‘An Hukom han Bug-os nga Tuna’ Pirme Nagbubuhat han Matadong

1. Paonan-o iginpakita ni Abraham nga nasarig gud hiya nga ipapadapat ni Jehova an hingpit nga hustisya? (Kitaa an retrato hini nga pahina.)

‘DIRI ba an Hukom han bug-os nga tuna magbubuhat hin matadung?’ (Gen. 18:25) Iginpapakita hito nga pakiana nga nasarig gud hi Abraham nga ipapadapat ni Jehova an hingpit nga hustisya ha Sodoma ngan Gomorra. Kombinsido hi Abraham nga diri gud magbubuhat hi Jehova hin kawaray-hustisya pinaagi ha “pagpatay han mga magtadung upud han mga magraut.” Para kan Abraham, diri gud ito mahihimo han Dios. Paglabay hin mga 400 ka tuig, iginhulagway ni Jehova an iya kalugaringon: “An Bato nga bantilis, an iya buhat hingpit; kay an ngatanan niya nga mga dalan amo an katadungan: Usa nga Dios ha pagkamatinumanon ngan waray karat-an, subay ngan matadung hiya.”—Deut. 31:19; 32:4.

2. Kay ano nga imposible nga magbuhat hi Jehova hin kawaray-hustisya?

² Kay ano nga nasarig gud hi Abraham nga pirme matadong an paghukom ni Jehova? Tungod kay hi Jehova an pinakamaopay nga susbaranan han hustisya ngan pagkamatadong. Ngani, an Hebreo nga mga pulong nga iginhubad nga “hustisya” ngan “pagkamatadong” agsob nga mababasa nga magkaupod ha Hebreo nga Kasuratan kay pariho an kahulogan hito nga mga pulong. Salit tungod kay hi Jehova an gihitaasi nga suruklan han pagkamatadong, pirme gud husto an iya paghukom. Dugang pa, sumala ha iya Pulong, ‘nahigugma hiya ha katadungan ngan hustisya.’—Sal. 33:5.

3. Paghatag hin ehemplo han kawaray-hustisya nga naieksperyensyahan han mga tawo yana.

³ An sinsero nga mga tawo naliliaw ha paghibaro nga pirme ginbubuhat ni Jehova kon ano an matadong tungod kay an kalibotan yana puno hin kawaray-hustisya. Salit usahay an pipira nabibiktima hito. Pananglitan, may mga tawo nga gin-akusaran hin buwa ngan ginpriso bisan kon waray sala. Han nagtikang paggamit hin DNA test basi magin ebidensya ha mga kaso, may mag-iha na nga priso nga nakagawas kay hito la nga panahon napamatud-an nga inosente hira. Oo, an sugad nga kawaray-hustisya nagriresulta hin kasubo ngan kasina pa ngani. Pero para ha mga Kristiano, may usa pa nga klase hin kawaray-hustisya nga bangin mas makuri ilubon.

HA SULOD HAN KONGREGASYON

4. Paonan-o mahimo masarihan an pagtoo han usa nga Kristiano?

⁴ An mga Kristiano makakalaom nga makakaeksperyensya hira hin kawaray-hustisya ha gawas han Kristiano nga kongregasyon. Pero bangin masarihan an aton pagtoo kon may maobserbaran kita o maeksperyensyahan nga baga hin kawaray-hustisya ha sulod han kongregasyon. Ano an imo magigin reaksyon kon inaabat mo nga ginbuhatan ka hin sayop ha kongregasyon o han usa nga bugto? Tutugotan mo ba ito nga makapakdol ha imo?

5. Kay ano nga diri sadang mahipausa an usa nga Kristiano kon may maobserbaran hiya o maeksperyensyahan nga kawaray-hustisya ha kongregasyon?

⁵ Tungod kay kita ngatanan diri perpekto ngan nakakasala, maaram kita nga posible kita makaeksperyensya hin kawaray-hustisya ha kongregasyon o kita mismo an makabuhat hito ha iba. (1 Juan 1:8) Bisan kon talagsa gud la ito mahitabo, an matinumanon nga mga Kristiano diri nahipapausa o nahipapakdol kon may nabangon nga kawaray-hustisya. May maopay gud nga rason hi Jehova ha pagtagana han iya Pulong kay may praktikal ito nga mga sagdon nga mabulig ha aton nga matipigan an aton integridad, bisan kon may igkasi-tumuroo nga nakakabuhat ha aton hin sayop.—Sal. 55:12-14.

6, 7. Ano nga kawaray-hustisya ha sulod han kongregasyon an naeksperyensyahan han usa nga bugto, ngan ano nga mga kalidad an nakabulig ha iya ha pag-atubang hito?

⁶ Tagda an eksperyensya ni Willi Diehl. Tikang han 1931, hi Bugto Diehl matinumanon nga nag-alagad ha Bethel ha Bern, Switzerland. Han 1946, nag-eskwela hiya ha ikawalo nga klase han Gilead School ha New York, E.U.A. Paggradwar niya, igintoka hiya sugad nga paramangno han sirkito ha Switzerland. Ha istorya han kinabuhi ni Bugto Diehl, hiya nagsiring: “Han Mayo 1949, ginpahibaro ko an sanga nga opisina ha Bern nga mag-aasawa na ako.” Ano an baton han sanga nga opisina? “Waray iba nga pribilehiyo labot la han pagin regular payunir.” Hi Bugto Diehl padayon nga nagsiring: “Diri ako gintutugotan nga magdumara hin mga pahayag . . . Damu an diri na nakikiistorya ha amon, ngan gintatagad kami sugad hin mga ginpaiwas ha kongregasyon.”

⁷ Paonan-o gin-atubang ni Bugto Diehl ito nga sitwasyon? Hiya nagsiring: “Pero maaram kami nga an pag-asawa diri man igindidiri ha Kasuratan, salit igintubyan na la namon ito kan Jehova pinaagi ha pag-ampo ngan pagsarig ha iya.” Ha urhi, gintadong an sayop nga panhunahuna han pipira nga kabugtoan may kalabotan ha pag-asawa, ngan naibalik kan Bugto Diehl an iya mga pribilehiyo. Ginbalosan an iya pagkamaunungon kan Jehova.a Maopay nga pakianhan naton an aton kalugaringon: ‘Ito ba liwat an akon magigin disposisyon kon makaeksperyensya ako hin sugad nga kawaray-hustisya? Mapailubon ba ako nga maghuhulat kan Jehova, o masarig ako ha akon kalugaringon nga pangalimbasog ha pagtadong han sitwasyon?’—Prob. 11:2; basaha an Mika 7:7.

8. Kay ano nga mahimo ka magsayop ha imo paghunahuna nga biktima ka o an iba hin kawaray-hustisya?

⁸ Ha luyo nga bahin, mahimo ka magsayop ha imo paghunahuna nga biktima ka hin kawaray-hustisya o an usa han imo kakongregasyon. Posible ini mahitabo tungod kay nagsasayop kita ha pagsabot han mga butang o diri kita maaram han ngatanan nga detalye. Anoman an kahimtang, husto man an aton pagsabot han mga butang o diri, an pag-ampo ngan pagsarig kan Jehova pati na an aton pagkamaunungon ha iya mabulig ha aton nga diri ‘maurit kanJehova.’—Basaha an Proberbios 19:3.

9. Ano nga mga ehemplo an aton hihisgotan hini nga artikulo ngan ha sunod?

⁹ Aton tagdon an tulo nga ehemplo hin kawaray-hustisya nga nahitabo ha katawohan ni Jehova ha panahon han Biblia. Hini nga artikulo, hihisgotan naton an apo ha tuhod ni Abraham nga hi Jose ngan an maraot nga ginbuhat ha iya han iya kabugtoan. Ha sunod nga artikulo, aton mahibabaroan kon paonan-o gintratar ni Jehova an ginbuhat ni Hadi Ahab han Israel ngan ni apostol Pedro ha Antiokia ha Sirya. Samtang ginhihisgotan naton ini nga mga ehemplo, hibaroi an mga leksyon nga mabulig ha imo nga matipigan nga marig-on an imo relasyon kan Jehova, labi na kon inaabat mo nga biktima ka hin kawaray-hustisya.

JOSE—BIKTIMA HIN KAWARAY-HUSTISYA

10, 11. (a) Ano nga mga kawaray-hustisya an naeksperyensyahan ni Jose? (b) Han nakadto hi Jose ha prisohan, nagkaada hiya ano nga higayon?

¹⁰ An matinumanon nga surugoon ni Jehova nga hi Jose nakaeksperyensya hin kawaray-hustisya diri la ha mga tawo nga diri niya kaano-ano, kondi mas masakit pa gud, ha iya mismo kabugtoan. Han 17 anyos hi Jose, iginbaligya hiya han iya kabugtoan basi magin uripon. Katapos gindara hiya ha Ehipto. (Gen. 37:23-28; 42:21) Paglabay hin pipira ka panahon ha Ehipto, sayop nga gin-akusaran hiya hin panlugos ngan ginpriso nga waray ngani bistaha. (Gen. 39:17-20) An iya pag-antos sugad nga uripon ngan priso umabot hin mga 13 ka tuig. Ano nga mga leksyon an aton mahibabaroan ha nahitabo kan Jose nga mabulig ha aton kon makaeksperyensya kita hin kawaray-hustisya ha aton igkasi-tumuroo?

¹¹ Han nakadto hi Jose ha prisohan, nagkaada hiya higayon nga isumat ha iya igkasi-priso an tinuod nga nahitabo ha iya. Ito nga priso amo an pangulo nga paratagay hadto han hadi. Makausa, nag-inop an paratagay, ngan gin-interpretar ito ni Jose. Ginsumatan ni Jose an paratagay nga maibabalik hiya ha iya posisyon ha palasyo han Paraon. Han iginsumat ni Jose an kahulogan hito nga inop pinaagi ha paggiya han Dios, ginsalingabot niya an higayon nga isaysay ha paratagay an nahitabo ha iya. May mahibabaroan kita nga birilhon nga mga leksyon diri la ha mga ginsiring ni Jose kondi pati liwat ha iya waray isiring.—Gen. 40:5-13.

12, 13. (a) An mga ginsiring ba ni Jose ha paratagay nagpapakita nga ginkarawat na la niya an kawaray-hustisya nga iya gin-antos? Isaysay. (b) Ano nga mga detalye an matin-aw nga waray igsumat ni Jose ha paratagay?

¹² Basaha an Genesis 40:14, 15. Tigamni nga ginhulagway ni Jose an iya kalugaringon sugad nga “kinawat.” Matin-aw, biktima hiya hin kawaray-hustisya. Nagsiring liwat hiya nga waray hiya nabuhat nga sala nga hinungdan han iya kapriso. Salit naghangyo hiya ha paratagay nga sumatan an Paraon mahitungod ha iya. Ano an katuyoan ni Jose? Hiya nagsiring: “[Basi] kuhaon ako dinhi hini nga balay.”

¹³ An mga ginsiring ba ni Jose ha paratagay nagpapasabot nga ginkarawat na la niya an iya kahimtang? Diri gud. Maaram hiya nga damu ka beses hiya nga nabiktima hin kawaray-hustisya. Matin-aw niya nga iginsaysay ha paratagay an tinuod nga nahitabo; naglalaom hiya nga mabubuligan hiya han paratagay. Kondi tigamni nga waray kita mababasa ha Kasuratan nga nagsumat hi Jose ha bisan hin-o—bisan ngani ha Paraon—nga an iya kabugtoan an nagbaligya ha iya. Ngani, han kinadto ha Ehipto an kabugtoan ni Jose ngan nakigmurayaw ha iya, gin-abiabi hira han Paraon ngan ginsidngan nga umukoy ha Ehipto ngan pahimulsan “an kaopayan ha bug-os nga tuna.”—Gen. 45:16-20.

14. Ano an makakabulig ha aton nga malikyan an pagyakan hin nakakadaot nga mga pulong bisan kon nakakaeksperyensya kita hin kawaray-hustisya ha kongregasyon?

¹⁴ Kon inaabat han usa nga Kristiano nga biktima hiya hin kawaray-hustisya, kinahanglan mag-ikmat hiya nga diri magpasarang hin nakakadaot nga mga tsismis. Oo, angayan gud nga mangaro hin bulig ha mga tigurang ngan sumatan hira kon may bugto nga nakabuhat hin seryoso nga sayop. (Leb. 5:1) Pero ha damu nga kahimtang nga diri man nag-uupod hin seryoso nga sayop, mahimo ito masulbad nga waray iba nga nahidadabi, bisan ngani an mga tigurang. (Basaha an Mateo 5:23, 24; 18:15.) Hinaot padayon kita nga magin maunungon ngan iaplikar naton an mga prinsipyo ha Biblia ha pagsulbad han sugad nga mga problema. Ha pipira nga kahimtang, bangin masantop naton nga diri ngay-an kita biktima hin kawaray-hustisya. Magigin mapasalamaton gud kita nga waray naton padakua an problema pinaagi ha pagpakaraot ha aton igkasi-Kristiano! Tigamni, husto man kita o diri, an pagyakan hin nakakadaot nga mga pulong diri gud makakaopay ha sitwasyon. An pagkamaunungon kan Jehova ngan ha aton kabugtoan magpapanalipod ha aton nga diri makabuhat han sugad nga sayop. May kalabotan ha tawo nga “naglalakat hin hingpit,” an salmista nagsiring nga ‘diri hiya nagbubutangbutang pinaagi han iya dila, ngan diri nagbubuhat hin maraut ha iya sangkay, ngan diri nagyuyubit kontra ha iya amyaw.’—Sal. 15:2, 3; San. 3:5.

HINUMDUMI AN IMO PINAKAIMPORTANTE NGA RELASYON

15. Paonan-o nagin bendisyon kan Jose an iya relasyon kan Jehova?

¹⁵ May mahibabaroan kita nga mas importante nga leksyon may kalabotan ha relasyon ni Jose kan Jehova. Durante han 13 ka tuig nga pag-antos ni Jose, iginpakita niya nga nasubad niya an panhunahuna ni Jehova ha mga butang. (Gen. 45:5-8) Waray gud niya basola hi Jehova han iya kahimtang. Bisan kon waray makalimti ni Jose an kawaray-hustisya nga iya gin-ilob, waray hiya magdumot tungod hito. Labaw ha ngatanan, waray niya tuguti an sayop nga mga buhat ngan an pagin diri perpekto han iba nga makagbulag ha iya kan Jehova. Tungod han pagkamaunungon ni Jose, nagkaada hiya higayon nga makita kon paonan-o gintadong ni Jehova an kawaray-hustisya ngan kon paonan-o hiya ginbendisyonan pati an iya pamilya.

16. Kay ano nga sadang kita magin mas duok kan Jehova kon nakakaeksperyensya kita hin kawaray-hustisya?

¹⁶ Ha pariho nga paagi, kinahanglan naton pabilhan ngan panalipdan an aton relasyon kan Jehova. Diri gud naton sadang tugotan nga an mga kaluyahan han kabugtoan makagbulag ha aton ha Dios nga aton hinigugma ngan ginsisingba. (Roma 8:38, 39) Lugod, kon nakakaeksperyensya kita hin kawaray-hustisya ha aton igkasi-tumuroo, hinaot subaron naton hi Jose; magin mas duok kita kan Jehova ngan mangalimbasog nga subaron an Iya panhunahuna ha mga butang. Kon ginbuhat na naton an aton bug-os nga mahihimo uyon ha Kasuratan basi masulbad an problema, sadang naton isarig kan Jehova an mga butang; natoo kita nga iya ito tatadungon ha husto nga panahon ngan uyon ha iya paagi.

SARIG HA ‘HUKOM HAN BUG-OS NGA TUNA’

17. Paonan-o naton maipapakita nga nasarig kita ha ‘Hukom han bug-os nga tuna’?

¹⁷ Samtang nagkikinabuhi kita hinin maraot nga sistema, makakalaom kita nga makakaeksperyensya kita hin kawaray-hustisya. Usahay bangin may maobserbaran o maeksperyensyahan ka o an imo kakilala nga baga hin kawaray-hustisya ha kongregasyon. Ayaw ito tuguti nga makapakdol ha imo. (Sal. 119:165) Lugod, sugad nga matinumanon nga mga surugoon han Dios, maunungon kita ha iya, nag-aampo ha iya para hin bulig, ngan nasarig ha iya. Mapainubsanon liwat naton nga ginkakarawat nga posible nga diri kita maaram han ngatanan nga detalye ngan bangin sayop an aton pagsabot han mga butang. Sugad han aton hinbaroan ha ehemplo ni Jose, ginlilikyan naton an pagyakan hin nakakadaot nga mga pulong kay maaram kita nga magpapadaku la ito han problema. Ngan imbes nga sumarig la ha kalugaringon ha pagsulbad han problema, magin determinado kita nga magin maunungon ngan mapailubon nga maghulat kan Jehova ha pagtadong hito. Kon bubuhaton naton ini, sigurado nga makakarawat naton an pag-uyon ngan bendisyon ni Jehova, pariho han iya ginhimo kan Jose. Oo, makakasarig kita nga hi Jehova, ‘an Hukom han bug-os nga tuna,’ pirme magbubuhat han matadong, “kay an ngatanan niya nga mga dalan amo an katadungan.”—Gen. 18:25; Deut. 32:4.

18. Ano an aton hihisgotan ha sunod nga artikulo?

¹⁸ Ha sunod nga artikulo, aton hihisgotan an duha pa nga ehemplo hin kawaray-hustisya nga nahitabo ha katawohan ni Jehova ha panahon han Biblia. An pagrepaso hini nga mga asoy nagpapakita kon paonan-o an pagin mapainubsanon ngan pagin andam magpasaylo mabulig ha aton nga masubad an panhunahuna ni Jehova ha hustisya.