Leviticus

6 Jehovah continue to tell Moses say: 2 “If person* sin and behave anyhow against Jehovah as e deceive im neighbor about something wey them put for im hand or something wey them give-am to care for, or e thief from im neighbor or e cheat-am, 3 or e see something wey lost and e lie about-am, and if e swear lie-lie swear about any of that kind sin wey e fit don do, this one na wetin e go do: 4 If e don sin and the sin dey im head, e must return wetin e thief, wetin e take from person by force, wetin e take from person as e cheat-am, wetin them put for im hand or the thing wey lost wey e see, 5 or anything wey e don swear lie-lie swear about, and e must pay full payment for-am, and e go add one-fifth of im value to-am. E go give-am to the owner for the day wey them prove say the sin dey im head. 6 E go bring one ram wey dey well for body come give the priest from among the animals to Jehovah as im offering for the bad thing wey e do, according to the correct value. Na offering for the bad thing wey e do. 7 The priest go do sacrifice for-am for front of Jehovah to make-am dey clean, and e go get forgiveness for anything wey e fit don do because of the sin wey dey im head.”

8 Jehovah continue to talk to Moses say: 9 “Command Aaron and im sons and tell them say, ‘This one na the law about the offering wey them de burn: The offering wey them de burn go continue to dey ontop the place wey them de light fire for ontop the altar the whole night till morning, and them go make the fire continue to burn ontop the altar. 10 The priest go wear im priest cloth wey them make with linen, and e go wear the knickers wey them make with linen* to cover im body. Then e go remove the ashes* of the offering wey them de burn wey the fire don burn finish ontop the altar, and put them near the altar. 11 Then e go remove im cloths and wear other cloths and take the ashes go clean place outside the camp. 12 Them go make the fire to continue to burn ontop the altar. Make e no ever off. The priest must burn wood ontop of-am every morning and ontop of-am e go arrange the offering wey them de burn, and e go burn the fat of the peace sacrifice them to make smoke comot from ontop of-am. 13 Them go make the fire continue to burn everytime ontop the altar. Make e no ever off.

14 “‘Now this one na the law about the grain offering: Make una wey be sons of Aaron bring-am come front of Jehovah for front of the altar. 15 One of them go take one full hand of the better flour* for the grain offering and some of im oil and all the frankincense wey dey ontop the grain offering, and e go burn-am to make smoke comot from ontop the altar as something wey get better smell* to Jehovah and this one na something wey stand for the whole offering.* 16 Aaron and im sons go chop wetin remain from the offering. Them go chop-am as bread wey no get yeast for holy place. Them go chop-am for the compound of the tent of meeting. 17 Make them no bake-am with anything wey get yeast. I don give-am to them as their share from my offerings wey them make with fire. Na something wey really dey holy, like the sin offering and like the offering for the bad thing wey person do. 18 Every man among the sons of Aaron go chop-am. For all una generations, e go always be their share from Jehovah offerings wey them make with fire. Everything wey touch them* go dey holy.’”

19 Jehovah talk to Moses again say: 20 “This one na the offering wey Aaron and im sons go give Jehovah for the day wey them go anoint-am: the tenth part of one eʹphah* of better flour* as grain offering wey them go always de do, half of-am go be for morning and half of-am go be for evening. 21 Them go use oil make-am for inside flat pan.* You go mix-am well with oil and bring-am. You go break the grain offering wey them don bake to pieces and bring-am as something wey get better smell* to Jehovah. 22 The priest wey them anoint from among im sons wey go take over from-am go do the offering. This one na law wey go last: Una go make-am as complete offering wey them burn to make smoke come out to Jehovah. 23 All the grain offering of priest go be complete offering. Make una no ever chop-am.”

24 Jehovah talk to Moses again say: 25 “Tell Aaron and im sons say, ‘This one na the law of the sin offering: For the place where them de kill the animal of the offering wey them de burn, them go still kill the animal of the sin offering for front of Jehovah. This one na something wey holy pass. 26 The priest wey give the offering for sin go chop-am. E go chop-am for holy place for the compound of the tent of meeting.

27 “‘Everything wey touch the flesh of the offering go dey holy, and when anybody splash some of the blood ontop im cloth, make you wash wetin the blood wey splash don touch for holy place. 28 Make una scatter the clay container wey una use boil-am, but if na copper container una use boil-am, then una must scrape the container and wash-am with water.

29 “‘Every man among the priest go chop-am. Na something wey really dey holy. 30 But, make una no chop any sin offering if them bring some of im blood come inside the tent of meeting to make person dey clean from im sin for inside the holy place. Make una burn-am with fire.