Ginsasalingabot Mo ba an Pagtutdo Tikang kan Jehova?

1. Ano an panhunahuna ni Jehova ha pagtutdo?

¹ Karuyag ni Jehova, an aton Gihitaasi nga Magturutdo, nga matutdoan kita. (Isa. 30:20) Nagtikang hiya pagtutdo katapos han iya paglarang han iya suhag nga Anak. (Juan 8:28) Bisan kon nagrebelde hi Adan, waray Hiya umundang ha pagtutdo, lugod mahigugmaon nga nagtagana Hiya hin instruksyon ha diri hingpit nga katawohan.—Isa. 48:17, 18; 2 Tim. 3:14, 15.

2. Ano nga kampanya han pagtutdo an napapahimulosan yana?

² Yana, gin-gigiyahan ni Jehova an pinakadaku nga kampanya ha pagtutdo. Sugad han igintagna ni Isaias, minilyon ha bug-os nga kalibotan an nasagka ha simboliko nga “bukid han balay ni Jehova.” (Isa. 2:2) Kay ano? Basi magiyahan han mga dalan ni Jehova, oo, basi matutdoan ni Jehova! (Isa. 2:3) Durante han 2010 nga tuig han pag-alagad, naggasto an mga Saksi ni Jehova hin 1.6 bilyon ka oras ha pagsangyaw ngan pagtutdo han kamatuoran. Dugang pa, igintatagana an espirituwal nga instruksyon kada semana ha sobra 105,000 nga kongregasyon ha bug-os nga kalibotan, ngan ginpupublikar han matinumanon ngan maaramon nga uripon an edukasyonal nga mga publikasyon ha sobra 500 nga yinaknan.

3. Paonan-o ka personal nga nakakapahimulos han pagtutdo nga tikang kan Jehova?

³ Pahimulsi hin Bug-os: Nagpapahimulos gud kita han pagtutdo nga tikang kan Jehova! Hinbaroan naton nga may ngaran an Dios ngan nagtatagad hiya ha aton. (Sal. 83:18; 1 Ped. 5:6, 7) Hinbaroan naton an baton han pipira han pinakaimportante nga pakiana ha kinabuhi: Kay ano nga nag-aantos kita ngan namamatay? Paonan-o ako magkakaada tinuod nga kalipay? Ano an katuyoan han kinabuhi? Gintatagan liwat kita ni Jehova hin giya basi ‘magmauswagon an aton paglakat.’—Jos. 1:8.

4. Ano an pipira nga higayon diin natututdoan an mga surugoon han Dios, ngan kay ano nga sadang naton salingabuton an iya pagtutdo?

⁴ Dugang pa, nagtatagana liwat hi Jehova hin espesyal nga edukasyon basi buligan an damu han iya mga surugoon nga mapahaluag an ira pag-alagad ha iya. Makikita ha pahina 4-6 an mga higayon nga abrido. Bisan kon diri kita aada ha kahimtang ha pagkarawat han mga pagbansay nga ginhisgotan, ginsasalingabot ba naton an edukasyon tikang ha Dios nga puydi naton mapahimulsan? Gindadasig ba naton an mga batan-on nga gin-aaghat han mga titser ngan han iba nga kumuha hin hitaas nga edukasyon nga magkaada espirituwal nga tumong nga amo an gilalabawi nga edukasyon? An pagsalingabot han pagtutdo tikang kan Jehova mabulig ha aton nga magpahimulos hin malipayon nga kinabuhi yana ngan ha waray kataposan.—Sal. 119:105; Juan 17:3.

Edukasyon nga Igintatagana han Organisasyon ni Jehova

Literacy Class

• Katuyoan: Pagtutdo ha mga indibiduwal ha pagbasa ngan pagsurat basi personal nga maadman nira an Biblia ngan makagtutdo han kamatuoran ha iba.

• Kahilawigon: Depende ha panginahanglan.

• Lokasyon: Lokal nga Kingdom Hall.

• An Puydi Tumambong: Ngatanan nga magwarali ngan interesado.

• Paonan-o Makakaeskwela: Gin-oorganisar ini han mga tigurang uyon han lokal nga panginahanglan, ngan gindadasig nira an tanan nga makakapahimulos ha pagtambong.

Teokratiko nga Eskwelahan ha Ministeryo

• Katuyoan: Pagbansay ha mga magwarali basi magin epektibo nga magsarangyaw ngan magturutdo han maopay nga sumat.

• Kahilawigon: Padayon.

• Lokasyon: Lokal nga Kingdom Hall.

• An Makakaenrol: Ngatanan nga magwarali pati adton aktibo nga nakikig-upod ha kongregasyon, nauyon ha katutdoan han Biblia, ngan nagkikinabuhi uyon ha Kristiano nga mga prinsipyo.

• Paonan-o Makakapalista: Pakiistorya ha paramangno han Teokratiko nga Eskwelahan ha Ministeryo.

Mga Foreign-Language Class

• Katuyoan: Pagtutdo ha mga magwarali ha pagsangyaw han maopay nga sumat ha iba nga yinaknan.

• Kahilawigon: Lima o upat ka bulan. Kasagaran ginhihimo an klase ha Sabado nga aga ha sulod hin usa o duha ka oras.

• Lokasyon: Kasagaran ha kahirani nga Kingdom Hall.

• An Makakaaplay: Magwarali nga maopay an reputasyon ngan naruruyag pagsangyaw ha lugar nga iba an yinaknan.

• Paonan-o Makakaaplay: Gin-oorganisar han sanga nga opisina ini nga klase uyon ha panginahanglan.

Kingdom Hall Construction

• Katuyoan: Pagtukod ngan pag-ayad hin mga Kingdom Hall. Diri ini eskwelahan pero pinaagi hini, natututdoan an mga boluntaryo hin magkalain-lain nga skill ha konstruksyon.

• Kahilawigon: Depende ha kahimtang han boluntaryo.

• Lokasyon: Ha mga lugar nga sakop han Kingdom Hall Construction Desk’s Regional Office. An pipira nga boluntaryo ginpapadara ha pakigbahin ha relief work ha higrayo nga lugar nga naapektohan hin kalamidad.

• Kwalipikasyon: Bawtismado nga lalaki o babaye nga gin-aprobahan han lawas han mga tigurang, may skill man o waray.

• Paonan-o Makakaaplay: Pagpil-ap hin Application for Kingdom Hall Construction Volunteer Program (A-25) nga porma nga ginsusuplay han paramangno han sirkito o han sanga nga opisina, kon may maghangyo hito.

Pioneer Service School

• Katuyoan: Pagbulig ha mga payunir nga bug-os nga ‘matuman an ira pagkaministro.’—2 Tim. 4:5.

• Kahilawigon: Duha ka semana.

• Lokasyon: Uyon ha desisyon han sanga nga opisina; kasagaran ha kahirani nga Kingdom Hall.

• Kwalipikasyon: Regular payunir hin diri maminos usa ka tuig.

• Paonan-o Makakaenrol: Awtomatiko nga nakaenrol an kwalipikado nga payunir ngan papahibaroon hira han ira paramangno han sirkito.

Bethel Entrants’ School

• Katuyoan: Pagbulig ha bag-o nga Bethelite nga maglampos ha pagboluntaryo ha Bethel.

• Kahilawigon: Usa ka oras kada semana ha sulod hin disisais ka semana.

• Lokasyon: Bethel.

• Kwalipikasyon: Kinahanglan permanente nga membro han pamilya han Bethel o temporaryo nga boluntaryo hin maiha nga panahon (usa ka tuig o mas maiha pa).

• Paonan-o Makakaenrol: Awtomatiko nga kaapi an boluntaryo ha Bethel nga kwalipikado.

Kingdom Ministry School

• Katuyoan: Pagbansay ha mga tigurang ngan ministeryal ha ira mga responsabilidad ha pagdumara ngan pag-organisar. (Buh. 20:28) Ini nga eskwelahan gin-ieskedyol han Nagmamando nga Lawas ha kada pipira ka tuig.

• Kahilawigon: Usa ngan tunga ka adlaw para ha mga tigurang ngan usa ka adlaw para ha mga ministeryal.

• Lokasyon: Kasagaran ha kahirani nga Kingdom Hall o Assembly Hall.

• Kwalipikasyon: Kinahanglan tigurang o ministeryal.

• Paonan-o Makakaenrol: Gin-iimbitar han paramangno han sirkito an kwalipikado nga tigurang ngan ministeryal.

School for Congregation Eldersa

• Katuyoan: Pagbulig ha mga tigurang ha pagtuman han ira responsabilidad ha kongregasyon.

• Kahilawigon: Lima ka adlaw.

• Lokasyon: Uyon ha desisyon han sanga nga opisina; kasagaran ha kahirani nga Kingdom Hall o Assembly Hall.

• Kwalipikasyon: Kinahanglan tigurang.

• Paonan-o Makakaenrol: Gin-iimbitar han sanga nga opisina an kwalipikado nga mga tigurang.

School for Traveling Overseers and Their Wivesb

• Katuyoan: Pagbulig ha mga paramangno han sirkito ngan distrito basi magin mas epektibo ha pag-alagad ha mga kongregasyon ngan ha ‘pagbudlay ha pagwali ngan pagtutdo’ ngan ha pagmangno han panon nga igintapod ha ira.—1 Tim. 5:17; 1 Ped. 5:2, 3.

• Kahilawigon: Duha ka bulan.

• Lokasyon: Uyon ha desisyon han sanga nga opisina.

• Kwalipikasyon: Kinahanglan paramangno han sirkito o distrito.

• Paonan-o Makakaenrol: Gin-iimbitar han sanga nga opisina an kwalipikado nga nagbibiyahe nga mga paramangno ngan an ira asawa.

Bible School for Single Brothersc

• Katuyoan: Pag-andam ha solo nga mga tigurang ngan ministeryal para ha dugang nga responsabilidad. Kadam-an han nagradwar gintutoka ha lugar ha ira nasud nga may panginahanglan. An iba bangin itoka ha iba nga nasud kon libre hira ha pagkarawat hito.

• Kahilawigon: Duha ka bulan.

• Lokasyon: Uyon ha desisyon han sanga nga opisina; kasagaran ha kahirani nga Assembly Hall o Kingdom Hall.

• Kwalipikasyon: Solo nga kabugtoan nga kalalakin-an nga 23 tubtob 62 an pangidaron, mahimsog, ngan karuyag magserbi ha kabugtoan ngan magpahaluag han ira ministeryo ha lugar nga may panginahanglan. (Mar. 10:29, 30) Kinahanglan hira tigurang o ministeryal hin diri maminos duha ka tuig nga waray uruundang.

• Paonan-o Makakaaplay: Kon may-ada hini ha teritoryo nga sakop han sanga nga opisina ha iyo nasud, magkakaada miting durante han sirkito nga asembleya para ha interesado hini diin igintatagana an dugang nga impormasyon.

Bible School for Christian Couplesd

• Katuyoan: Pagbansay ha mag-asawa basi mas magamit hira ni Jehova ngan han iya organisasyon. Kadam-an han nagradwar itutoka ha lugar han ira nasud nga may panginahanglan. An iba bangin itoka ha iba nga nasud kon libre hira ha pagkarawat hito.

• Kahilawigon: Duha ka bulan.

• Lokasyon: An pipira han nauna nga mga klase ginhihimo ha Watchtower Educational Center ha Patterson, New York, U.S.A. Katapos, an mga masunod pagdudumarahon ha Assembly Hall o Kingdom Hall o depende han sanga nga opisina.

• Kwalipikasyon: Mag-asawa nga 25 tubtob 50 an pangidaron. Mahimsog ngan may kapas ha pag-alagad ha lugar nga may panginahanglan ngan may disposisyon nga pariho han kan Isaias: “Iini ako; pakadtoa ako.” (Isa. 6:8) Dugang pa, kinahanglan duha ka tuig na hira nga mag-asawa ngan bug-os-panahon nga nag-aalagad hin diri maminos duha ka tuig nga waray uruundang.

• Paonan-o Makakaaplay: Kon may-ada hini ha teritoryo nga sakop han sanga nga opisina ha iyo nasud, magkakaada miting durante han espesyal nga asembleya para ha interesado hini diin igintatagana an dugang nga impormasyon.

Watchtower Bible School of Gilead

• Katuyoan: Pagbansay ha mga payunir ngan ha iba ha bug-os-panahon nga pag-alagad para ha pagmisyonero.

• Kahilawigon: Lima ka bulan.

• Lokasyon: Watchtower Educational Center, Patterson, New York, U.S.A.

• Kwalipikasyon: Mag-asawa nga tulo ka tuig na nga bawtismado ngan 21 tubtob 38 an pangidaron han siyahan nira nga pag-aplay. Kinahanglan mag-asawa na hira hin diri maminos duha ka tuig, nagyayakan hin Ingles, ngan aada ha bug-os-panahon nga pagministeryo hin diri maminos duha ka tuig nga waray uruundang. Kinahanglan maopay an kahimsog. Mahimo liwat mag-aplay an kwalipikado nga payunir nga nag-aalagad ha iba nga nasud (upod na an mga misyonero); nagbibiyahe nga mga paramangno; Bethelite; ngan naggradwar ha Ministerial Training School, Bible School for Single Brothers, ngan Bible School for Christian Couples.

• Paonan-o Makakaaplay: Durante han distrito nga kombensyon ha pipira nga sanga nga opisina, usa nga miting an gindudumara para ha interesado hini diin igintatagana an dugang nga impormasyon. Kon waray hini nga miting ha mga kombensyon ha iyo nasud kondi karuyag mo mag-aplay, pagsurat ngan pangaro hin impormasyon ha sanga nga opisina.

School for Branch Committee Members and Their Wives

• Katuyoan: Pagbulig ha mga membro han Komite han Sanga nga magin mas epektibo ha pagdumara hin mga Bethel home, ha pagtagad han mga kahikayan han mga kongregasyon, ha pagdumara han mga sirkito ngan distrito nga sakop han ira teritoryo, ha paghubad, pag-imprinta, pagpadara han mga literatura, ngan pagdumara ha iba-iba nga departamento.—Luk. 12:48b.

• Kahilawigon: Duha ka bulan.

• Lokasyon: Watchtower Educational Center, Patterson, New York, U.S.A.

• Kwalipikasyon: Membro hin Komite han Sanga o Komite han Nasud o gintokahan hin sugad.

• Paonan-o Makakaaplay: Gin-iimbitar han Nagmamando nga Lawas an kwalipikado nga kabugtoan ngan an ira asawa.

[Mga Footnote]