‘Magin Maisugon Ngan Marig-on Hinduro’
‘Magin maisugon ngan marig-on hinduro. Hi Jehova nga imo Dios upod ha imo.’—JOS. 1:7-9, NW.
ANO AN IMO BATON?
Ha ano nga mga paagi iginpakita ni Enok ngan ni Noe an kaisog?
Paonan-o an pipira nga kababayin-an ha kadaan nga panahon nagpakita hin susbaranan ha pagtoo ngan kaisog?
Ano nga mga ehemplo han mga batan-on nga nagpakita hin kaisog an imo naruruyagan gud?
1, 2. (a) Ano an usahay ginkikinahanglan basi maipadayon an pagbuhat hin husto kada adlaw? (b) Ano an aton pag-aadman hini nga artikulo?
AN KAISOG kabaliktaran han kahadlok, kaluya, ngan pagin matalaw. Bangin maghunahuna kita nga an maisugon nga tawo marig-on ngan waray kahadlok. Kondi usahay ginkikinahanglan an kaisog basi la maipadayon an pagbuhat hin husto kada adlaw.
2 May mga indibiduwal nga gin-unabi ha Biblia nga nagpakita hin kawaray kahadlok ha magkuri nga kahimtang. An iba nagpakita hin kaisog ha mga sitwasyon nga komon nga nahitatabo ha mga surugoon ni Jehova. Ano nga leksyon an aton hibabaroan ha mga ehemplo ha Biblia nga nagpakita hin kaisog? Paonan-o kita magigin maisugon?
MAISUGON NGA MGA SAKSI HA KALIBOTAN NGA WARAY KAHADLOK HA DIOS
3. Ano an igintagna ni Enok mahitungod ha magraot?
3 Ginkinahanglan an kaisog basi magin saksi ni Jehova butnga han maraot nga katawohan antes an Baha ha panahon ni Noe. Kondi hi Enok nga “ikapito tikang kan Adan” waray kahadlok nga nagpahayag hini nga tagna: “Kitaa, an Ginoo inabot upod an iya napulo ka yukot nga mga baraan, ha paghukom ha ngatanan, ngan ha pagbadlong ha ngatanan nga diri matinahuron ha Dios tungod ha ira mga buhat nga diri diosnon nga ira ginbuhat ha diri pagkamatinahuron ha Dios, ngan tungod ha ngatanan nga magtig-a nga mga butang nga ginyakan kontra ha iya han mga magpakasasala nga diri magtinahuron ha Dios.” (Jud. 14, 15) Iginyakan ito ni Enok nga sugad hin nahitabo na tungod kay ito nga tagna sigurado nga matutuman. Ngan natuman gud ito han ginbungkag an magraot ha bug-os-kalibotan nga baha!
4. Ano an mga kahimtang ha panahon nga hi Noe ‘naglakat upod han Dios’?
4 An Baha nahitabo han 2370 A.K.P., sobra 650 ka tuig katapos mamatay hi Enok. Antes han Baha, natawo hi Noe, nagkaada pamilya, ngan naghimo han arka kaupod an iya mga anak. An magraot nga anghel nagpakatawo, nag-asawa hin maghusay nga babaye, ngan nagkaada mga anak nga Nepilim. Dugang pa, nagtikaduro an karaotan han tawo, ngan an tuna napuno hin kamadarahog. (Gen. 6:1-5, 9, 11) Bisan pa hito, ‘hi Noe naglakat upod han Dios’ ngan maisugon nga nagpamatuod sugad nga “parawali ha katadongan.” (Basaha an 2 Pedro 2:5.) Nagkikinahanglan kita hin sugad hito nga kaisog hinin kataposan nga mga adlaw.
NAGPAKITA HIRA HIN PAGTOO NGAN KAISOG
5. Paonan-o iginpakita ni Moises an pagtoo ngan kaisog?
5 Hi Moises susbaranan han pagtoo ngan kaisog. (Heb. 11:24-27) Tikang han 1513-1473 A.K.P., gin-gamit hiya han Dios ha pagpanguna ha mga Israelita paggawas ha Ehipto ngan ha kamingawan. Inabat hi Moises nga waray hiya kapas ha pagbuhat hito nga toka, kondi ginkarawat niya ito. (Eks. 6:12) Hiya ngan an iya bugto nga hi Aaron pauroutro nga inatubang ha mapintas nga Paraon han Ehipto ngan maisugon nga nagpahayag han Napulo nga Peste nga gin-gamit ni Jehova basi talwason an iya katawohan ngan ipakita nga waray gahum an mga dios han Ehipto. (Eks., kap. 7-12) Nagpakita hi Moises hin pagtoo ngan kaisog tungod kay pirme hiya ginbubuligan han Dios, ngan sugad man kita yana.—Deut. 33:27.
6. Kon gin-iimbistigar kita han mga awtoridad, ano an mabulig ha aton nga magkaada kaisog nga depensahan an aton gintotoohan?
6 Ginkikinahanglan naton an kaisog nga pariho han iginpakita ni Moises, kay hi Jesus nagsiring: “Ha atubangan han mga gobernador ngan han mga hadi pagdadad-on kamo tungod ha akon, ha pagpamatuod ha ira, ngan ha mga Hentil. Kondi kon kamo ira na igtubyan, diri kamo mangarit kon oonanhon, o kon ano an igyayakan, kay ihahatag ha iyo hito ngahaw nga oras an iyo igyayakan. Kay diri kamo an magyayakan, kondi an espiritu han Amay, nga nagyayakan ha iyo.” (Mat. 10:18-20) Kon iimbistigaron kita han mga awtoridad, bubuligan kita han espiritu ni Jehova nga magin matinalahuron samtang aton gindidepensahan an aton gintotoohan nga may pagtoo ngan kaisog.—Basaha an Lukas 12:11, 12.
7. Kay ano nga hi Josue maisugon ngan malampuson ha iya toka?
7 An regular nga pag-aram han Balaud han Dios nagparig-on han pagtoo ngan kaisog ni Josue, an sinaliwan kan Moises. Han 1473 A.K.P., an Israel andam na sumulod ha Tuna nga Iginsaad. ‘Magin maisugon ngan marig-on hinduro,’ nagsiring an Dios. Pinaagi ha pagsunod ha Balaud, magigin maaramon ngan malampuson hi Josue. Ginsidngan hiya: “Ayaw patarhog ngan ayaw man liwat kahulop: kay hi Jehova nga imo Dios maupod ha imo bisan ngain ka kadto.” (Jos. 1:7-9; NW) Sigurado nga ito nga mga pulong nagparig-on gud kan Josue! Ngan waray ruhaduha nga inupod ha iya hi Jehova, kay ha unom la ka tuig nasakop na an kadak-an han Tuna nga Iginsaad, han 1467 A.K.P.
KABABAYIN-AN NGA MAISUGON NGA NAG-ALAGAD HA DIOS
8. Kay ano nga hi Rahab susbaranan ha pagtoo ngan kaisog?
8 Ha kadaan nga panahon, damu nga kababayin-an an nagpakita hin kaisog ha ira pag-alagad kan Jehova. Pananglitan, an puta nga hi Rahab nga taga-Jeriko nagpakita hin pagtoo ha Dios pinaagi han maisugon nga pagtago han duha nga espiya nga ginsugo ni Josue ngan pagtutdo ha iba nga direksyon han mga nagbibiling ha mga espiya. Hiya ngan an iya panimalay naluwas han ginsakop han mga Israelita an Jeriko. Inundang hiya ha iya maraot nga pagkinabuhi, matinumanon nga nagsingba kan Jehova, ngan nagin kaapoy-apoyan han Mesias. (Jos. 2:1-6; 6:22, 23; Mat. 1:1, 5) Ginbendisyonan gud hiya tungod han iya pagtoo ngan kaisog!
9. Paonan-o nagpakita hin kaisog hira Debora, Barak, ngan Jael?
9 Han mga 1450 A.K.P., katapos mamatay hi Josue, nagpili hi Jehova hin kalalakin-an basi magin mga hukom ha Israel. Bainte ka tuig na nga ginraraugdaog han hadi han Kanaan nga hi Jabin an mga Israelita. Ginpagios han Dios an propetisa nga hi Debora nga aghaton an hukom nga hi Barak nga makig-away hito nga hadi. Nagtirok hi Barak hin 10,000 nga kalalakin-an ha Bukid Tabor ngan andam na ha pakig-away kan Sisera, an kumander han kasundalohan ni Jabin. Inagi hi Sisera ha mamara nga salog han Kison upod an iya kasundalohan nga may 900 nga karomata nga pan-girra. Han an mga Israelita nagmartsa tipakadto ha patag han walog, nagpahinabo an Dios hin tigda nga pagbaha salit nagin malapok hinduro an patag-awayan, nga tungod hito diri na nakakaabante an mga karomata han mga Kanaanhon. Nagdaog an kalalakin-an ni Barak, ngan “an bug-os nga kasundalohan ni Sisera nagkapupukan pinaagi han kataisan han kampilan.” Hi Sisera nagtago ha tolda ni Jael, kondi ginpatay hiya ni Jael samtang nakaturog. Sugad han igintagna ni Debora kan Barak, an kadayawan hini nga kadaogan nahingadto ha babaye nga hi Jael. Tungod kay hira Debora, Barak, ngan Jael ginios nga maisugon, an Israel “nakapahuway ha kap-atan ka tuig.” (Huk. 4:1-9, 14-22; 5:20, 21, 31) Damu nga kalalakin-an ngan kababayin-an an nagpapakita hin pariho hito nga pagtoo ngan kaisog.
AN ATON MGA PULONG MAKAKABULIG HA IBA NGA MAGIN MAISUGON
10. Kay ano nga masisiring naton nga an aton mga pulong makakabulig ha iba nga magin maisugon?
10 An aton ginsisiring makakabulig ha iba nga magsiringba ni Jehova nga magin maisugon. Han ika-11 ka siglo A.K.P., hi Hadi David nagsiring ha iya anak nga hi Salomon: “Magmakusganon ka ngan magmaisugon, ngan buhata ini: ayaw kahadlok, o ayaw kahulop; kay hi Jehova nga Dios, bisan an akon Dios, maupod ha imo; diri ka niya kakawangon, o diri ka babayaan, ngada nga an ngatanan nga buruhaton para ha pag-alagad ha balay ni Jehova mahuman.” (1 Kron. 28:20) Maisugon nga gintukod ni Salomon an maopay hinduro nga templo ni Jehova ha Jerusalem.
11. Paonan-o an mga pulong han usa nga maisugon nga Israelita nga daragita nakabulig ha usa nga lalaki?
11 Han ikanapulo ka siglo A.K.P., an mga pulong han usa nga maisugon nga Israelita nga daragita nagin bendisyon ha usa nga may leprosi. Ginbihag hiya han mga Siryahanon ngan nagin uripon ni Naaman, an punoan han kasundalohan han Sirya nga may leprosi. Tungod kay maaram ini nga daragita han mga milagro nga ginhimo ni Jehova pinaagi han Iya propeta nga hi Eliseo, iya ginsumatan an asawa ni Naaman nga kon an iya bana kumadto ha Israel, matatambal hiya ni Eliseo. Kinadto hi Naaman ha Israel, milagroso nga natambal, ngan nagin magsiringba ni Jehova. (2 Hadi 5:1-3, 10-17) Kon usa ka nga batan-on nga nahigugma ha Dios pariho hito nga daragita, mahahatagan ka Niya hin kaisog nga magsangyaw ha imo mga titser, igkasi-estudyante, ngan ha iba pa.
12. Ano an epekto han mga pulong ni Hadi Hesekia ha iya mga sakop?
12 An ginhunahuna hin maopay nga mga pulong mahimo makabulig ha iba nga magin maisugon ha peligroso nga mga kahimtang. Han ginsulong han mga Asiryahanon an Jerusalem han ikawalo ka siglo A.K.P., hi Hadi Hesekia nagsiring ha iya mga sakop: “Pagmakusganon ngan pagmaisugon, ayaw kahadlok o ayaw kahulop tungod han hadi ha Asirya, o tungod han ngatanan han kadam-an nga upod niya; kay may-ada durodaku nga upod ha aton kay han upod ha iya: an upod ha iya amo an butkon nga unod; kondi an upod ha aton amo hi Jehova an aton Dios ha pagbulig ha aton, ngan ha pakig-away han aton mga away.” Ano an epekto hito nga mga pulong ha mga taga-Juda? “An mga tawo sinmarig dida han mga pulong ni Hesekia”! Nakabulig ito ha ira nga magin mas maisugon. (2 Kron. 32:7, 8) An sugad hito nga mga pulong makakabulig ha aton ngan ha iba nga Kristiano nga magin mas maisugon kon gintitimaraot kita.
13. Paonan-o an tinaporan ni Hadi Ahab nga hi Obadia nagpakita hin susbaranan ha pagin maisugon?
13 Usahay an kaisog naipapakita pinaagi han diri pagyakan. Han ikanapulo ka siglo A.K.P., maisugon nga gintago han tinaporan ni Hadi Ahab nga hi Obadia an usa ka gatos nga propeta ni Jehova “ha tinagkalim-an didto ha lungib” basi diri maipapatay han maraot nga rayna nga hi Jesebel. (1 Hadi 18:4) Pariho kan Obadia nga may kahadlok ha Dios, damu nga maunungon nga surugoon ni Jehova yana an maisugon nga nagpapanalipod ha ira mga igkasi-tumuroo pinaagi ha diri pagsumat ha mga nagtitimaraot hin impormasyon mahitungod ha ira.
HI RAYNA ESTER NAGPAKITA HIN KAISOG
14, 15. Paonan-o hi Rayna Ester nagpakita hin pagtoo ngan kaisog, ngan ano an resulta?
14 Hi Rayna Ester nagpakita hin daku nga pagtoo ngan kaisog han an maraot nga hi Haman nagplano pagpoo ha mga Judio ha bug-os nga Imperyo han Persia han ikalima ka siglo A.K.P. Han hinbatian han mga Judio nga papatayon hira, nabido hira ngan nagpuasa ngan sigurado nga sinsero gud nga nag-ampo. (Est. 4:1-3) Nabaraka gud hi Rayna Ester. Ginpadad-an hiya han iya patod nga hi Mordekay hin kopya han balaud nga nagsusugo han pagpoo han mga Judio ngan ginsidngan hiya nga kumadto ha hadi ngan makimalooy nga buligan an iya mga igkasi-Judio. Kondi an bisan hin-o nga kumadto ha hadi nga waray ipatawag papatayon.—Est. 4:4-11.
15 Pero hi Mordekay nagsiring kan Ester: ‘Kon ikaw humilom la, an kaluwasan maabot tikang ha lain nga lugar. Ngan hin-o an nahibaro nga ikaw waray pakanhia ha ginhadian para hini nga panahon nga sugad hini?’ Ginsidngan ni Ester hi Mordekay nga tirukon an mga Judio ha Susan ngan magpuasa. Hiya nagsiring: “Ako liwat . . . magpupuasa ha sugad nga paagi; ngan dida hito ako makadto ha hadi, hin diri subay ha balaud: ngan kon ako mahanaw, ako mahanaw.” (Est. 4:12-17) Nagpakita hin kaisog hi Ester, ngan an libro han Ester nagsusumat ha aton nga gintalwas han Dios an Iya katawohan. Yana, an dinihogan nga mga Kristiano ngan an iba nga mga karnero nagpapakita liwat hin kaisog ha panahon han pagsari, ngan pirme hira ginbubuligan ni Jehova, nga namamati ha mga pag-ampo.—Basaha an Salmo 65:2; 118:6.
MAGIN MAISUGON
16. Ano nga susbaranan an iginpakita ni Jesus para ha mga batan-on?
16 Makausa han 12 anyos hi Jesus, naagian hiya ha templo nga “nalingkod ha butnga han mga magturutdo, ngan nagpinamati, ngan nagpipinamakiana ha ira.” Dugang pa, “an ngatanan nga nanmamati, nanhipausa han iya hibaro, ngan han iya mga baton.” (Luk. 2:41-50) Bisan kon bata pa hi Jesus, may pagtoo hiya ngan kaisog nga ginkinahanglan basi magpakiana ha edaran nga mga magturutdo ha templo. Sadang hinumdoman han Kristiano nga mga batan-on an susbaranan ni Jesus. Mabulig ito ha ira nga salingabuton an ngatanan nga higayon ‘ha pagbaton ha ngatanan nga mapakiana ha ira kon ano an katungdanan han ira pagtoo.’—1 Ped. 3:15.
17. Kay ano nga gin-aghat ni Jesus an iya mga disipulo nga magin maisugon, ngan kay ano nga kinahanglan magin maisugon kita?
17 Gin-aghat ni Jesus an iya mga disipulo nga magin maisugon. Hiya nagsiring ha ira: “Maabot an panahon, ngan aanhi na, nga magkakaburublag kamo ngatanan, kada usa, ha iya kalugaringon nga urukyan, ngan babayaan ako nga mag-uusaan. Kundi diri tinuod nga nag-uusaan la ako, kay kaupod ko an Amay. Iginsumat ko ini ha iyo basi mamay-ada niyo kamurayaw pinaagi hin pakig-usa ha akon. Pagpapaantoson kamo han kalibutan; kundi pagmaisog kamo! Gindaog ko na an kalibutan!” (Juan 16:32, 33, Maopay nga Sumat) Pariho ha siyahan nga mga sumurunod ni Jesus, nangangalas liwat ha aton an kalibotan, kondi diri naton karuyag nga magin bahin hito. Kon aton papamalandungon an pagin maisugon han Anak han Dios, magkakaada kita kaisog nga magpabilin nga bulag hini nga kalibotan. Gindaog ni Jesus an kalibotan, ngan mahihimo liwat naton ito.—Juan 17:16; Jak. 1:27.
“AYAW KAHADLOK!”
18, 19. Paonan-o iginpakita ni apostol Pablo an pagtoo ngan kaisog?
18 Hi apostol Pablo nag-ilob hin damu nga pagsari. Makausa, papatayon na unta hiya han mga Judio ha Jerusalem pero gintalwas hiya han Romano nga kasundalohan. Han pagkagab-i, “tinmupad an Ginoo kan Pablo ngan nagsiring, ‘Ayaw kahadlok! Sugad nga nagsaksi ka ha akon dinhe ha Jerusalem, magigin saksi ko liwat ikaw didto ha Roma.’” (Buh. 23:11, Maopay nga Sumat) Ito gud an ginbuhat ni Pablo.
19 Waray kahadlok nga ginsaway ni Pablo an “bantogan kaopay nga mga apostol” nga nangangalimbasog pagdaot ha kongregasyon ha Korinto. (2 Kor. 11:5; 12:11) Diri pariho ha ira, mapapamatud-an ni Pablo an iya pagkaapostol tungod han ngatanan nga iya gin-antos—kapriso, pagkastigo, peligroso nga mga pagbiyahe, iba pa nga kakurian, kagutom, kauhaw, kawaray katurog, ngan kabaraka ha mga igkasi-tumuroo. (Basaha an 2 Korinto 11:23-28.) An iya maopay gud nga susbaranan ha pagpakita hin pagtoo ngan kaisog nagpamatuod nga an iya kusog tikang ha Dios!
20, 21. (a) Paghatag hin ehemplo nga nagpapakita nga ginkikinahanglan naton an kaisog basi makailob ha magkuri nga kahimtang. (b) Ha ano nga mga kahimtang bangin kinahanglan ipakita naton an kaisog, ngan ha ano kita makakasiguro?
20 Diri ngatanan nga Kristiano makakaeksperyensya hin duro nga pagtimaraot. Kondi kita ngatanan kinahanglan magmaisugon basi makailob ha magkuri nga kahimtang. Pananglitan, usa nga batan-on ha Brazil an membro hin gang. Katapos niya mag-aram han Biblia, nasabtan niya nga kinahanglan magbag-o hiya, kondi kasagaran na nga ginpapatay an bisan hin-o nga nabaya ha gang. Nag-ampo hiya ngan naggamit hin mga teksto basi ipakita ha lider kon kay ano nga kinahanglan hiya bumaya. Gintugotan hiya nga bumaya nga waray sirot, ngan nagin magwarali hiya.
21 Ginkikinahanglan an kaisog basi maisangyaw an maopay nga sumat. An Kristiano nga mga batan-on nagkikinahanglan hin kaisog basi matipigan an ira integridad ha eskwelahan. Bangin kinahanglan an kaisog ha pagsarit nga magbakasyon ha trabaho basi makatambong ha ngatanan nga sesyon han kombensyon. Damu pa nga kahimtang an nagkikinahanglan hin kaisog. Anoman an kahimtang, hi Jehova mamamati ha aton mga “pag-ampo han pagtoo.” (Jak. 5:15) Ngan sigurado nga maihahatag niya ha aton an iya baraan nga espiritu basi kita ‘magin maisugon ngan marig-on hinduro’!
[Retrato ha pahina 11]
Hi Enok maisugon nga nagsangyaw ha kalibotan nga waray kahadlok ha Dios
[Retrato ha pahina 12]
Hi Jael maisugon ngan marig-on