Magin Positibo Bisan kon Problemado an Pag-asawa

“Ha inasaw-an na ako nagsusugo, diri ako, kondi an Ginoo.”—1 KOR. 7:10.

MAISASAYSAY MO BA?

Ha ano nga paagi gintig-ob han Dios an mag-asawa?

Paonan-o an mga tigurang makakabulig ha mga Kristiano nga may mga problema ha pag-asawa?

Paonan-o naton sadang tagdon an pag-asawa?

1. Ano an panhunahuna han mga Kristiano ha pag-asawa, ngan kay ano?

KON nag-aasawa an mga Kristiano, naghihimo hira hin saad ha Dios. Seryoso ito nga responsabilidad. (Ekles. 5:4-6) Hi Jehova an nagpatikang han kahikayan nga pag-asawa, salit iya “gintig-ob” an mga mag-asawa. (Mar. 10:9) Mag-asawa hira ha paniplatan han Dios anoman an mga balaud han nasud mahitungod ha pag-asawa. Sadang tagdon han mga surugoon ni Jehova an pag-asawa sugad nga permanente nga kahikayan, nag-aalagad man hira ha iya han ginkasal hira o diri pa.

2. Ano nga mga pakiana an hihisgotan hini nga artikulo?

² An malampuson nga pag-asawa mahimo magresulta hin duro nga kalipay. Kondi ano an aton bubuhaton kon problemado an aton pag-asawa? Mapaparig-on pa ba an sugad hito nga pag-asawa? Ano an bulig para ha mga masamok an pag-asawa?

MAGIGIN MAKALILIPAY BA ITO NGA PAG-ASAWA O MAKABIBIDO?

3, 4. Ano an mahimo mahitabo kon an usa naghihimo hin diri maaramon nga desisyon ha pagpili hin maarasawa?

³ Kon malampuson an pag-asawa han usa nga Kristiano, makalilipay ito ngan nagpapasidungog kan Jehova. Pero kon mapakyas ito, makabibido ito hinduro. An solo nga Kristiano nga nagpaplano pag-asawa makakagtikang hito ha maopay nga paagi kon iya susundon an giya han Dios. Pero kon an usa naghihimo hin diri maaramon nga desisyon ha pagpili hin maarasawa, mahimo hiya mapakyas ngan masubo. Pananglitan, may mga batan-on nga nakikig-date bisan kon diri pa andam ha mga responsabilidad nga nahiuupod ha pag-asawa. An iba nakakaagi hin maarasawa ha Internet ngan nag-aasawa dayon pero diri nagigin malipayon. An iba nakabuhat hin daku nga sala samtang mag-uyab. Tungod hini bangin mawarayan hira hin respeto ha usa kag usa. Salit kon magdesisyon hira nga magpakasal, bangin maluya an pundasyon han ira pag-asawa.

⁴ An iba nga Kristiano waray mag-asawa “ha kanan Ginoo la” ngan nag-aantos han makasurubo nga mga resulta han pagkaada pamilya nga diri nagkakaurosa ha tinuod nga pagsingba. (1 Kor. 7:39) Kon ito an imo sitwasyon, pag-ampo ha Dios basi mangaro hin pasaylo ngan bulig. Diri niya ginkukuha an mga problema nga resulta han naglabay nga mga sayop, pero ginbubuligan niya an mga mabinasulon nga mailob ito. (Sal. 130:1-4) Salit buhata an imo gimaopayi nga mapalipay an Dios yana ngan ha kadayonan, ngan ‘an kalipay ni Jehova magigin imo kusog.’—Neh. 8:10.

KON NAMIMELIGRO NGA MAGBULAG

5. Mahitungod ha diri malipayon nga pag-asawa, ano nga panhunahuna an sadang likyan?

⁵ An mga masurub-on ha ira pag-asawa bangin maghunahuna: ‘Isasalbar ko pa ba an amon pag-asawa? Kon puydi ko la ibalik an panahon ngan mag-asawa hin iba!’ Bangin maghandom hira nga makigbulag ngan maghunahuna: ‘Karuyag ko magin solo na liwat! Kay ano nga diri ako makigdiborsyo? Bisan kon waray ako Kasuratanhon nga hinungdan ha pakigdiborsyo, kay ano nga diri ako makigbulag ngan magin malipayon na liwat?’ Imbes nga hunahunaon ini o maghandom nga unta iba an kahimtang, sadang himoon han mga Kristiano an pinakamaopay ha ira kahimtang pinaagi ha pagpamiling han giya han Dios ngan pagsunod hito.

6. Isaysay an ginsiring ni Jesus ha Mateo 19:9.

⁶ An iba nga Kristiano nga nakikigdiborsyo bangin may kagawasan nga mag-asawa utro uyon ha Kasuratan, pero an iba bangin waray. Hi Jesus nagsiring: “Bisan hin-o an mabulag ha iya asawa nga babaye kon diri tungod la ha pakighilawas, ngan mangasawa hin iba, nakakagbuhat hin panlibog.” (Mat. 19:9) Dinhi, an pulong nga “pakighilawas” o pornikasyon nag-uupod hin pag-adulteryo ngan iba pa nga dagku nga sala may kalabotan ha sekso. Salit kon an usa nga Kristiano naghuhunahuna nga makigdiborsyo bisan kon waray Kasuratanhon nga hinungdan, importante gud nga mag-ampo hiya para han bulig ngan giya han Dios.

7. Ano an bangin hunahunaon han iba kon pakyas an pag-asawa han usa nga Kristiano?

⁷ Kon pakyas an pag-asawa han usa, bangin iginpapakita hito nga maluya an iya espirituwalidad. Hi apostol Pablo nagbangon hinin seryoso nga pakiana: “Kon an tawo diri maaram magmando ha iya kalugaringon nga panimalay, oonan-on ba niya in pagmangno ha singbahan han Dios?” (1 Tim. 3:5) Ha pagkamatuod, kon an mag-asawa nasiring nga mga Kristiano hira pero pakyas an ira pag-asawa, bangin hunahunaon han iba nga diri nira ginbubuhat an ira ginsasangyaw.—Roma 2:21-24.

8. Ano an posible nga problema kon an Kristiano nga mag-asawa nagdidesisyon nga magbulag o magdiborsyo?

⁸ Kon an bawtismado nga mag-asawa nagpaplano pagbulag o pagdiborsyo bisan kon waray Kasuratanhon nga hinungdan, sigurado nga may problema an ira espirituwalidad. Posible nga an usa ha ira o hira nga duha diri nag-aaplikar han mga prinsipyo ha Kasuratan. Kon hira tinuod nga ‘nasarig kan Jehova ha bug-os nga kasingkasing,’ waray hinungdan nga diri nira maisalbar an ira pag-asawa.—Basaha an Proberbios 3:5, 6.

9. Paonan-o ginbendisyonan an iba nga Kristiano ha ira mapailubon nga pangalimbasog nga isalbar an ira pag-asawa?

⁹ Damu nga pag-asawa nga baga hin mapapakyas na an ha urhi nagin malampuson gud. An mga Kristiano nga diri dayon nagdidesisyon nga makigbulag bisan kon problemado an ira pag-asawa kasagaran na nga ginbibendisyonan. Tagda an mahimo mahitabo ha pamilya nga diri nagkakaurosa ha tinuod nga pagsingba. Hi apostol Pedro nagsurat: “Mga kaasaw-an nga kababayin-an, magpasakop kamo ha iyo mga kaasaw-an nga kalalakin-an; nga, basi, kon may-ada iba nga diri masinugtanon ha pulong, pagdad-on unta hira ha waray pulong, pinaagi han mga batasan han ira mga kaasaw-an; nga hikit-an nira an iyo mauray nga gawi nga may kahadlok.” (1 Ped. 3:1, 2) Oo, tungod han maopay nga paggawi han usa nga Kristiano, an iya diri-tumuroo nga padis mahimo kumarawat han kamatuoran! An mga Kristiano nga nangangalimbasog pagsalbar han ira pag-asawa nagpapasidungog ha Dios, ngan bibendisyonan an ira bug-os nga pamilya.

10, 11. Ano an diri ginlalaoman nga mga problema nga bangin mahitabo ha pag-asawa, kondi ha ano makakasiguro an usa nga Kristiano?

¹⁰ Tungod han hingyap nga mapalipay hi Jehova, an kadam-an nga solo nga Kristiano nagpipili hin dedikado nga igkasi-tumuroo nga ira mapapangasawa. Kondi bisan pa hito, bangin may mahitabo nga diri ginlalaoman. Pananglitan, an padis bangin magkaada seryoso nga mga problema ha emosyon. O paglabay hin pipira ka panahon katapos han kasal, an padis bangin magin diri aktibo nga magwarali. Ha pag-ilustrar: Hi Linda,a usa nga madasigon nga Kristiano ngan mahigugmaon nga nanay, waray nahimo han an iya bawtismado nga bana nakabuhat hin sala ngan waray magbasol salit ginpaiwas ha kongregasyon. Ano an sadang himoon han usa nga Kristiano kon an iya pag-asawa baga hin waray na paglaom tungod han sugad hini nga hinungdan?

¹¹ Bangin magpakiana ka: ‘Kinahanglan ba nga padayon ako nga mangalimbasog nga isalbar an akon pag-asawa anoman an mahitabo?’ Waray bisan hin-o an makakahimo o sadang maghimo hito nga desisyon para ha imo. Kondi may maopay nga mga hinungdan nga diri dayon umundang ha pangalimbasog nga isalbar an pag-asawa nga baga hin waray na paglaom. Birilhon gud ha Dios an mga Kristiano nga nag-iilob han mga pagsari ha problemado nga pag-asawa tungod han ira konsensya. (Basaha an 1 Pedro 2:19, 20.) Ginagamit ni Jehova an iya Pulong ngan espiritu basi buligan an mga Kristiano nga nangangalimbasog gud nga maparig-on an ira pag-asawa.

ANDAM HIRA HA PAGBULIG

12. Ano an aabaton ha aton han mga tigurang kon magpapabulig kita ha ira?

¹² Kon may mga problema an iyo pag-asawa, ayaw pag-alang ha pagpangaro hin bulig ha hamtong nga mga Kristiano. An mga tigurang nagmamangno ha kongregasyon ngan malilipay nga ipakita ha imo an mga sagdon ha Kasuratan. (Buh. 20:28; Jak. 5:14, 15) Ayaw paghunahuna nga mawawara an ira respeto ha iyo nga mag-asawa kon mangangaro kamo ha ira hin bulig ngan ipakiistorya an daku nga problema niyo nga mag-asawa. Mas hihigugmaon ngan rirespetuhon lugod kamo nira tungod kay ira nakikita nga karuyag gud niyo lipayon an Dios.

13. Ano an iginsasagdon han 1 Korinto 7:10-16?

¹³ Kon an mga tigurang gin-aaroan hin bulig han mga Kristiano nga diri Saksi an mga kapamilya, mahimo nira gamiton ini nga sagdon ni Pablo: “Ha inasaw-an na ako nagsusugo, diri ako, kondi an Ginoo, nga an babaye diri bumulag ha iya asawa nga lalaki. (Kondi kon hiya bumulag, magpadayon hiya nga waray asawa, o kondi man makig-opay ha iya asawa nga lalaki); ngan nga an lalaki diri bumulag ha iya asawa nga babaye. . . . Kay ano an hibaro nimo, O! asawa nga babaye, kon maluluwas mo ba an imo asawa nga lalaki? O ano an hibaro nimo, O! asawa nga lalaki, kon maluluwas mo ba an imo asawa nga babaye?” (1 Kor. 7:10-16) Bendisyon gud kon an diri-tumuroo nga padis magin surugoon ni Jehova!

14, 15. Kay ano nga an usa nga Kristiano bangin magdesisyon nga bulagan an iya padis, kondi kay ano nga kinahanglan ig-ampo niya ito ngan tangkod nga usisahon an iya pagbati?

¹⁴ Ha ano nga mga kahimtang bangin magdesisyon an Kristiano nga asawa nga bumulag? An iba nagdesisyon nga bumulag tungod kay tinuyo nga diri nasuporta ha ira an ira bana. An iba liwat nakigbulag tungod han duro nga pag-abuso ha pisikal o tungod kay namimeligro gud an ira espirituwalidad sugad nga Kristiano.

¹⁵ Personal nga desisyon an pagbulag o diri pagbulag. Kondi, kinahanglan ini ig-ampo han usa nga Kristiano ngan tangkod nga usisahon niya an iya pagbati. Pananglitan, an iya la ba diri-tumuroo nga padis an hinungdan nga namimeligro an iya espirituwalidad, o nagpapasibaya hiya ha pag-aram ha Biblia, napalya ha mga katirok, ngan diri regular ha ministeryo?

16. Ano an sadang magpugong ha mga Kristiano ha pagdesisyon dayon nga makigdiborsyo?

¹⁶ An aton pagpabili ha aton relasyon ha Dios ngan pagpasalamat ha iya regalo nga pag-asawa sadang magpugong ha aton ha pagdesisyon dayon nga makigdiborsyo. Sugad nga mga surugoon ni Jehova, importante ha aton an pagbaraan han iya ngaran. Salit sigurado nga diri kita maghihimo hin paagi nga bulagan an aton padis basi makaasawa hin iba.—Jer. 17:9; Mal. 2:13-16.

17. Ha ano nga mga kahimtang masisiring nga gintawag han Dios an inasaw-an nga mga Kristiano ha kamurayawan?

¹⁷ An usa nga Kristiano nga diri-tumuroo an padis sadang mangalimbasog gud nga tipigan nga marig-on an ira pag-asawa. Kondi diri hiya sadang makonsensya kon an iya diri-tumuroo nga padis magdesisyon nga bumulag bisan pa han iya sinsero nga pangalimbasog nga matipigan an ira pag-asawa. ‘Kon an diri matinoohon bumulag, pabulaga hiya,’ nagsurat hi Pablo. “An bugto nga lalaki o babaye diri sakop ha kauripon sugad hini nga mga pagkaagi: kondi an Dios nagtawag ha aton ha kamurayawan.”—1 Kor. 7:15.b

SARIG KAN JEHOVA

18. Bisan kon diri na maisasalbar an pag-asawa, ano an mahimo magin maopay nga resulta han pangalimbasog ha pagsalbar hito?

¹⁸ Kon may problema kita ha pag-asawa, sadang kita mag-ampo kan Jehova para hin kaisog ngan pirme sumarig ha iya. (Basaha an Salmo 27:14.) Hunahunaa hi Linda nga gin-unabi na. Bisan kon damu ka tuig nga nangalimbasog hiya nga maisalbar an iya pag-asawa, ha urhi nagdiborsyo hira han iya bana. Inabat ba hiya nga nakarag la an iya pangalimbasog? “Waray gud,” siring niya. “An akon pangalimbasog nakahatag hin maopay nga pamatuod ha iba. Limpyo an akon konsensya. Labaw ha ngatanan, hito nga mga tuig nabuligan an amon anak nga babaye nga magpabilin nga marig-on ha kamatuoran. Nagin madasigon hiya nga dedikado nga Saksi ni Jehova.”

19. Ano an mahimo mahitabo kon ginpapangalimbasogan nga maisalbar an pag-asawa?

¹⁹ Hi Marilyn nga usa nga Kristiano nalipay nga sinarig hiya ha Dios ngan nangalimbasog gud ha pagsalbar han iya pag-asawa. “Nahunahuna ko nga bulagan an akon bana kay diri hiya nasuporta ha pinansyal ngan namimeligro an akon espirituwalidad,” siring niya. “Kondi tigurang hiya hadto han waray pa hiya mahidabi ha diri maaramon nga mga buruhaton may kalabotan ha negosyo. Nagtikang hiya pagpalya ha mga katirok, ngan diri na kami nag-iistorya. Han gin-atake hin mga terorista an amon syudad, nahadlok gud ako ngan karuyag ko na la mag-inusahan. Katapos nasantop ko nga may sayop liwat ako. Salit nagtikang kami pag-istorya utro, iginbalik an amon pag-aram han pamilya, ngan nagin regular na liwat ha pagtambong ha mga katirok. An mga tigurang buotan ngan mabinuligon gud. Naibalik an amon maopay nga relasyon sugad nga mag-asawa. Paglabay han panahon, an akon bana nagin kwalipikado na liwat ha mga pribilehiyo ha kongregasyon. Makuri adto nga eksperyensya pero makalilipay an resulta.”

20, 21. May kalabotan ha pag-asawa, ano an sadang naton magin determinasyon?

²⁰ Solo man kita o inasaw-an, kinahanglan pirme kita magin maisugon ngan sumarig kan Jehova. Kon may mga problema an aton pag-asawa, sadang gud kita mangalimbasog ha pagsulbad hito ngan hinumdoman nga an mag-asawa “diri na duha, kondi usa la nga unod.” (Mat. 19:6) Hinumdoman liwat naton nga kon iilubon naton an makuri nga mga kahimtang ha pamilya nga diri nagkakaurosa ha tinuod nga pagsingba, mahimo naton maeksperyensyahan an kalipay kon an aton padis magin surugoon ni Jehova.

²¹ Anoman an aton kahimtang, hinaot magin determinado kita nga pirme gumios hin maaramon basi makahatag hin maopay nga pamatuod ha mga nag-oobserbar nga diri membro han kongregasyon. Kon namimeligro an aton pag-asawa, maniguro gud kita ha pag-ampo, tangkod nga usisahon an aton mga motibo, usisahon hin maopay an Kasuratan, ngan mangaro hin bulig ha mga tigurang. Labaw ha ngatanan, hinaot magin determinado kita nga lipayon hi Jehova nga Dios ha ngatanan nga butang ngan ipakita nga gin-aapresyar gud naton an iya makaruruyag nga regalo nga pag-asawa.

[Mga footnote]

[Blurb ha pahina 10]

An mga Kristiano nga diri dayon nagdidesisyon nga makigbulag bisan kon problemado an ira pag-asawa kasagaran na nga ginbibendisyonan

[Blurb ha pahina 12]

Sarig pirme kan Jehova ngan pangaro ha iya hin kaisog

[Retrato ha pahina 9]

Ginbibendisyonan ni Jehova an Kristiano nga mga padis nga nangangalimbasog nga maparig-on an ira namimeligro nga pag-asawa

[Retrato ha pahina 11]

An Kristiano nga kongregasyon mahimo makahatag hin pagliaw ngan espirituwal nga bulig