Han 26 anyos hi Hadi Josias, gintikangan niya an pag-ayad utro han templo. Dida hito nga panahon, nakita “an libro han Balaud ni Jehova nga iginhatag pinaagi kan Moises.” Han nabatian han hadi an sulod hito, ginios dayon hiya basi sundon an ginsisiring dida hito. (2 Cron. 34:​14, 19-21) Karuyag mo ba basahon an Biblia hin regular? Kon naniningkamot ka nga buhaton ito, kumusta man? Gintitigamnan mo ba an mga teksto nga mahimo makabulig ha imo? Han mga 39 anyos hi Josias, nakahimo hiya hin sayop nga nagresulta han iya kamatayon. Sinarig hiya ha iya kalugaringon imbes nga mangaro han giya ni Jehova. (2 Cron. 35:​20-25) May mahibabaroan kita ha iya. Anoman an aton edad o anoman kita kaiha nga nag-aaram han Biblia, kinahanglan padayon naton nga pamilngon hi Jehova. Upod hito an regular nga pag-ampo para han iya giya, pag-aram han iya Pulong, ngan pagpamati han mga sagdon han hamtong nga mga Kristiano. Kon bubuhaton ta ito, posible naton malikyan an dagku nga sayop ngan magigin mas malipayon kita.​—San. 1:25. w23.09 12 ¶15-16

An Biblia nag-uunabi hin damu nga mag-opay gud nga kababayin-an nga nahigugma ngan nag-alagad kan Jehova. Nagpakita hira hin mga kalidad nga “kontrolado an pamatasan” ngan “matinumanon ha ngatanan nga butang.” (1 Tim. 3:11) Dugang pa, an mga sister makakabiling ha ira kongregasyon hin mga hamtong nga sister nga angay subaron. Mga batan-on nga sister, may kilala ba kamo nga mga hamtong nga sister nga puydi niyo subaron? Obserbari an ira mag-opay nga kalidad; ngan hunahunaa kon paonan-o mo maipapakita ito. An usa nga importante nga kalidad ha pagin hamtong amo an pagin mapainubsanon. Kon mapainubsanon an usa nga sister, magkakaada hiya maopay nga relasyon kan Jehova ngan ha iba. Pananglitan, an usa nga babaye nga nahigugma kan Jehova mapainubsanon nga nasuporta ha prinsipyo han pagkaulo nga gin-establisar han iya langitnon nga Amay. (1 Cor. 11:3) Ito nga prinsipyo espisipiko nga maiaaplikar ha kongregasyon ngan ha kahikayan ha pamilya. w23.12 18-19 ¶3-5

Hi Jehova naglalaom nga hihigugmaon han bana an iya asawa ngan aatamanon hiya ha pisikal, emosyonal, ngan espirituwal. An pagkultibar han abilidad ha paghunahuna, pagrespeto ha kababayin-an, ngan pagin masasarigan, mabulig ha imo nga magin maopay nga bana. Katapos mo magpakasal, bangin magin usa ka nga tatay. Ano an imo mahibabaroan tikang kan Jehova mahitungod ha pagin maopay nga tatay? (Efe. 6:4) Hi Jehova waray mag-alang pagsiring ha iya Anak nga hi Jesus, nga hinigugma niya hiya ngan inuuyonan. (Mat. 3:17) Kon magin tatay ka, siguroha nga pirme mo pasarigon an imo mga anak nga hinigugma mo hira. Pirme gud maghatag hin kumendasyon ha mag-opay nga butang nga ira ginbubuhat. An mga tatay nga nagsusubad ha ehemplo ni Jehova nabulig ha ira mga anak nga magin hamtong nga mga Kristiano. Makakapangandam ka yana para hini nga responsabilidad pinaagi ha mahigugmaon nga pag-ataman hadton aada ha imo pamilya ngan ha kongregasyon ngan pinaagi ha pag-aram ha pagpahayag ha iba han imo gugma ngan apresasyon.​—Juan 15:9. w23.12 28-29 ¶17-18