Numbers
13 Jehovah come talk to Moses say: 2 “Send men to go check* the land of Ca′naan, wey I de give Israel people. You go send one man from each tribe of im papa-papa them, each man go be chief among them.”
3 So Moses send them comot from the wilderness of Pa′ran as Jehovah command. All the men na heads of Israel people. 4 This na their name: from the tribe of Reu′ben, Sham·mu′a the son of Zac′cur; 5 from the tribe of Sim′e·on, Sha′phat the son of Ho′ri; 6 from the tribe of Judah, Ca′leb the son of Je·phun′neh; 7 from the tribe of Is′sa·char, I′gal the son of Joseph; 8 from the tribe of E′phra·im, Ho·she′a the son of Nun; 9 from the tribe of Benjamin, Pal′ti the son of Ra′phu; 10 from the tribe of Zeb′u·lun, Gad′di·el the son of So′di; 11 from the tribe of Joseph for the tribe of Ma·nas′seh, Gad′di the son of Su′si; 12 from the tribe of Dan, Am′mi·el the son of Ge·mal′li; 13 from the tribe of Ash′er, Se′thur the son of Mi′cha·el; 14 from the tribe of Naph′ta·li, Nah′bi the son of Voph′si; 15 from the tribe of Gad, Geu′el the son of Ma′chi. 16 This na the names of the men wey Moses send to go check the land. And the name wey Moses give Ho·she′a the son of Nun na Joshua.*
17 When Moses de send them to go check the land of Ca′naan, e tell them say: “Go up from there to Neg′eb, and then go up to the area wey mountains dey. 18 Una must check to see the kind land wey e be, whether the people wey de stay for there strong or weak, whether them no plenty or them plenty, 19 and whether the land dey good or e bad and whether the cities wey them de stay na tent or na place wey them fence round. 20 And check whether the land dey rich* or poor* and whether trees dey there or e no dey. Una must get strong heart and take some of the fruit of the land.” That time na the season of the first ripe grapes.
21 So them go up and check the land from the wilderness of Zin to Re′hob, and to Le′bo-ha′math.* 22 When them go up to Neg′eb, them come reach Heb′ron, where A·hi′man, She′shai, and Tal′mai wey be An′a·kim people, de live. E come happen say, them don build Heb′ron seven years before them build Zo′an for Egypt. 23 When them come reach the Lowland* of Esh′col, for there, them cut one branch of grape tree wey get bunch of grapes wey two of the men carry ontop long stick, together with some of the pomegranates* and figs. 24 Them call the name of the place the Lowland* of Esh′col* because of the bunch of grapes wey Israel people cut from there.
25 For the end of 40 days, them come back from where them go check the land. 26 So them come back to meet Moses and Aaron and all the Israel people wey gather for the wilderness of Pa′ran, for Ka′desh. Them bring back report for all Israel people and show them the fruit from the land. 27 Na the report wey them bring to Moses be this: “We enter the land wey you send us go check, and true-true, na land wey milk and honey de flow for inside, and this na the fruit from the land. 28 But, the people wey de live for the land dey strong, and their cities get protection wey really strong. We still see An′a·kim people for there. 29 A·malʹek people de live for the land of Neg′eb, and Hitʹtite people, Jeʹbu·s people, and Am′or·ite people de live for the area wey mountain dey, and Ca′naan people de live near the sea and near River Jordan.”
30 Then Ca′leb try to calm the people down as them stand for front of Moses, and e talk say: “Make we go up quick-quick, and we dey sure say we go collect-am as our own because we go surely win-am.” 31 But the men wey go up with-am talk say: “We no go fit go up fight against the people because them strong pass us.” 32 And them continue to give Israel people bad report about the land wey them go check. Them talk say: “The land wey we enter go check na the land wey de chop the people wey dey inside-am, and all the people wey we see inside-am na men wey overbig for size. 33 And for there we see the people wey them de call Neph′i·lim, the sons of A′nak, wey come from* Neph′i·lim, and when we compare ourself with them, we be like grasshoppers, for our eye and for their eye.”