The Second of Kings
1 After A′hab don die, Mo′ab people turn against Israel people.
2 Na that time A·ha·zi′ah fall and wound imself. E fall from one small place wey them open and use sticks cover for the room wey dey the roof of im house for Sa·mar′i·a. So e send im servants message and tell them say: “Make una go ask Ba′al-ze′bub the god of Ek′ron whether I go well from this wound wey I get.” 3 But Jehovah angel tell E·li′jah* wey be Tish′beh person say: “Make you stand up go meet the people wey the king of Sa·mar′i·a send and tell them say, ‘Na because say no God dey for Israel na im make you de go meet Ba′al-ze′bub wey be the god of Ek′ron to ask-am wetin go happen? 4 Because of this one, hear wetin Jehovah talk: “You no go stand up from the bed wey you lie down so, because you go surely die.”’” When E·li′jah talk-am finish, e comot leave them.
5 When the people wey e send come back come meet-am, quick-quick e ask them say: “Why una come back?” 6 Them tell-am say: “E get one man wey come meet us and e tell us say, ‘Make una go back to the king wey send una message and tell-am say, “This na wetin Jehovah talk: ‘Na because say no God dey for Israel na im make you de send people go meet Ba′al-ze′bub wey be the god of Ek′ron to ask-am wetin go happen? Because of that one, you no go stand up from the bed wey you lie down so, because you go surely die.’”’” 7 So e ask them say: “How the man wey come meet una and tell una this things be?” 8 So them tell-am say: “The man wear cloth wey them use animal hair make, and e tie leather belt for im waist.” At once e talk say: “Na E·li′jah wey be Tish′beh person.”
9 Then the king send person wey de control one group of 50 soldiers with im 50 soldiers to go meet-am. When e go up go meet-am, E·li′jah be sitdown for the up-up part of the mountain. So e tell-am say: “Man of the true God, the king talk say, ‘Make you come down.’” 10 But E·li′jah tell the person wey de control the 50 soldiers say: “Okay, if I be man of God, make fire come down from heaven and kill you and your 50 soldiers.” And fire come down from heaven and kill-am with im 50 soldiers.
11 So the king send another person wey de control group of 50 soldiers with im 50 soldiers go meet-am. E go and e tell-am say: “Man of the true God, this na wetin the king talk, ‘Make you come down quick-quick.’” 12 But E·li′jah tell them say: “If I be man of the true God, make fire come down from heaven and kill you and your 50 soldiers.” And fire from God come down from heaven and kill-am with im 50 soldiers.
13 Then the king still send another person wey de control group of 50 soldiers with im 50 soldiers. But this person wey de control this 50 soldiers come go up, bow down and kneel down for front of E·li′jah, and start to beg-am make e pity-am and e talk say: “Man of the true God, abeg, make my life and the life* of this your 50 servants get value for your eyes. 14 Fire don already come down from heaven and kill the first two people wey de control 50-50 soldiers and their groups of 50-50 soldiers, but now, abeg, make my life* get value for your eyes.”
15 So the angel of Jehovah tell E·li′jah say: “Make you follow-am go down. No fear-am.” So e stand up and e follow-am go down go meet the king. 16 Then E·li′jah tell the king say, “This na wetin Jehovah talk: ‘You send people make them go ask Ba′al-ze′bub the god of Ek′ron wetin go happen. Na because say no God dey for Israel? Why you no ask-am wetin go happen? Because of that one, you no go stand up from this bed wey you lie down so, because you go surely die.’” 17 So e die, just as Jehovah don use E·li′jah talk, and because e no get son, Je·ho′ram* come start to rule as king after-am. This one happen for the second year wey Je·ho′ram the son of Je·hosh′a·phat the king of Judah de rule.
18 And for the other story about A·ha·zi′ah, wetin e do, them no write-am for the book wey talk about the things wey happen for the time of Israel kings?