Leviticus
10 After, Aaron sons, Na′dab and A·bi′hu, take the thing wey each of them de use hold fire and put fire inside and put incense ontop-am. Then them start to do offering with fire wey no dey according to law for front of Jehovah, something wey e no command them to do. 2 So Jehovah send fire and destroy them, and them die for front of Jehovah. 3 Then Moses tell Aaron say: “This one na wetin Jehovah don talk, ‘I go dey holy among people wey near me, and I go get honor for front of all the people.’” And Aaron no talk anything.
4 So Moses call Mish′a·el and El·za′phan, the sons of Uz′zi·el wey be Aaron uncle, and tell them say: “Make una come here, carry una brothers from front of the holy place to place wey dey outside the camp.” 5 So them come near, and carry the men as their long cloths still dey their body go place wey dey outside the camp, just as Moses don tell them.
6 Then Moses tell Aaron and im other sons El·e·a′zar and Ith′a·mar say: “Make una no allow the hair for una head to grow anyhow or tear una cloths so that una no go die and so that God no go vex for everybody. Una brothers wey be all Israel people go cry for the people wey Jehovah don kill with fire. 7 Make una no ever comot from the domot of the tent of meeting, or una go die, because the anointing oil of Jehovah dey ontop una.” So them do as Moses don talk.
8 Then Jehovah tell Aaron say: 9 “Make una no drink wine or any kind of alcohol, you and your sons wey dey with you when una come inside the tent of meeting, so that una no go die. This one na law wey go dey for long time for all una generations. 10 This one na to show the difference between the holy thing and the thing wey no dey holy, and between the thing wey no dey clean and the thing wey dey clean, 11 and to teach Israel people all the things wey Jehovah don use Moses tell them say make them de follow.”
12 Then Moses tell Aaron and im sons wey remain, wey be El·e·a′zar and Ith′a·mar say: “Make una take wetin remain for the grain offering from Jehovah offerings wey them make with fire, and chop-am as bread wey no get yeast near the altar, because na something wey really dey holy. 13 Make una no ever chop-am for holy place, because na your share and the share of your sons from Jehovah offerings wey them make with fire, because this one na wetin God don command me. 14 Una go still chop the breast of the offering wey them de wave, and the leg of the holy part for clean place, you and your sons and your daughters wey dey with you, because them don give this things as your share and the share of your sons from the peace sacrifice them of Israel people. 15 Them go bring the leg of the holy part and the breast of the offering wey them de wave together with the fat offerings wey them make with fire, so that them go wave the offering wey them de wave go back and front for front of Jehovah; and e go always be your share and the share of your sons wey dey with you, just as Jehovah don command.”
16 And Moses really take time find the goat of the sin offering, and e see say them don burn-am finish. So e vex for El·e·a′zar and Ith′a·mar, the sons of Aaron wey remain, and e talk say: 17 “Why una no chop the sin offering for the holy place, since na something wey really dey holy and e don give-am to una so that una go fit answer for the sin of the people and do sacrifice for them for their sin for front of Jehovah? 18 See! Una no bring the blood come inside the holy place. Una for don chop-am for inside the holy place, just as God don command me.” 19 Aaron answer Moses say: “See! Today, them give their sin offering and their offering wey them de burn for front of Jehovah, and even with that one, this things happen to me. If to say I don chop the sin offering today, that one for make Jehovah happy?” 20 When Moses hear that one, e gree with-am.