BATON HA MGA PAKIANA MAHITUNGOD HA BIBLIA

Ano nga klase hin persona an Dios?

An Dios diri nakikita nga espiritu nga persona. Iya ginlarang an langit, tuna, ngan an ngatanan nga buhi nga linarang. Waray may naglarang ha iya—waray hiya tinikangan. (Salmo 90:2) Karuyag han Dios nga pamilngon hiya han mga tawo ngan hibaroan an kamatuoran mahitungod ha iya.—Basaha an Buhat 17:24-27.

An Dios usa nga persona nga mahimo naton hibaroan an ngaran. Mahibabaroan naton an pipira han iya mga kalidad pinaagi ha pagpamalandong han iya mga ginlarang. (Roma 1:20) Kondi basi mas makilala hiya, kinahanglan naton pag-adman an iya Pulong, an Biblia. Ginbubuligan kita hito nga hibaroan an iya mahigugmaon nga personalidad.—Basaha an Salmo 103:7-10.

Ano an inaabat han Dios ha kawaray-hustisya?

An aton Maglalarang, hi Jehova, nangangalas ha kawaray-hustisya. Ngan ginlarang niya an tawo uyon han iya dagway. (Deuteronomio 25:16) Ito an rason kon kay ano nga kadam-an ha aton nangangalas ha kawaray-hustisya. Diri an Dios an nagpapahinabo han kawaray-hustisya yana. Gintagan niya an tawo hin kagawasan ha pagbuot. Kondi makasurubo, sayop nga ginagamit han damu an ira kagawasan ngan nagbubuhat hin kawaray-hustisya. Nasusubo hito hi Jehova.—Basaha an Genesis 6:5, 6; Deuteronomio 32:4, 5.

Hinigugma ni Jehova an hustisya, ngan diri niya tutugotan nga magpadayon an kawaray-hustisya. (Salmo 37:28, 29) An Biblia nagsasaad nga tatapuson ito han Dios.—Basaha an 2 Pedro 3:7-9, 13.