Apresyara an mga Maduruto nga Nagbubuhat Para ha Iyo
‘Kilalaha an mga nagbubuhat ha butnga niyo, ngan nagmamando ha iyo ha Ginoo, ngan an mga nagsasagdon ha iyo.’—1 TES. 5:12.
1, 2. (a) Ano an kahimtang han kongregasyon ha Tesalonika han iginsurat ni Pablo an iya siyahan nga surat ha ira? (b) Ano an igin-aghat ni Pablo nga buhaton han mga taga-Tesalonika?
HUNAHUNAA nga membro ka han siyahan-siglo nga kongregasyon ha Tesalonika, usa han siyahan nga naestablisar nga mga kongregasyon ha Europa. Hi apostol Pablo naggahin hin daku nga panahon ha pagparig-on han kabugtoan didto. Bangin nagpili hiya hin mga tigurang basi manguna, pariho han iya ginbuhat ha iba nga kongregasyon. (Buh. 14:23) Kondi katapos maestablisar an kongregasyon, an mga Judio nagporma hin masamok nga grupo basi paiwason ha Tesalonika hira Pablo ngan Silas. An mga Kristiano nga nahibilin didto bangin inabat nga ginbayaan hira, ngan bangin nahadlok pa ngani.
2 Diri urusahon nga pagbaya ni Pablo ha Tesalonika, nabaraka hiya ha bag-o nga kongregasyon. Nangalimbasog hiya nga bumalik, kondi “hi Satanas nag-ulang” ha iya. Salit iya ginsugo hi Timoteo nga parig-unon an kongregasyon. (1 Tes. 2:18; 3:2) Pagbalik ni Timoteo nga may maopay nga sumat, naaghat hi Pablo nga magsurat ha mga taga-Tesalonika. Lakip hito nga surat an iya pagdasig ha ira nga ‘kilalahon an mga nagbubuhat ha butnga nira, ngan nagmamando’ o nangunguna ha ira.—Basaha an 1 Tesalonika 5:12, 13.
3. Ano an mga hinungdan nga kinahanglan apresyaron gud han mga Kristiano ha Tesalonika an mga tigurang?
3 An kabugtoan nga nangunguna ha kongregasyon ha Tesalonika diri eksperyensyado sugad kan Pablo ngan han iya mga kaupod, ngan bag-o pa la hira nga mga Kristiano kon itanding ha mga tigurang ha Jerusalem. Ngani, waray pa mag-usa ka tuig tikang nga naestablisar ito nga kongregasyon! Bisan pa hito, an kabugtoan may hinungdan nga magin mapasalamaton ha mga tigurang nga maduruto nga “nagbubuhat” ngan nangunguna ha kongregasyon ngan “nagsasagdon” ha ira. Oo, may-ada hira maopay nga hinungdan nga ‘mahalon gud’ an mga tigurang. Katapos hini nga hangyo, hi Pablo nagsagdon nga makigmurayaw ha usa kag usa. Kon nakadto ka ha Tesalonika, aapresyaron mo gud ba an ginbubuhat han mga tigurang? Paonan-o mo gintatagad an regalo nga kalalakin-an nga iginhatag han Dios ha iyo kongregasyon pinaagi kan Kristo?—Efe. 4:8.
Maduruto nga “Nagbubuhat”
4, 5. Kay ano nga an mga tigurang ha panahon ni Pablo kinahanglan magmaduruto, ngan kay ano nga sugad liwat hito an kahimtang yana?
4 Han nakadto hira Pablo ngan Silas ha Berea, paonan-o an mga tigurang ha Tesalonika maduruto nga “nagbubuhat”? Ha pagsubad kan Pablo, sigurado nga ira gintutdoan an kongregasyon gamit an Kasuratan. ‘Gin-apresyar ba han mga Kristiano ha Tesalonika an Pulong han Dios?’ bangin maghunahuna ka. An Biblia nasiring nga an mga taga-Berea “burobuotan pa ha mga taga-Tesalonika, . . . adlaw-adlaw ira gin-usisa an Santos nga Surat.” (Buh. 17:11) Pero an pagtanding diri ha mga Kristiano, kondi ha kabug-osan han mga Judio ha Tesalonika. Adton nagin tumuroo ‘nagkarawat han Pulong han Dios, diri sugad nga pulong han mga tawo, kondi sugad nga pulong han Dios.’ (1 Tes. 2:13) Sigurado nga maduruto nga nagbuhat an mga tigurang basi mapakaon hira ha espirituwal.
5 Yana, an matinumanon ngan maaramon nga uripon nga klase nagtatagana ha panon han Dios hin “pagkaon ha igo nga panahon.” (Mat. 24:45) Ha paggiya han uripon, maduruto nga ginpapakaon ha espirituwal han mga tigurang an ira kabugtoan. An mga membro han kongregasyon bangin may damu nga literatura nga basado ha Biblia, ngan ha iba nga yinaknan may mga garamiton sugad han Watch Tower Publications Index ngan Watchtower Library ha CD-ROM. Basi matagbaw an espirituwal nga panginahanglan han kongregasyon, damu nga oras an ginagamit han mga tigurang ha pangandam hin mga bahin ha katirok basi maipresenta ito ha epektibo nga paagi. Nahunahuna mo ba kon mationan-o kadaku nga panahon an igin-gagahin han mga tigurang ha pangandam han ira bahin ha mga katirok, asembleya, ngan kombensyon?
6, 7. (a) Ano nga susbaranan an iginpakita ni Pablo ha mga tigurang ha Tesalonika? (b) Kay ano nga bangin makuri ha mga tigurang yana an pagsubad kan Pablo?
6 Ginhinumdoman han mga tigurang ha Tesalonika an maopay nga susbaranan ni Pablo ha pagmangno ha panon. Waray niya ito buhata tungod la kay obligasyon niya ito. Sugad han ginhisgotan ha nahiuna nga artikulo, hi Pablo nagin ‘matalunoy sugad hin yaya nga nag-uugay ha iya anak.’ (Basaha an 1 Tesalonika 2:7, 8.) Andam pa ngani hiya ‘ha paghatag han iya kalag’! Sadang hiya subaron han mga tigurang ha ira pagmangno ha panon.
7 Ginsusubad hi Pablo han Kristiano nga mga paramangno yana pinaagi ha pag-ataman hin maopay ha panon. Bangin may kabugtoan nga diri nira kinaiya an pagin buotan ngan makisangkayon. Bisan pa hito, an mga tigurang nangangalimbasog nga magin masinabuton ngan ‘makaagi hin kaopayan’ ha ira. (Prob. 16:20) Syempre, tungod kay diri hingpit, bangin makuri ha usa nga tigurang nga magkaada positibo nga panhunahuna ha kada usa. Kondi samtang nagtatalinguha gud hiya nga magin malumo ha ngatanan, diri ba sadang hiya kumendasyonan ha iya pangalimbasog nga magin maopay nga paramangno nga nagpapasakop kan Kristo?
8, 9. Ano an pipira nga paagi nga an mga tigurang yana ‘nagmamangno ha aton kalag’?
8 Kita ngatanan may hinungdan nga “magpasakop” ha mga tigurang. Sugad han iginsurat ni Pablo, ‘nagmamangno hira ha aton kalag.’ (Heb. 13:17) Nagpapahinumdom ito ha aton han magbarantay hin karnero nga nag-aagma ha gab-i basi panalipdan an iya panon. Ha pariho nga paagi, an mga tigurang yana bangin mapiraw ha pagmangno ha mga may sakit, problema ha emosyon, o nakukurian pag-aplikar han mga prinsipyo ha Biblia. Pananglitan, an kabugtoan ha Hospital Liaison Committee napupukaw kon may mga emergency. Salit mapasalamaton gud kita ha ira bulig kon kita an aada hito nga kahimtang!
9 An mga tigurang nga nanginginano ha pagtukod hin mga Kingdom Hall ngan mga membro hin relief committee maduruto nga nabulig ha kabugtoan. Takos gud hira han aton bug-os-kasingkasing nga suporta! Tagda an ginhimo nga pagbulig ha mga naapektohan han makusog nga bagyo nga Nargis ha Myanmar han 2008. Basi makaabot ha kongregasyon han Bothingone ha naapektohan gud nga rehiyon ha Irrawaddy Delta, an grupo nga mabulig nagbiyahe ha naguba nga dalan nga damu nga patay nga lawas an nagpapatsarang. Han nakita han kabugtoan didto nga upod han siyahan nga grupo nga inabot an ira paramangno han sirkito hadto, hira ginuliat: “Kitaa! Adi an aton paramangno han sirkito! Ginluwas kita ni Jehova!” Gin-aapresyar mo ba an pagin maduruto han mga tigurang ha adlaw ngan gab-i? An iba ha ira gintutokahan nga magin kaapi han espesyal nga mga komite nga nanginginano ha magkuri nga hudisyal nga kaso. Diri nira iginhahambog an ira nahihimo, kondi mapasalamaton gud an ira mga nabubuligan.—Mat. 6:2-4.
10. Ano nga buruhaton nga diri hinbabaroan han kadam-an an ginbubuhat han mga tigurang?
10 Damu nga tigurang yana an nag-aasikaso han mga rekord han kongregasyon. Pananglitan, an koordinetor han lawas han mga tigurang nag-aandam han eskedyol han mga katirok kada semana. An sekretaryo han kongregasyon nagtitirok han binulan ngan tinuig nga report ha pag-alagad ha kanataran. Gin-aadman hin maopay han paramangno han Teokratiko nga Eskwelahan an eskedyol han eskwelahan. Kada tulo ka bulan, gin-aawdit an account han kongregasyon. Ginbabasa han mga tigurang an mga surat tikang ha sanga nga opisina ngan ginsusunod an instruksyon nga nakakabulig basi matipigan an “pagkaurosa han pagtoo.” (Efe. 4:3, 13) Pinaagi han pangalimbasog han maduruto nga mga tigurang, an ngatanan ginbubuhat hin mahapsay ngan uyon ha kahikayan.—1 Kor. 14:40.
Nangunguna ha Kongregasyon
11, 12. Hin-o an nangunguna ha kongregasyon, ngan ano an nahiuupod ha pagbuhat hito?
11 Hi Pablo nagsiring nga an maduruto nga mga tigurang ha Tesalonika “nagmamando” ha kongregasyon. An orihinal nga pulong nga iginhubad nga “nagmamando” nagpapasabot hin “pagtindog ha atubangan” ngan mahimo ihubad nga “naggigiya; nangunguna.” (1 Tes. 5:12) Gin-unabi ni Pablo nga ito nga mga tigurang maduruto nga “nagbubuhat.” Diri la an usa nga “nangunguna nga paramangno” an iya gintutudlok kondi an ngatanan nga tigurang ha kongregasyon. Yana, kadam-an han mga tigurang an natindog ha atubangan han kongregasyon ngan nagdudumara han mga katirok. An diri pa la maiha nga pagbag-o nga gamiton an termino nga “koordinetor han lawas han mga tigurang” nabulig ha aton nga tagdon an ngatanan nga tigurang sugad nga mga membro han nagkakaurosa nga lawas han mga tigurang.
12 An ‘pagmando’ o panguna ha kongregasyon labaw pa kay ha pagtutdo la. Ha orihinal nga yinaknan, gin-gamit liwat ito nga pulong ha 1 Timoteo 3:4. Hi Pablo nagsiring nga an paramangno kinahanglan nangunguna o “nagdadara hin maopay ha iya panimalay, ngan iton iya mga anak magmasinugtanon ha bug-os nga kaligdong.” An pulong nga iginhubad dinhi nga “nagdadara” matin-aw nga nag-uupod diri la han pagtutdo ha iya mga anak kondi han pagpanguna liwat ha pamilya ngan pagkaada ‘masinugtanon nga mga anak.’ Oo, an mga tigurang nangunguna ha kongregasyon, ginbubuligan an ngatanan nga magpasakop kan Jehova.—1 Tim. 3:5.
13. Kay ano nga bangin magkinahanglan hin panahon antes makahimo hin desisyon ha katirok han mga tigurang?
13 Basi mapangunahan hin maopay an panon, an mga tigurang nag-iiristorya kon paonan-o maihahatag an panginahanglan han kongregasyon. Bangin mas madagmit kon usa la nga tigurang an maghimo han ngatanan nga desisyon. Kondi ha pagsubad han susbaranan han nagmamando nga lawas ha siyahan nga siglo, an mga lawas han mga tigurang yana tangkod nga nag-iiristorya ngan nagpapagiya ha Kasuratan. Tumong nira nga iaplikar an mga prinsipyo ha Kasuratan ha mga panginahanglan han kongregasyon. Epektibo gud ito kon an tagsa nga tigurang nangangandam para ha ira katirok, gin-uusisa an Biblia ngan an mga instruksyon han matinumanon ngan maaramon nga uripon nga klase. Syempre, nagkikinahanglan ito hin panahon. Kon iba-iba an opinyon, sugad han nahitabo ha nagmamando nga lawas han siyahan nga siglo han ira ginhisgotan an mahitungod han pagturi, bangin pagkinahanglanon an dugang nga panahon ngan pagsaliksik basi magkauruyon ha usa nga desisyon nga basado ha Kasuratan.—Buh. 15:2, 6, 7, 12-14, 28.
14. Gin-aapresyar mo ba an urosa nga pagbuhat han mga tigurang? Kay ano?
14 Ano an mahimo mahitabo kon iinsister han usa nga tigurang an iya karuyag o iaghat an iya kalugaringon nga mga ideya? O ano man kon may usa—pariho kan Diotrepes ha siyahan nga siglo—nga mag-aghat hin pagkabahin-bahin? (3 Juan 9, 10) Sigurado nga mag-aantos an bug-os nga kongregasyon. Kon nagsari hi Satanas nga samukon an kongregasyon ha siyahan nga siglo, sigurado nga karuyag liwat niya nga mawara an kamurayawan han kongregasyon yana. Bangin pukawon niya an makikalugaringon nga tendensya han tawo, sugad han hingyap nga magin prominente. Salit kinahanglan kultibaron han mga tigurang an pagkamapainubsanon ngan magbuhat nga urosa sugad nga lawas han mga tigurang. Gin-aapresyar gud naton an pagkamapainubsanon han mga tigurang nga nagbuburublig sugad nga lawas!
“Nagsasagdon ha Iyo”
15. Ano an motibo han mga tigurang kon nagsasagdon ha usa nga bugto?
15 Katapos, ginpabug-atan ni Pablo an makuri pero importante nga buruhaton han mga tigurang: an pagsagdon ha panon. Ha Kristiano Griego nga Kasuratan, hi Pablo la an naggamit han Griego nga pulong nga iginhubad nga “sagdoni.” Mahimo ito mangahulogan hin marig-on nga pagsagdon kondi diri nagpapasabot hin maraot nga pagtratar. (2 Tes. 3:15) Pananglitan, hi Pablo nagsurat ha mga taga-Korinto: “Diri ako magsurat hini nga mga bagay ha pagpakaalo ha iyo, kondi ha pagsagdon ha iyo sugad ha akon mga hinigugma nga mga anak.” (1 Kor. 4:14) An iya motibo ha pagsagdon amo an iya gugma ha iba.
16. Ano an sadang hinumdoman han mga tigurang kon nagsasagdon ha iba?
16 Ginhihinumdoman han mga tigurang nga importante an paagi han ira pagsagdon. Nangangalimbasog hira nga subaron hi Pablo pinaagi ha pagin buotan, mahigugmaon, ngan mabinuligon. (Basaha an 1 Tesalonika 2:11, 12.) Syempre, an mga tigurang ‘nagbabantay han pulong nga matinumanon, basi makasadang hira paglaygay han putli nga pagturon-an.’—Tito 1:5-9.
17, 18. Ano an sadang mo hinumdoman kon ginsasagdonan ka han usa nga tigurang?
17 Syempre, an mga tigurang diri hingpit ngan bangin may mayakan hira nga pagbasolan nira ha urhi. (1 Hadi 8:46; Jak. 3:8) Maaram liwat hira nga para ha kabugtoan, an pakakarawat hin sagdon kasagaran na nga diri ‘makalilipay kondi makabibido.’ (Heb. 12:11) Salit kon an usa nga tigurang nagsasagdon ha usa nga bugto, sigurado nga ginhunahuna niya ito hin maopay ngan igin-ampo antes buhaton. Kon ginsagdonan ka han usa nga tigurang, gin-aapresyar mo ba an iya mahigugmaon nga pagtagad?
18 Pananglitan may-ada ka sakit nga baga hin diri bug-os nga masabtan han mga doktor. Katapos, may usa nga doktor nga nagsumat ha imo kon ano an imo sakit, kondi makuri ito karawaton. Masisina ka ba ha iya? Diri gud! Bisan kon sumiring hiya nga kinahanglan ka operahan, posible nga maruyag ka tungod kay natoo ka nga makakaopay ito ha imo. Bangin makaapekto ha imo emosyon an paagi han pagsumat ha imo han doktor, pero ito ba an imo magigin basihan ha pagdesisyon? Posible nga diri. Sugad man, an paagi han pagsagdon diri sadang makapugong ha imo nga pamatian an mga ginagamit ni Jehova ngan ni Jesus basi buligan ka kon paonan-o pauswagon o panalipdan an imo espirituwalidad.
Apresyara an Igintagana ni Jehova nga mga Tigurang
19, 20. Paonan-o mo maipapakita an imo apresasyon ha regalo nga kalalakin-an?
19 Ano an imo bubuhaton kon nakakarawat ka hin regalo nga ginhimo para gud ha imo? Ipapakita mo ba an imo apresasyon pinaagi han paggamit hito? Igintagana ni Jehova ha imo pinaagi kan Jesu-Kristo an regalo nga kalalakin-an. Usa nga paagi nga maipapakita mo nga mapasalamaton ka hito amo an pagpamati hin maopay ha pahayag han mga tigurang ngan pangalimbasog nga iaplikar an mga punto nga ira ginpapabug-atan. Maipapakita mo liwat an imo apresasyon pinaagi ha paghatag hin praktikal nga mga komento ha mga katirok. Makigkooperar ha mga buruhaton nga ginpapangunahan han mga tigurang, sugad han pagsangyaw. Kon nakabulig ha imo an sagdon han usa nga tigurang, kay ano nga diri hiya sumatan? Dugang pa, kay ano nga diri ipakita an imo apresasyon ha pamilya han mga tigurang? Hinumdumi nga basi matuman han usa nga tigurang an iya obligasyon ha kongregasyon, iginsasakripisyo han iya pamilya an panahon nga para unta ha ira.
20 Oo, damu an aton hinungdan nga ipakita an aton apresasyon ha mga tigurang nga maduruto nga nagbubuhat para ha aton, nangunguna, ngan nagsasagdon ha aton. Mahigugmaon gud nga tagana ni Jehova inin regalo nga kalalakin-an!
Nahihinumdoman Mo Ba?
• Ano an mga hinungdan han mga Kristiano ha Tesalonika nga apresyaron an mga nangunguna ha ira?
• Paonan-o an mga tigurang ha iyo kongregasyon maduruto nga nagbubuhat para ha iyo?
• Paonan-o ka nagpapahimulos ha pagpanguna han mga tigurang?
• Kon ginsasagdonan ka han usa nga tigurang, ano an imo sadang hinumdoman?
[Retrato ha pahina 27]
Gin-aapresyar mo ba an damu nga paagi nga ginmamangnoan han mga tigurang an kongregasyon?