Babatunon ba ni Jehova an Akon mga Pag-ampo?

1-2. Kay ano nga bangin abaton naton nga diri ginbabaton ni Jehova an aton mga pag-ampo?

“MAGMALIPAYON ka hinduro tungod kan Jehova, ngan ihahatag niya ha imo an mga hingyap han imo kasingkasing.” (Sal. 37:4) Makaruruyag gud ito nga saad! Pero dapat ba kita maglaom nga ihahatag dayon ni Jehova an ngatanan nga aton gin-aaro? Kay ano nga importante nga ipakiana ito? Pansina an masunod nga mga sitwasyon. May solo nga sister nga nag-inampo nga makaeskwela ha School for Kingdom Evangelizers. Pero damu ka tuig an naglabay, waray la gihapon hiya matatawag. An usa nga batan-on nga brother nag-inampo kan Jehova nga mag-opay ha iya grabe nga sakit basi damu an iya mahimo ha kongregasyon. Pero waray hiya mag-opay. An Kristiano nga mga kag-anak nag-iinampo nga an ira anak magpabilin ha kamatuoran. Pero an ira anak umundang ha pag-alagad kan Jehova.

² Bangin may-ada ka liwat igin-aampo kan Jehova, pero waray ka pa niya babatona. Salit bangin maghunahuna ka nga ginbabaton ni Jehova an mga pag-ampo han iba pero diri an imo. O bangin maghunahuna ka nga may nabuhat ka nga sayop. Inabat ito han sister nga hi Janice.b Hiya ngan an iya bana nag-ampo mahitungod han ira hingyap nga mag-alagad ha Bethel. Siring niya: “Kombinsido ako nga diri na gud mag-iiha mahingangadto kami ha Bethel.” Pero damu ka tuig na an naglabay, ngan an mag-asawa waray la gihapon matatawag. Hi Janice nagsiring: “Nasubo ako ngan nawurok. Naghunahuna ako kon ano an akon nabuhat nga nakapasubo kan Jehova. Nag-inampo gud ako nga matawag ha Bethel. Kay ano nga waray niya batona an akon pag-ampo?”

3. Ano an aton hihisgotan hini nga artikulo?

³ Usahay, bangin maghunahuna kita kon namamati gud ba hi Jehova ha aton mga pag-ampo. Bisan an pipira nga matinumanon nga kalalakin-an hadto nakahunahuna hin sugad. (Job 30:20; Sal. 22:2; Hab. 1:2) Ano an makakakombinse ha imo nga babatunon ni Jehova an imo mga pag-ampo? (Sal. 65:2) Basi mabaton ito nga pakiana, babatunon ta anay an masunod: (1) Ano an aton malalaoman tikang kan Jehova? (2) Ano an ginlalaoman ni Jehova ha aton? (3) Kay ano nga bangin kinahanglan naton bag-uhon an iba han aton mga hangyo?

ANO AN ATON MALALAOMAN TIKANG KAN JEHOVA?

4. Sumala ha Jeremias 29:​12, ano an iginsaad ni Jehova nga bubuhaton niya?

⁴ Hi Jehova nagsasaad nga mamamati hiya ha aton mga pag-ampo. (Basaha an Jeremias 29:12.) An Dios nahigugma ha iya matinumanon nga mga magsiringba, salit diri gud niya igbabalewaray an ira mga pag-ampo. (Sal. 10:17; 37:28) Pero diri ito nagpapasabot nga ihahatag niya an ngatanan nga aton gin-aaro. Bangin kinahanglan naton hulaton an bag-o nga kalibotan antes naton makarawat an pipira han aton mga ginhahangyo.

5. Ano an ginhuhunahuna ni Jehova kon namamati hiya ha aton mga pag-ampo? Isaysay.

⁵ Ginhuhunahuna ni Jehova an iya katuyoan kon namamati hiya ha aton mga pag-ampo. (Isa. 55:​8, 9) Bahin hito nga katuyoan amo an pun-on an tuna hin mga lalaki ngan mga babaye nga malipayon nga nagkakaurosa ilarom han iya pagmando. Pero hi Satanas nagsiring nga an mga tawo magigin mas malampuson kon hira an magmamando ha ira kalugaringon. (Gen. 3:​1-5) Basi pamatud-an nga buwa an ginsiring han Yawa, gintugotan ni Jehova an mga tawo nga mandoan an ira kalugaringon. Pero an pagmando han tawo nagresulta hin damu nga problema yana. (Ecles. 8:9) Nasasabtan naton nga diri ni Jehova wawad-on yana an ngatanan nga problema. Kay kon bubuhaton niya ito, bangin hunahunaon han iba nga malampuson an pagmando han tawo tungod kay nasusulbad nira an mga problema han katawohan.

6. Kay ano nga dapat kita makombinse nga hi Jehova pirme magbubuhat hin mahigugmaon ngan matadong?

⁶ Hi Jehova bangin bumaton ha pariho nga mga hangyo ha iba-iba nga paagi. Pananglitan, han hi Hadi Hezekias may grabe nga sakit, nakimalooy hiya kan Jehova nga buligan hiya nga mag-opay. Sugad nga baton, gintambal hiya ni Jehova. (2 Hadi 20:​1-6) Pero han hi apostol Pablo nakimalooy kan Jehova nga tanggalon an iya “tunok ha unod,” nga posible usa nga problema ha kahimsog, waray ni Jehova tanggala an iya problema. (2 Cor. 12:​7-9) Pansina liwat an sitwasyon nira apostol Santiago ngan Pedro. Hira nga duha gin-ikaparatay ni Hadi Herodes. An kongregasyon nag-ampo para kan Pedro ngan sigurado nga para liwat kan Santiago. Pero hi Santiago ginpatay, samtang hi Pedro milagroso nga gintalwas. (Buh. 12:​1-11) Bangin maghunahuna kita, ‘Kay ano nga gintalwas ni Jehova hi Pedro pero waray hi Santiago?’ Waray ginsisiring an Biblia.c Pero makakasiguro kita nga hi Jehova diri gud nagbubuhat hin “kawaray-hustisya.” (Deut. 32:4) Ngan maaram kita nga hira Pedro ngan Santiago may pag-uyon ni Jehova. (Pah. 21:14) Usahay, bangin an baton ni Jehova ha aton mga pag-ampo diri an aton ginlalaoman. Pero tungod kay nasarig kita nga pirme ginbubuhat ni Jehova an mahigugmaon ngan matadong, diri naton ginkukwestyon an iya paagi ha pagbaton han aton mga pag-ampo.​—Job 33:13.

7. Ano an aton ginpapaningkamotan nga likyan, ngan kay ano?

⁷ Naniningkamot kita nga likyan nga ikompara an aton sitwasyon ha iba. Pananglitan, bangin espisipiko nga nag-ampo kita kan Jehova nga buligan kita, pero an aton hangyo waray ihatag. Ha urhi, may nahibaroan kita nga nag-ampo hin pariho nga hangyo, ngan baga hin ginbaton hiya ni Jehova. Sugad hito an eksperyensya han sister nga hi Anna. Nag-ampo hiya nga an iya bana nga hi Matthew makarekober unta ha kanser. May duha liwat nga edaran nga sister nga may kanser. Sinsero nga nag-inampo hi Anna para kan Matthew ngan ha mga sister. Nakarekober an mga sister, pero hi Matthew namatay. Ha siyahan, naghunahuna hi Anna nga an mga sister nag-opay kay ginbuligan hira ni Jehova. Ngan kon ginbuligan hira ni Jehova, kay ano nga waray pamatii an iya pag-ampo para ha iya bana? Syempre diri kita maaram kon kay ano nga nakarekober an duha nga sister. Pero maaram kita nga hi Jehova may permanente nga solusyon ha ngatanan naton nga pag-antos, ngan hingyap niya nga banhawon an iya mga sangkay nga nagkamatay.​—Job 14:15.

8. (a) Sumala ha Isaias 43:​2, paonan-o kita ginbubuligan ni Jehova? (b) Paonan-o an pag-ampo nakakabulig ha aton kon naatubang kita hin magkuri nga problema? (Kitaa an video nga An Pag-ampo Nabulig ha Aton nga Makailob.)

⁸ Hi Jehova pirme mabulig ha aton. Sugad nga aton mahigugmaon nga Amay, diri karuyag ni Jehova nga makita kita nga nasasakit. (Isa. 63:9) Pero diri niya ginpupugngan an ngatanan naton nga problema, nga maipapariho ha mga salog o mga laga. (Basaha an Isaias 43:2.) Pero nagsasaad hiya nga bubuligan kita ha pag-agi hito. Ngan diri niya tutugotan nga an aton mga problema makawara han aton relasyon ha iya. Gintatagan liwat kita ni Jehova han iya gamhanan nga baraan nga espiritu basi buligan kita nga makailob. (Luc. 11:13; Fil. 4:13) Sugad nga resulta, makakasarig kita nga pirme niya ihahatag an aton ginkikinahanglan basi makapailob ngan makapabilin nga matinumanon ha iya.d

ANO AN GINLALAOMAN NI JEHOVA HA ATON?

9. Sumala ha Santiago 1:​6, 7, kay ano nga dapat kita sumarig nga bubuligan kita ni Jehova?

⁹ Ginlalaoman ni Jehova nga masarig kita ha iya. (Heb. 11:6) Usahay inaabat naton nga makuri hinduro an aton mga problema. Bangin magruhaduha pa ngani kita kon bubuligan ba kita ni Jehova. Pero an Biblia nagpapasarig ha aton nga pinaagi han gahum han Dios, ‘makakasaka kita hin pader.’ (Sal. 18:29) Salit imbes nga magruhaduha, dapat kita mag-ampo nga may bug-os nga pagtoo, nga nasarig nga babatunon ni Jehova an aton mga pag-ampo.​—Basaha an Santiago 1:​6, 7.

10. Iilustrar kon paonan-o kita mahimo gumios uyon ha aton mga pag-ampo.

¹⁰ Ginlalaoman ni Jehova nga magios kita uyon ha aton mga pag-ampo. Pananglitan, an usa nga brother bangin mag-ampo kan Jehova nga buligan hiya nga maka-leave ha iya sekular nga trabaho basi makaatender ha regional nga kombensyon. Paonan-o posible batunon ni Jehova ito nga pag-ampo? Puydi hiya tagan ni Jehova hin kaisog nga iya ginkikinahanglan basi makiistorya ha iya employer. Pero dapat la gihapon hiya kumadto ha iya employer ngan maghangyo. Bangin kinahanglan nga pauroutro nga maghangyo hiya. Posible pa ngani makigbalyo hiya hin eskedyol ha iya katrabaho. O magsuhestyon nga waray bayad an iya pag-leave.

11. Kay ano nga dapat kita mag-ampo hin pauroutro mahitungod han mga butang nga importante ha aton?

¹¹ Ginlalaoman ni Jehova nga mag-aampo kita hin pauroutro mahitungod han mga butang nga importante ha aton. (1 Tes. 5:17) Iginpapakita ha ginsiring ni Jesus nga diri dayon ihahatag an pipira naton nga hangyo. (Luc. 11:9) Salit ayaw pag-undang! Pag-ampo hin sinsero ngan pauroutro. (Luc. 18:​1-7) Kon padayon kita nga nag-aampo parte ha usa nga butang, iginpapakita naton kan Jehova nga seryoso gud kita ha aton ginhahangyo. Iginpapakita liwat naton an aton pagtoo ha iya abilidad ha pagbulig ha aton.

KAY ANO NGA BANGIN KINAHANGLAN NATON BAG-UHON AN IBA HAN ATON MGA HANGYO?

12. (a) Ano an usa nga pakiana nga dapat naton igpakiana ha aton kalugaringon mahitungod han aton mga pag-ampo, ngan kay ano? (b) Paonan-o kita makakasiguro nga an aton mga pag-ampo nagpapakita hin respeto kan Jehova? (Kitaa an kahon nga “An Akon ba mga Pag-ampo Nagpapakita hin Respeto kan Jehova?”)

¹² Kon diri naton nakakarawat an aton igin-aampo, bangin kinahanglan naton pakianhan an aton kalugaringon hin tulo nga pakiana. An siyahan, ‘Tama ba an akon igin-aampo?’ Kasagaran na nga naghuhunahuna kita nga maaram kita han pinakamaopay para ha aton. Pero an mga butang nga aton gin-aaro diri ngay-an makakaopay ha aton. Kon nag-aampo kita parte ha usa nga problema, bangin may-ada mas maopay nga solusyon kay han aton ginhahangyo. Ngan an pipira nga butang nga aton ginhahangyo bangin diri uyon ha kaburut-on ni Jehova. (1 Juan 5:14) Pananglitan, pansina an ehemplo han mga kag-anak nga gin-unabi kanina. Nag-ampo hira kan Jehova nga siguruhon nga magpabilin ha kamatuoran an ira anak. Baga hin angayan ito nga hangyo. Pero diri ni Jehova ginpipirit an bisan hin-o ha aton nga mag-alagad ha iya. Karuyag niya nga pilion naton, pati na han aton mga anak, nga singbahon hiya. (Deut. 10:​12, 13; 30:​19, 20) Salit puydi lugod maghangyo an mga kag-anak kan Jehova nga buligan hira nga maabot an kasingkasing han ira anak basi mapagios hiya nga higugmaon hi Jehova ngan magin Iya sangkay.​—Prob. 22:6; Efe. 6:4.

13. Sumala ha Hebreo 4:​16, san-o kita bubuligan ni Jehova? Isaysay.

¹³ An ikaduha nga pakiana, ‘Panahon na ba ni Jehova nga ihatag an akon hangyo?’ Bangin abaton naton nga kinahanglan batunon dayon an aton mga pag-ampo. Pero maaram gud hi Jehova han pinakamaopay nga panahon ha pagbulig. (Basaha an Hebreo 4:16.) Kon diri dayon naton nakakarawat an aton igin-aampo, bangin hunahunaon naton nga ‘Diri’ an baton ni Jehova. Pero ha pagkamatuod, an iya baton ‘Diri pa.’ Pananglitan, hunahunaa an batan-on nga brother nga nag-ampo nga matambal an iya sakit. Kon milagroso nga gintambal hiya ni Jehova, hi Satanas puydi unta makasiring nga an brother nagpapadayon la pag-alagad kan Jehova tungod kay gintambal hiya. (Job 1:​9-11; 2:4) Dugang pa, hi Jehova may-ada na itinanda nga panahon nga tambalon an ngatanan nga sakit. (Isa. 33:24; Pah. 21:​3, 4) Ngan samtang diri pa ito naabot, diri kita makakalaom hin milagroso nga mga pagtambal. Salit an brother puydi maghangyo kan Jehova nga tagan hiya hin kusog ngan hin murayaw nga hunahuna basi makailob ha iya sakit ngan padayon nga makag-alagad ha Dios hin matinumanon.​—Sal. 29:11.

14. Ano an imo mahibabaroan ha eksperyensya ni Janice?

¹⁴ Hunahunaa an eksperyensya ni Janice, nga nag-ampo nga mag-alagad ha Bethel. Lima ka tuig anay an naglabay antes niya masabtan kon paonan-o ginbaton ni Jehova an iya pag-ampo. Siring niya: “Gin-gamit ni Jehova ito nga panahon ha pagtutdo ha akon ngan ha pagbulig nga mas magin maopay nga Kristiano. Kinahanglan magin mas marig-on an akon pagsarig ha iya. Kinahanglan mag-uswag an akon rutina ha personal nga pag-aram. Ngan kinahanglan mahibaroan ko nga magin malipayon, anoman an akon toka ha pag-alagad ha iya.” Ha urhi, hi Janice ngan an iya bana gintawag basi mag-alagad ha sirkito. Kon ginhihinumdom ni Janice an naglabay, siring niya: “Ginbaton gud ni Jehova an akon mga pag-ampo, bisan kon diri amo an akon ginlalaoman. Nag-iha anay antes ko masabtan nga an baton ni Jehova usa nga maopay nga regalo, nagpapasalamat gud ako nga naeksperyensyahan ko an iya gugma ngan pagkabuotan.”

15. Kay ano nga usahay kinahanglan diri kita magin duro ka espisipiko ha aton mga pag-ampo? (Kitaa liwat an piktyur.)

¹⁵ An ikatulo nga pakiana, ‘Dapat ba mag-ampo ako hin iba nga butang?’ Bisan kon maopay an pagin espisipiko ha pag-ampo, mahimo naton masabtan an kaburut-on ni Jehova para ha aton kon diri duro ka espisipiko an aton ginhahangyo. Pansina an ehemplo han solo nga sister nga nag-inampo nga makaeskwela ha School for Kingdom Evangelizers. Karuyag niya makaeskwela hito basi hiya makag-alagad ha lugar nga mas daku an panginahanglan. Salit samtang gin-iinampo niya nga makaeskwela, mahimo liwat hiya maghangyo kan Jehova nga buligan hiya nga mahibaroan an iba pa nga mga oportunidad ha pagpahaluag han iya ministeryo. (Buh. 16:​9, 10) Katapos, mahimo hiya gumios uyon hito nga pag-ampo pinaagi ha pagpakiana ha paramangno han sirkito kon may hirani ba nga kongregasyon nga nagkikinahanglan hin dugang nga payunir. O mahimo hiya magsurat ha sanga nga opisina basi magpakiana kon diin nga lugar an nagkikinahanglan hin dugang nga magwarali.e

16. Ha ano kita mahimo magin kombinsido?

¹⁶ Sugad han aton nahibaroan, mahimo kita magin kombinsido nga babatunon ni Jehova an aton mga pag-ampo ha mahigugmaon ngan matadong nga paagi. (Sal. 4:3; Isa. 30:18) Usahay, bangin an baton ha aton diri amo an aton ginlalaoman. Pero diri gud igbabalewaray ni Jehova an aton mga pag-ampo. Hinigugma gud kita niya. Ngan diri gud kita niya papabay-an. (Sal. 9:10) Salit padayon nga “sarig ha iya ha ngatanan nga panahon,” nga iginsusumat ha pag-ampo an ngatanan nga aada ha iyo kasingkasing.​—Sal. 62:8.