Leviticus

14 Jehovah continue to talk to Moses say: 2 “This one na the law about person wey get leprosy wey una go follow for the day wey them want clean the person, when them bring-am come meet the priest. 3 The priest go go outside the camp and check the person. If the person don heal from the leprosy, 4 the priest go command the person to bring two clean birds wey dey alive, cedarwood, red material, and hyssop plant, wey them go use to make the person dey clean. 5 The priest go command say make them kill one of the birds inside clay container wey get water wey them just fetch from river wey de flow. 6 But make e take the bird wey dey alive together with the cedarwood, the red material, and the hyssop plant, and dip them together for inside the blood of the bird wey them don kill ontop the water wey them just fetch from river wey de flow. 7 Then e go splash-am seven times ontop the person wey de clean imself from leprosy and e go talk for public say the person dey clean, and e go free the bird wey dey alive for open area.

8 “The person wey de make imself dey clean must wash im cloths and shave all im hair comot and bath for inside water, and e go dey clean. Then after, e fit come inside the camp but e go stay outside im tent for seven days. 9 For the seventh day, e go shave all im hair for im head and im chin* and im eyebrow. After e don shave all im hair comot, e go wash im cloths and bath imself for inside water, and e go dey clean.

10 “For the eighth day, e go take two young rams wey dey well for body, one small female sheep wey dey well for body and wey dey im first year, three tenths of one e′phah* of better flour* wey them mix with oil as grain offering, and one log measure* of oil; 11 and the priest wey talk for public say the man dey clean go bring the man wey de make imself clean, together with the offerings, for front of Jehovah for the domot of the tent of meeting. 12 The priest go take one of the young ram and give the ram as offering for the bad thing wey person do together with the log measure of oil, and e go wave them go back and front as offering wey them de wave for front of Jehovah. 13 Then e go kill the young ram for the place wey them de always kill the sin offering and the offering wey them de burn, for holy place, because just like the sin offering, na the priest get the offering for the bad thing wey person do. Na something wey really dey holy.

14 “Then the priest go take some of the blood of the offering for the bad thing wey person do, and the priest go put-am for the down part of the right ear of the person wey de make imself clean, and for the thumb of im right hand and for the big toe of im right leg. 15 And the priest go take some of the log measure of oil and pour-am for inside the left palm of im own hand. 16 Then the priest go dip im right finger inside the oil wey dey inside im left palm and splash some of the oil with im finger seven times for front of Jehovah. 17 Then the priest go put some of the oil wey remain for inside im palm for the down part of the right ear of the person wey de make imself clean and for the thumb of im right hand and for the big toe of im right leg, ontop the blood of the offering for the bad thing wey person do. 18 The priest go put the oil wey remain wey dey im palm ontop the head of the person wey de make imself clean, and the priest go do sacrifice for the person for front of Jehovah so that e go get forgiveness.

19 “The priest go sacrifice the sin offering and do sacrifice for the person wey de make imself clean from im sin so that e go get forgiveness, and after, e go kill the animal for the offering wey them de burn. 20 And the priest go sacrifice the offering wey them de burn and the grain offering ontop the altar, and the priest go do sacrifice for the person so that e go get forgiveness, and then e go dey clean.

21 “But if the person dey poor and e no get enough to get this things, then e go take one young ram as offering for the bad thing wey e do for offering wey them de wave, so that e go fit do sacrifice for imself to get forgiveness, together with one tenth of one e′phah* of better flour* wey them mix with oil as grain offering, one log measure of oil, 22 and two turtledoves or two young pigeons, according to wetin e get. One go be for sin offering, and the other one go be for offering wey them de burn. 23 For the eighth day, e go bring this things wey them go use to make-am dey clean and give the priest for the domot of the tent of meeting for front of Jehovah.

24 “The priest go take the young ram of the offering for the bad thing wey person do and the log measure of oil, and the priest go wave them go back and front as offering wey them de wave for front of Jehovah. 25 Then e go kill the young ram of the offering for the bad thing wey person do, and the priest go take some of the blood of the offering for the bad thing wey person do and put-am for the down part of the right ear of the person wey de make imself clean and for the thumb of im right hand and for the big toe of im right leg. 26 The priest go pour some of the oil inside the left palm of im own hand, 27 then e go use im right finger splash some of the oil wey dey inside im left palm seven times for front of Jehovah. 28 And the priest go put some of the oil wey dey inside im palm for the down part of the right ear of the person wey de make imself clean and for the thumb of im right hand and for the big toe of im right leg ontop the same place them wey e put the blood of the offering for the bad thing wey person do. 29 Then the priest go put the oil wey remain, wey dey inside im palm ontop the head of the person wey de make imself clean, so that e go fit do sacrifice for-am for front of Jehovah to get forgiveness.

30 “E go sacrifice one of the turtledoves or one of the young pigeons, according to wetin e get, 31 the one wey e fit bring, as sin offering and the other one as offering wey them de burn, together with the grain offering; and the priest go do sacrifice for the person wey de make imself clean for front of Jehovah so that e go get forgiveness.

32 “This one na the law about the person wey get leprosy disease before, but wey no get the normal offerings wey e suppose bring when them de make-am clean.”

33 Then Jehovah tell Moses and Aaron say: 34 “When una enter inside the land of Ca′naan, wey I de give una as una property and I allow leprosy disease to affect house for una land, 35 then make the person wey get the house come tell the priest say, ‘One kind disease don dey my house.’ 36 The priest go give command say make them pack everything comot from the house before e come check the disease, so that e no go talk for public say everything wey dey inside the house no dey clean, and after that one, the priest go come inside to check the house. 37 E go check the area wey the thing affect, and if the wall of the house get yellow and green, or red marks wey deep go inside and the mark be like wetin deep pass the plaster for the wall, 38 then the priest go go outside the house to the domot of the house and e no go allow anybody enter the house for seven days.

39 “Then the priest go come back for the seventh day and check-am. If the disease don spread for the walls of the house, 40 then the priest go give command and them must remove the stones wey the disease affect and troway them for outside the city for place wey no clean. 41 Then the priest go talk say make them scrape inside the house well and them go go troway the plaster and the cement wey them remove from the house for outside the city, for place wey no clean. 42 Then, them go put other stones for the place wey them remove the stones from, and e go use another cement and talk say make them plaster the house.

43 “But, if the disease come back and affect the house after them don remove the stones and them don scrape and plaster the house again, 44 then the priest go go inside and check-am. If the disease don spread for the house, na strong leprosy dey the house. The house no clean. 45 Then e go talk say make them destroy the house reach ground—the stones, the timbers, and all the plaster and cement of the house—and make them carry-am go outside the city, go place wey no clean. 46 But anybody wey enter inside the house for any of the days wey them talk say make nobody enter, the person no go dey clean till evening. 47 And anybody wey lie down for inside the house go wash im cloths, and anybody wey chop for inside the house go wash im cloths.

48 “But if the priest come and see say the disease no spread for the house after them don plaster the house again, then the priest go talk for public say the house clean, because the disease don comot. 49 To make the house dey clean from wetin no clean,* make e take two birds, cedarwood, red material, and hyssop plant. 50 Make e kill one of the birds for inside clay container wey get water wey them just fetch from river wey de flow. 51 Then e go take the cedarwood, the hyssop plant, the red material, and the bird wey dey alive, and dip them for inside the blood of the bird wey them don kill, and for inside the water wey them just fetch from river wey de flow, and e must splash-am for the house seven times. 52 And e go use the blood of the bird, the water wey them fetch from river wey de flow, the bird wey dey alive, the cedarwood, the hyssop plant, and the red material, to make the house dey clean from wetin no clean.* 53 Then e go free the bird wey dey alive for outside the city for open area and e go do sacrifice to make the house dey clean, and the house go dey clean.

54 “This one na the law about any matter wey concern leprosy, disease wey affect the skin of the head or beard-beard, 55 leprosy for cloth or for house, 56 and about body wey swell up, dry-dry marks for body, and marks wey get different color from the skin, 57 so that the priest fit know when something no clean and when something clean. This one na the law about leprosy.”