Deuteronomy
6 “Now this na the commandments, the laws, and the decisions wey Jehovah una God don give to teach una, so that una go fit obey them when una cross enter the land wey una go take as una own, 2 so that you fit fear Jehovah your God and obey all im laws and im commandments wey I de command you—you and your son and your grandson—all the days of your life, and this one go make you live long. 3 And you must listen, O Israel, and sofri obey them, so that e go go well for you and una go really plenty for inside the land wey milk and honey de flow for inside, just as Jehovah, the God of your papa-papa them, don promise you.
4 “Listen, O Israel: Jehovah our God na one Jehovah. 5 You must love Jehovah your God with all your heart and all your soul* and all your power.* 6 This words wey I de command you today must dey for your heart, 7 and you must put them for inside the heart of* your sons and talk about them when you sitdown for your house and when you de waka for road and when you lie down and when you get up. 8 Tie them for your hand as something wey go de remind you, and them must be like headband wey you go tie for your forehead.* 9 Write them ontop the doorframes of your house and ontop your gates.
10 “When Jehovah your God bring you come inside the land wey e swear to your papa-papa them wey be Abraham, Isaac, and Jacob to give you—cities wey big and fine, wey you no build, 11 houses wey different-different kind of better things full inside wey you no work for, wells wey them dig for rock wey no be you dig-am, and vine farms and olive trees wey you no plant—and you don chop belleful, 12 dey careful make you no forget Jehovah, the Person wey bring you come out from the land of Egypt, from the place* wey you be dey as slave. 13 Na Jehovah your God you go fear, and na im you go serve, and na im name you go use swear. 14 Make una no follow other gods, any gods wey people around una de serve, 15 because Jehovah your God wey dey with you na God wey want make people worship only-am. If you no do like that, Jehovah your God go really vex for you and e go destroy you finish from the earth.
16 “Make una no ever test Jehovah una God the way una test-am for Mas′sah. 17 Make una sofri obey the commandments of Jehovah una God and the things wey e don remind una and im laws wey e don command you to obey. 18 You must do wetin correct and good for the eyes of Jehovah so that e go go well for you and so that you fit enter and take the good land as your own, wey Jehovah don swear to your papa-papa them, 19 when e don drive all your enemies comot from your front just as Jehovah don promise.
20 “For future, when your son ask you say, ‘Wetin be the meaning of the laws,* the directions, and the decisions wey Jehovah our God don command una?’ 21 then you go tell your son say, ‘We be slaves to Phar′aoh for Egypt before, but Jehovah bring us come out from Egypt with strong hand. 22 So Jehovah continue to send signs and miracles wey we see with our eyes, wey dey great and wey cause suffer for Egypt, for Phar′aoh, and for everybody for im house. 23 And e bring us come out from there so that e fit bring us come here to give us the land wey e don swear to give our papa-papa them. 24 Then Jehovah command us make we de follow all this laws and de fear Jehovah our God, so that e go always better for us and this one go make us continue to dey alive, as we dey today. 25 And e go mean say we de do the correct thing for God eye if we make sure say we de follow all this commandments to show say we de obey* Jehovah our God, just as e don command us.’