Leviticus

4 Jehovah continue to talk to Moses say: 2 “Tell Israel people say, ‘If person* sin by mistake as e do any of the things wey Jehovah command say make una no do:

3 “‘If priest wey them anoint sin and bring the sin ontop the people, then e must give young bull wey dey well for body to Jehovah as sin offering for the sin wey e do. 4 E go bring the bull come the domot of the tent of meeting for front of Jehovah and put im hand ontop the bull head, and e go kill the bull for front of Jehovah. 5 Then the priest wey them anoint go take some of the blood of the bull and bring-am inside the tent of meeting; 6 and the priest go dip im finger inside the blood and splash some of the blood seven times for front of Jehovah, for front of the curtain of the holy place. 7 The priest go still put some of the blood ontop the horns wey dey the altar of perfume incense, wey dey front of Jehovah for inside the tent of meeting; and e go pour all the rest of the bull blood for the down part of the altar of offering wey them de burn, wey dey for the domot of the tent of meeting.

8 “‘Then e go remove all the fat for the bull of the sin offering, and the fat wey cover the intestines and the fat wey surround the intestines, 9 and the two kidneys with the fat wey dey ontop them wey near the waist. And e go remove the fat wey dey ontop the liver together with the kidneys. 10 E go be the same like the one wey them remove from bull wey them use for the peace sacrifice. And the priest go burn them to make smoke comot from ontop the altar of offering wey them de burn.

11 “‘But as for the skin of the bull and all im flesh together with im head, im legs,* im intestines, and im shit— 12 all the rest of the bull—e go carry-am go outside the camp to place wey clean, where them de troway the ashes,* and e go burn-am ontop wood for fire. E go burn-am for where them de troway the ashes.

13 “‘Now if all Israel people don sin by mistake wey make their hand no clean, but the people* no know say them don do something wey Jehovah command them make them no do, 14 and then people come know about the sin, them* must give young bull as sin offering and bring-am come front of the tent of meeting. 15 The elders among the people go put their hands ontop the bull head for front of Jehovah, and them go kill the bull for front of Jehovah.

16 “‘Then the priest wey them anoint go bring some of the blood of the bull inside the tent of meeting. 17 The priest go dip im finger inside the blood and splash some of-am seven times for front of Jehovah for front of the curtain. 18 Then e go put some of the blood ontop the horns of the altar wey dey front of Jehovah, wey dey inside the tent of meeting; and e go pour all the rest of the blood for the down part of the altar of offering wey them de burn, wey dey for the domot of the tent of meeting. 19 E go remove all im fat and burn-am to make smoke comot from ontop the altar. 20 The thing wey e go do to the bull na just the same thing wey e do to the other bull of the sin offering. Na so e go do-am and the priest go make the people clean from their sins, and God go forgive them. 21 E go carry the bull go outside the camp and burn-am, just as e burn the first bull. This one na sin offering for the people.*

22 “‘When chief sin by mistake as e do one of all the things wey Jehovah im God command say make una no do and im hand no come clean again, 23 or if e come know about the sin wey e commit as e no obey the commandment, then e must bring one young man goat wey dey well for body as im offering. 24 E go put im hand ontop the head of the young goat and kill-am for the place where them de kill the animal of the offering wey them de burn, for front of Jehovah. This one na sin offering. 25 The priest go take some of the blood of the sin offering with im finger and put-am ontop the horns wey dey the altar of offering wey them de burn, and e go pour the rest of im blood for the down part of the altar of offering wey them de burn. 26 E go burn all im fat to make smoke comot from ontop the altar, like the fat of the peace sacrifice; and the priest go make-am clean from im sin, and God go forgive-am.

27 “‘If anybody* among the people of the land sin by mistake and im hand no come dey clean again as e do one of the things wey Jehovah command say make them no do, 28 or if e come know about sin wey e don do, then e go bring one young female goat wey dey well for body as im offering for the sin wey e don do. 29 E go put im hand ontop the head of the sin offering and kill the animal of the sin offering for the same place where them de kill the animal wey them de use for offering wey them de burn. 30 The priest go take some of the blood with im finger and put-am ontop the horns wey dey the altar of offering wey them de burn, and e go pour all the rest of the blood for the down part of the altar. 31 E go remove all im fat, just as them de remove the fat from the peace sacrifice, and the priest go burn-am to make smoke comot from ontop the altar as something wey get better smell* to Jehovah; and the priest go make-am dey clean from im sins, and God go forgive-am.

32 “‘But if e give small sheep as im sin offering, make e bring one small female sheep wey dey well for body. 33 E go put im hand ontop the head of the sin offering, and kill-am as sin offering for the place where them de kill the animal of the offering wey them de burn. 34 The priest go take some of the blood of the sin offering with im finger and put-am ontop the horns wey dey the altar of offering wey them de burn, and e go pour all the rest of im blood for the down part of the altar. 35 E go remove all im fat the same way wey them de remove the fat for the young ram of the peace sacrifice, and the priest go burn them to make smoke comot from the altar ontop Jehovah offerings wey them de make with fire; and the priest go make-am dey clean from the sin wey e don do, and God go forgive-am.