Exodus
15 That time, Moses and Israel people sing this song to Jehovah say:
“Make I sing to Jehovah, because e don get great honor.
E don throw the horse and the person wey sitdown ontop-am inside sea.
2 Na Jah* de give me power and de make me strong, because e don be person wey de save me.
This one na my God, I go praise-am; the God of my papa-papa them, and I go honor-am.
3 Jehovah na powerful person wey de fight war. Jehovah na im name.
4 E don throw Phar′aoh chariots and im army inside sea,
And im best soldiers don sink inside the Red Sea.
5 The strong waves of the water cover them, them sink deep inside water like stone.
6 O Jehovah, your right hand really get power no be small.
O Jehovah, your right hand fit break enemy to pieces.
7 With your great power, you fit make people wey stand against you fall;
Your vex be like fire, e de burn them like grass.
8 The air wey you de breathe for your nose make water join together;
The water stand like wall, e no move;
The water wey get strong waves block for middle of sea.
9 The enemy talk say: ‘I go pursue them! I go catch them!
I go share the property wey I collect until I* don belleful!
I go bring my sword come out! My hand go destroy them!’
10 You blow air and the sea cover them;
Them sink like heavy iron* inside big sea.
11 Who among the gods dey like you, O Jehovah?
Who dey like you, you wey de show say na you dey holy pass?
The Person wey them suppose fear, and praise-am with songs, the Person wey de do wonderful things.
12 You stretch your right hand, and the earth swallow them.
13 Your love wey no de fail don make you lead the people wey you don save;
You go use your power guide them to your holy place where you dey.
14 People must hear; them go fear;
People wey de stay for Phi·lis′ti·a go feel great pain.*
All the people for Ca′naan go lose hope.
16 Them go fear and shake.
Because of the power of your hand, them no go fit move just like stone
Until your people don pass, O Jehovah,
Until the people wey you make don pass.
17 You go bring them and plant them for the mountain wey be your own,
The place wey you don fix and prepare for yourself to stay, O Jehovah,
The holy place, O Jehovah, wey your hands don make.
18 Jehovah go rule as king forever and ever.
19 When Phar′aoh horses and im war chariots and im horsemen enter inside the sea,
Jehovah bring back the water of the sea ontop them,
But Israel people waka ontop dry ground pass middle of the sea.”
20 Then Mir′i·am wey be woman prophet and Aaron sister, take tambourine for im hand, and all the women de dance follow-am with tambourines. 21 As the men sing, Mir′i·am sing back say:
“Sing to Jehovah, because e don get great honor.
E don throw the horse and the person wey sitdown ontop-am inside sea.”
22 After, Moses lead Israel people comot from the Red Sea, and them go the wilderness of Shur and them continue to waka for three days for the wilderness, but them no see water. 23 Them come reach Ma′rah,* but them no fit drink the water from Ma′rah because e bitter. Na because of this one the name of the place come be Ma′rah. 24 So the people start to complain against Moses say: “Wetin we go drink?” 25 Moses beg Jehovah for help, and Jehovah show-am one tree. When Moses throw the tree inside the water, the water come sweet.
For there, God give them one law and show them how E go de judge them, and E test them. 26 E talk say: “If you go really listen to the things wey Jehovah your God de talk, and you do wetin correct for im eyes, and you do the things wey e command, and obey all im laws, I no go punish you with any of the sickness wey I use punish Egypt people, because na me Jehovah de heal you.”
27 After, them come reach E′lim, where them see 12 places for ground wey water de come out from and 70 palm trees. So them stay there near the water.