⁸ Diri ito nangangahulogan nga ha damu ka tuig nga pag-alagad ni Abraham kan Jehova, waray hiya makasala. Diri ha sugad hito nga paagi hiya nagin matadong. (Roma 3:10, 23) Kondi tungod han waray tubtoban nga kinaadman ni Jehova, iya gintagad an makatirigamnan nga pagtoo ni Abraham pati na an iya mga buhat nga resulta hito. Natoo gud hi Abraham ha “katulinan” o binhi nga magtitikang ha iya. Ito nga Binhi amo an nagin Mesias, o Kristo. (Gen. 15:6; 22:15-18) Salit pinaagi ha “pagtubos nga aada kan Kristo Jesus,” an Dios sugad nga Hukom makakapasaylo han mga sala nga nahimo ha naglabay. Kon sugad, hi Abraham ngan an iba pa nga magtinumanon nga nabuhi antes an panahon han mga Kristiano may paglaom nga mabanhaw.—Basaha an Roma 3:24, 25; Sal. 32:1, 2.

Pahimulsi an Pagin Matadong Yana

19. Kay ano nga sadang magin makaparig-on ha damu yana an pagtagad han Dios kan Abraham?

¹⁹ An kamatuoran nga gintagad han mahigugmaon nga Dios nga matadong hi Abraham sadang magparig-on ha tinuod nga mga Kristiano yana. Waray hiya ipahayag nga matadong ni Jehova ha paagi nga pariho han mga dinihogan han espiritu nga magigin mga “manurunod upod ni Kristo.” Ito nga grupo nga limitado an kadamu “gintawag nga mga magigin baraan” ngan ginkarawat nga “mga anak han Dios.” (Roma 1:7; 8:14, 17, 33) Ha luyo nga bahin, hi Abraham gintawag nga “sangkay han Dios” antes pa ihalad an lukat. (Jak. 2:23; Isa. 41:8) Kondi kumusta man an tinuod nga mga Kristiano nga naglalaom nga mabuhi ha naibalik nga Paraiso ha tuna?

20. Ano an ginlalaoman han Dios ha iya gintatagad yana nga magtadong pariho kan Abraham?

²⁰ Waray hira makakarawat han “hatag han kamatadong” para ha kinabuhi ha langit “pinaagi ha pagtubos nga aada kan Kristo Jesus.” (Roma 3:24; 5:15, 17) Bisan pa hito, nagpapakita hira hin sinsero nga pagtoo ha Dios ngan ha iya mga tagana, ngan iginpapakita nira an ira pagtoo pinaagi han mag-opay nga buhat. Usa hito nga mga buhat amo an ‘pagwali han ginhadian han Dios ngan pagtutdo han mga bagay mahitungod ha Ginoo Jesu-Kristo.’ (Buh. 28:31) Salit mahimo hira tagdon nga matadong ni Jehova ha pariho nga paagi han iya pagtagad kan Abraham. An regalo nga ira nakakarawat, an pagin sangkay han Dios, iba ha “hatag” o regalo nga nakakarawat han mga dinihogan. Kondi sigurado nga mapasalamaton gud hira ha pagkarawat hito nga regalo.

21. Paonan-o kita nagpapahimulos ha gugma ngan hustisya ni Jehova?

²¹ Damu an iginsasaad han tawhanon nga mga magmarando, kondi diri tikang ha ira an imo paglaom nga mabuhi ha waray kataposan. Lugod, an higayon nga mabuhi ha waray kataposan iginbasar ha maaramon nga katuyoan han Soberano ha Uniberso. Ginbuhat ni Jehova an sunod-sunod nga paagi basi matuman an iya katuyoan. Uyon ito ha tinuod nga hustisya. Labaw ha ngatanan, iginpakita hito an daku nga gugma han Dios. Salit nakasiring hi Pablo: “An Dios nagpahayag gud han iya kalugaringon nga gugma tungod ha aton, nga, amo man hi Kristo namatay tungod ha aton, han mga makasasala pa kita.”—Roma 5:8.

[Footnote]

Nahihinumdoman Mo Ba?

• Ano an napanunod han katulinan ni Adan, ngan ano an resulta?

• Paonan-o igintagana an katugbang nga lukat, ngan ha ano nga paagi nagin katugbang ito?

• Ano an imo paglaom tungod han regalo nga pagin naipahayag nga matadong?

[Retrato ha pahina 13]

Nakasala an hingpit nga tawo nga hi Adan. Iginhalad han hingpit nga tawo nga hi Jesus an “katugbang nga lukat”

[Retrato ha pahina 15]

Maopay gud nga sumat nga pinaagi kan Jesus maipapahayag kita nga matadong!