Exodus

25 Then Jehovah tell Moses say: 2 “Tell Israel people say make them bring contribution for me. Make you take my contribution from everybody wey im heart move-am. 3 This one na the contribution wey una go accept from them: gold, silver, copper, 4 blue thread, purple wool,* red material,* quality linen, goat hair, 5 ram skins wey them dye with red color, sealskins,* acacia wood, 6 oil wey them go use for the lamps, balsam wey them go use for the anointing oil and for the perfume incense, 7 and onyx stones and other stones wey them go put for the eph′od* and for the breastpiece.* 8 Them go make holy place for me, and I go live* among them. 9 Make una build-am, the tabernacle and everything wey dey inside. Follow the same example* just as I de show you.

10 “Them go use acacia wood make ark,* e go long reach two and half cubits,* and e go wide reach one and half cubit, and e go high reach one and half cubit. 11 Then you go cover-am with pure gold. You go cover the inside and outside, and you go use gold make design* round-am for the up part. 12 And you go make four rings with gold for-am and you go put them for the top of the four legs, two rings go dey for one side and two rings go dey for the other side. 13 And you go use acacia wood make poles and cover them with gold. 14 You go put the poles inside the rings wey dey the sides of the Ark so that you go fit use them carry the Ark. 15 The poles go stay inside the rings for the Ark; you no go remove them from the Ark. 16 You go put the Testimony* wey I go give you inside the Ark.

17 “You go use pure gold make cover for the Ark, e go long reach two and half cubits and e go wide reach one and half cubit. 18 You go use gold make two cherubs; you go form them with hammer for the two ends of the cover. 19 You go make the cherubs for the two ends, one cherub for each end of the cover. 20 The cherubs go spread their two wings go up, them go cover the cover with their wings, and them go face each other. The face of the cherubs go turn face the cover. 21 You go put the cover ontop the Ark, and inside the Ark you go put the Testimony wey I go give you. 22 I go show myself to you for there and talk with you from ontop the cover. From between the two cherubs wey dey ontop the ark of the Testimony, I go make you know all the things wey I go command you to tell Israel people.

23 “You go still use acacia wood make table, e go long reach two cubits and wide reach one cubit and high reach one and half cubit. 24 You go cover-am with pure gold, and you go use gold make design* round-am for the up part. 25 You go make rim around-am wey wide reach one handbreadth,* and you go make design* around the rim with gold. 26 You go make four rings for-am with gold and put the rings for the four corners where them join the four legs. 27 The rings go dey near the rim and hold the poles wey them de use carry the table. 28 You go use acacia wood make the poles and cover them with gold and use them carry the table.

29 “You go still make im plates, cups, jugs, and bowls wey them go use pour drink offerings. You go make them with pure gold. 30 And you go put the showbread ontop the table for my front everytime.

31 “You go use pure gold make lampstand. Na hammer you go use hit the gold to form the lampstand. The down of the lampstand, the stem, the branches, the cups, the knobs, and the flowers, go be one piece of gold. 32 And six branches go come out from the sides of the lampstand. Three branches from one side and three branches from the other side. 33 Make one set of branches for one side get three cups wey get the shape of almond flowers. Make the knobs and the flowers de follow each other one after the other; and three cups wey get the shape of almond flowers go dey ontop the other set of branches, and their knobs and flowers go follow each other one after the other. Na like this the six branches go come out from the stem of the lampstand. 34 The stem of the lampstand go get four cups wey get the shape of almond flowers and the knobs, and the flowers go follow each other one after the other. 35 One knob go dey under the first two branches wey come out from the stem and one knob go dey under the next two branches, and another knob go dey under the next two branches. Na so e go be for the six branches wey come out from the stem. 36 The knobs and the branches and the whole lampstand go be one piece of pure gold wey them use hammer form. 37 You go make seven lamps for the lampstand, and when them light the lamps, them go shine for the area wey dey front of the lampstand. 38 Use pure gold make the things wey them de use hold lamp thread,* and the things wey them de use hold the fire. 39 You go use one talent* of pure gold to make the lampstand, together with this things wey them de use for the lampstand. 40 When you de do-am, make sure say you follow the same example* wey I show you for the mountain.