NANGUNGUNA NGA ARTIKULO | MGA ANGHEL—AN GINSISIRING HAN BIBLIA MAHITUNGOD HA IRA

An Kamatuoran Mahitungod ha mga Anghel

Karuyag mo ba hibaroan an kamatuoran mahitungod ha mga anghel—kon hin-o hira, kon paonan-o hira nag-eksister, ngan kon ano an ira ginbubuhat? Waray mas maopay nga makukuhaan hin baton hini nga mga pakiana kondi an giniyahan nga Pulong han Dios, an Biblia. (2 Timoteo 3:16) Ano an ginsisiring hito?

Sugad la nga an Dios Espiritu, an mga anghel espiritu liwat nga diri nakikita nga “waray unod ngan tul-an.” An maunungon nga mga anghel naukoy ha langit ngan direkta nga nakakadaop ha Dios.—Lucas 24:39; Mateo 18:10; Juan 4:24.
May mga higayon nga an mga anghel nagpakatawo basi tumanon an mga toka nga hatag han Dios ha ira dinhi ha tuna, ngan han natapos nira an toka bumalik hira ha pagin espiritu.—Hukom 6:11-23; 13:15-20.
Bisan kon an mga anghel iginpipresentar han Biblia sugad nga lalaki, ngan pirme hira lalaki kon nagpapakatawo, waray lalaki o babaye nga anghel. Diri hira nag-aasawa o nag-aanak. Dugang pa, an mga anghel diri tikang ha mga tawo—ha minasus-an man, bata, o adulto. An mga anghel ginlarang ni Jehova salit gintatawag hira han Biblia nga “mga anak nga kalalakin-an han Dios.”—Job 1:6; Salmos 148:2, 5.
An Biblia nag-uunabi hin mga “pinulongan han mga tawo ngan han mga anghel,” nga nagpapakita nga an mga espiritu may yinaknan ngan may abilidad ha pakigkomunikar. Bisan kon ginagamit hira han Dios ha pakigkomunikar ha tawo, diri kita niya gintutugotan ha pagsingba o ha pag-ampo ha ira.—1 Corinto 13:1; Pahayag 22:8, 9.
May yinukot-yukot ka yinukot-yukot nga mga anghel, nga posible naabot hin damu ka bilyon.a—Daniel 7:10; Pahayag 5:11.
An mga anghel “gamhanan ha kusug”—mas gamhanan gud kay ha tawo ngan labaw han kanan tawo an ira kahibaro. Mahimo hira makalupad hin sobra kalaksi, mas malaksi pa kay ha bisan ano nga pisikal nga linarang ha kalibotan.—Salmos 103:20; Daniel 9:20-23.
Bisan pa han ira labaw nga kapasidad ha mental ngan espirituwal, may limitasyon hira, ngan may mga butang nga diri nira hinbabaroan.—Mateo 24:36; 1 Pedro 1:12.
An mga anghel ginlarang nga may mga personalidad, mga kalidad han Dios, ngan kagawasan ha pagdesisyon. Salit pariho ha tawo, mahimo nira buhaton an husto o sayop. Makasurubo, ginpili han iba nga anghel nga diri sumunod ha Dios.—Judas 6.

a An “yinukot-yukot” 10,000. An total han yinukot-yukot nga ginmultiplikar ha yinukot-yukot, 100 ka milyon. Pero an Pahayag nag-uunabi hin mga “yinukot-yukot ka [mga] yinukot-yukot” nga anghel. Nangangahulogan ito nga ginatos ka milyon, bangin binilyon, an mga anghel!

Paonan-o Gin-organisar an mga Anghel han Dios?

An arkanghel, hi Miguel, amo an nangunguna nga anghel kon gahum ngan awtoridad an pag-iistoryahan. Matin-aw nga iginpapakita han Biblia nga an Miguel amo an iba nga ngaran ni Jesu-Kristo.—1 Tesalonica 4:16; Judas 9.

An mga serapin an may hitaas hinduro nga ranggo ha mga anghel may kalabotan ha pribilehiyo ngan kadungganan, ngan aada hira ha palibot han trono han Dios.—Isaias 6:1-3.

An mga kerubin may hitaas liwat nga ranggo ngan gin-aataman nira an espesyal nga mga responsabilidad nga may duok nga kalabotan ha mahimayaon nga personalidad han Makagarahum-ha-ngatanan. Agsob nga gin-uunabi hira sugad nga nagtutuman hin mga toka para ha iya. —Genesis 3:24; Esekiel 9:3; 11:22.

An mga yinukot-yukot nga iba pa nga mensahero nga mga anghel nag-aalagad sugad nga ahente ngan representante han Gihitaasi ha pagtuman han iya kaburut-on.b—Hebreo 1:7, 14.

b Para ha dugang nga impormasyon mahitungod ha mga anghel, kitaa an kapitulo 10 han libro nga Ano Gud ba an Igintututdo han Biblia? ngan an artikulo ha apendise nga “Hin-o hi Miguel nga Arkanghel?” nga iginpupublikar han mga Saksi ni Jehova. Makikita liwat ini ha www.pr2711.com/war.