The Second Book of Chronicles
22 Then the people wey de stay for Jerusalem make A·ha·zi′ah wey be im last son to rule as king after-am, because the people wey de come attack them, wey follow Arab people come the camp, don kill all the ones wey senior-am. So A·ha·zi′ah wey be the son of Je·ho′ram start to rule as king for Judah. 2 A·ha·zi′ah dey 22 years when e start to rule as king and e rule for one year for Jerusalem. Im mama name na Ath·a·li′ah wey be the granddaughter* of Om′ri.
3 E still do things like people for the family* of A′hab, because im mama come de advice-am to de do wicked things. 4 And e continue to do wetin bad for Jehovah eyes like the family* of A′hab, because na them come de advice-am after im papa don die and na this one cause im death. 5 E follow their advice and join Je·ho′ram the son of King A′hab of Israel to go fight war with Haz′a·el wey be king of Syria for Ra′moth-gil′e·ad, and na there the people wey de shoot arrow wound Je·ho′ram. 6 E go back go Jez′re·el so that e go well from the wounds wey them give-am for Ra′mah when e go fight Haz′a·el wey be king of Syria.
A·ha·zi′ah* the son of Je·ho′ram wey be king of Judah go down go Jez′re·el to go see Je·ho′ram wey be son of A′hab, because say them wound-am.* 7 But God do-am say as A·ha·zi′ah go visit Je·ho′ram, e come die for there. When e come, e follow Je·ho′ram comot go meet Je′hu wey be the grandson* of Nim′shi, wey Jehovah don anoint say make e kill everybody for the family* of A′hab. 8 When Je′hu start to punish the family* of A′hab, e see the leaders of Judah and the sons of A·ha·zi′ah brothers, wey get high position for A·ha·zi′ah kingdom, and e kill them. 9 Then e find A·ha·zi′ah; and them catch-am for the place wey e de hide for Sa·mar′i·a, and them bring-am come give Je′hu. Then them kill-am and bury-am because them talk say: “Na the grandson of Je·hosh′a·phat, wey use all im heart serve Jehovah.” E no get anybody for A·ha·zi′ah family* wey get the power to rule the kingdom.
10 When Ath·a·li′ah, wey be A·ha·zi′ah mama see say im son don die, e stand up and kill all the people wey fit inherit the throne* for the family* of Judah. 11 But, Je·ho·shab′e·ath wey be the daughter of the king hide carry Je·ho′ash wey be the son of A·ha·zi′ah from the sons of the king wey them want kill, and e put-am with im nurse for one bedroom wey dey inside-inside. Je·ho·shab′e·ath wey be the daughter of King Je·ho′ram manage hide-am from Ath·a·li′ah, so this one make Ath·a·li′ah no kill-am. (Je·ho·shab′e·ath na the wife of Je·hoi′a·da wey be the priest, and na A·ha·zi′ah sister). 12 Je·ho′ash continue to dey with them for six years, and them hide-am for the house of the true God as Ath·a·li′ah de rule the people for the land.