PAGTIKANG HA PAKIISTORYA
LEKSYON 4
Pagin Mapainubsanon
Prinsipyo: “May pagkamapainubsanon nga iyo tagdon an iba nga labaw ha iyo.”—Fil. 2:3.
An Ginbuhat ni Pablo
1. Kitaa an VIDEO, o basaha an Buhat 26:2, 3. Katapos, batona an masunod nga mga pakiana:
Paonan-o iginpakita ni Pablo an pagkamapainubsanon ha paagi han iya pakiistorya kan Hadi Agripa?
Paonan-o iginpokus ni Pablo an atensyon kan Jehova ngan ha Kasuratan imbes nga ha iya kalugaringon?—Kitaa an Buhat 26:22.
Ano an Aton Mahibabaroan kan Pablo?
2. An aton mensahe magigin mas makaruruyag kon ipipresenta ito ha mapainubsanon ngan matinalahuron nga paagi.
Subara hi Pablo
3. Pagyakan ha matinalahuron nga paagi. Likayi an pagyakan nga sugad hin maaram ka han tanan ngan an imo kaistorya waray nahibabaroan.
4. Ipatin-aw nga an imo iginsusumat tikang ha Biblia. An Pulong han Dios may epekto ha panhunahuna ngan pag-abat han tawo. Kon ginagamit ta ito, ginbubuligan naton hira nga an ira pagtoo magkaada marig-on nga pundasyon.
5. Magpabilin nga kalmado. Ayaw ipirit an imo punto. Diri naton karuyag makigdebate. Magin mapainubsanon pinaagi ha pagpabilin nga kalmado ngan hibaroi kon san-o angay bumaya. (Prob. 17:14; Tito 3:2) Kon bumaton ka hin kalmado bangin mamati na hiya ha imo ha sunod.