An Pinakabirilhon nga Regalo han Dios​—Kay Ano nga Presyoso Hinduro?

HIN-O AN NAGREGALO?

Presyoso an pipira nga regalo tungod kay iginhatag ito hin may awtoridad o usa nga gintatahod. An iba nga regalo, bisan kon gutiay la an kantidad, ginpapabilhan tungod kay hatag ito hin usa nga hinigugma nga kapamilya o hin tinaporan nga sangkay. Sugad hito an regalo ni Russell kan Jordan, nga gin-unabi han nauna nga artikulo. Paonan-o ini naaplikar ha regalo nga lukat?

Siyahan, an Biblia nasiring nga “ginpakanhi han Dios ha kalibotan an iya bugtong nga Anak basi makarawat naton an kinabuhi pinaagi ha iya.” (1 Juan 4:9) Ini nga kamatuoran nagpapahinabo hini nga regalo nga presyoso gud. Waray usa nga mas labaw an awtoridad ha Dios. Ngani, usa nga Hebreo nga salmista an nagsurat: “Basi nga hira kumilala nga hi ikaw la, nga an ngaran hi Jehova, amo an Gihataasi ha bawbaw han tuna.” (Salmos 83:18) Waray na mas hitaas ha iya an makakaghatag ha aton hin regalo.

Ikaduha, an Dios amo an aton “Amay.” (Isaias 63:16) Paonan-o? Hiya an naghatag ha aton hin kinabuhi. Dugang pa, padayon nga nag-aataman hiya ha aton sugad hin mahigugmaon nga amay ha iya anak. Ha pag-unabi han iba han iya katawohan han naglabay sugad nga Epraim, an Dios nagpakiana: “Anak ko ba nga minahal hi Epraim? Amo ba hiya an inugayan nga bata? . . . An akon kasingkasing naongara ha iya; ha pagkamatuud ako mamamayada kalooy ha iya.” (Jeremias 31:20) Ito liwat an inaabat han Dios ha iya magsiringba yana. Diri la hiya an Makagarahum-ha-ngatanan nga Maglalarang kondi hiya liwat an aton maunungon nga Amay ngan Sangkay. Tungod hito, diri ba labi nga nagigin presyoso an bisan ano nga regalo tikang ha iya?

KAY ANO NGA IGINHATAG?

An pipira nga regalo presyoso kay iginhatag ito diri tungod han obligasyon, kondi tungod han tinuod nga gugma. An nahatag nga tinuod nga diri kalugaringon la an ginhuhunahuna diri naglalaom hin kabalyo.

Iginhatag han Dios an iya anak para ha aton tungod kay hinigugma kita niya. “An gugma han Dios iginpahayag ha aton hini nga paagi, han ginpakanhi han Dios ha kalibotan an iya bugtong nga Anak,” siring han Biblia. Kay ano? “Basi makarawat naton an kinabuhi pinaagi ha iya.” (1 Juan 4:9) Naobligar ba an Dios ha pagbuhat hito? Waray gud! An “lukat nga iginbayad ni Kristo Jesus” kapahayagan han “diri-matupngan nga pagkabuotan” han Dios.—Roma 3:24.

Kay ano nga kapahayagan ito han “diri-matupngan nga pagkabuotan” han Dios? An Biblia nagsasaysay: “Iginpakita ha aton han Dios an iya gugma hini nga paagi: An Kristo namatay para ha aton samtang makasasala pa kita.” (Roma 5:8) An diri makikalugaringon nga gugma nag-aghat ha Dios nga gumios para ha magluya, waray mahihimo, ngan makasasala nga mga tawo. Diri kita angayan hito nga gugma, ngan diri gud kita makakabayad hito. An iya regalo amo an waray kapariho nga paagi ha pagpakita han iya gugma.

ANO AN IGINSAKRIPISYO?

An pipira nga regalo presyoso tungod kay daku an iginsakripisyo han nagregalo. Kon andam ihatag han usa an birilhon ha iya, labi nga ginpapabilhan naton ito tungod han sakripisyo nga ginhimo.

“Iginhatag [han Dios] an iya bugtong nga Anak.” (Juan 3:16) Diri man obligado an Dios nga ihatag ha aton an iya pinakahinigugma. Durante han hilawig nga panahon han paglarang han Dios ha uniberso, bumulig ha iya hi Jesus ngan nagin “iya kalipay ha adlaw-adlaw.” (Proberbios 8:30) Hi Jesus an “hinigugma nga Anak” han Dios ngan “an dagway han diri-nakikita nga Dios.” (Colosas 1:13-15) Waray gud duha nga intelihente nga persona nga may sugad kaduok nga relasyon.

Bisan pa hito, iginhatag la gihap han Dios an iya kalugaringon nga Anak. (Roma 8:32) Iginhatag niya an iya pinakamaopay para ha aton. Waray regalo nga malabaw hini tungod han iya iginsakripisyo.

BATON HA DAKU NGA PANGINAHANGLAN

Presyoso an pipira nga regalo tungod kay baton ito ha usa nga tinuod nga panginahanglan. Pananglitan, kon waray ka panbayad ha tambal nga imo ginkikinahanglan, sigurado nga magigin mapasalamaton ka ha usa nga nagboluntaryo pagbayad hito! Presyoso gud ito nga regalo, diri ba?

“Sugad la nga tungod kan Adan an ngatanan namamatay, sugad man an ngatanan mabubuhi pinaagi han Kristo.” (1 Corinto 15:22) Tungod kay tulin ni Adan, “namamatay” kita ngatanan, diri nakakalikay ha sakit ngan kamatayon o diri nakakapahiuli ha Dios ngan pirme salaan. Ngan sugad nga minos nga tawo, waray kita mahihimo basi ‘mabuhi’ kita o an iba. An Biblia nasiring: “Waray gud ha ira nga makakatubus han iya bugto ha bisan ano nga paagi, bisan hin paghatag ngadto ha Dios hin lukat tungud ha iya.” (Salmos 49:7) Nanginginahanglan gud kita hin bulig tungod kay diri naton maaakos an pagbayad ha lukat. Kon waray bulig han Dios, waray kita mahihimo.

Tungod han iya daku nga gugma, andam baydan ni Jehova an nakakaluwas hin kinabuhi nga “tambal” nga aton ginkikinahanglan, salit pinaagi kan Jesus “an ngatanan mabubuhi.” Paonan-o ini natutuman han lukat? “An dugo han iya Anak nga hi Jesus naglilimpyo ha aton ha ngatanan nga sala.” Oo, an pagtoo ha dugo ni Jesus nag-abri ha dalan basi mapasaylo an aton mga sala ngan magkaada kinabuhi nga dayon. (1 Juan 1:7; 5:13) Ngan ano an kapulsanan han lukat para ha aton namatay nga mga hinigugma? “Kay nagkaada kamatayon pinaagi han usa ka tawo, nagkakaada liwat pagkabanhaw han mga patay pinaagi han usa ka tawo [hi Jesus].”—1 Corinto 15:21.a

Waray iba nga regalo nga iginhatag ha aton tikang ha usa nga mas labaw o iginhatag ha aton tungod han mas daku nga gugma kay han halad-lukat. Waray gud iba nga nagsakripisyo hin daku para ha aton, gawas la kan Jehova nga Dios. Ngan waray iba nga regalo nga baton ha daku nga panginahanglan kay han halad nga nagluwas ha aton tikang ha sala ngan kamatayon. Oo, waray gud regalo nga makakatupong ha pagkabirilhon han lukat.