Numbers

15 Jehovah still talk to Moses say: 2 “Talk to Israel people and tell them say, ‘At last, when una come inside the land wey I de give una to stay for inside 3 and una use fire make offering to Jehovah from bull, or from sheep, or from goat—whether na offering wey them de burn, or na sacrifice for special promise wey una don make, or offering wey una give from una heart, or na offering wey una de make for the festivals wey una de do for different-different season, so that una go make better smell* go up to Jehovah— 4 the person wey de bring im offering must still give Jehovah grain offering of better flour, one tenth of one e′phah,* wey them mix with one fourth of one hin* of oil. 5 Make you bring wine as drink offering, one fourth of one hin, together with offering wey them de burn or the sacrifice of each small male sheep. 6 Or if na ram, you go make grain offering wey reach two tenth of one e′phah measure of better flour wey them mix with one third of one hin of oil. 7 And make you bring wine as drink offering, one third of one hin, as something wey get better smell* to Jehovah.

8 “‘But if you give bull as offering wey them de burn or sacrifice for special promise wey you make or peace sacrifice to Jehovah, 9 make you still bring the bull together with grain offering wey reach three tenth of one e′phah measure of better flour wey them mix with half hin of oil. 10 Make you still bring wine as drink offering, half hin, as offering wey them make with fire and something wey get better smell* to Jehovah. 11 This one na wetin una go do for each bull or for each ram, or for each of the small-small male sheep, or the goats. 12 Any number of animal wey una go give as offering, that one na wetin una go do for each of them, according to their number. 13 Na so every person wey them born as Israel person suppose give sacrifice wey them burn with fire, as something wey get better smell* to Jehovah.

14 “‘If stranger wey de live with una, or person wey don dey among una for many generations go still make offering wey them make with fire as something wey get better smell* to Jehovah, make e do just as una de do. 15 Una wey be Israel people* and the strangers wey de live with una go get one law. Na law wey go last for long time for all una generation. Make the stranger wey de live with una be the same like una for front of Jehovah. 16 Na the same law and the same decision go dey for una and for the stranger wey de live with una.’”

17 Jehovah continue to talk to Moses say: 18 “Talk to Israel people and tell them say, ‘When una come inside the land wey I de carry una enter, 19 and una chop any of the food* of the land, make una do contribution to Jehovah. 20 Make una give bread wey get ring shape wey una make from flour wey them no grind make e smooth, as contribution of the firstfruits. E go be like the contribution wey una de make from the place wey una de separate grain from plant. 21 Make una give some of una flour wey them no grind make e smooth as contribution of the firstfruits to Jehovah for all una generations.

22 “‘Now if una make mistake, and una no obey all this commandments wey Jehovah don tell Moses, 23 all the things wey Jehovah don command una through Moses, from the day wey Jehovah give the command go reach una generations for future, 24 and if una do-am by mistake and the people no know about-am, the whole nation must give one young bull as offering wey them de burn, to bring better smell* to Jehovah, together with im grain offering and im drink offering according to the normal way wey them de do-am, and one young goat as sin offering. 25 The priest go do this sacrifice for all Israel people to get forgiveness, and God go forgive them, because na mistake, and them bring offering wey them make with fire to Jehovah as their offering and their sin offering for front of Jehovah for their mistake. 26 God go forgive all Israel people and the stranger wey de live among them, because all the people do-am by mistake.

27 “‘If any person* sin by mistake, then e must bring female goat wey dey im first year for sin offering. 28 And the priest go do sacrifice for the person* wey make mistake when e do sin wey e no plan to do for front of Jehovah, so that the priest go do sacrifice for the sin make the person get forgiveness, and God go forgive-am. 29 As for the person wey them born as Israel person among una and the stranger wey de live among una, make one law dey for una for the matter about the thing wey person do wey e no plan to do.

30 “‘But the person* wey open eye do something, whether na person wey them born as Israel person or na stranger wey de live for the land, e don talk bad about Jehovah and una must kill* the person comot from among im people. 31 Because e no respect Jehovah word and e no obey im commandment, make una no fail to kill* that person.* Im own sin dey ontop im head.’”

32 When Israel people dey wilderness, them see one man de gather wood for Sabbath day. 33 The people wey see the man de gather wood bring-am come meet Moses and Aaron and all the people. 34 Them arrest the man because them never talk wetin them suppose do to the man.

35 And Jehovah tell Moses say: “Make una no fail to kill the man, and all the people go stone-am for outside the camp.” 36 So all the people bring-am come outside the camp and stone-am till e die, just as Jehovah don command Moses.

37 Jehovah continue to talk to Moses say: 38 “Talk to Israel people and tell them say them must make the down part of their cloth with pieces of thread for all their generation, and make them put blue rope ontop the pieces for the down part of the skirt. 39 ‘Una must get this thread for the down part of una cloth so that una go see-am and remember all the commandments from Jehovah and obey them. Make una no ever follow una own heart and eyes, wey de make una no dey faithful.* 40 This one go help una remember, and una go obey all my commandments and dey holy to una God. 41 I be Jehovah una God, wey carry una comot from the land of Egypt so that I go show say I be una God. I be Jehovah una God.’”