Gintagan hin Gahum Basi Malamposan an Bisan Ano nga Pagsari
“Ngatanan mahihimo ko ha gahum han Nagpaparig-on ha akon.”—FIL. 4:13.
1. Kay ano nga an katawohan ni Jehova nakakaeksperyensya hin damu nga problema?
AN KATAWOHAN ni Jehova agsob makaeksperyensya hin iba-iba nga problema. May mga pagsari nga resulta han aton pagkadiri-hingpit o tungod kay aanhi kita hinin maraot nga sistema. An iba liwat resulta han away butnga han mga nag-aalagad ha Dios ngan han diri. (Gen. 3:15) Temprano pa ha kasaysayan, ginbubuligan na han Dios an iya magtinumanon nga alagad nga malamposan an pagtimaraot, maatohan an pagsulay han mga kaupod, ngan mailob an iba pa nga problema. Pinaagi han iya baraan nga espiritu mabubuligan liwat kita niya nga buhaton ito.
Ginbubuligan Kita nga Mailob an Pagtimaraot
2. Ano an katuyoan han pagtimaraot, ngan ano an iba-iba nga klase hito?
2 An pagtimaraot amo an tinuyo nga panarhog o pag-atake ha mga tawo tungod han ira relihiyon o gintotoohan. Katuyoan hito nga mawara an usa nga relihiyon pinaagi ha pagpugong han pagpasamwak han mga gintotoohan hito o pagbungkag han integridad han mga natoo hito. Iba-iba an klase han pagtimaraot, may direkta ngan may tuso. Ha Biblia an mga pag-atake ni Satanas iginpariho ha pag-atake han leon ngan kobra.—Basaha an Salmo 91:13.
3. Ano an sugad-leon nga pagtimaraot, ngan ano an sugad-kobra nga pagtimaraot?
3 Pariho ha mabangis nga leon, hi Satanas agsob nga direkta nga naatake pinaagi han kamadarahog, pagpriso, o pagdiri ha aton buruhaton. (Sal. 94:20) Damu han sugad hito nga mga pag-atake ha aton kabugtoan yana an iginsasaysay ha aton Yearbook. Ha damu nga lugar, an katawohan han Dios ginmamaltrato han magsamok nga grupo, nga an iba ginpapangunahan hin mga klero o mga panatiko ha politika. Tungod hinin sugad-leon nga mga pag-atake, an iba inundang pag-alagad kan Jehova. Pariho hin kobra, an Yawa tuso liwat nga naatake basi hugawan an hunahuna han mga tawo ngan limbongan hira nga buhaton an iya karuyag. Katuyoan hito nga paluyahon kita o aghaton nga magkompromiso. Kondi pinaagi han baraan nga espiritu han Dios, malalamposan naton iton duha nga klase han pagtimaraot.
4, 5. Ano an gimaopayi nga paagi ha pangandam ha pagtimaraot, ngan kay ano? Paghatag hin ehemplo.
4 An paghinunahuna han iba-iba nga kahimtang han pagtimaraot nga posible mahitabo ha tidaraon diri amo an gimaopayi nga paagi ha pangandam. Ha pagkamatuod, diri kita maaram kon ano nga pagsari an maabot, salit waray pulos an pagkinabaraka ha mga butang nga bangin diri man mahitabo. Kondi, may-ada kita puydi buhaton. Kadam-an han nakailob han pagtimaraot an naglampos tungod kay ira ginpamalandong an susbaranan han magtinumanon nga alagad ni Jehova nga mababasa ha Kasuratan, pati na an mga katutdoan ngan susbaranan ni Jesus. Nagpahilarom ini han ira gugma kan Jehova. Ngan ito nga gugma an nakabulig ha ira nga malamposan an bisan ano nga pagsari.
5 Tagda an ehemplo han duha nga bugto nga babaye ha Malawi. Basi piriton hira nga pumalit hin kard han mga partido ha politika, ginkastigo hira, ginhuboan, ngan gintarhog nga luluguson han usa nga madarahog nga grupo. Ginbuwaan hira nga bisan an mga Bethelite pinalit na hin kard. Ano an ira baton? “Hi Jehova nga Dios gud la an amon ginsisingba. Salit bisan kon an kabugtoan ha Bethel pinalit na hin kard, diri ito makakapabag-o han amon desisyon. Diri kami magkukompromiso bisan pa kami niyo patayon!” Katapos ipahayag ito nga ira marig-on nga desisyon, ginpauli hira.
6, 7. Paonan-o hi Jehova naghahatag hin gahum ha iya mga alagad basi malamposan an pagtimaraot?
6 Gin-unabi ni apostol Pablo nga ginkarawat han mga Kristiano ha Tesalonika an kamatuoran nga may “daku nga kagol-anan” kondi ‘may kalipay ha espiritu.’ (1 Tes. 1:6) Ha pagkamatuod, damu nga Kristiano hadto ngan yana nga nakaeksperyensya ngan naglampos ha pagtimaraot an nakasiring nga ha pinakamakuri nga panahon han mga pagsari ha ira, inabat nira an kamurayawan ha hunahuna, usa nga bahin han bunga han baraan nga espiritu han Dios. (Gal. 5:22) Ngan ito nga kamurayawan an nagbantay han ira kasingkasing ngan hunahuna. Oo, ginagamit ni Jehova an iya aktibo nga pwersa ha paghatag hin gahum ha iya mga alagad basi malamposan an bisan ano nga pagsari ngan gumios hin maaramon ha panahon han kakurian.a
7 An mga tawo nga nag-oobserbar ha katawohan han Dios nahipapausa han ira determinasyon nga magpabilin nga maunungon bisan kon nakakaeksperyensya hin mabangis nga pagtimaraot. Naghuhunahuna hira nga an mga Saksi baga hin may-ada labaw ha tawo nga kusog, ngan ha pagkamatuod, may-ada gud. Hi apostol Pedro nagpasarig ha aton: ‘Kon ginpapasiparahan kamo tungod ha ngaran ni Kristo, mga bulahan kamo; kay an espiritu han himaya ngan an espiritu han Dios aada ha iyo.’ (1 Ped. 4:14) An pagtimaraota ha aton tungod han marig-on nga pagsunod ha magtadong nga prinsipyo nagpapamatuod nga gin-uuyonan ngan ginbibendisyonan kita ni Jehova. (Mat. 5:10-12; Juan 15:20) Tungod hini malipayon gud kita!
Ginbubuligan Kita nga Maatohan an Pagsulay han mga Kaupod
8. (a) Ano an nakabulig kanda Josue ngan Kaleb nga diri magpaimpluwensya ha ira mga kaupod? (b) Ano an aton hibabaroan ha ira susbaranan?
8 Usa nga mas tuso nga paagi han pagkontra nga kinahanglan atohan han mga Kristiano amo an pagsulay han mga kaupod. Kondi tungod kay an espiritu ni Jehova mas gamhanan kay han espiritu han kalibotan, maaatohan naton an mga nagtatamay ha aton, nagpapasarang hin sayop nga mga sumat mahitungod ha aton, o nagpipirit ha aton nga sumunod ha ira. Pananglitan, ano an nakabulig kanda Josue ngan Kaleb nga diri magpaimpluwensya ha panhunahuna han napulo nga espiya nga ira kaupod nga ginsugo ngadto ha Kanaan? An baraan nga espiritu nagpagios ha ira nga magkaada iba nga “espiritu,” o panhunahuna.—Basaha an Numeros 13:30; 14:6-10, 24.
9. Kay ano nga an mga Kristiano kinahanglan magin determinado nga magin iba ha kadam-an?
9 An baraan nga espiritu naghatag liwat hin gahum ha mga apostol ni Jesus nga sundon an Dios imbes nga an mga gintatahod han damu sugad nga magturutdo han tinuod nga relihiyon. (Buh. 4:21, 31; 5:29, 32) Kadam-an an nagpapadára na la ha sulog, siring pa, basi malikyan an samok o away. Kondi, an tinuod nga mga Kristiano agsob nga kinahanglan magin marig-on ha kon ano an husto. Pero tungod han kusog nga iginhahatag han aktibo nga pwersa han Dios, diri hira nahahadlok nga magin iba ha kadam-an. (2 Tim. 1:7) Tagda an usa nga bahin nga kinahanglan diri kita magpaimpluwensya ha aton mga kaupod.
10. Ano an bangin magin problema han iba nga Kristiano?
10 May mga batan-on nga namumroblema kon ira hinbaroan nga an usa nira nga sangkay nagbubuhat hin supak ha Kasuratan. Bangin mabaraka hira nga madadaot an ira pagkasangkay kon isusumat nira ha mga tigurang an iya sala salit tungod han sayop nga pagkamaunungon, diri na la hira nagsusumat. Bangin piriton pa ngani han nakasala an iya kasangkayan nga diri gud magsumat. Syempre, diri la mga batan-on an nakakaeksperyensya hito. An iba nga adulto bangin makurian liwat pagsumat ha mga tigurang han sala han ira sangkay o kapamilya. Kondi ano an sadang buhaton han tinuod nga mga Kristiano may kalabotan hito?
11, 12. Ano an gimaopayi nga buhaton kon may kakongregasyon ka nga nag-aaghat ha imo nga diri isumat an iya sala, ngan kay ano?
11 Handurawa ini. Hinbaroan han batan-on nga hi Alex nga an iya kakongregasyon nga hi Steve nagkikinita hin pornograpiya. Ginsidngan niya hi Steve nga nababaraka gud hiya hito. Pero diri namamati hi Steve. Han gin-aghat hiya ni Alex nga magsumat ha mga tigurang, nagsiring hiya nga kon tinuod nga sangkay hi Alex, diri hiya magsusumat. Sadang ba mahadlok hi Alex nga mawad-an hin sangkay? Bangin maghunahuna hiya kon hin-o ha ira an tutuuron han mga tigurang kon magdiwara hi Steve. Bisan pa hito, waray kaopayan nga mahihimo kon diri magsusumat hi Alex. Ngani, mahimo ito magresulta ha kawara han relasyon ni Steve kan Jehova. Maopay gud hinumdoman ni Alex nga “an kahadlok ha tawo nagdadara hin usa nga bitik, kondi bisan hin-o nga magbutang han iya pagsarig dida kan Jehova, maluluwas.” (Prob. 29:25) Ano pa an maopay nga buhaton ni Alex? Mahimo niya kaistoryahon utro hi Steve ha mahigugmaon nga paagi ngan prangka nga hisgotan an iya problema. Nagkikinahanglan ito hin kaisog. Kondi, bangin hini nga panahon andam na hi Steve nga hisgotan an iya problema. Sadang aghaton utro ni Alex hi Steve nga magsumat ha mga tigurang ngan sidngan hiya nga kon diri niya bubuhaton ito ha sulod hin pipira ka panahon, magsusumat na hi Alex.—Leb. 5:1.
12 Kon ha imo ito mahitabo, ha siyahan bangin diri malipay an imo sangkay ha imo pangalimbasog nga buligan hiya. Kondi bangin umabot an panahon nga masantop niya nga an imo ginbubuhat para gud ha iya kaopayan. Kon mabuligan hiya ngan karawaton niya ito, bangin magpasalamat gud hiya ha imo kaisog ngan pagkamaunungon. Pero kon padayon nga masisina hiya ha imo, hiya gud ba an klase hin tawo nga karuyag mo magin sangkay? An pagpalipay kan Jehova, an aton gimaopayi nga Sangkay, amo pirme an husto. Kon gin-uuna naton hiya, irirespeto kita han mga nahigugma ha iya tungod han aton pagkamaunungon ngan magigin tinuod naton hira nga sangkay. Diri gud naton sadang tagan hin higayon an Yawa nga makasulod ha Kristiano nga kongregasyon. Kay kon bubuhaton naton ito, mapapasubo gud naton an baraan nga espiritu ni Jehova. Kondi nagpapagiya kita ha baraan nga espiritu kon nangangalimbasog kita nga tipigan an kaputli han Kristiano nga kongregasyon.—Efe. 4:27, 30.
Gintagan hin Gahum Basi Mailob an Bisan Ano nga Problema
13. Ano nga mga klase hin problema an naieksperyensyahan han katawohan ni Jehova, ngan kay ano nga nahitatabo ito?
13 Iba-iba nga klase an problema—kawaray kwarta, kawad-i hin trabaho, natural nga kalamidad, kamatyi hin hinigugma, sakit, ngan iba pa. Tungod kay nagkikinabuhi kita ha “magpakalilisang nga mga panahon,” sigurado nga kita ngatanan magkakaproblema. (2 Tim. 3:1) Kon mahitabo ito, diri kita sadang matarantar. An baraan nga espiritu makakahatag ha aton hin gahum basi mailob an bisan ano nga problema.
14. Ano an nakabulig kan Job nga mailob an iya mga problema?
14 Hi Job nag-antos hin sunod-sunod nga problema. Napobre hiya, namatyan hin mga anak, nawad-an hin kasangkayan, ngan an iya asawa nawad-an hin pagsarig kan Jehova. (Job 1:13-19; 2:7-9) Kondi ginliaw hiya ni Elihu. An mensahe ni Elihu, pati na an ginpabug-atan han mga ginsiring ni Jehova kan Job, amo ini: “Tindog ha mahadong, ngan hunahunaa an mga urusahon nga mga buhat han Dios.” (Job 37:14) Ano an nakabulig kan Job nga mailob an mga pagsari ha iya? Ngan ano an makakabulig ha aton nga mailob an mga pagsari ha aton? Makakabulig an paghinumdom ngan pamalandong han iba-iba nga paagi nga ginagamit ni Jehova an iya baraan nga espiritu ngan gahum. (Job 38:1-41; 42:1, 2) Bangin may mahinumdoman kita nga mga panahon ha aton kinabuhi nga napamatud-an naton nga interesado gud an Dios ha aton sugad nga indibiduwal. Interesado pa gihapon hiya ha aton.
15. Ano an nagparig-on kan apostol Pablo nga mailob an mga pagsari?
15 Hi apostol Pablo nag-antos hin damu nga kakurian diin nameligro an iya kinabuhi tungod han iya pagtoo. (2 Kor. 11:23-28) Paonan-o hiya nakapabilin nga timbang ngan kalmado bisan pa hito ngatanan? Pinaagi ha pag-ampo ngan pagsarig kan Jehova. Ha panahon han pagsari ha iya nga posible nga natapos han ginpatay hiya sugad nga martir, hiya nagsurat: “An Ginoo tinabang ha akon, ngan nagparig-on ha akon; basi nga tungod ha akon matuman hin hingpit gud an pagwali, ngan nga magpakabati an ngatanan nga mga Hentil: ngan ginluwas ako tikang ha baba han leon.” (2 Tim. 4:17) Salit ha eksperyensya mismo ni Pablo, ginpasarig niya an iya mga igkasi-tumuroo nga diri kinahanglan ‘mabaraka hin bisan ano nga bagay.’—Basaha an Filipos 4:6, 7, 13.
16, 17. Paghatag hin ehemplo kon paonan-o hi Jehova naghahatag hin gahum ha iya katawohan basi malamposan an mga problema yana.
16 Hi Roxana usa nga payunir nga nakaeksperyensya kon paonan-o hi Jehova nagtatagana ha iya katawohan. Han nagsarit hiya ha iya agaron nga magbakasyon hin pipira ka adlaw basi tumambong hin kombensyon, nasina an iya agaron ngan nagsiring nga kon tumambong hiya, mawawarayan hiya trabaho. Pero tinambong la gihapon hi Roxana ngan sinsero nga nag-ampo nga diri unta hiya mawad-an hin trabaho. Katapos mag-ampo, murayaw na an iya hunahuna. Pagka-Lunes, sugad han ginsiring han iya agaron, waray na hiya karawata ha trabaho. Nabaraka hiya. Bisan kon gutiay la an iya sweldo, kinahanglan niya ito nga trabaho basi masuportahan an iya pamilya. Nag-ampo hiya utro, ngan ginpamalandong niya nga an Dios nagtagana han iya espirituwal nga panginahanglan didto ha kombensyon, salit sigurado nga magtatagana liwat Hiya han iya pisikal nga panginahanglan. Samtang nagbabaktas tipauli, nakabasa hiya hin karatola nga nanginginahanglan hin eksperyensyado nga paragtahi, ngan nag-aplay hiya. Nasabtan han manidyer nga waray hiya eksperyensya pero ginkarawat la gihapon hiya, ngan an iya sweldo haros doble kay ha iya siyahan nga trabaho. Inabat ni Roxana nga ginbaton an iya pag-ampo. Kondi, an gidadakui nga bendisyon amo an pagkaada niya higayon nga masangyawan an pipira han iya katrabaho. Lima ha ira, pati na an manidyer, an kinarawat han kamatuoran ngan nabawtismohan.
17 May mga panahon nga baga hin diri ginbabaton an aton mga pag-ampo. Bangin diri ito batunon dayon katapos naton mag-ampo o diri ha paagi nga aton ginlalaoman. Kon amo, sigurado nga may-ada ito maopay nga hinungdan. Maaram hito hi Jehova, pero bangin magigin matin-aw la ito ha aton paglabay han panahon. Kondi makakasiguro kita nga diri ginpapabay-an han Dios an magtinumanon ha iya.—Heb. 6:10.
Ginbubuligan nga Malamposan an mga Pagsari ngan Pagsulay
18, 19. (a) Kay ano nga diri kita nahipapausa kon may mga pagsari ngan pagsulay ha aton? (b) Paonan-o mo malalamposan an mga pagsari?
18 An katawohan ni Jehova diri nahipapausa kon hira ginsusulay, nanluluya, gintitimaraot, ngan gin-aaghat nga magbuhat hin sayop. An kalibotan nangangalas ha aton. (Juan 15:17-19) Kondi, an baraan nga espiritu makakabulig ha aton nga malamposan an bisan ano nga problema nga bangin maeksperyensyahan naton ha aton pag-alagad ha Dios. Diri matugot hi Jehova nga sulayon kita labaw han aton maaakos. (1 Kor. 10:13) Diri gud kita niya babayaan o papabay-an. (Heb. 13:5) An pagsunod ha iya giniyahan nga Pulong nagpapanalipod ngan nagpaparig-on ha aton. Dugang pa, an espiritu han Dios makakapagios ha aton kabugtoan nga buligan kita ha panahon nga ginkikinahanglan gud naton ito.
19 Hinaot kita ngatanan padayon nga mangaro han baraan nga espiritu pinaagi ha pag-ampo ngan pag-aram han Kasuratan. Ngan padayon nga “manrig-on [kita] ha ngatanan nga gahum, sugad ha kagamhanan han [kanan Dios] himaya, ha ngatanan nga pag-ilob ngan pagkamainantuson upod ha kalipay.”—Kol. 1:11.
[Footnote]
a Para ha mga ehemplo, kitaa an Mayo 1, 2001 nga An Barantayan ha pahina 16; ngan an Pebrero 8, 1993 nga Awake! ha pahina 21 ngan 22.
Ano an Imo Baton?
• Paonan-o ka mangangandam basi malamposan an pagtimaraot?
• Ano an sadang mo buhaton kon gin-aaghat ka nga diri isumat an imo hinbaroan nga sala?
• Kon nakakaeksperyensya ka hin bisan ano nga problema, ha ano ka makakasiguro?
[Retrato ha pahina 28]
Ano an aton hibabaroan ha susbaranan nira Josue ngan Kaleb?
[Retrato ha pahina 29]
Paonan-o mo mabubuligan an imo sangkay nga nakasala?