Nahinunumdoman Mo Ba?

Nabasa mo ba hin maopay an mga isyu han An Barantayan hini nga tuig? Kitaa kon mababaton mo an masunod nga mga pakiana:

Ano an nagpapagios ha aton nga ihatag kan Jehova an himaya?

Ginhihimo naton ito kay ginrirespeto gud naton hi Jehova ngan hinigugma gud naton hiya. Ginhihimaya liwat naton hiya kay karuyag naton nga makilala hiya han iba.​—w25.01, p. 3.

Kon may nakasakit ha aton, paonan-o kita magigin mas mapinasayloon?

Diri naton basta la ginbabalewaray an aton mga inaabat; pero kon ginwawara naton an aton kasina ngan pagdumot, diri naton gintutugotan nga an kasina makaapekto ha aton pagtratar ha iba.​—w25.02, p. 15-16.

Kay ano nga maopay nga ehemplo an disipulo nga hi Marcos para ha batan-on nga mga brother?

Kinaburut-on nga ginkarawat ni Marcos an asaynment nga magserbi. Bisan kon posible gud nga nasubo hi Marcos ha usa nga sitwasyon, waray hiya umundang. Ginkultibar niya an iya relasyon kan Pablo ngan ha iba nga hamtong nga mga Kristiano.​—w25.04, p. 27.

Ano an karuyag sidngon ni Jesus han nag-ampo hiya: “Iginpakilala ko ha ira an imo ngaran”? (Juan 17:26)

An iya mga disipulo maaram na nga daan han ngaran han Dios. Pero iginpakilala ni Jesus kon hin-o gud ito nga nagdadara hito nga ngaran, upod na an Iya mga katuyoan, mga ginbubuhat, ngan mga kalidad.​—w25.05, p. 20-21.

Kon mapainubsanon kita, ano an aton ginkikilala?

Ginkikilala naton nga may mga butang nga diri kita maaram. Halimbawa, diri kita maaram kon san-o maabot an kataposan o kon paonan-o posible magios hi Jehova hito nga panahon. Ngan diri kita maaram han mahitatabo buwas o kon ano kita kakilala ni Jehova.​—w25.06, p. 15-18.

Ano an makakabulig ha aton nga magpahimulos ha usa nga artikulo o pahayag publiko?

Puydi naton pakianhan an aton kalugaringon: ‘Ano an gin-gamit nga ebidensya nga nakakombinse ha mga mamarati o magbarasa? May-ada ba epektibo nga ilustrasyon nga puydi ko gamiton kon nagtututdo? Hin-o an bangin interesado hini nga topiko?’—w25.07, p. 19.

Ha pagtratar han Dios kan David, ano an aton mahibabaroan nga leksyon mahitungod ha iya pagpasaylo?

Bisan kon nakabuhat hi David hin grabe nga mga sala, ginpasaylo hiya ni Jehova han sinsero hiya nga nagbasol. (1 Hadi 9:​4, 5) Kon nagpapasaylo an Dios, diri niya gintitipigan an naglabay nga mga sayop o diri ito gagamiton basi sirotan kita ha tiarabot.​—w25.08, p. 17.

Kon nakukurian an usa nga Bible study ha pag-intindi ha usa nga punto, ano an puydi mo buhaton?

Kon nakukurian la gihap hiya ha pagsabot ha usa nga punto katapos mo maningkamot nga magtutdo hin maopay tikang ha Biblia, ayaw pag-iniha hito ngan balika na la niyo ha urhi.​—w25.09, p. 24.

An Biblia nasiring nga an sala may-ada “nakakalimbong nga gahum.” (Heb. 3:13) Paonan-o?

An sala nakakasulay ha aton nga magbuhat hin mga sayop. Nakakalimbong liwat ito ha aton basi pirme kita magruhaduha nga hinigugma gud kita ni Jehova.​—w25.10, p. 16.

Ano an tulo nga puydi naton himoon basi an aton mga pag-ampo makabulig ha aton nga magin mas duok kan Jehova?

(1) Puydi naton pamalandungon an mga kalidad ni Jehova. (2) Puydi naton hunahunaon kon ano an aton mga gin-aagian ngan ig-ampo ito, halimbawa, kon may kinahanglan kita pasayloon. (3) Puydi kita diri magdali-dali ha aton pag-ampo. Posible gud nga mas maipapahayag naton an aton mga inaabat ngan ginhuhunahuna kon mas hilaba an aton pag-ampo.​—w25.10, p. 19-20.

Paonan-o naton mabubuligan an mga lagas na?

Puydi naton bisitahon ngan tawagan an mga lagas. Puydi liwat naton hira updan ha pagpadoktor. O puydi naton updan an mga lagas ha iba-iba nga klase han pagministeryo.​—w25.11, p. 6-7.

Ano an importante nga mga aspekto basi magin dungganon an Kristiano nga kasal?

Sunda an mga balaud han gobyerno parte ha pag-asawa. Siguroha nga makita ha seremonya ngan resepsyon han kasal an bunga han espiritu han Dios. Dapat an iyo pamado may kasadangan, o desente, ngan siguroha nga likyan an diri Kasuratanhon nga mga kustomre. Pagkomunikar kamo hin maopay kon nagpaplano hin kasal.​—w25.12, p. 21-24.