Nabag-o ba an Sinurat nga Pulong han Dios?

May mga tawo nga naghuhunahuna kon nabag-o ba an sinurat nga Pulong han Dios. Hi propeta Isaias nagsiring nga an Pulong han Dios “nagpapadayon ha waray kataposan.” (Isaias 40:8) Kay ano nga makakasiguro kita nga natipigan an orihinal nga mensahe han Dios?

An Dios may gahum ha pagtipig han iya Pulong ngan ha pagsiguro nga diri ito mabag-o. Ha kadaan nga panahon, kon an mga parakopya nagkukopya hin baraan nga sinurat, gin-iihap nira an mga letra basi masiguro nga waray nahidugang, nabag-o, o naiban. Bisan pa hito, diri hira perpekto, ngan may pipira nga nakahimo hin gudtiay nga sayop ha ira pagkopya.

PAONAN-O MASISIGURO NGA ORIHINAL NGA MENSAHE HAN DIOS AN AADA HA BARAAN NGA KASURATAN YANA?

May yinukot nga kopya an kadaan nga mga manuskrito han Baraan nga Kasuratan. Kon an usa nga kopya nagkaada bisan gutiay la nga kaibahan, puydi ito ikompara ha iba nga kopya basi hibaroan kon sayop ba ito.​—Para mahibaro hin dugang, kitaa ha jw.org an artikulo nga “Nabag-o ba an Mensahe han Biblia?”

Tagda pananglitan an kadaan nga mga manuskrito nga gintatawag nga Dead Sea Scrolls, nga nadiskobrehan han mga bedouin ha mga lungib hirani ha Dead Sea han 1947. Makikita hinin kadaan nga mga sinurat, nga 2,000 ka tuig na an kaihaon, an pipira nga bahin han Baraan nga Kasuratan. Iginkompara han mga eksperto ini nga mga manuskrito ha Baraan nga Kasuratan nga may-ada kita yana. Ano an ira nakita?

Nadiskobrehan han mga eskolar nga an sulod han Pulong han Dios nga may-ada kita yana pariho ha orihinal nga mga sinurat.a Tungod han pag-usisa hin maopay ha kadaan nga mga manuskrito, napamatud-an nga an aton nababasa yana ha Baraan nga Kasuratan amo an orihinal nga mensahe han Dios. Waray ruhaduha, ginsiguro han Dios nga diri mabag-o an mensahe nga aada ha iya Baraan nga mga Sinurat para mapahimulosan naton yana.

Salit bug-os nga makakasarig kita nga husto gud an aton nababasa ha Pulong han Dios. Yana, usisahon naman naton kon ano an aton mahibabaroan mahitungod ha Dios tikang ha iya mga propeta.