Ezra
1 For the first year of Cyrus wey be king of Persia, to make wetin Jehovah be don use Jeremiah talk happen, Jehovah move the spirit of Cyrus wey be king of Persia to make one announcement for all im kingdom, and e still write-am. E talk say:
2 “This na wetin Cyrus wey be king of Persia talk, ‘Jehovah the God of the heavens don give me all the kingdoms of the earth, and e don give me work say make I build house for-am for Jerusalem, wey dey Judah. 3 Anybody among all of una wey be im people, make im God dey with-am, and make e go up go Jerusalem wey dey Judah and build the house of Jehovah the God of Israel again. Na im be the true God, the person wey im house dey Jerusalem* before. 4 Anybody wey de stay for the land as stranger, no matter where e fit dey, make im neighbors* help-am, make them give-am silver, gold, other property, animals, and offering wey their heart move them to give for the house of the true God wey dey for Jerusalem before.’”
5 Then the leaders of the family groups of Judah and Benjamin for their papa side, and the priests and the Levites—everybody wey the true God move im spirit—ready to go up and build the house of Jehovah again, wey dey Jerusalem. 6 All the people wey dey around them support them as them give them* things wey them use silver and gold make, property, animals, and better-better things, plus the offerings wey their heart move them to give.
7 King Cyrus still bring the things wey them be de use for the house of Jehovah come out, wey Neb·u·chad·nez′zar be don carry from Jerusalem and wey e be don put for the house of im god. 8 Cyrus wey be king of Persia bring them come out and na Mith′re·dath wey be the person wey de handle money matter de care for them, and na im count them give Shesh·baz′zar* wey be leader for Judah.
9 Now, na the things wey them count be this: 30 gold containers wey their shape be like basket, 1,000 silver containers wey their shape be like basket, 29 extra containers, 10 30 small gold bowls, 410 small silver bowls, plus other things wey reach 1,000. 11 All the things wey them use gold make and wey them use silver make na 5,400. Shesh·baz′zar carry all this things when them de carry the people wey be slaves comot from Babylon go Jerusalem.