Gintagan hin Gahum Basi Maatohan an Pagsulay Ngan Malamposan an Panluya
‘Kamo makarawat hin gahum kon kumanhi na an espiritu ha iyo.’—BUH. 1:8.
1, 2. Ano nga bulig an iginsaad ni Jesus ha iya mga disipulo, ngan kay ano nga pagkikinahanglanon nira ito?
MAARAM hi Jesus nga diri mahihimo han iya mga disipulo an ngatanan nga iya iginsugo kon ha ira la kalugaringon nga kusog. Kon huhunahunaon an kahaluag han ira sasangyawan, an pwersa han ira mga kaaway, ngan an ira pagkadiri-hingpit, matin-aw nga nagkinahanglan hira hin gahum nga labaw ha tawo. Salit antes gud hiya sumaka ha langit, ginpasarig niya an iya mga disipulo: ‘Kamo makarawat hin gahum kon kumanhi na an espiritu ha iyo: ngan kamo matitestigo ko ha Jerusalem, ngan ha bug-os nga Judea, ngan ha Samaria, ngan ngadto ha sidsid gud han kalibotan.’—Buh. 1:8.
2 Ito nga saad siyahan nga natuman han Pentekostes 33 K.P. han gintagan hin gahum han baraan nga espiritu an mga sumurunod ni Jesu-Kristo basi magsangyaw ha bug-os nga Jerusalem. Waray pagkontra nga nakapaundang hito. (Buh. 4:20) “Ha ngatanan nga mga adlaw tubtob ha kataposan” hini nga sistema, an magtinumanon nga sumurunod ni Jesus, pati na kita, magkikinahanglan gud han kusog nga hatag han Dios.—Mat. 28:20.
3. (a) Isaysay an kaibahan han baraan nga espiritu ha gahum. (b) Ano an maibubulig ha aton han gahum tikang kan Jehova?
3 Hi Jesus nagsaad ha iya mga disipulo nga ‘makarawat hira hin gahum kon kumanhi na an espiritu ha ira.’ Magkaiba an kahulogan han “gahum” ngan han “espiritu.” An espiritu han Dios, an iya aktibo nga pwersa, amo an enerhiya nga ginagamit ngan ginpapagios ha mga tawo o mga butang basi matuman an kaburut-on han Dios. Kondi an gahum mahimo mangahulogan hin “kapas ha pagbuhat o ha pagpahinabo hin resulta.” Puydi nga aada la ito ha usa ka tawo o butang tubtob nga kinahanglanon na ito basi magpahinabo hin resulta. Salit an baraan nga espiritu maipapariho ha koryente nga naghahatag hin enerhiya ha rechargeable nga bateriya, samtang an gahum pariho han enerhiya nga aada ha bateriya. An gahum nga iginhahatag ni Jehova ha iya mga alagad pinaagi han baraan nga espiritu nabulig ha tagsa ha aton nga tumanon an aton dedikasyon sugad nga Kristiano ngan kon kinahanglanon, nabulig ito ha aton nga atohan an magraot nga impluwensya.—Basaha an Mika 3:8; Kolosas 1:29.
4. Ano an aton hihisgotan hini nga artikulo, ngan kay ano?
4 Paonan-o nakikita an gahum nga iginhahatag ha aton pinaagi han baraan nga espiritu? Ha bulig hito, ano an posible nga buhaton naton o magin reaksyon ha iba-iba nga sitwasyon? Samtang nangangalimbasog kita nga mag-alagad ha Dios hin matinumanon, damu an mga pagsari ha aton—tikang man ito kan Satanas, ha iya sistema, o tungod han aton pagkadiri-hingpit. Importante nga malamposan naton ito basi magpabilin kita nga matinumanon, magin regular ha ministeryo, ngan matipigan an aton maopay nga relasyon kan Jehova. Aton hisgotan kon paonan-o an baraan nga espiritu nabulig ha aton nga maatohan an pagsulay ngan malamposan an kakapoy ngan panluya.
Gintagan hin Gahum ha Pag-ato ha Pagsulay
5. Paonan-o an pag-ampo makakahatag ha aton hin gahum?
5 Gintutdoan ni Jesus an iya mga sumurunod nga mag-ampo: “Diri mo kami pagdad-on ngadto ha panulay; kondi luwason mo kami ha karaotan.” (Mat. 6:13) Diri papabay-an ni Jehova an iya magtinumanon nga alagad nga nag-aampo hini. Ha lain nga higayon, hi Jesus nagsiring nga ‘an Amay nga langitnon mahatag han espiritu ha mga nangangaro ha iya.’ (Luk. 11:13) Nakakaliaw gud nga hi Jehova nagsaad nga ihahatag niya an iya espiritu, nga mabulig ha aton ha pagbuhat han husto! Syempre, diri ini nangangahulogan nga hi Jehova diri matugot nga sulayon kita. (1 Kor. 10:13) Kondi ha panahon nga ginsusulay kita, mas labi nga kinahanglan maniguro kita pag-ampo.—Mat. 26:42.
6. Diin iginbasar ni Jesus an iya mga baton ha pagsulay ni Satanas?
6 Ha pagbaton ha mga pagsulay han Yawa, ginkotar hi Jesus an Kasuratan. Matin-aw nga ginhuhunahuna ni Jesus an Pulong han Dios han hiya binaton: “Nahisurat na . . . Nahisurat liwat . . . Iwas ka dinhi, Satanas, kay nahisurat na: Magsingba ka ha imo Ginoo nga Dios, ngan ha iya la ikaw mag-aalagad.” An gugma kan Jehova ngan ha iya Pulong nagpagios kan Jesus nga atohan an mga pagsulay han Yawa. (Mat. 4:1-10) Han pauroutro nga gin-atohan niya an pagsulay, ginbayaan hiya ni Satanas.
7. Paonan-o an Biblia nabulig ha aton nga atohan an pagsulay?
7 Kon hi Jesus sinarig ha Kasuratan basi maatohan an mga pagsulay han Yawa, labaw na gud nga sadang naton buhaton ito! Ha pagkamatuod, basi maatohan an Yawa ngan an iya mga representante, siyahan kinahanglan determinado kita nga hibaroan an mga prinsipyo han Dios ngan bug-os nga sundon ito. Damu an napagios nga sundon an mga prinsipyo ha Biblia han gin-adman nira ito ngan nasabtan an kinaadman ngan pagkamatadong han Dios. Oo, “an pulong han Dios” may gahum nga masabtan an “mga hunahuna ngan mga tinguha han kasingkasing.” (Heb. 4:12) Samtang mas ginbabasa ngan ginpapamalandong naton an Kasuratan, mas maghihilarom an aton pagsabot ha ‘kamatuoran ni Jehova.’ (Dan. 9:13) Salit kinahanglan pamalandungon naton an mga teksto nga naghihisgot han aton mga kaluyahan.
8. Paonan-o kita magkakaada han baraan nga espiritu?
8 Labot pa ha pagin batid ha Kasuratan, hi Jesus ‘puno han espiritu,’ salit naatohan niya an pagsulay. (Luk. 4:1) Basi magkaada sugad hito nga kusog ngan abilidad, kinahanglan magin duok kita kan Jehova pinaagi ha pagpahimulos han ngatanan nga iya igintagana basi mapuno kita han iya espiritu. (Jak. 4:7, 8) Upod hini an pag-aram ha Biblia, pag-ampo, ngan pakig-upod ha kabugtoan. Damu liwat an nag-aapresyar han kapulsanan han pagin sagipo ha Kristiano nga mga buruhaton nga nakakabulig ha ira nga pirme hunahunaon an makaparig-on nga espirituwal nga mga butang.
9, 10. (a) Ano nga mga pagsulay an kasagaran nga naieksperyensyahan han mga Kristiano? (b) Paonan-o an pamalandong ngan pag-ampo makakahatag ha imo hin gahum ha pag-ato ha pagsulay bisan kon kinakapoy ka?
9 Ano nga mga pagsulay an kinahanglan mo atohan? Nasulay ka na ba nga magpakita hin romantiko nga interes ha diri mo asawa o bana? Kon solo ka, naaaghat ka ba nga makig-date ha diri-tumuroo? Samtang nagkikita hin TV o nag-i-Internet, an usa bangin tigda nga masulay nga magkita hin mga butang nga diri angayan ha mga Kristiano. Nahitabo na ba ito ha imo, ngan kon amo, ano an imo ginbuhat? Maopay gud pamalandungon nga an pagbuhat hin usa nga sayop mahimo magtugway ha lain pa nga sayop ngan magresulta ha seryoso nga pakasala. (Jak. 1:14, 15) Hunahunaa an kasakit nga aabaton ni Jehova, han kongregasyon, ngan han imo pamilya kon magbuhat ka hin sayop. Ha luyo nga bahin, an pirme pagsunod ha mga prinsipyo han Dios nagriresulta hin limpyo nga konsensya. (Basaha an Salmo 119:37; Proberbios 22:3.) Ha kada panahon nga ginsusulay ka, magin determinado nga mag-ampo ha pangaro hin kusog basi maatohan ito.
10 May-ada pa kita sadang hinumdoman ha mga pagsulay han Yawa. Ginsulay niya hi Jesus katapos Niya magpuasa hin 40 ka adlaw ha kamingawan. Sigurado nga nahunahuna han Yawa nga ito an kombinyente nga higayon nga sarihan an integridad ni Jesus. (Luk. 4:13) Hi Satanas namimiling liwat hin kombinyente nga mga panahon basi sarihan an aton integridad. Salit importante nga pirme marig-on an aton espirituwalidad. Agsob nga naatake hi Satanas kon iya nakikita nga maluya hinduro an iya karuyag biktimahon. Salit ha mga panahon nga kinakapoy o nanluluya kita, sadang kita magin mas determinado nga maghangyo kan Jehova han iya panalipod ngan han iya baraan nga espiritu.—2 Kor. 12:8-10.
Gintagan hin Gahum nga Malamposan an Kakapoy ngan Panluya
11, 12. (a) Kay ano nga damu yana an nanluluya? (b) Ano an makakahatag ha aton hin gahum basi malamposan an panluya?
11 Tungod kay diri kita hingpit, ha panapanahon nanluluya kita. Nahitatabo ito labi na yana nga nagkikinabuhi kita ha makuri hinduro nga panahon. Aanhi na kita ha pinakamakuri nga panahon ha bug-os nga kasaysayan. (2 Tim. 3:1-5) Samtang nagtitikahirani an Armagedon, mas nagtitikagrabe an kakuri ha panginabuhi, kasakit ha emosyon, ngan iba pa nga problema. Salit diri kita sadang mahipausa nga mas nakukurian an iba nga tumanon an ira responsabilidad ha pagmangno ngan pagtagana han panginahanglan han ira pamilya. Kinakapoy hira, nabubug-atan, nanluluya, ngan naabat pa ngani nga baga hin nauupos nga kandila. Kon ito an imo kahimtang, paonan-o mo ito malalamposan?
12 Hinumdumi nga ginpasarig ni Jesus an iya mga disipulo nga tatagan niya hira hin ‘maglilipay’ o kabulig—an baraan nga espiritu han Dios. (Basaha an Juan 14:16, 17.) Ito an pinakagamhanan nga pwersa ha uniberso. Pinaagi hito, ‘labaw gud ha kahuraan’ nga maihahatag ni Jehova an kusog nga aton ginkikinahanglan basi mailob an bisan ano nga pagsari. (Efe. 3:20) Hi apostol Pablo nagsiring nga kon nasarig kita hito, makakarawat naton an “kapin kaopay nga gahum,” bisan kon kita ‘ginsusuok paluyoluyo.’ (2 Kor. 4:7, 8) Hi Jehova waray magsaad nga iya kukuhaon an kakurian, pero ginpapasarig kita niya nga pinaagi han iya espiritu, ihahatag niya ha aton an kusog basi malamposan ito.—Fil. 4:13.
13. (a) Paonan-o an usa nga batan-on gintagan hin gahum nga mailob an makuri nga kahimtang? (b) May kilala ka ba nga bugto nga puropariho hito an kahimtang?
13 Tagda an ehemplo ni Stephanie, usa nga 19-anyos nga regular payunir. Han 12 anyos hiya, naistrok hiya ngan nasabtan nga may tumor ha iya utok. Tikang hito nga panahon, makaduha na hiya operahi, nag-radiation therapy, ngan naistrok na liwat hin duha ka beses, salit limitado na an iya pagkiwa ha wala nga bahin han iya lawas ngan naapektohan an iya pagkita. Kinahanglan ireserba ni Stephanie an iya kusog para ha mga buruhaton nga para ha iya mas importante, sugad han mga katirok ngan pagsangyaw. Kondi inaabat niya nga ginbubuligan hiya han espiritu ni Jehova nga makailob ha damu nga paagi. An mga publikasyon nga basado ha Biblia nga may mga eksperyensya han mga igkasi-Kristiano nagpaparig-on ha iya ha mga panahon nga nanluluya hiya. Gindadasig hiya han kabugtoan pinaagi han ira mga surat o han ira makaparig-on nga pakiistorya antes ngan katapos han mga katirok. An mga interesado nagpapakita liwat hin apresasyon ha igintututdo ha ira ni Stephanie pinaagi ha pagkadto ha iya balay basi didto hira mag-aram han Biblia. Tungod hini ngatanan, mapasalamaton gud hi Stephanie kan Jehova. An iya paborito nga teksto amo an Salmo 41:3, nga para ha iya natutuman gud ha iya kahimtang.
14. Ano an diri naton sadang buhaton kon nanluluya kita, ngan kay ano?
14 Kon kinakapoy kita o damu an problema, diri gud naton sadang hunahunaon nga malalamposan naton ito kon iibanan naton an espirituwal nga mga buruhaton. Sayop gud an pagbuhat hito. Kay ano? Tungod kay an mga buruhaton sugad han personal ngan panpamilya nga pag-aram han Biblia, pagsangyaw, ngan pagtambong ha mga katirok amo an mga paagi nga makakarawat naton an baraan nga espiritu nga magpapakusog ha aton. Pirme nakakarepresko an Kristiano nga mga buruhaton. (Basaha an Mateo 11:28, 29.) Damu nga higayon nga may mga kabugtoan nga naabot ha mga katirok nga nanluluya, pero pag-uli nira, sugad hin nahibalik an ira kusog ngan na-recharge an ira espirituwal nga bateriya!
15. (a) Nagsaad ba hi Jehova nga magigin masayon la an pagin Kristiano? Isaysay basado ha Kasuratan. (b) Ano an iginsaad ha aton han Dios, ngan ano an sadang naton igpakiana?
15 Syempre, diri karuyag sidngon nga masayon la an pagin disipulo ni Kristo. Kinahanglan mangalimbasog kita basi magin matinumanon nga Kristiano. (Mat. 16:24-26; Luk. 13:24) Bisan pa hito, pinaagi han baraan nga espiritu, hi Jehova makakahatag hin kusog ha nanluluya. “Hira nga naghuhulat kan Jehova magbabag-o han ira kusog,” siring ni propeta Isaias. “Hira masaka pinaagi hin mga pako sugad hin mga agila; hira madalagan, ngan diri maguguol; hira maglalakat, ngan diri maluya.” (Isa. 40:29-31) Salit maopay nga pakianhan naton an aton kalugaringon, Ano gud ba an hinungdan nga inaabat naton nga mabug-at an Kristiano nga mga buruhaton?
16. Ano an puydi naton buhaton basi maibanan an posible nga magin hinungdan han kakapoy o panluya?
16 An Pulong ni Jehova nag-aaghat ha aton nga siguruhon “an mga bagay nga mag-opay gud” o mas importante. (Fil. 1:10) Iginpariho ni apostol Pablo an Kristiano nga pagkinabuhi ha rumba, ngan pinaagi ha giya han Dios hiya nagsiring: “Isikway ta man an ngatanan nga kabug-at . . . , ngan dalaganon ta ha mapailubon an rumba nga ibinutang ha aton atubangan.” (Heb. 12:1) Karuyag sidngon niya nga sadang naton likyan an diri kinahanglanon ngan nakakapabug-at nga mga buruhaton nga magigin hinungdan han aton kakapoy. Bangin ginpipirit han iba nga dugangan pa an ira mga buruhaton bisan kon damu na ito hinduro. Salit kon agsob ka umabat hin kakapoy ngan tensyon, makakabulig an pag-usisa kon ano kadaku nga panahon an imo ginagamit ha trabaho, kon ano kaagsob ka magbakasyon, ngan kon ano ka kapursigido ha isport o iba pa nga kaliawan. An pagin makatadunganon sadang magpagios ha aton ngatanan nga karawaton an aton mga limitasyon ngan ibanan an diri kinahanglanon nga mga buruhaton.
17. Ano an posible nga hinungdan nga nanluluya an iba, kondi ano an iginpapasarig ni Jehova mahitungod hini?
17 An iba ha aton bangin nanluluya liwat tungod kay an kataposan hini nga sistema waray umabot ha panahon nga aton ginlalaoman. (Prob. 13:12) Kondi bisan hin-o nga naabat hini madadasig han ginsiring ha Habakuk 2:3: “An bisyon para pa ha panahon nga itinanda, ngan ini magdadagmit tipakadto ha kataposan, ngan diri magbubuwa: bisan kon ini malangan, paghulat hini; tungod kay ini ha waray ruhaduha maabot, ini diri maglalangan.” Ginpapasarig kita ni Jehova nga an kataposan hini nga sistema maabot ha itinanda nga panahon!
18. (a) Ano nga mga saad an nagpapakusog ha imo? (b) Ano an aton hibabaroan ha sunod nga artikulo?
18 An ngatanan nga magtinumanon nga alagad ni Jehova sigurado nga nagpipinamulat han adlaw nga mawawaray na an kakapoy ngan panluya ngan an ngatanan nga buhi magigin makusog pariho hin batan-on. (Job 33:25) Bisan yana mahimo magin makusog an ‘aton pagkatawo ha sulod’ pinaagi han bulig han baraan nga espiritu samtang nakikigbahin kita ha espirituwal nga mga buruhaton nga nagpapakusog ha aton. (2 Kor. 4:16; Efe. 3:16) Ayaw tuguti nga an kakapoy makaulang ha imo pagkarawat hin waray kataposan nga mga bendisyon. An ngatanan nga pagsari—tungod man ito han pagsulay, kakapoy, o panluya—matatapos, kon diri man yana, ha bag-o nga kalibotan han Dios. Ha sunod nga artikulo, aton hihisgotan kon paonan-o an baraan nga espiritu nabulig ha mga Kristiano nga magkaada gahum nga malamposan an pagtimaraot, maatohan an pagsulay han mga kaupod, ngan mailob an iba pa nga problema.
Ano an Imo Baton?
• Paonan-o an pagbasa han Biblia naghahatag ha aton hin gahum?
• Paonan-o an pag-ampo ngan pamalandong naghahatag ha aton hin gahum?
• Ano an imo mahihimo basi mawara an posible nga magin hinungdan han panluya?
[Retrato ha pahina 24]
An Kristiano nga mga katirok magpapakusog ha aton ha espirituwal