The Second Book of Chronicles
35 Jo·si′ah do Passover to Jehovah for Jerusalem and them kill the animal wey them use do Passover sacrifice for the 14th day of the first month. 2 E give the priests work wey them suppose do and e encourage them to do their work for the house of Jehovah. 3 Then e tell the Levites, wey be say na them de teach for all Israel, and wey dey holy to Jehovah say: “Make una put the holy Ark for the house wey Sol′o·mon the son of David wey be king of Israel don build. Una no go carry-am again for una shoulders. Now make una work for Jehovah una God and im people Israel. 4 And make una ready unaself according to una family for una papa side, and according to una different-different groups, just as David wey be king of Israel and im son Sol′o·mon write-am. 5 Make una stand for the holy place according to the family groups of the papa side of una brothers, wey be, the other Israel people; and each of the groups go get the family group of the papa side of the Levites wey go de help them. 6 Make una kill the animal of the Passover sacrifice and make una make unaself holy and make una arrange things for una brothers to do wetin Jehovah use Moses talk.”
7 Jo·si′ah give the people animals wey them go use do the Passover sacrifice for the people wey dey there. E give them 30,000 small male sheep, and young male goats, and e still give them 3,000 cows. All this ones na from the king property. 8 The people wey e don choose as leaders still do contribution as offering wey come from the heart for the people, the priests, and the Levites. Hil·ki′ah, Zech·a·ri′ah, and Je·hi′el, wey be leaders of the house of the true God, give the priests 2,600 animals wey them go use do Passover sacrifice them and 300 cows. 9 Con·a·ni′ah and im brothers wey be She·mai′ah and Ne·than′el, with Hash·a·bi′ah, Je·i′el, and Jo′za·bad, wey be the leaders of the Levites, give the Levites 5,000 animals wey them go use do the Passover sacrifice them, and 500 cows.
10 Them finish everything wey them de arrange, and the priests stand for where them de normally stand, and the Levites stand group by group as the king don command them. 11 So them kill the animals wey them use do the Passover sacrifice them, and the priests sprinkle the blood wey them collect from them, and the Levites de comot the skin from the animals. 12 After this one, them prepare the offerings wey them de burn, so that them go share them give the rest of the people, wey them arrange according to the family group from their papa side, so that them go fit carry-am give Jehovah the way them write-am for the book of Moses; and na so them still do with the cows. 13 Them cook* the Passover offering for fire as them de normally do; and them cook the holy offerings for inside pots, big iron pots, and pans, after that one them bring-am quick-quick come give all the other people. 14 Then them ready things for theirself and for the priests, because the priests, the children-children of Aaron de do sacrifice them wey them de burn and de burn the animal fats too until night reach, so the Levites ready things for theirself and for the priests, the children-children of Aaron.
15 And the people wey de sing, the sons of A′saph, be dey their positions just as David, A′saph, He′man, and Je·du′thun wey de see vision for the king don command them; and the gatemen be dey for their different-different gates. Them no need to leave their place wey them de work because their brothers the Levites don ready things for them. 16 So them ready everything for Jehovah work that day so that them go fit do the Passover and do the offerings wey them de burn for Jehovah altar, just as King Jo·si′ah don command them.
17 So Israel people wey be dey there do the Passover that time and the Festival of Bread Wey No Get Yeast for seven days. 18 Them never do any Passover like this for Israel since the time of Samuel the prophet, and no other kings for Israel do Passover wey be like this one wey Jo·si′ah, the priests, the Levites, all Judah and Israel people wey dey there, and the people wey de live for Jerusalem do. 19 Them do this Passover for the 18th year wey Jo·si′ah de rule.
20 After all this one, when Jo·si′ah don arrange the temple,* Ne′cho wey be king of Egypt come fight for Car′che·mish wey dey near Eu·phra′tes. Then Jo·si′ah comot go fight-am. 21 So Ne′cho send messengers to-am and ask-am say: “How this matter take concern you, O king of Judah? No be you I de come fight today, but I de come fight another house, and God tell me say make I do-am quick-quick. If you like yourself, make you no fight God, wey dey with me, if not, e go kill you.” 22 But Jo·si′ah no gree leave-am, instead, e do wetin go make people no know say na im, so that e go fit fight-am, and e no listen to the things wey Ne′cho talk, wey be say them come from the mouth of God. So e go fight for the Level Land Wey Dey Me·gid′do.
23 And the people wey de shoot arrows shoot King Jo·si′ah, and the king tell im servants say: “Carry me comot from here, because them don wound me no be small.” 24 So im servants comot-am from the chariot and make-am ride the second war chariot and them bring-am come Jerusalem. Na so e die and them bury-am for the grave of im papa-papa them, and all Judah and Jerusalem mourn Jo·si′ah. 25 And Jeremiah sing song to cry for Jo·si′ah, and all the men and women wey de sing continue to sing about Jo·si′ah for their songs* till today; and them decide-am say make them sing this songs for Israel, and them write them among the songs wey them de sing when person die.
26 As for the other story about Jo·si′ah and how e show love wey no de fail, as e follow wetin them write for the Law of Jehovah, 27 and wetin e do, from the start go reach the end, them write-am for the Book of the Kings of Israel and Judah.