The First Book of Chronicles
28 Then David gather all the leaders of Israel go Jerusalem, the people wey e gather na: the leaders of the tribes, the leaders of the different-different groups wey de work for the king, the people wey de control one-one thousand soldiers, the people wey de control hundred-hundred soldiers, the people wey dey in charge of all the property and the animals of the king and im sons own, plus the people wey get high position for the king palace, and every strong man wey fit do the work well. 2 Then King David stand up and talk say:
“Make una hear me, my brothers and my people. E be really dey my heart to build house wey go be permanent house for the ark of agreement of Jehovah and as stool for our God to put im leg ontop, and I be don prepare things to build the house. 3 But the true God tell me say, ‘You no go build house for my name, because you don fight wars well-well and you don kill plenty people.’ 4 But, Jehovah the God of Israel choose me out of all the people for my papa house to be king to rule Israel people forever, because e choose the tribe of Judah as leader, and for the tribe of Judah, e choose my papa family,* and among my papa sons, na me be the person wey e choose, to make me king wey go rule all Israel people. 5 And among all my sons—because Jehovah give me plenty sons—e choose my son Sol′o·mon to sitdown for the throne of Jehovah to rule Israel.
6 “E tell me say, ‘Na your son Sol′o·mon be the person wey go build my house and my compounds, because I don choose-am as my son and I go be im papa. 7 I go make im kingdom stand well forever if e make up im mind to obey my commandments and the things wey I don decide, as e de do now.’ 8 So for front of all Israel people wey be Jehovah people, and as our God de hear, I de talk say: Make una sofri search for all the commandments of Jehovah una God, and obey them so that una go continue to dey for the good land and una go fit still give-am to una sons as their permanent property.
9 “And you, Sol′o·mon my son, make you know the God of your papa and serve-am with all your heart and de happy as you de serve-am,* because Jehovah de search everybody heart and e de know every reason why person de think something for mind. If you look for-am e go allow you make you see-am, but if you leave-am, e go reject you forever. 10 So now, make you dey careful because Jehovah don choose you to build house for-am as holy place. Get strong heart and start to work.”
11 Then David give im son Sol′o·mon the plan of the house, wey be, the plan of the veranda and the rooms wey surround-am, the storerooms, the rooms for up, the rooms wey dey inside-inside, and the house wey them put the cover wey de make person get peace with God again.* 12 E give-am the plan of everything wey God don use im spirit tell-am about how to build the compounds for Jehovah house, all the dining rooms wey go surround-am, the place them wey them go keep better-better things for the house of the true God, and the place them wey them go keep the better-better things wey them don make holy;* 13 e still give-am direction about the different-different groups of the priests and the Levites, about the work for the house of Jehovah, and about all the things wey them go use for the house of Jehovah; 14 e still tell-am how the gold go heavy reach, the gold for all the things wey them go use do the different-different work, how all the things wey them go use silver make go heavy reach, and about all the things wey them go use for the different-different work; 15 e still tell-am how the gold lampstands and their gold lamps go heavy reach, how the different-different lampstands and their lamps go heavy reach and how the silver lampstands go heavy reach, and how each lampstand and the lamps wey dey ontop-am go heavy reach, according to wetin them de use-am do; 16 e still tell-am how the gold for the tables wey them go keep the layer bread* go heavy reach, the gold wey them go use do each table, plus the silver wey them go use do the silver tables, 17 and the ones wey them go use make the forks, the bowls, and the jugs wey them use pure gold make, and e tell-am how each of the small bowls wey them use gold make go heavy reach, and how each of the small bowls wey them use silver make go heavy reach. 18 E still tell-am how the pure gold wey them go use make the incense altar go heavy reach, and wey them go use make wetin de represent the chariot, wey be, the cherubs wey them use gold make, wey spread their wings and cover the ark of the agreement of Jehovah. 19 David talk say: “The hand of Jehovah be dey ontop me, and e give me sense to fit write all the things wey concern the building plan.”
20 Then David tell im son Sol′o·mon say: “Make you get strong heart, dey strong and start the work. Make you no fear or de shake, because Jehovah God, my God, dey with you. E no go leave you or abandon you, instead, e go dey with you until all the work for the house of Jehovah don finish. 21 And the different-different groups of priests and the Levites dey wey go do all the work of the house of the true God. You get people wey ready to work and wey sabi handwork, wey go do every kind of work, and you still get the leaders and all the people wey go do everything wey you talk.”