Padayon nga Magsangyaw Tungod han Gugma!

1. Ano an aton nahibaroan ha tinuig nga miting han 2023?

HAN tinuig nga katirok han 2023a nakakarawat kita hin eksayting nga mga pagbag-o ha pipira naton nga gintotoohan ngan nabatian naton an pipira nga eksayting nga mga pahibaro mahitungod ha aton ministeryo. Pananglitan, nahibaroan naton nga an pipira nga indibiduwal bangin magkaada oportunidad nga dumapig ha katawohan ni Jehova bisan katapos bungkagon an Babilonya nga Gamhanan. Nahibaroan liwat naton nga tikang han Nobyembre 2023, an mga magwarali han Ginhadian diri na aaroan hin report ha ngatanan nira nga ginbubuhat ha ministeryo. Iginpapakita ba hito nga pagbag-o nga an aton ministeryo diri na sugad kaimportante ngan kaapurado kay han naglabay? Diri gud!

2. Kay ano nga an aton ministeryo nagigin mas apurado ha kada adlaw nga nalabay? (Marcos 13:10)

² Ha kada adlaw nga nalabay, nagigin mas apurado an aton ministeryo. Kay ano? Kay gutiay na la nga panahon an nahibibilin. Hunahunaa an igintagna ni Jesus mahitungod han pagsangyaw nga buruhaton ha kataposan nga mga adlaw. (Basaha an Marcos 13:10.) Sumala ha kapariho nga rekord ni Mateo, hi Jesus nagsiring nga an maopay nga sumat kinahanglan maisangyaw ha ngatanan nga inuukyan nga tuna antes umabot an “kataposan.” (Mat. 24:14) Iginpapasabot hito nga mga pulong an bug-os nga kataposan han maraot nga sistema ni Satanas. Hi Jehova nag-eskedyol na han “adlaw ngan oras” para hito nga mga panhitabo nga hirani na matuman. (Mat. 24:36; 25:13; Buh. 1:7) Kada adlaw mas nagtitikahirani kita hito nga adlaw. (Roma 13:11) Pero yana, dapat kita padayon nga magsangyaw tubtob nga umabot an kataposan.

3. Ano an nagpapagios ha aton nga magsangyaw?

³ Samtang ginpapamalandong naton an aton ministeryo, ini an importante nga pakiana nga dapat naton hunahunaon hin maopay: Kay ano nga iginsasangyaw naton an maopay nga sumat? Tungod han gugma napapagios kita nga magsangyaw. Kon nagsasangyaw kita, iginpapakita naton an aton gugma—an aton gugma ha maopay nga sumat, an aton gugma ha mga tawo, ngan labaw ha ngatanan, an aton gugma kan Jehova ngan ha iya ngaran. Hisgotan naton an tagsa hini.

NAGSASANGYAW KITA TUNGOD HAN ATON GUGMA HA MAOPAY NGA SUMAT

4. Ano an aton reaksyon kon nakakakarawat kita hin maopay nga balita?

⁴ Nahinunumdoman mo ba kon ano an imo inabat han nakakarawat ka hin maopay nga sumat—bangin han may bag-o nga baby ha iyo pamilya, o bangin han nakakarawat ka hin trabaho nga imo gud kinahanglan? Sigurado nga eksayted ka gud nga isumat ito nga maopay nga balita ha imo pamilya ngan kasangkayan. Sugad ba hito an imo ginbuhat han nabatian mo an pinakamaopay nga balita ha ngatanan—an maopay nga sumat han Ginhadian han Dios?

5. Ano an imo gin-abat han nahibaroan mo an kamatuoran nga tikang ha Pulong han Dios? (Kitaa liwat an mga piktyur.)

⁵ Hunahunaa kon ano an imo inabat han nahibaroan mo an kamatuoran nga tikang ha Pulong han Dios. Nahibaroan mo nga hinigugma ka han imo langitnon nga Amay, ngan karuyag niya nga magin bahin ka ha iya pamilya han mga magsiringba, nga nagsaad hiya nga iya tatapuson an kasakit ngan pag-antos, nga makakalaom ka nga makikita mo utro an imo mga hinigugma nga nagkamatay nga bubuhion ha bag-o nga kalibotan—ngan mas damu pa gud. (Mar. 10:​29, 30; Juan 5:​28, 29; Roma 8:​38, 39; Pah. 21:​3, 4) Nalipay ka gud tungod hito nga mga kamatuoran. (Luc. 24:32) Ginhigugma mo an imo nahibaroan ngan karuyag mo gud isumat ha iba ito nga presyoso nga mga kamatuoran!—Ikompara an Jeremias 20:9.

6. Ano an imo nahibaroan ha eksperyensya nira Ernest ngan Rose?

⁶ Pansina an usa nga eksperyensya. An brother nga hi Ernestb namatyan hin tatay han mga 10 anyos pa la hiya. Hi Ernest nagsiring: “Nahunahuna ko: ‘Aadto na ba hiya ha langit? O permanente nga waray na gud hiya?’ Naaawa ako ha iba nga kabataan nga may tatay pa.” Pirme hi Ernest napakadto ha sementeryo, naluhod ha lubnganan han iya tatay ngan nag-aampo: “Nanginginyupo ako Dios ko, karuyag ko mahibaroan kon hain an akon tatay.” Paglabay hin mga 17 ka tuig, katapos mamatay an iya tatay, may nag-offer ha iya hin pag-aram ha Biblia, ngan ginkarawat niya ito dayon. Nalipay hiya han nahibaroan niya nga an mga patay waray sarabotan, sugad hin nakaturog la hin hilarom, ngan an Biblia nagsasaad hin pagkabanhaw ha tiarabot. (Ecles. 9:​5, 10; Buh. 24:15) Ha urhi, nahibaroan gihap niya an mga baton han iya mga pakiana nga maiha na nga nakakawurok ha iya. Eksayted gud hi Ernest ha mga kamatuoran nga iya nahibabaroan ha Biblia. An iya asawa nga hi Rose inapi ha iya pag-Bible study ngan naruyag liwat han mensahe han Ginhadian. Han 1978 nabawtismohan hira. Tungod han mga kamatuoran nga ira nahibabaroan, eksayted gud hira nga isumat ito ha ira kapamilya, kasangkayan, ngan ha iba. Sugad nga resulta, nabuligan nira Ernest ngan Rose an sobra 70 nga indibiduwal nga mag-uswag ngadto ha bawtismo.

7. Ano an nahitatabo kon nagkakaada kita gugma ha kamatuoran ha Biblia? (Lucas 6:45)

⁷ Klaro gud nga kon nahigugma na kita ha mga kamatuoran ha Biblia, diri ta gud maiilob nga diri naton ito isumat. (Basaha an Lucas 6:45.) Gin-abat naton an pariho han gin-abat han siyahan-siglo nga mga disipulo ni Jesus nga nagsiring: “Diri namon mahihimo nga umundang ha pagyakan mahitungod han mga butang nga amon nakita ngan nabatian.” (Buh. 4:20) Hinigugma gud naton an kamatuoran, salit karuyag naton nga isumat ito ha pinakadamu tubtob nga posible.

NAGSASANGYAW KITA TUNGOD HA GUGMA HA MGA TAWO

8. Ano an nagpapagios ha aton nga isangyaw an maopay nga sumat? (Kitaa an kahon nga “Higugmaa an mga Tawo—Panhimo hin Disipulo.”) (Kitaa liwat an piktyur.)

⁸ Pariho kan Jehova ngan ha iya Anak, hinigugma naton an mga tawo. (Prob. 8:31; Juan 3:16) Napaid gud kita hadton “waray Dios” ngan ha mga “waray paglaom.” (Efe. 2:12) Nalulunod hira ha mga problema ha kinabuhi ngan may-ada kita life jacket nga ira kinahanglan—an maopay nga sumat han Ginhadian han Dios. An aton gugma ngan pagpaid ha ira nagpapagios ha aton nga buhaton an ngatanan nga aton mahihimo basi masumatan hira han maopay nga sumat. Ito nga importante nga mensahe makakahatag ha ira hin paglaom, makakabulig ha ira nga mabilngan an pinakamaopay nga kinabuhi nga posible yana, ngan maghahatag ha ira hin oportunidad para ha “tinuod nga kinabuhi”—an kinabuhi nga waray kataposan—ha bag-o nga kalibotan han Dios.—1 Tim. 6:19.

9. Ano nga pahamangno an aton iginsusumat mahitungod ha tiarabot, ngan kay ano? (Ezekiel 33:​7, 8)

⁹ An aton gugma ha mga tawo nagpapagios liwat ha aton nga pahamangnoan hira mahitungod han hirani na nga kataposan hinin maraot nga kalibotan. (Basaha an Ezekiel 33:​7, 8.) Nalolooy kita ha ngatanan nga tawo, upod na hito an aton kapamilya nga diri nag-aalagad kan Jehova. Damu nga tawo an nagkikinabuhi hin normal la nga diri maaram han mahitatabo—an “daku nga kasakitan nga waray pa mahitabo tikang ha tinikangan han kalibotan tubtob yana, ngan diri na mahitatabo utro.” (Mat. 24:21) Karuyag naton nga mahibaro hira han mahitatabo ha panahon han paghukom—wawad-on an buwa nga relihiyon ngan katapos, an bug-os nga sistema han maraot nga kalibotan bubungkagon ha Armagedon. (Pah. 16:​14, 16; 17:​16, 17; 19:​11, 19, 20) Igin-aampo naton nga tubtob nga posible damu an mamati han pahamangno ngan umupod ha aton ha putli nga pagsingba yana. Pero kumusta man adton diri namamati han pahamangno yana, upod na an aton hinigugma nga kapamilya?

10. Kay ano nga apurado an aton padayon nga pagpahamangno?

¹⁰ Sugad han iginsaysay ha nahiuna nga artikulo, bangin kaburut-on ni Jehova nga talwason an mga tawo nga nagtikang magpakita hin pagtoo ha iya kon makita na nira an kabungkagan han Babilonya nga Gamhanan. Kon sugad, mas importante yana an padayon nga pagsumat ha ira mahitungod hito. Hunahunaa ini: Kon ano an aton iginsusumat yana posible nga amo an ira mahinumdoman hito nga panahon. (Ikompara an Ezekiel 33:33.) Bangin mahinumdoman nira an pahamangno nga ira nabatian tikang ha aton ngan mapagios hira nga umupod ha aton ha putli nga pagsingba antes magin urhi na an ngatanan. Pariho han gwardya ha prisohan han Filipos nga nagbag-o la katapos ‘maglinog hin makusog,’ bangin an pipira nga diri namamati yana magbag-o la katapos han makaharadlok nga kabungkagan han Babilonya nga Gamhanan.—Buh. 16:​25-34.

NAGSASANGYAW KITA KAY HINIGUGMA NATON HI JEHOVA NGAN AN IYA NGARAN

11. Paonan-o naton naihahatag kan Jehova an himaya, dungog, ngan gahum? (Pahayag 4:11) (Kitaa liwat an mga piktyur.)

¹¹ An pinakaimportante nga rason kon kay ano nga nagsasangyaw kita han maopay nga sumat kay hinigugma naton hi Jehova nga Dios ngan an iya baraan nga ngaran. Ginhuhunahuna naton an aton ministeryo sugad nga usa nga paagi han pagdayaw ha aton hinigugma nga Dios. (Basaha an Pahayag 4:11.) Kinasingkasing nga mauyon kita nga hi Jehova nga Dios takos ha pagkarawat han himaya, dungog, ngan gahum tikang ha iya maunungon nga mga magsiringba. Iginhahatag naton ha iya an himaya ngan an dungog kon iginsusumat naton ha iba an makakombinse nga mga ebidensya nga hiya an “naglarang han ngatanan nga butang,” ngan utang naton ha iya an aton kinabuhi. Iginhahatag naton ha iya an gahum—an aton gahum—kon gin-gagamit naton an aton panahon, kusog, ngan panag-iya basi makasangyaw tubtob ha aton mahihimo. (Mat. 6:33; Luc. 13:24; Col. 3:23) Ha simple nga pagkayakan, naruruyag kita ha pag-istorya mahitungod ha Dios nga aton hinigugma. Napapagios liwat kita nga isumat ha iba an mahitungod ha iya ngaran ngan kon ano hiya nga klase hin Dios. Kay ano?

12. Paonan-o naton ginbabaraan an ngaran ni Jehova ha aton ministeryo?

¹² An aton gugma kan Jehova nagpapagios ha aton nga baraanon an iya ngaran. (Mat. 6:9) Nagpapasabot ito nga karuyag naton isumat ha iba nga buwa an ngatanan nga igin-akusar ni Satanas mahitungod kan Jehova. (Gen. 3:​1-5; Job 2:4; Juan 8:44) Kon nagsasangyaw kita, hingyap gud naton nga isumat ha ngatanan nga mamamati kon hin-o hi Jehova ngan kon ano hiya nga klase hin Dios. Karuyag naton mahibaro an ngatanan nga an gugma an iya pinakalabaw nga kalidad, nga an iya paagi han pagmando matadong ngan may hustisya, ngan diri na mag-iiha tatapuson han iya Ginhadian an ngatanan nga pag-antos ngan maghahatag hin kamurayawan ngan kalipay ha tawhanon nga pamilya. (Sal. 37:​10, 11, 29; 1 Juan 4:8) Kon gindidepensahan naton an reputasyon ni Jehova ha aton ministeryo, ginbabaraan naton an iya ngaran. Nalilipay liwat kita kay ginbubuhat naton an angay naton buhaton sugad nga mga Saksi ni Jehova. Paonan-o?

13. Kay ano nga proud kita nga tawagon nga mga Saksi ni Jehova? (Isaias 43:​10-12)

¹³ Gintawag kita ni Jehova nga iya “mga Saksi.” (Basaha an Isaias 43:​10-12.) Pipira ka tuig na an naglabay, an surat han Nagmamando nga Lawas nasiring: “An pinakadaku nga dungog nga makakarawat han bisan hin-o ha aton amo an tawagon nga usa han mga Saksi ni Jehova.”c Kay ano? Hunahunaa ini nga ilustrasyon. Kon kinahanglan mo hin magigin testigo para ha imo ha usa nga kaso ha korte, pipilion mo an kilala mo gud ngan matataporan, ngan tungod han iya maopay nga reputasyon masasarigan an iya testimonya. Pinaagi ha pagpili ha aton nga magin iya mga Saksi, iginpapakita ni Jehova nga kilala kita niya hin maopay ngan nasarig hiya ha aton pagtestigo nga hiya la an tinuod nga Dios. Proud kita nga magin iya mga Saksi, salit ginsasalingabot naton an tagsa nga higayon nga maipakilala an iya ngaran ngan ginpapamatud-an naton nga diri totoo an damu nga buwa nga iginsusumat mahitungod ha iya. Pinaagi ha pagbuhat hito, nagkikinabuhi kita uyon ha ngaran nga proud gud kita nga tawagon, mga Saksi ni Jehova!—Sal. 83:18; Roma 10:​13-15.

PADAYON KITA NGA MAGSASANGYAW TUBTOB HA KATAPOSAN

14. Ano nga eksayting nga panhitabo an hirani na naton makita?

¹⁴ Eksayted gud kita nga makita an hirani na mahitabo ha tiarabot! Pinaagi ha bendisyon ni Jehova, naglalaom kita nga makita an damu pa nga makarawat han kamatuoran antes magtikang an daku nga kasakitan. Nalilipay gud liwat kita han posibilidad nga bisan han pinakamakuri nga panahon ha kasaysayan han tawo—an daku nga kasakitan—mahimo la gihapon kita makakita hin mga tawo nga nabaya ha kalibotan ni Satanas ngan maupod ha aton ha pagdayaw kan Jehova!—Buh. 13:48.

15-16. Ano an padayon ta nga bubuhaton, ngan tubtob san-o?

¹⁵ Pero yana, may kinahanglan kita buhaton. May pribilehiyo kita ha pakigbahin ha buruhaton nga diri na gud mauutro—an pagsangyaw han maopay nga sumat han Ginhadian han Dios ha bug-os nga tuna. Kinahanglan ta liwat pahamangnoan an mga tawo. Dapat mahibaro an mga tawo nga an kataposan hinin maraot nga sistema madagmit nga nagtitikahirani na. Ngan kon umabot na an panahon han paghukom, mahibabaroan nira nga an mensahe nga aton iginsangyaw tikang kan Jehova nga Dios.—Ezek. 38:23.

¹⁶ Salit ano an aton determinasyon? Pinaagi han gugma—gugma ha maopay nga sumat, gugma ha mga tawo, ngan labaw ha ngatanan gugma kan Jehova ngan ha iya ngaran—padayon kita nga magsasangyaw nga eksayted, madasigon, ngan may pagkaapurado tubtob nga magsiring hi Jehova, “Tapos na!”