The Second Book of Chronicles
21 Then Je·hosh′a·phat die like im papa-papa them, and them bury-am with im papa-papa them for the City of David; and im son Je·ho′ram start to rule as king after-am. 2 Im brothers, Je·hosh′a·phat sons, na Az·a·ri′ah, Je·hi′el, Zech·a·ri′ah, Az·a·ri′ah, Mi′cha·el, and Sheph·a·ti′ah; all this people na the sons of King Je·hosh′a·phat of Israel. 3 And their papa give them plenty gifts, silver, gold, and things wey get value, with cities wey get strong protection for Judah, but e give the kingdom to Je·ho′ram, because e be firstborn.
4 When Je·ho′ram don start to control the kingdom of im papa, e make im position strong as e use sword kill all im brothers, and e still kill some leaders for Israel. 5 Je·ho′ram dey 32 years when e start to rule as king and e rule for eight years for Jerusalem. 6 E do the things wey the kings for Israel do, just as people for the family* of A′hab do, because e marry A′hab daughter, and e continue to do wetin bad for Jehovah eyes. 7 But Jehovah no want destroy the house of David because of the agreement wey e make with David, since e be don promise say e go always give David and im sons lamp.
8 For im time, E′dom people turn against Judah, them come get their own king. 9 So Je·ho′ram and im commanders cross with all im chariots and E′dom people be surround-am with the chariot commanders for there, but Je·ho′ram stand up for night to fight them, and e win them. 10 But E′dom continue to dey against Judah till today. Lib′nah still turn against-am that time, because e don abandon Jehovah the God of im papa-papa them. 11 And e still make high place* them for the mountains of Judah, to make people wey de live for Jerusalem no dey faithful, and e make Judah comot from the correct road.
12 At last, E·li′jah wey be prophet write one message to-am say: “This na wetin Jehovah the God of David your papa-papa talk, ‘You no do things the way Je·hosh′a·phat your papa do or the way King A′sa of Judah do. 13 But you do the things wey the kings of Israel do, and you make Judah people and the people wey de live for Jerusalem no dey faithful, just like them no dey faithful for the house of A′hab, and you even kill your own brothers wey be family of your papa, wey better pass you. 14 So, Jehovah go destroy your people, your sons, your wives, and all the things wey you get. 15 And you go suffer because of plenty sickness, and you go still get disease for your intestines, sotey your intestines go come out because of the disease, everyday.’”
16 Then Jehovah make Phi·lisʹti·a people and Arab people wey dey near E·thi·oʹpi·a people to turn against Je·ho′ram. 17 So them enter Judah by force and them carry all the property wey them see for the king house* and them still carry im sons and im wives; and the only son wey remain for-am na the last son wey im name na Je·ho′a·haz.* 18 After all this one, Jehovah make-am get one disease wey no get cure for im intestine. 19 After some time, when two complete years don pass, im intestines come out because of the disease, and e die as e de suffer well-well because of the disease, and im people no burn things wey get better scent to honor-am as them do for im papa-papa them. 20 E dey 32 years when e start to rule as king and e rule for Jerusalem for eight years. E no pain anybody say e die. So them bury-am for the City of David, but no be for the place wey them de bury the kings.