Hi Jehova Malumo Magpalangga ha Imo

1. Ano an imo naiimadyin kon ginhuhunahuna mo hi Jehova?

GIN-IMADYIN mo na ba kon ano an hitsura ni Jehova? Kon nag-aampo ka ha iya, ano an imo nahuhunahuna? Bisan kon diri nakikita hi Jehova, iginhuhulagway hiya han Biblia ha iba-iba nga paagi. Gintatawag hi Jehova nga “usa nga adlaw ngan usa nga taming” ngan “usa nga nakakaugtang nga kalayo.” (Sal. 84:11; Heb. 12:29) An iya presensya iginpapariho ha bato nga sapiro, nagraranggat nga metal, ngan malamrag nga balangaw. (Ezek. 1:​26-28) Posible nga maimpres gud kita o umabat hin pagin diri takos hini nga mga paghulagway mahitungod kan Jehova.

2. Ano an posible makaulang ha pipira nga magin duok kan Jehova?

² Tungod kay diri naton nakikita hi Jehova, bangin makurian kita nga tumoo nga hinigugma kita niya. An iba naghuhunahuna nga diri gud hira hihigugmaon ni Jehova tungod han ira naglabay nga mga eksperyensya. Bangin waray hira tatay nga naghigugma ha ira. Naiintindihan ni Jehova an sugad nga mga pag-abat ngan kon paonan-o ito nakakaapekto ha aton. Basi buligan kita, iginsumat niya an iya maopay nga personalidad pinaagi han iya Pulong.

3. Kay ano nga dapat hisgotan naton hin mas klaro pa gud an gugma ni Jehova?

³ An usa nga pulong nga naghuhulagway gud hin maopay kan Jehova amo an gugma. An Biblia nasiring nga an Dios gugma. (1 Juan 4:8) An ngatanan nga iya ginbubuhat tungod han gugma. An gugma han Dios hilarom ngan gamhanan gud ngan iya pa ngani ito iginpapakita bisan hadton diri nahigugma ha iya. (Mat. 5:​44, 45) Hini nga artikulo, hihisgotan naton hin mas klaro pa gud hi Jehova ngan an iya gugma. Samtang mas nahibabaro kita mahitungod han aton Dios, mas hihigugmaon naton hiya.

HINIGUGMA GUD KITA NI JEHOVA

4. Ano an imo inaabat ha malumo nga pagpalangga ni Jehova? (Kitaa liwat an piktyur.)

⁴ “Hi Jehova malumo hinduro magpalangga.” (San. 5:11) Ha Biblia, iya iginkukompara an iya kalugaringon ha mahigugmaon nga nanay. (Isa. 66:​12, 13) Imadyina la an nanay nga mahigugmaon nga nag-aataman han iya gutiay nga anak. Ginsasabak niya an iya anak ngan ginkakaistorya hiya ha malumo ngan kalmado nga tingog. Kon nagtatangis o may maul-ol an iya anak, ginsisiguro han nanay nga may-ada an iya anak han iya ginkikinahanglan. Kon nadidepres kita, makakasiguro kita han gugma ni Jehova. An salmista nagsurat: “Han an mga kabaraka nagtabon ha akon, imo ako ginliaw ngan ginpakalma.”—Sal. 94:19.

5. Ano an iginpapasabot han maunungon nga gugma ni Jehova ha imo?

⁵ Hi Jehova maunungon. (Sal. 103:8) Diri hiya naundang ha paghigugma ha aton kon nakakasala kita. Pauroutro nga ginpasubo han nasud han Israel hi Jehova; pero iginpahayag niya an iya diri napapakyas nga gugma ha iya mabinasulon nga katawohan hini nga mga pulong: “Nagin presyoso ka ha akon pagkita, ginpasidunggan ka, ngan hinigugma ko ikaw.” (Isa. 43:​4, 5) An gugma han Dios waray magbag-o. Pirme kita makakasarig hito. Bisan kon nakahimo kita hin seryoso nga mga sayop, diri kita babayaan ni Jehova. Kon magbasol ngan bumalik kita kan Jehova, makikita naton nga hinigugma la gihapon kita niya. Nagsasaad hiya nga “hura hiya nga magpapasaylo.” (Isa. 55:7) Ini nga pagpasaylo ginpapakita han Biblia nga sugad hin “panahon han pagrepresko tikang kan Jehova mismo.”—Buh. 3:19.

6. Ano an igintututdo ha aton han Zacarias 2:8 mahitungod kan Jehova?

⁶ Basaha an Zacarias 2:8. Tungod kay hinigugma kita ni Jehova, napapansin dayon niya an aton mga inaabat ngan gusto gud niya nga proteksyonan kita. Nasusubo hiya kon nadidepres kita. Salit makakasiguro kita nga babatunon niya an aton pag-ampo: “Panalipdi ako pariho han nawotawo han imo mata.” (Sal. 17:8) An mata sensitibo ngan importante nga parte han lawas. Salit kon ginkukompara kita ni Jehova ha nawotawo han iya mata, sugad hin nasiring hiya, ‘An bisan hin-o nga nagdadaot ha iyo, akon katawohan, nagdadaot ha importante ha akon.’

7. Kay ano nga kinahanglan naton parig-unon an aton pagsarig ha gugma ni Jehova?

⁷ Karuyag ni Jehova nga magin kombinsido kita nga hinigugma kita niya sugad nga indibiduwal. Pero maaram hiya nga tungod han naglabay nga mga eksperyensya, bangin maghunahuna kita kon hinigugma gud ba kita niya. O bangin naatubang kita yana mismo hin mga sitwasyon nga nagsasari han aton pagsarig han gugma ni Jehova. Ano an magpaparig-on han aton pagsarig? An paghibaro kon paonan-o ni Jehova ginpapahayag an iya gugma kan Jesus, ha mga dinihogan, ngan ha aton ngatanan.

KON PAONAN-O GINPAPAHAYAG NI JEHOVA AN IYA GUGMA

8. Kay ano nga kombinsido hi Jesus nga hinigugma hiya han iya Amay?

⁸ Ha diri maihap nga mga panahon, hi Jehova ngan an iya hinigugma nga Anak nagkaada hin duok nga relasyon nga may hilarom nga gugma ngan pagpalangga. An ira relasyon an pinakamaiha ha uniberso. Hi Jehova klaro nga nagpahayag han iya gugma kan Jesus, sugad han mababasa naton ha Mateo 17:5. Hi Jehova puydi la unta sumiring, ‘Ini an akon gin-uuyonan.’ Pero karuyag niya ipahibaro ha aton kon ano niya kahinigugma hi Jesus, salit gintawag niya hiya nga “an akon Anak nga hinigugma.” Proud hi Jehova kan Jesus labi na kay kinaburut-on nga ginhatag niya an iya kinabuhi. (Efe. 1:7) Ngan hi Jesus waray gud magruhaduha nga hinigugma hiya han iya Amay. An gugma ni Jehova kan Jesus tinuod gud, salit inaabat niya ito. Pauroutro nga ginpahayag niya nga may pagsarig nga hinigugma hiya han iya Amay.—Juan 3:35; 10:17; 17:24.

9. Ano nga mga pulong an naghuhulagway han gugma ni Jehova ha mga dinihogan? Isaysay. (Roma 5:5)

⁹ Ginpahayag liwat ni Jehova an iya gugma ha mga dinihogan. (Basaha an Roma 5:5.) Pansina an pulong nga “iginbubo.” Usa nga diksyonaryo han Biblia an nagsasaysay nga sugad ito hin “nabuhos ha aton pariho hin sapa.” Angayan gud ini nga paghulagway ha hura nga gugma ni Jehova ha mga dinihogan! Maaram an mga dinihogan nga “hinigugma [hira] han Dios.” (Jud. 1) Hi apostol Juan nagpahayag han ira inaabat han hiya nagsurat: “Kitaa kon ano nga klase han gugma an iginpakita ha aton han Amay, nga tawagon kita nga mga anak han Dios!” (1 Juan 3:1) An mga dinihogan la ba an hinigugma ni Jehova? Diri, ginpamatud-an ni Jehova nga hinigugma kita niya ngatanan.

10. Ano an pinakadaku nga pamatuod han gugma ni Jehova ha imo?

¹⁰ Ano an pinakadaku nga pamatuod han gugma ni Jehova? An lukat—an pinakaespesyal nga kapahayagan han gugma ha uniberso! (Juan 3:16; Roma 5:8) Ginhatag ni Jehova an iya hinigugma nga Anak nga mamatay para ha ngatanan nga tawo basi an aton mga sala mapasaylo ngan magin sangkay kita Niya. (1 Juan 4:10) Samtang mas ginpapamalandong naton an kantidad nga iginbayad ni Jehova ngan ni Jesus, mas masasabtan naton kon ano kahilarom an ira gugma ha kada tagsa ha aton. (Gal. 2:20) Iginbayad ito nga lukat diri la tungod kay gin-oobligar ito han hustisya ni Jehova. Regalo ito tungod han gugma. Ginpamatud-an ni Jehova an iya gugma ha aton pinaagi ha pagsakripisyo han pinakaimportante ha iya—hi Jesus. Gintugotan ni Jehova an iya Anak nga mag-antos ngan mamatay para ha aton.

11. Ano an aton mahibabaroan ha Jeremias 31:3?

¹¹ Sugad han aton nakita, diri ni Jehova gintatago an iya mga inaabat, lugod, iya iginpapahayag an iya gugma. (Basaha an Jeremias 31:3.) Ginpahirani kita ni Jehova ha iya kay hinigugma kita niya. (Ikompara an Deuteronomio 7:​7, 8.) Waray butang ngan bisan hin-o nga makakabulag ha aton tikang hito nga gugma. (Roma 8:​38, 39) Ano an inaabat mo tungod hini nga gugma? Basaha an Salmo 23, ngan kitaa an epekto han gugma ni Jehova ngan an malumo nga pag-ataman niya kan David ngan an epekto hito ha aton ngatanan.

ANO AN IMO INAABAT TUNGOD HAN GUGMA NI JEHOVA?

12. Paonan-o mo isusumaryo an Salmo 23?

¹² Basaha an Salmo 23:​1-6. An Salmo 23 usa nga kanta nga nagpapahayag han pagsarig ha gugma ngan pagpalangga ni Jehova. Iginsaysay ni David, nga nagsurat hini nga salmo, an iya marig-on nga relasyon ha iya Paraataman nga hi Jehova. Inabat ni David nga talwas hiya ha pagpagiya kan Jehova, ngan bug-os nga nakadepende hiya ha Iya. Maaram hi David nga pirme ipapakita ni Jehova nga hinigugma niya hiya ha ngatanan nga adlaw han iya kinabuhi. Kay ano nga nakakasiguro hiya hito?

13. Kay ano nga sigurado hi David nga aatamanon hiya ni Jehova?

¹³ “Diri ako makukulangan hin bisan ano.” Inabat ni David nga inataman gud hiya hin maopay kay hi Jehova pirme nagtatagana han ngatanan niya nga panginahanglan. Maaram liwat hi David nga sangkay hiya ni Jehova ngan gin-uuyonan hiya. Salit sigurado hiya nga bisan ano an mahitabo, pirme ihahatag ni Jehova an ngatanan niya nga panginahanglan. Tungod kay hi David nasarig nga hinigugma hiya ni Jehova ngan aatamanon hiya, nakabulig ito ha iya nga diri mabaraka, lugod magin malipayon ngan kontento.—Sal. 16:11.

14. Paonan-o kita mahigugmaon nga maaataman ni Jehova?

¹⁴ Mahigugmaon nga gin-aataman kita ni Jehova, labi na kon may nahitatabo ha aton nga magraot. Hi Claire,a nga sobra 20 ka tuig na nga nag-aalagad ha Bethel, inabat nga waray hiya mahihimo han an iya pamilya inatubang hin sunod-sunod nga dagku nga problema. An iya tatay naistrok, an usa han iya bugto nga babaye na-disfellowship, ngan an iya pamilya nawad-an han ira gutiay nga negosyo ngan han ira balay. Paonan-o iginpakita ha ira ni Jehova an iya mahigugmaon nga pag-ataman? Hi Claire nagsiring: “Ginsiguro ni Jehova nga an akon pamilya pirme may-ada han ira ginkikinahanglan kada adlaw. Salit damu ka beses nga iginhatag ha amon ni Jehova an labaw pa kay han amon ginkikinahanglan. Agsob ko mahunahuna an mga panahon nga naeksperyensyahan ko an malumo nga gugma ni Jehova, ngan diri ko gud ito makakalimtan. Ini nga mga hinumdoman nakabulig ha akon nga makapabilin nga malipayon ha pag-alagad kan Jehova bisan pa han mga problema.”

15. Kay ano nga narepreskohan hi David? (Kitaa liwat an piktyur.)

¹⁵ “Gintatagan niya ako hin karepresko.” May mga panahon nga naistres hi David tungod han ngatanan nga problema ngan kakurian nga iya gin-atubang. (Sal. 18:​4-6) Pero an malumo nga gugma ngan pag-ataman ni Jehova nakarepresko ha iya. Gin-giyahan ni Jehova an iya kapoy na nga sangkay ngadto ha “magrabong nga mga panabsaban” ngan “mga pahuwayan nga damu an tubig.” Salit nahibalik an kusog ni David ngan nakapadayon hiya ha pag-alagad kan Jehova nga malipayon.—Sal. 18:​28-32.

16. Paonan-o an gugma ni Jehova nagrirepresko ha imo?

¹⁶ Sugad man yana, “tungod han maunungon nga gugma ni Jehova waray kita umabot ha aton kataposan” han inatubang kita hin mga problema ngan kakurian. (Pag. 3:22; Col. 1:11) Pansina an ehemplo ni Rachel. Nasubo gud hiya han an iya bana binaya ha iya ngan kan Jehova ha panahon han COVID-19 nga pandemya. Paonan-o hiya ginbuligan ni Jehova? Hiya nagsiring: “Ginsiguro ni Jehova nga abaton ko nga hinigugma ako. Gintagan niya ako hin kasangkayan nga naggahin hin panahon ha akon, nagdara hin mga pagkaon, nagpadara hin makaparig-on nga mga mensahe ngan teksto, nahiyom ha akon, ngan pirme nagpapahinumdom ha akon nga gin-aataman ako ni Jehova. Pirme ako nagpapasalamat kan Jehova kay gintagan niya ako hin daku ngan mahigugmaon nga pamilya.”

17. Kay ano nga hi David ‘diri nahahadlok ha peligro’?

¹⁷ “Diri ako nahahadlok ha peligro, kay kaupod ko ikaw.” Agsob mameligro an kinabuhi ni David, ngan damu an iya gamhanan nga kaaway. Pero tungod han gugma ni Jehova, inabat niya nga talwas hiya ngan protektado. Naaabat ni David nga kaupod niya hi Jehova ha tagsa nga sitwasyon, ngan nagpasarig ito ha iya. Tungod hito, nakagkanta hiya: “Gintalwas [ako ni Jehova] ha ngatanan ko nga nahahadlokan.” (Sal. 34:4) Tinuod an mga ginkakahadlokan ni David, pero an gugma ni Jehova mas makusog kay han iya mga ginkakahadlokan.

18. Paonan-o an pasarig han gugma ni Jehova mahimo magparig-on ha imo kon nahahadlok ka?

¹⁸ Paonan-o an pasarig han gugma ni Jehova nagpaparig-on ha aton kon naatubang kita hin makaharadlok nga mga sitwasyon? Ginsaysay han payunir nga hi Susi kon ano an iya inabat ngan han iya bana han nagpakamatay an ira anak: “Nakakatruma an tigda nga trahedya ngan nakakaapekto gud ito ha imo ngan inaabat mo nga waray ka gud mahihimo. Pero tungod han malumo nga pagpalangga ni Jehova inabat namon nga talwas kami ngan protektado.” Hi Rachel, nga gin-unabi na, nagsiring: “Usa ka gab-i han nasusubo gud ako ngan nababaraka ngan nahahadlok, nag-ampo ako kan Jehova ha daku nga tingog. Katapos gud hito, inabat ko nga ginpakalma ako ni Jehova, sugad han ginhihimo han nanay ha iya minasus-an, ngan nahingaturog na ako. Diri ko gud makakalimtan ito nga takna.” An tigurang nga hi Tasos napriso hin upat ka tuig kay nagdumiri hiya nga magsundalo. Paonan-o niya naeksperyensyahan an gugma ngan pag-ataman ni Jehova? Hiya nagsiring: “Gin-ataman ni Jehova an ngatanan ko nga panginahanglan ngan gintagana niya an labaw pa kay han akon ginkikinahanglan. Nagparig-on ini han akon pagtapod nga bug-os gud nga makakasarig ako ha iya. Pinaagi liwat han iya espiritu, gintagan ako ni Jehova hin kalipay bisan pa han nakakadepres nga palibot. Nagpasarig ini ha akon nga kon mas duok ako nga magbubuhat kaupod niya, mas makakapahimulos ako han iya pagkamaopay. Salit nagregular payunir ako samtang aadto ha prisohan.”

MAGIN DUOK HA IMO MALUMO NGA DIOS

19. (a) Paonan-o kita mag-aampo kon maaram kita nga hinigugma kita han Dios? (b) Ano nga diskripsyon han gugma ni Jehova an nakabantad gud ha imo? (Kitaa an kahon nga “Mga Pulong nga Mabulig ha Aton nga Abaton an Mapaso nga Gugma ni Jehova.”)

¹⁹ An mga eksperyensya nga aton nahisgotan nagpapamatuod nga kaupod naton hi Jehova, “an Dios han gugma”! (2 Cor. 13:11) Interesado hiya ha aton. Kombinsido kita nga “ginpapalibotan [kita] han Iya maunungon nga gugma.” (Sal. 32:10) Kon mas ginpapamalandong naton kon paonan-o hiya nagpakita ha aton han iya gugma, mas nagigin tinuod hiya ha aton ngan inaabat ta nga mas duok kita ha iya. Makakag-ampo kita ha iya nga diri nag-aalang ngan makakagsumat ha iya nga kinahanglan gud naton an iya gugma. Maipapahayag naton ha iya an ngatanan naton nga mga kabaraka, ngan nasarig nga nasasabtan kita niya ngan andam hiya ha pagbulig ha aton.—Sal. 145:​18, 19.

20. Paonan-o an gugma ni Jehova nabulig nga magin mas duok kita ha iya?

²⁰ Sugad la nga nagpapahirani kita ha mapaso nga kalayo ha mahagkot nga adlaw, napahirani liwat kita ha mapaso nga gugma ni Jehova. Bisan kon gamhanan an gugma ni Jehova, malumo liwat ito. Salit magin malipayon kay hinigugma ka ni Jehova. Ngan karawata an iya gugma pinaagi ha pagsiring: “Hinigugma ko hi Jehova”!—Sal. 116:1.