An Ngaran nga Makikita ha Engadine Valley
ST. MORITZ. Pamilyar ba ito ha imo? Bangin, tungod kay usa ito nga parasyadahan nga kilala gud ha bug-os nga kalibotan. Aada ito ha Engadine Valley ha butnga han natatabonan hin niebe nga Alps nga kabukiran ha sur-este han Switzerland hirani ha giutan han Italy. Kondi an St. Moritz usa la han mga lugar nga maiha na nga gindadayo han mga tawo dida hiton maopay pagkit-on nga walog. Aada liwat hito an Swiss National Park, diin makikita an damu kalain nga mga hayop ngan tanom nga nagdadayaw ha aton Harangdon nga Maglalarang nga hi Jehova. (Sal. 148:7-10) Kondi usa nga tradisyon ha kabutngaan han ika-17 ka siglo an nagdadayaw liwat kan Jehova tubtob yana.
Ha damu nga balay hini nga lugar, may makikita ka nga bangin urusahon ha imo—an ngaran han Dios nga nakaukit ha prente han balay, bangin ha igbaw han purtahan. Ha naglabay nga mga siglo nagin tradisyon nira nga dekorasyonan an gawas han ira mga balay hin mga inskripsyon, usahay ginsusurat ha bungbong pinaagi hin pintura, o gin-uukit ha palitada o ha bato. Makikita mo dinhi an usa nga retrato hin balay ha baryo han Bever. Ini an hubad han inskripsyon: “Tuig han 1715. Hi Jehova an tinikangan, ngan hi Jehova an kataposan. An ngatanan mahihimo ha bulig han Dios, ngan waray mahihimo kon waray hiya.” Oo, duha ka beses nga mababasa dida hiton kadaan nga inskripsyon an ngaran han Dios.
May-ada mas kadaan pa nga inskripsyon ha baryo han Madulain. Ini an mababasa: “Salmo 127. Kon diri hi Jehova an magtukod han balay, waray pulos an pangalimbasog han mga nagtukod hito. Lucius Rumedius. Tuig han 1654.”
Kay ano nga hini nga lugar iginbutang nira an ngaran han Dios ha prente han ira mga balay? Ha panahon han Repormasyon, iginpublikar an Biblia ha Romansh, usa nga yinaknan nga iginbasar ha Latin nga amo an pinulongan ha Engadine. Ngani, ito an siyahan nga libro nga iginhubad hito nga yinaknan. Tungod kay an mga taga-Engadine napagios han ira nabasa ha Pulong han Dios, damu ha ira an nag-ukit ha gawas han ira balay, diri la han ira ngaran kondi pati na han mga teksto ha Biblia nga may ngaran han Dios.
Oo, tubtob yana ini nga mga inskripsyon nagpapasamwak han ngaran ni Jehova ngan nagdadayaw ha iya, mga siglo na tikang nga iginsurat ito ha mga balay. An mga bisita ngan residente hini nga lugar gin-aaghat nga magkaada dugang nga kahibaro mahitungod han harangdon nga Dios nga hi Jehova pinaagi ha pagbisita ha usa pa nga istraktura nga may-ada han iya ngaran—an Kingdom Hall han mga Saksi ni Jehova ha Bever.
[Ginkuhaan han mga Retrato ha pahina 7]
© Stähli Rolf A/age fotostock