“An Iyo Katalwasan Hirani Na”!

1. Ano an nahitabo han 66 C.E.? (Kitaa an retrato hini nga pahina.)

HANDURAWA nga usa ka nga Kristiano nga naukoy ha Jerusalem han 66 C.E. Damu an nahitatabo ha imo palibot. An Romano nga opisyal nga hi Florus nangawat hin 17 ka talanton ha surudlan han salapi ha templo. Tungod hito, nagrebelde an mga Judio. Ira ginpamatay an Romano nga mga sundalo ngan nagdeklara hin independensya tikang ha Roma. Pero ginios dayon an Roma. Ha sulod hin tulo ka bulan, ginpalibotan an Jerusalem hin 30,000 nga sundalo ha pagpanguna han Romano nga gobernador han Sirya nga hi Cestius Gallus. An Judio nga mga rebelde nagtago ha kuta han templo, pero an mga sundalo nakaabot ha gawas nga pader han templo ngan nangalimbasog ha pagbungkag hito. Nalilisang na an mga tawo ha syudad. Ano daw la an imo aabaton samtang nakikita mo ito nga mga panhitabo?

2. Ano an kinahanglan buhaton han mga Kristiano han 66 C.E., ngan paonan-o ito nagin posible?

² Sigurado nga nahinunumdoman mo an ginsiring ni Jesus nga iginrekord han parasurat han Ebanghelyo nga hi Lucas: “Kon makita niyo nga an Jerusalem ginpapalibotan han nagkakampo nga kasundalohan, tigamni nga hirani na an kabungkagan hito. An mga aadto ha Judea sadang pumalagiw ngadto ha kabukiran, ngan an aadto ha sulod han Jerusalem sadang gumawas, ngan an aadto ha kaumhan diri sumulod ngadto.” (Luc. 21:20) Pero bangin magpakiana ka, ‘Paonan-o ko masusunod an instruksyon ni Jesus nga pumalagiw tikang ha Jerusalem nga napapalibotan ito hin damu nga kasundalohan?’ May urusahon nga nahitabo. An Romano nga kasundalohan tigda la nga binaya ha syudad! Sugad han igintagna, ‘ginpahalipot’ an ira pag-atake. (Mat. 24:22) Yana, may higayon ka na ha pagsunod han instruksyon ni Jesus. Pinalagiw ka dayon ngadto ha kabukiran ha tabok han Salog Jordan kaupod an iba nga magtinumanon nga Kristiano ha syudad ngan ha palibot hito.a Katapos, han 70 C.E, sinulong ha Jerusalem an bag-o nga grupo hin kasundalohan ngan ginbungkag an syudad. Pero natalwas ka tungod kay ginsunod mo an instruksyon ni Jesus.

3. Ano nga pariho nga sitwasyon an hirani na atubangon han mga Kristiano, ngan ano an aton paghihisgotan hini nga artikulo?

³ Diri na gud mag-iiha, an tagsa ha aton maatubang hin pariho nga sitwasyon. An pahamangno ni Jesus mahitungod han kabungkagan han Jerusalem diri la para ha mga Kristiano hadto. Gin-gamit liwat niya ito nga panhitabo basi isumat an mga mahitatabo kon magtikang na an “daku nga kasakitan.” (Mat. 24:3, 21, 29) Sugad la nga may magtinumanon nga Kristiano nga natalwas hadto, may-ada liwat “daku nga grupo” han katawohan nga matatalwas hinin bug-os-kalibotan nga panhitabo. (Basaha an Pahayag 7:9, 13, 14.) Ano an ginsisiring han Biblia mahitungod hinin tiarabot nga panhitabo? Kinahanglan magin interesado gud kita ha baton tungod kay nakadepende hito an aton katalwasan. Aton usisahon hin detalyado kon paonan-o inin tiarabot nga panhitabo makakaapekto ha tagsa ha aton.

AN TINIKANGAN HAN DAKU NGA KASAKITAN

4. Paonan-o magtitikang an daku nga kasakitan, ngan paonan-o ito mahitatabo?

⁴ Paonan-o magtitikang an daku nga kasakitan? Ginbaton ito han libro han Pahayag pinaagi ha paghulagway han kabungkagan han “Babilonya nga Gamhanan.” (Pah. 17:5-7) Angayan gud la nga ipariho ha puta an ngatanan nga buwa nga relihiyon! An mga klero sugad hin nakighilawas ha mga lider hinin maraot nga kalibotan. Imbes nga maunungon nga suportaran hi Jesus ngan an iya Ginhadian, ginsuportaran lugod nira an mga tawo nga magmarando ngan ginbalewaray an katutdoan han Biblia basi la magkaada impluwensya ha politika. Iba gud hira ha limpyo ngan sugad-birhen nga mga dinihogan han Dios. (2 Cor. 11:2; San. 1:27; Pah. 14:4) Pero hin-o an magbubungkag hinin sugad-puta nga organisasyon? Ibubutang ni Jehova nga Dios “an iya panhunahuna” ha kasingkasing han “napulo nga sungay” han “pula nga mapintas nga hayop.” Ini nga mga sungay nagsisimbolo ha ngatanan nga politikal nga gahum nga nasuporta ha Nagkakaurosa nga mga Nasud (UN), an organisasyon nga ginrirepresentaran han “pula nga mapintas nga hayop.”—Basaha an Pahayag 17:3, 16-18.

5, 6. Kay ano nga nakasiring kita nga diri mamamatay an ngatanan nga membro han buwa nga relihiyon kon bungkagon na an Babilonya nga Gamhanan?

⁵ Mamamatay ba an ngatanan nga membro han buwa nga relihiyon kon bungkagon na an Babilonya nga Gamhanan? Diri. Gin-giyahan hi propeta Sakarias ha pagsurat mahitungod hito nga panahon. May kalabotan ha usa nga membro hadto han buwa nga relihiyon, an asoy nasiring: “Hiya masiring; Ako diri manaragna, ako amo an parabugwal han tuna; kay akon ginhimo nga uripon tikang han akon pagkabata. Ngan an usa masiring ha iya: Ano ini nga mga kasamdan nga ginbubutnga han imo mga butkon? Dida hito hiya mabaton: Ito amo an akon mga kasamdan didto ha balay han akon kasangkayan.” (Sak. 13:4-6) Salit, bisan adton mga lider han relihiyon magpapakunokuno nga diri hira relihiyoso ngan magdidiwara nga nagin bahin hira han buwa nga relihiyon.

⁶ Ano an mahitatabo ha katawohan han Dios hito nga panahon? Hi Jesus nagsiring: “Ha pagkamatuod, kon diri pahaliputon ito nga mga adlaw, waray tawo nga matatalwas. Pero tungod han mga pinili, pahahaliputon ito nga mga adlaw.” (Mat. 24:22) Sugad han aton ginhisgotan, ‘ginpahalipot’ an kasakitan han 66 C.E. Tungod hini, an “mga pinili”—an dinihogan nga mga Kristiano—nakapalagiw tikang ha syudad ngan ha palibot hito. Ha pariho nga paagi, “pahahaliputon” an siyahan nga bahin han daku nga kasakitan tungod han “mga pinili.” Diri tutugotan an “napulo nga sungay,” an politikal nga mga gahum, nga poohon an katawohan han Dios. Lugod, magkakaada halipot nga panahon han pagkalma han mga panhitabo.

PANAHON HAN PAGSARI NGAN PAGHUKOM

7, 8. Magkakaada ano nga higayon katapos han kabungkagan han buwa nga mga relihiyon, ngan paonan-o magigin iba an katawohan han Dios hito nga panahon?

⁷ Ano an mahitatabo katapos mabungkag an mga organisasyon han buwa nga relihiyon? Hito nga panahon, makikita kon ano gud an aada ha aton kasingkasing. An kadam-an han katawohan maayop ha mga organisasyon han tawo nga iginpariho ha “dagku nga bato ha kabukiran.” (Pah. 6:15-17) Pero an katawohan han Dios mapalagiw ngadto ha arayopan nga igintatagana ni Jehova. Han siyahan nga siglo, an temporaryo nga pagkalma han mga panhitabo diri panahon ha pangumbirte ha damu nga Judio ha Kristianidad. Panahon adto para ha mga Kristiano nga gumios ngan magin masinugtanon. Sugad man, diri kita sadang maghunahuna nga durante han temporaryo nga pagkalma han mga panhitabo ha daku nga kasakitan, damu an magpapakombirte ha tinuod nga Kristianidad. Lugod, higayon ito han ngatanan nga Kristiano nga pamatud-an an ira gugma kan Jehova ngan suportaran an kabugtoan han Kristo.—Mat. 25:34-40.

⁸ Bisan kon diri kita maaram han ngatanan nga mahitatabo durante hito nga panahon han pagsari, maaram kita nga diri ito masayon ngan kinahanglan kita maghimo hin mga sakripisyo. Han siyahan nga siglo, ginkinahanglan han mga Kristiano nga bayaan an ira mga panag-iya ngan mag-ilob hin mga kakurian basi matalwas. (Mar. 13:15-18) Basi magpabilin nga matinumanon, andam ba naton bayaan an aton mga panag-iya? Andam ba naton buhaton an bisan ano nga ginkikinahanglan basi mapamatud-an an aton pagkamaunungon kan Jehova? Hunahunaa la! Hito nga panahon, kita la an padayon nga magsisingba kan Jehova sugad han ginbuhat ni propeta Daniel.—Dan. 6:10, 11.

9, 10. (a) Ano nga mensahe an ipapasamwak han katawohan han Dios durante han daku nga kasakitan? (b) Ano an magigin reaksyon han mga kaaway han Dios?

⁹ An daku nga kasakitan diri panahon ha pagsangyaw han “maopay nga sumat han Ginhadian.” Hito nga panahon, tapos na ito nga buruhaton. Inabot na an panahon han “kataposan”! (Mat. 24:14) An katawohan han Dios magpapasamwak hin mapwersa nga mensahe han paghukom. Ito nga mensahe posible nga nagpapahibaro nga bubungkagon na an maraot nga kalibotan ni Satanas. Iginpariho han Biblia ini nga mensahe ha mga yelo han ito nagsiring: “Tikang ha langit nagkahudlog ha mga tawo an dagku nga yelo nga mga usa ka talanton an kabug-aton. Tungod han peste nga uran nga yelo, ginpasiparahan han mga tawo an Dios kay waray gud kapariho ito nga peste.”—Pah. 16:21.

¹⁰ Mababatian han aton mga kaaway inin mapwersa nga mensahe. May kalabotan ha bubuhaton han Gog han Magog—an grupo han mga nasud—hi propeta Esekiel gin-giyahan ha pagsaysay: “Ha sugad hini nasiring an Ginoo nga hi Jehova: Mahinanabo hadto nga adlaw, nga an mga butang maabot ha imo panumdoman, ngan ikaw magmumugna hin maraot nga paagi: Ngan ikaw masiring: Ako makadto ha tuna han mga baryo nga diri kinuta; kakadtoon ko hira nga namamahuway, nga nangungukoy ha masarig, hira ngatanan nangungukoy hin waray mga kuta, ngan waray bisan mga trangka o mga ganghaan; Ha pagkuha han dinag-an ngan ha pagkuha han dinakpan; ha pagwaring han imo kamot patok ha mga lugar nga bungkag nga yana pinangungukyan, ngan patok ha mga tawo nga gintirok tikang ha mga nasud, nga nakakuha hin mga hayop ngan hin mga manggad, nga naukoy dida ha butnga han tuna.” (Esek. 38:10-12) An katawohan han Dios magigin iba gud ha ngatanan, sugad hin naukoy “ha butnga han tuna.” Mangangalas gud hito an mga nasud. Oo, magigin determinado gud hira ha pag-atake ha mga dinihogan ni Jehova ngan hadton nasuporta ha ira.

11. (a) Ano an sadang naton hinumdoman may kalabotan han pagkasunod-sunod han mga panhitabo durante han daku nga kasakitan? (b) Ano an magigin reaksyon han mga tawo kon makita nira an mga tigaman ha langit?

¹¹ Samtang ginhihisgotan naton kon ano an sunod nga mahitatabo, sadang naton hinumdoman nga waray igsumat han Pulong han Dios an eksakto nga pagkasunod-sunod han mga panhitabo. Posible nga an pipira hito durungan nga mahitatabo. Ha tagna ni Jesus mahitungod ha ikatarapos hini nga sistema, hiya nagsiring: “Magkakaada . . . mga tigaman ha adlaw, bulan, ngan mga bitoon. Mag-aantos an mga nasud ha tuna ngan malilisang tungod han hagubuhob han mabalud nga dagat. An mga tawo madidismayo tungod ha kahadlok ngan pagpinamulat han mga mahitatabo ha bug-os nga inuukyan nga tuna, kay mababay-og an gamhanan nga mga butang ha langit. Ngan makikita nira an Anak han tawo nga nalusad upod han dampog nga may gahum ngan daku nga himaya.” (Luc. 21:25-27; basaha an Marcos 13:24-26.) An katumanan ba hini nga tagna mag-uupod hin makaharadlok nga mga tigaman ngan panhitabo ha literal nga langit? Kinahanglan kita maghulat basi hibaroan ito. Pero, maaram kita nga kon makita na han mga kaaway han Dios an mga tigaman, malilisang ngan mahahadlok hira.

12, 13. (a) Ano an mahitatabo kon umabot na hi Jesus nga “may gahum ngan daku nga himaya”? (b) Ano an magigin reaksyon han mga surugoon han Dios hito nga panahon?

¹² Ano an mahitatabo kon umabot na hi Jesus nga “may gahum ngan daku nga himaya”? Babalosan niya adton magtinumanon ngan sisirotan adton diri. (Mat. 24:46, 47, 50, 51; 25:19, 28-30) Sumala kan Mateo, gintapos ni Jesus an paghatag han tigaman pinaagi ha pag-unabi han parabola mahitungod han mga karnero ngan mga kanding. Hiya nagsiring: “Pag-abot han Anak han tawo nga may daku nga awtoridad upod an ngatanan nga anghel, malingkod hiya ha iya harangdon nga trono. Ngan an ngatanan nga nasud titirukon ha iya atubangan, ngan iya bubulagbulagon an mga tawo pariho ha ginbubuhat han paraataman kon iginbubulag niya an mga karnero ha mga kanding. Iya ibubutang an mga karnero ha iya too, kondi an mga kanding ha iya wala.” (Mat. 25:31-33) Ano an dadangatan han mga karnero ngan mga kanding? An parabola nagsiring: “Huhukman hira [an mga kanding] hin permanente nga kamatayon, pero an magtadong makarawat hin kinabuhi nga waray kataposan.”—Mat. 25:46.

¹³ Ano an magigin reaksyon han mga kanding kon masantop nira nga “permanente nga kamatayon” an ira dadangatan? Hira “magpupukpok han ira dughan tungod ha kasubo.” (Mat. 24:30) Kondi ano an magigin reaksyon han kabugtoan han Kristo ngan han ira mga kaupod? Tungod han ira bug-os nga pagtoo kan Jehova ngan ha iya Anak nga hi Jesu-Kristo, susundon nira an sugo ni Jesus: “Kon magtikang na mahitabo ini nga mga butang, tindog kamo hin tadong ngan hangad kamo kay an iyo katalwasan hirani na.” (Luc. 21:28) Oo, magkakaada kita positibo nga disposisyon kay sigurado nga matatalwas kita.

MALAMRAG NGA NASANAG HA GINHADIAN

14, 15. Ano nga pagtirok an mahitatabo katapos gud la magtikang an pag-atake han Gog han Magog, ngan paonan-o ito mahitatabo?

¹⁴ Ano an mahitatabo kon magtikang na an pag-atake han Gog han Magog ha katawohan han Dios? Hira Mateo ngan Marcos nagrekord hin pariho nga panhitabo: “Susugoon [han Anak han Tawo] an mga anghel ngan titirukon an iya mga pinili tikang ha upat nga direksyon han hangin, tikang ha kataposan han tuna tubtob ha kataposan han langit.” (Mar. 13:27; Mat. 24:31) Ini nga pagtirok diri nagtutudlok ha panahon han pagpili ha mga dinihogan o ha ultimo nga pagselyo ha mga dinihogan nga aanhi pa ha tuna. (Mat. 13:37, 38) Ito nga pagselyo mahitatabo antes gud han pagtikang han daku nga kasakitan. (Pah. 7:1-4) Kon sugad, ano ini nga pagtirok nga gin-unabi ni Jesus? Ito an panahon diin makakarawat na han nabibilin nga membro han 144,000 an ira langitnon nga balos. (1 Tes. 4:15-17; Pah. 14:1) Mahitatabo ini diri la maiha katapos magtikang an pag-atake han Gog han Magog. (Esek. 38:11) Kahuman, matutuman an ginsiring ni Jesus: “Hito nga panahon an magtadong masanag hin sugad kalamrag han adlaw ha Ginhadian han ira Amay.”—Mat. 13:43.b

¹⁵ Nagpapasabot ba ini nga magkakaada hin “rapture” han mga dinihogan? Damu ha Kakristianohan an natoo, sumala hini nga katutdoan, nga dadad-on an mga Kristiano ngadto ha langit ha ira pisikal nga lawas. Ngan natoo hira nga makikita nira an pagbalik ni Jesus basi magmando dinhi ha tuna. Kondi matin-aw nga iginpapakita han Biblia nga “an tigaman han Anak han tawo” makikita ha langit ngan hi Jesus ‘malusad upod han mga dampog ha langit.’ (Mat. 24:30) Nagpapasabot ini nga diri makikita an pagbalik ni Jesus. Dugang pa, “an unod ngan dugo diri makakapanunod han Ginhadian han Dios.” Tungod hini, adton dadad-on ha langit kinahanglan anay ‘mabag-o, sugad la kadagmit ha pagpirok han mata, ha panahon han pagtunog han ultimo nga trumpeta.’c (Basaha an 1 Corinto 15:50-53.) Salit bisan kon diri naton ginagamit an pulong nga “rapture” tungod kay naghahatag ito hin sayop nga ideya, an nanhibilin nga magtinumanon nga dinihogan titirukon ha langit “sugad la kadagmit ha pagpirok han mata.”

16, 17. Ano an kinahanglan mahitabo antes han kasal han Kordero ha langit?

¹⁶ Kon adto na ha langit an ngatanan nga membro han 144,000, mahimo na magtikang an pangataposan nga pagpangandam para ha kasal han Kordero. (Pah. 19:9) Pero may mahitatabo antes hiton makalilipay nga okasyon. Hinumdumi nga antes dad-on ha langit an nanhibilin nga dinihogan, aatakehon han Gog an katawohan han Dios. (Esek. 38:16) Ano an magigin reaksyon han katawohan han Dios? Susundon nira an instruksyon nga iginhatag ha panahon ni Hadi Jehosapat: “Diri kamo kinahanglan makiaway dida hini nga away: magpahamutang kamo ha iyo ngahaw, tindog kamo ha mahadong, ngan kitaa an kaluwasan ni Jehova ha iyo, O Juda ngan Jerusalem; ayaw kahadlok, o ayaw kahulop.” (2 Kron. 20:17) Pero iba an magigin reaksyon ha langit. May kalabotan ha panahon nga aadto na ha langit an ngatanan nga dinihogan, an Pahayag 17:14 nasiring mahitungod ha mga kaaway han katawohan han Dios: “Makikig-away hira ha Kordero, pero tungod kay hiya an Ginoo han mga ginoo ngan Hadi han mga hadi, pipirdihon hira han Kordero. Ito liwat an bubuhaton han iya mga kaupod nga tinawag ngan pinili ngan matinumanon.” Kaupod han 144,000 nga igkasi-magmarando ha langit, tatalwason ni Jesus an katawohan han Dios dinhi ha tuna.

¹⁷ Magriresulta ito ha girra han Armagedon nga magpapasidungog han baraan nga ngaran ni Jehova. (Pah. 16:16) Hito nga panahon, an ngatanan nga sugad-kanding nga mga tawo ‘huhukman hin permanente nga kamatayon.’ An tuna malilimpyohan na tikang ha ngatanan nga karaotan, ngan an daku nga grupo matatalwas ha ultimo nga bahin han daku nga kasakitan. Hito nga panahon, mahitatabo na an makalilipay nga kataposan nga panhitabo nga gin-unabi ha libro han Pahayag—an kasal han Kordero. (Pah. 21:1-4)d An ngatanan nga natalwas ha tuna magpapahimulos han pag-uyon han Dios ngan makakaeksperyensya han iya daku nga gugma ngan pagkamahinatagon. Makalilipay gud ito nga panahon! Diri ba kita nalilipay ha pagpamulat hito?—Basaha an 2 Pedro 3:13.

18. Tungod han tiarabot nga mga panhitabo, ano an sadang magin determinasyon han tagsa ha aton?

¹⁸ Tungod hinin tiarabot nga mga panhitabo, ano an sadang buhaton han tagsa ha aton yana? Hi apostol Pedro gin-giyahan ha pagsurat: “Tungod kay hito nga paagi matutunaw ito ngatanan nga butang, hunahunaa kon sadang magin ano nga klase kamo hin mga tawo may kalabotan ha baraan nga panggawi ngan ha mga buhat tungod han debosyon ha Dios, samtang ginhuhulat ngan ginhuhunahuna niyo pirme an presensya han adlaw ni Jehova . . . Salit mga hinigugma, tungod kay nagpapamulat kamo hito nga mga butang, buhata an iyo bug-os nga mahihimo basi ha kataposan makita niya kamo nga waray-buring ngan waray-hugaw ngan may kamurayawan.” (2 Ped. 3:11, 12, 14) Hinaot magin determinado gud kita nga magpabilin nga limpyo ha espirituwal ngan suportaran an Hadi han Kamurayawan.