The First of Kings
15 For the 18th year of King Jer·o·bo′am wey be the son of Ne′bat, A·bi′jam start to rule as king for Judah. 2 Na three years e rule for Jerusalem. Im mama name na Ma′a·cah wey be the granddaughter of A·bish′a·lom. 3 E continue to do all the bad things wey im papa do before im time, and e no use all im heart worship* Jehovah im God like David im papa-papa wey use all im heart. 4 But because of David, Jehovah im God give-am lamp for Jerusalem, as e make im son king after-am and make Jerusalem still dey. 5 Because David do wetin correct for Jehovah eyes, and e no stop to do anything wey E command-am for all the days of im life, apart from the matter about U·ri′ah wey be Hit′tite person. 6 And Re·ho·bo′am and Jer·o·bo′am fight war with each other all the days of im life.
7 As for the other story about A·bi′jam, everything wey e do, them no write-am for the book wey talk about the things wey happen for the time of Judah kings? A·bi′jam and Jer·o·bo′am fight war too. 8 Then A·bi′jam die like im papa-papa them, and them bury-am for the City of David, and im son A′sa start to rule as king after-am.
9 For the 20th year of King Jer·o·bo′am of Israel, A′sa start to rule Judah. 10 E rule for Jerusalem for 41 years. Im grandmama name na Ma′a·cah wey be the granddaughter of A·bish′a·lom. 11 A′sa do wetin correct for Jehovah eyes like David im papa-papa. 12 E pursue the men wey be temple prostitutes from the land, and e comot all the rubbish idols* wey im papa-papa them don make. 13 E even comot Ma′a·cah im grandmama from im position as mama wey be queen,* because Ma′a·cah make one rubbish idol wey them de use worship the idol pole.* A′sa scatter the rubbish idol and burn-am for the Lowland* of Kid′ron. 14 But the high place* them be still dey. Even with that one, A′sa use im whole heart serve Jehovah all im life.* 15 And e bring the things wey im and im papa don make holy come inside the house of Jehovah. E bring silver, gold, and different-different things.
16 Na everytime A′sa and Ba′a·sha the king of Israel de fight war with each other. 17 So Ba′a·sha wey be king of Israel come fight Judah, and e start to build Ra′mah again,* so that nobody go fit de comot or de enter go meet A′sa wey be king of Judah.* 18 So A′sa take all the silver and the gold wey remain for the place wey them de keep better-better things for Jehovah house, and the place wey them de keep better-better things for the king house,* and carry them give im servants. Then King A′sa send them go meet Ben-ha′dad the son of Tab·rim′mon the son of He′zi·on, wey be king of Syria, wey de stay for Damascus, and e tell-am say: 19 “One agreement be dey between me and you, and between my papa and your papa. I de send you silver and gold as gift. Come, make you break your agreement with Ba′a·sha wey be king of Israel, so that e go stop to attack me.” 20 Ben-ha′dad hear wetin King A′sa talk, and e send the people wey de control im army make them go fight the cities of Israel, and them kill people for I′jon, Dan, A′bel-beth-ma′a·cah, all Chin′ne·reth area, and the whole land of Naph′ta·li. 21 As Ba′a·sha just hear-am, quick-quick, e stop to build Ra′mah* and continue to stay for Tir′zah. 22 So King A′sa call everybody for Judah, e no leave anybody, and them carry the stones and timbers for Ra′mah wey Ba′a·sha be don de use build the place, and King A′sa use-am build Ge′ba wey dey Benjamin again, and still build Miz′pah again.*
23 As for all the other story about A′sa, how e get power reach, everything wey e do, and the cities wey e build,* them no write-am for the book wey talk about the things wey happen for the time of Judah kings? But when e don old, e get one disease for im leg. 24 Then A′sa die like im papa-papa them, and them bury-am with them for the City of David wey be im papa-papa, and Je·hosh′a·phat im son start to rule as king after-am.
25 Na′dab wey be the son of Jer·o·bo′am start to rule as king for Israel for the second year wey King A′sa don de rule Judah, and e rule Israel for two years. 26 E continue to do wetin bad for Jehovah eyes, and de do like im papa, and commit the same sin wey im papa don make Israel commit. 27 Ba′a·sha wey be A·hi′jah son, wey come from the tribe of Is′sa·char plan against-am, and Ba′a·sha kill-am for Gib′be·thon wey be Phi·lisʹti·a people city. That time, Na′dab and all Israel people surround Gib′be·thon. 28 So Ba′a·sha kill-am for the third year of King A′sa of Judah and e start to rule as king after-am. 29 And as e just start to rule, e kill everybody for Jer·o·bo′am family. E no allow anybody wey come from Jer·o·bo′am family to dey alive; e kill them just as Jehovah don use im servant A·hi′jah wey be Shi′loh person talk. 30 This one na because of the sins wey Jer·o·bo′am don commit, and wey e don make Israel people to commit, and because e don really make Jehovah the God of Israel vex no be small. 31 As for the other story about Na′dab, everything wey e do, them no write-am for the book wey talk about the things wey happen for the time of Israel kings? 32 Na everytime A′sa and Ba′a·sha wey be king of Israel de fight war with each other.
33 For the third year of King A′sa of Judah, Ba′a·sha wey be son of A·hi′jah start to rule as king for Tir′zah, and e rule all Israel people. E rule for 24 years. 34 But e continue to do wetin bad for Jehovah eyes, and e do like Jer·o·bo′am, and e commit the sin wey Jer·o·bo′am make Israel people to commit.